Read Southern Kisi Tɛ̄sālo̍nīāŋ Tāso̍o̍ 2 Bible Online

Tɛ̄sālo̍nīāŋ Tāso̍o̍ 2 - Southern Kisi bible

Tɛ̄sālo̍nīāŋ Tāso̍o̍ 2

¹Chāāŋāā nāā, nyā pi̍lā lā sīnā māā kɔ̄lā nāā ŋ̄ kūɛ̄ nāā nyā chūā lāŋ, ō ve̍ kɔ̍lā fo̍ndō fu̍u̍ le̍.

²Ndu̍yɛ̍, lā sīnā mɛ̄ɛ̍ kpɛ̍ nāā ŋ̄ sɔ̄lā ni᷅ŋ pāāndū nyɛ̄ pālāā Fi̍li̍pāī chi̍e̍e̍ yɛ̍, ā si̍ɔ̍mbu̍lā ndā tūsi̍ nāā lāŋ. Kɛ̍, mɛ̄ɛ̍ nāā ŋ̄ hīŋ nāā nyā chūā Tɛ̄sālōnāi̍kā, mi̍ Mɛ̄lɛ̄ka̍ kē nāā kɔ̄l sīmūlāā, le̍ mī ŋ̄ dīmu̍l nyā Yōōŋgū Kɛ̄ndɛ̍ Mɛ̄lɛ̄ka̍a̍, mi̍ chē bɛ̍ɛ̍ mi̍ wāŋndā ndā āā si̍mūl nāā ta̍u̍ ta̍u̍ ni̍.

³Yōōŋgū Kɛ̄ndɛ̍ Mɛ̄lɛ̄ka̍ nāā ŋ̄ chō ho̍ō nyā dīmūllo̍ wo̍, tōnyāā kpe̍e̍kpe̍i̍ o̍ cho̍ ni̍. Ō cho̍ mī ŋ̄ wā nyā ndu̍ dīmūl mī ŋ̄ ho᷄l lāchōōwā lēchōo̍ le̍. Ŋ̄ cho̍ ndu̍ dīmī ā yīya᷄ŋ wɔ̍ɔ̍ŋ o̍ kɔ̄l te̍. Ndu̍yɛ̍, ō cho̍ hu̍ī le̍ nāā ŋ̄ chō nyā le̍.

⁴Mɛ̄lɛ̄ka̍ pi̍lā chɛ̍l ni̍ māā ŋ̄ bɛ̄ndā le̍ mbō ke̍ nāā wa̍llo̍ ho̍ō, ndu̍ yɔ̍nūŋ ni̍ māā, wāŋndā yōōŋgū kɛ̄ndɔ̄ɔ̍ ho̍ō dīmūllo̍. Ndu̍yɛ̍, yōōŋgū kɛ̄ndɛ̄ nāā ŋ̄ chō ho̍ō wāŋndā dīmūllo̍ wo̍ ŋ̄ cho̍ ndu̍ dīmī le̍ wānā chi̍e̍e̍ kɔ᷅l nɛ̄ŋī su̍e̍e̍ le̍. Le̍ Mɛ̄lɛ̄ka̍ kɔ̄llo̍ nɛ̄ŋīo̍o̍ nāā ŋ̄ chō kīndīo̍o̍ ni̍. Ndu̍ Mɛ̍lɛ̄kā ndu̍ mɛ̍ɛ̍ndāŋ o̍ kɔ̄ltā nāālāŋ ni᷄ŋ le̍ nyɛ̄ nāā ŋ̄ yīyāŋ ndo̍ ni̍.

⁵Nyā pi̍lā lā sīnā wa̍la̍ŋ māā hūnɔ̄ɔ̄ nāā ŋ̄ hīŋ nāā nyā chūā wo̍ ŋ̄ hi᷄ŋ ā dīōmndā sōndō yēēlɛ̍i̍ le̍. Ndu̍yɛ̍, nyɛ̄ o̍ nyɛ̄ nāā ŋ̄ sōō nāā nyā chūā, ŋ̄ dīmi̍ ndu̍ le̍ mī ŋ̄ sɔ̄lā nyɛ̄ nyā o̍ bā le̍.

