Read Southern Kisi Tɛ̄sālo̍nīāŋ Tāso̍o̍ 1 Bible Online

Tɛ̄sālo̍nīāŋ Tāso̍o̍ 1 - Southern Kisi bible

Tɛ̄sālo̍nīāŋ Tāso̍o̍ 1

¹Yā Pɔ̍ɔ̄, ā Sa̍i̍lɔ̄ɔ̄, ā Ti̍mo̍tī, nāā ŋ̍ cho̍ yāu̍wo̍ ho̍ō pōōnyīāā ni̍. Ŋ̄ chō ndu̍ pōōnyīāā nāā nyā ku̍ndā wānāā lāāla᷄ŋndā chūā Tɛ̄sālōnāi̍kā chi̍e̍e̍, nyā yɔ̍nūŋ ni̍ māā Mɛ̄lɛ̄ka̍ Fi̍nyā nāā ā Māsānɔ̄ɔ̍ Chi̍i̍sū Ki̍li̍tī wānāā ndūāā. I̍ cho̍ pīɛ̄īle̍ŋ māā Mɛ̄lɛ̄ka̍ yīyāŋ nyā chōo̍ ndu̍yɛ̍, mbō ke̍ nyā kɔ̄l nyūlōo̍ fɔ̍.

²Pɛ̄ŋgu̍ o̍ pɛ̄ŋgu̍ tē ŋ̄ wā Mɛ̄lɛ̄ka̍ pīɛ̄īyo̍ pɛ̍, mɛ̄ɛ̍ mī ŋ̄ pīɛ̍i̍ le̍ nyā. Ndu̍yɛ̍, le̍ pɛ̄ŋgu̍ o̍ pɛ̄ŋgu̍, ŋ̄ chō Mɛ̄lɛ̄ka̍ ba̍li̍kāā mēllo̍ le̍ nyā kpo̍u̍.

³Tē ŋ̄ wā Mɛ̄lɛ̄ka̍ Fi̍nyā nāā pīɛ̄īyo̍ pɛ̍, mɛ̄ɛ̍ mī ŋ̄ pɛ̄l nyā dīōla̍ŋ, ā mɛ̄ɛ̍ nyā chɔ᷄m tīīnda᷄ŋ nyā nɔ̄ o̍ Mɛ̄lɛ̄ka̍ ni᷄ŋ ndo̍, sānāā o̍ kāālā nyālāŋ ni᷄ŋ yɛ̍. Ndu̍yɛ̍, mɛ̄ɛ̍ mī ŋ̄ chɔ᷄m ā wāli̍ nyā chō tōsāā le̍ kāālā nyā nɔ̄ o̍ lākɔ̄l lo̍ o̍kɔ̄ɔ̄, vɛ̄lɛ̄ ā mɛ̄ɛ̍ nyā nɔ̄ hɔ̄lte̍ŋ o̍ Māsānɔ̄ɔ̍ Chi̍i̍sū Ki̍li̍tī lo̍ nyɛ̍ kɛ̄ndɛ̄ chi̍ŋ yɛ̍.

⁴Chāāŋāā nāā, ŋ̄ sīnā māā Mɛ̄lɛ̄ka̍ kāālā nyā, ndu̍yɛ̍, mbo̍ hɛ̄lī nyā le̍ wāā wānāā ndɔ̄.

⁵Kāni̍ fu̍u̍le̍, dīmūl nāā ŋ̄ dīmu̍l nyā Yōōŋgū Kɛ̄ndɛ̍ Mɛ̄lɛ̄ka̍a̍ wo̍, ō ve̍ ā sōndō ko̍ni̍ le̍ nāā ŋ̄ dīmu̍l nyā ndu̍ le̍. Mi̍ ŋ̄ chɔ̄m nyā sūɛ̍i̍ he̍ī wa̍la̍ŋ ā kɔ̄ndɔ̄fi̍ltā Nyi̍nā Kāsīo̍o̍ tōsā lāŋ. O̍ ko̍ŋ kɔ̍ɔ̍lī, mi̍ ŋ̄ chɔ̄m mɛ̄ɛ̍ kpɛ̍ nāā ŋ̄ nɔ̄ tīīnda᷄ŋndo̍ māā yōōŋgū kɛ̄ndɔ̄ɔ̍ ho̍ō chō tōnyā yɛ̍. Ndu̍yɛ̍, nyā pi̍lā bɛ̍ɛ̍ lā sīnā bōōndi̍i̍ nāā ŋ̄ wā nyā tɛ̄ɛ̄ŋ nde̍, mɛ̄ɛ̍ kāālā nāālāŋ lā wā yɛ̍. Ndu̍yɛ̍, le̍ sābū nyāā nāā ŋ̄ wā nyā tɛ̄ɛ̄ŋ le̍nde̍ ni̍.