⁶Ndu̍yɛ̍, wāli̍ nāā ŋ̄ chō ho̍ō wo̍ ŋ̄ cho̍ ndu̍ tōsā māā le̍ hāli̍ kpe̍ŋ mī ŋ̄ sɔ̄lā chāndɔ̄ɔ̍ ā wānā o̍ wānā chi̍e̍e̍ le̍. Ŋ̄ cho̍ ndu̍ tōsā le̍ mī lā chāndu̍ nāā kɛ̄lɛ̄ŋgāā mī wānā che᷅le̍ŋ chāndu̍ nāā le̍.

⁷Mɛ̄ɛ̍ nāā ŋ̄ chō wānāā Ki̍li̍tī ve᷅m hɔ̄ltē ndɔ̄ wā yɛ̍, ŋ̄ nɔ̄ di̍o̍o̍ le̍ mī lā ke̍ nāā nyɛ̄m nāā ŋ̄ hāu̍ bā le̍ mu̍ŋ ndo̍ŋ. Kɛ̍ ndu̍yɛ̍ o̍ ko̍ŋ ni̍ŋ kpo̍u̍, ŋ̄ chɛ᷄l mī ŋ̄ sīīlu̍u̍ nyā wōlɔ̄ɔ̄ o̍ wōlɔ̄ɔ̄ lūsu̍lɛ̍i̍ le̍. Mi̍ ŋ̄ bīī nyā ō kɛ̄ndɛ̄ kɛ̍ndɛ̄ mɛ̄ɛ̍ kālā chūāā bīī chu̍ā ndɔ̄ɔ̍ yɛ̍.

⁸Ndu̍yɛ̍, le̍ kāālā nāā ŋ̄ kāālā nyā wo̍, ō ve̍ ko̍ Yo̍o̍ŋgū Kɛ̄ndɛ̍ Mɛ̄lɛ̄ka̍a̍ le̍ nāā ŋ̄ ke̍ nyā le̍. Yōōmūlā nāālāŋ bɛ̍ɛ̍ ŋ̄ wā ā bɛ̄ɛ̄ndīāŋ le̍ yɔ̄ŋgōo̍ le̍ nyā. Kāni̍ fo̍ndōle̍, ŋ̄ kāālā nyā ta̍u̍ ta̍u̍.

⁹Chāāŋāā nāā, nyā pi̍lā lā lōōnūŋ ā bōōndi̍i̍ nāā ŋ̄ wā nyā Yōōŋgū Kɛ̄ndɛ̍ Mɛ̄lɛ̄ka̍a̍ dīmūllo̍ ve̍, mɛ̄ɛ̍ nāā ŋ̄ wā sāāŋgīāā yɛ̍. Le̍ pāāle̍ŋ ā nyūmndāŋ ŋ̄ wā wa̍llo̍ ō kālā kālā, māā hāli̍ kpe̍ŋ ŋ̄ he̍ndū nyā wōlɔ̄ɔ̄ lūsu̍lɛ̍i̍ cho̍o̍ le̍.

¹⁰Tē ō wā māā yɔ̄ŋɔ̄ɔ̄ pɛ̍, nyā ni̍, Mɛ̄lɛ̄ka̍ pi̍lā ni̍, lā tɛ̄ndā se̍īle̍ŋ ā nāā o̍kɔ̄ɔ̄, māā bōōndi̍i̍ nāā ŋ̄ wā nyā wānāā lāāla᷄ŋndā tɛ̄ɛ̄ŋ nde̍, māā kāālā cho̍ lā bɛ̄ndāā lāŋ nāā ŋ̄ wā tōsāā ni̍. Nyɛ̄ o̍ nyɛ̄ nāā ŋ̄ tōsā nāā nyā wānāā lāāla᷄ŋndā chūā, ō wā māwāā sākpō. Nyɛ̄ o̍ nyɛ̄ ŋ̄ tōsā ndu̍ mbō wā sūɛ̍i̍ wānā sɔ̍lā pɛ̄ɛ̄sā le̍ ndi̍ le̍.

¹¹Lā sīnā wa̍la̍ŋ māā mɛ̄ɛ̍ fi̍nyāā ō bīī chu̍a̍u̍wāā ndūāā ō kɛ̄ndɛ̄ yɛ̍, le̍nde̍ nāā ŋ̄ wā nyā pi̍lɛ̍ŋ pi̍lɛ̍ŋnda̍ kpo̍u̍ bi̍yɔ̄ɔ̄ kɛ̄ndɔ̄ɔ̍ ni̍.

¹²Mi̍ ŋ̄ dɛ̄ɛ̄nīāā nyā mi̍ ŋ̄ nyɔ̄ɔ̄lū nyā kɔ̄lta̍ŋ, ndu̍yɛ̍, mi̍ ŋ̄ dīmūl nyā te̍le̍ŋndā fāŋgā le̍ mī kāālā nyālāŋ lā wā māā wānāā Mɛ̄lɛ̄ka̍. Ndu̍ yɔ̍nūŋ ni̍ māā Mɛ̄lɛ̄ka̍ o̍ ve̍e̍lu̍ nyā le̍ mī lā kɔ̍ wa᷅ fɛ̍ɛ̍ŋ o̍ māsāle̍ ndɔ̄le̍ kɔ̄ndɔ̄fi̍li̍le̍ŋ ni᷄ŋ ndo̍.

¹³Le̍ sābū nāā ŋ̄ chō vɛ̄lɛ̄ Mɛ̄lɛ̄ka̍ ba̍li̍kāā mēllo̍ pɛ̄ŋgu̍ o̍ pɛ̄ŋgu̍ wo̍ cho̍ ni̍, māā, mɛ̄ɛ̍ nāā ŋ̄ dīmu̍l nyā Yōōŋgū Kɛ̄ndɛ̍ Mɛ̄lɛ̄ka̍a̍ mi̍ lā yāŋ ndu̍ lānī. Ndu̍yɛ̍, mi̍ lā chūā ndu̍ māā Mɛ̄lɛ̄ka̍ dīōm ndɔ̄ɔ̍ ni̍. Lā chu̍e̍ ndu̍ māā sūɛ̍i̍ wānā chi̍e̍e̍ kɛ̍ɛ̍si̍a̍a̍ le̍. Ndu̍yɛ̍, māā lēkɛ̍ndɛ̄, Mɛ̄lɛ̄ka̍ dīōm ndɔ̄ɔ̍ kpe̍e̍kpe̍i̍ o̍ cho̍ ni̍. Ndu̍yɛ̍, dīōm kālāā chō wāli̍ kpe̍e̍kpe̍i̍yo̍ tōsāā o̍ nyā wānāā lāāla᷄ŋndā ni᷄ŋ.

¹⁴Chāāŋāā nāā, nyɛ̍ yɔ̍nu̍ŋ ā ku̍ndālā wānāā lāāla᷄ŋāā Mɛ̄lɛ̄ka̍a̍ o̍ lɛ̄ŋndē Chūdi̍a̍āle̍ŋ ni᷄ŋ ndo̍, ndā yɔ̍nūŋ ni̍ māā wānāā dɔ̍ū tīīnda᷄ŋndo̍ o̍ Chi̍i̍sū Ki̍li̍tī ni̍ŋ ndā, nyɛ̄ pīlɛ̍ kōŋ ndu̍ ko̍ yɔ̍nu̍ŋ nyā ho̍ō ndo̍o̍. Mɛ̄ɛ̍ wānāā nyāā nyā chō kāa̍le̍ pi᷅lɛ̍ le̍ŋ ndā chō nyā nyɛ̄ pālāā tūsīo̍o̍ chōo̍ yɛ̍, le̍nde̍ ko̍ni̍ i̍ yɔ̍nu̍ŋ ā ku̍ndālā wānāā lāāla᷄ŋndā ha̍ā ni̍. Wānāā ndā chō Chu̍ūwa̍ vēllāā vēllē wā ndā tu̍si̍ ndā nyɛ̄ pālāā chōo̍ ni̍.