⁶O̍ ko̍ŋ kɔ̍ɔ̍lī, lā lo̍ o̍ ko̍ŋ, mi̍ lā chūā kāā nāā ā kāā Māsānɔ̄ɔ̍ Mɛ̄lɛ̄ka̍a̍. Ndu̍yɛ̍, yōōŋgū kɛ̄ndɛ̄ nāā ŋ̄ dīmu̍l nyā ā Chi̍i̍sū o̍kɔ̄ɔ̄ wo̍, mi̍ lā bīī ndu̍ nyɛ̄ kɛ̄ndɛ̄ kɛ̍ndɛ̍ī. O̍ he̍ī ni᷄ŋ, mi̍ lā sɔ̄lā nyɛ̄ pālāā fāŋgā fa̍ŋgā. Kɛ̍ ndu̍yɛ̍, o̍ sɔ̄ɔ̍ŋ pālāŋ mu᷅ŋ ni᷄ŋ kpo̍u̍, mi̍ lā chɛ̄l yōōŋgu̍ Mɛ̄lɛ̄ka̍a̍ ho̍ō ā kɔ̄l kɛ̄ndɛ̄ Nyi̍nā Kāsīo̍o̍ ō ke̍ nyā wo̍.

⁷O̍ he̍ī ni᷄ŋ, lā sīmnu᷄ŋ māā tāāmāsi̍ le̍ wānāā lāāla᷄ŋndā lɛ̄ŋndē Māsīdo̍o̍nīāāle̍ŋ, ā ha̍ā lɛ̄ŋndē Āke̍yāle̍ŋ.

⁸Kāni̍ fo̍ndōle̍, wānāā fāŋgā fa̍ŋgā lɛ᷅ŋndē Māsīdo̍o̍nīāāle̍ŋ, ā Āke̍yā, ā lo̍ o̍ ko̍ŋ mā tūɛ̄ī yōōŋgōo̍ ho̍ō ā Māsānɔ̄ɔ̍ Mɛ̄lɛ̄ka̍ o̍kɔ̄ɔ̄, o̍ sābū nyāā ni᷄ŋ. Bā o̍ bā fe̍e̍ ā chō nyā tɔ̍ɔ̍ tūēīyɔ̄ɔ̍ ā tīīnda᷄ŋ nyā nɔ̄ o̍ Mɛ̄lɛ̄ka̍ ni᷄ŋ ndo̍. Ŋ̄ nɔ̍ bɛ̍ɛ̍ mī ŋ̄ chɔ᷄m wānā nyɛ᷅ o̍ nyɛ̄ chēle̍ŋ ā he̍ī o̍kɔ̄ɔ̄ le̍.

⁹Kāni̍ fo̍ndōle̍, wāŋndā ta̍u̍ a̍ chō dīmīo̍o̍ ā bīyɔ̄ɔ̄ kɛ̄ndɛ̄ nyā bīī nāā bōōndi̍i̍ nāā ŋ̄ kūɛ̄ nāā nyā chūā ve̍. O̍ ko̍ŋ kɔ̍ɔ̍lī, wāŋndā chō dīmīo̍o̍ ā mɛ̄ɛ̍ nyā ma᷄l nyɛ̄m chēle̍ŋndo̍ŋ sōōlūūwo̍ mi̍ lā wā ni᷅ŋ Mɛ̄lɛ̄ka̍ sōōlūūwo̍ yɛ̍. Lā ma᷄l ni᷅ŋ nyɛ̄m mu᷅ŋ sōōlūūwo̍, mi̍ lā wā ni᷅ŋ Mɛ̄lɛ̄ka̍ o̍ cho̍ Mɛ̄lɛ̄ka̍ kpe̍e̍kpe̍i̍yo̍, ndu̍yɛ̍, mbo̍ wā yōōmū wo̍ sōōlūūwo̍.

¹⁰Ndu̍yɛ̍, ā chō dīmīo̍o̍ ā mɛ̄ɛ̍ nyā chō ni᷅ŋ chūmndo̍ le̍ chɔ̄nɔ᷄ŋ Po̍ ndɔ̄ɔ̍ chāŋ ni̍ŋ ɛ̄chɛ̍nɛ̄ mbō hīŋ ndo̍ yɛ̍, ndu̍ yɔ̍nūŋ yɛ̍ ni̍ māā Po̍ ndɔ̄ɔ̍ Chi̍i̍sū, ō ndu̍ pi̍la̍ mi̍ŋgi̍ yōōmū wo̍. Ndu̍ cho̍ hūnɔ̄ɔ̄ nāā pīŋī bōōndi̍i̍ Mɛ̄lɛ̄ka̍ dūāūnūŋ ni̍ŋ tu̍mbe̍ ā ŋ̄wāŋndā chīe̍e̍, mbō tūsi̍ ndā dɛ̍nɛ̍ pālāā chōo̍ ve̍ ni̍.