¹⁵Ndā ko̍ni̍ di̍ī Māsānɔ̄ɔ̍ Chi̍i̍sū ni̍, ā wānāā su̍āā le̍ Mɛ̄lɛ̄ka̍ wā. Ndā ko̍ tu̍si̍ vɛ̄lɛ̄ nāā nyɛ̄ pālāā chōo̍ ni̍. Mā bīī mā tɛ̄ɛ̄mbūū Mɛ̄lɛ̄ka̍ kɔ̄l, ndu̍yɛ̍, mā sīīŋgūū ndā pi̍lā ya̍a̍mɔ̍ɔ̍wa̍a̍ wāŋndā kpo̍u̍,

¹⁶kāni̍ fu̍u̍le̍, mā kīndī le̍ nāā kūūnāa̍ māā ŋ̄ di̍mūl wānāā cho̍ ā Chu̍ū le̍ wā sūɛ̍i̍ Mɛ̄lɛ̄kɛ̍i̍ le̍, yɔ̄ŋi̍ bɛ̍ɛ̍ Mɛ̄lɛ̄ka̍ pi̍ŋi̍ ndā. Yɔ̄ŋ o̍ yɔ̄ŋ wɔ̄ɔ̍ŋ ndā tōsā bōlle̍ŋ kīōlɔ̄ɔ̍ kpa̍li̍ cho̍ ho̍ō ni̍. Kɛ̍ ndu̍yɛ̍, Mɛ̄lɛ̄ka̍ dɔ̄ūnu᷄ŋ tu̍mbe̍ ā ndā, ndu̍yɛ̍, mbo̍ wā ni᷅ŋ ndā nyɛ̄ pālāā tūsīo̍o̍ chōo̍.

¹⁷Chāāŋāā nāā, fāŋā ndā fāŋā nāā nyā īkɛ̄i̍ yo̍, dīāllūŋ na᷄ŋ ko̍ni̍ ndā fāŋā ni̍, kɛ̍, ā fēŋa̍ kɔ᷅ltā nāālāŋ o̍ nyā lo̍ le̍. Pīɔ̄ūwa᷅ŋ kōŋ nāā nyāā, te̍le̍ŋ bi̍ŋgī ko̍ni̍ hi̍o̍ū ni̍ mi̍ yēēmɛ̍i̍ nyɛ̍i̍ ī kāndū nāā bīyɔ̄ɔ̍ ta̍u̍ ta̍u̍ le̍ mī ŋ̄ chīīki̍āŋ nāā nyāā.

¹⁸Ndu̍yɛ̍, mi̍ ŋ̄ kīndī tāu̍ le̍ mī ŋ̄ chīīki̍āŋ, ō chō māchūāā mi̍ Sēta̍nā māsā nyi̍nāā wɔ̄ɔ̍ŋndā kūūnā nāā. Yā Pɔ̍ɔ̄ bɛ̍ɛ̍ mi̍ ki̍ndī o̍ te̍le̍ŋndā fāŋgā ni᷄ŋ le̍ chīīki̍āŋndo̍ ā nyā.

¹⁹Kāni̍ fu̍u̍le̍, pāāle̍ Māsānɔ̄ɔ̍ Chi̍i̍sū hu᷅ŋ ni̍ŋ mī ŋ̄ si᷄m ndu̍ o̍ hɔ̄l le̍ŋ, nyā nāā ŋ̄ kɛ̄sī ni̍ŋ kɔ᷅lta̍ŋ chōo̍ ni̍. Nyā to̍sā ni̍ŋ ni̍ mī ŋ̄ na᷄ŋ kɔ̄l. Ndu̍yɛ̍, ā nyā nāā ŋ̄ pɛ̄ɛ̄lu̍ŋ ni̍ŋ pāāle̍ le̍ŋ ni̍.

²⁰Ī chō tōnyā kpe̍e̍kpe̍i̍ māā nyā to̍sā ni̍ŋ ni̍ mī ŋ̄ pɛ̄ɛ̄lu̍ŋ, ndu̍yɛ̍, mī ŋ̄ na᷄ŋ kɔ̄l.