Read Southern Kisi Tɛ̄sālo̍nīāŋ Tāso̍o̍ 4 Bible Online

Tɛ̄sālo̍nīāŋ Tāso̍o̍ 4 - Southern Kisi bible

Tɛ̄sālo̍nīāŋ Tāso̍o̍ 4

¹Ō fūlā o̍ ko̍ŋ kɔ̍ɔ̍lī chāāŋāā nāā, mi̍ ŋ̄ pɛ̄ɛ̄kū nyā ā mɛ̄ɛ̍ nyā nɔ̄ mī lā nɔ̄ kāālā nɛ̍ŋī Mɛ̍lɛ̄kā kɔ̄l lāŋ yɛ̍, ndu̍yɛ̍, mi̍ lā wā kāālā lāŋ tōsāā. Ndu̍yɛ̍, o̍ ko̍ŋ kɔ̍ɔ̍lī, ŋ̄ chō nyā nyɔ̄ɔ̄lōo̍ sɔ̍ŋgɔ̍ Māsānɔ̄ɔ̍ Chi̍i̍sōo̍, ā yāndi̍i̍ lā hīo̍u̍ lāchi̍ ā ka̍āla̍ŋ nda᷅ŋ tōsāā, mbō hīōū bɛ̍ɛ̍ māā pāāndū po̍lo̍ŋ.

²Lā sīnā si̍lālā nāā ŋ̄ sīlā nyā lāŋ, lā Māsānɔ̄ɔ̍ Chi̍i̍sū di̍mu̍l nāā māā nāā ŋ̄ sīlā nyā lāŋ.

³Sɔ̄ɔ̍ŋ Mɛ̄lɛ̄ka̍ hɛ̄nāŋ nyā mī lā tōsā wo̍ŋ, mu̍ŋ cho̍ mu᷅ŋ ni̍. Lā nɔ̄ mī lā nɔ̄ ka̍āla̍ŋ māā wānāā cho̍ le̍ Mɛ̄lɛ̄ka̍. Wānā o̍ wānā ā nɔ̍ kpo̍so̍ŋ mā su̍u̍ndā nyā wānā nyā cho̍ o̍ nɔ̄ ni̍ŋ nyā ndu̍ le̍ wo̍ le̍.

⁴Wānā o̍ wānā ā nɔ̄ mā pɛ̍ɛ̍ku̍ le̍ nūm pi̍lā māndāā, mɛ̄ɛ̍ o̍ wa᷅ o̍ bɛ̍ndāā Mɛ̄lɛ̄ka̍ o̍ hɔ̄l ā ŋ̄wāŋndā chīe̍e̍ yɛ̍.

⁵Yēēmɛ̍i̍ wānā la̍nɔ̍ɔ̍ ī nɔ̍ mī ī hīōū nu̍m o̍ kɔ̄l kɔ̄ɔ̄lī, māā wāŋndā ā pīli̍āā ā si̍nā Mɛ̍lɛ̄kā le̍ wā le̍.

⁶Le̍lāŋ, wānā o̍ wānā to̍sāl chāāŋ nu᷄m sūɛ̍i̍ wɔ̍ɔ̍ŋ o̍ nɛ̄ī o̍ nɛ̄ī ni̍ŋ ā sūɛ̍i̍ he̍ī o̍kɔ̄ɔ̄ le̍. Ŋ̄ sīlā ni᷅ŋ nyā pāāndū ō kālā kālā māā wānāā to̍sā sɔ̍ɔ̍ŋ wāā le̍ndo̍ŋ ndā, Māsānɔ̄ɔ̍ Mɛ̄lɛ̄ka̍ chō ndā nyɛ̄ pālāā tūsī chōo̍.

⁷Kāni̍ fu̍u̍le̍, Mɛ̄lɛ̄ka̍ vēēlu̍ nāā ma̍ve̍e̍lāā le̍ mī ŋ̄ wā wānāā cho̍ ā yɔ̄ŋga᷄ŋ o̍ ndu̍ lo̍. Ō vēēlu̍ nāā le̍ mī ŋ̄ wā o̍ nīīlū nɔ̄ɔ̄lɛ̍i̍ ni̍ŋ te̍.

⁸Le̍lāŋ, wānā kɛ̍ɛ̍ le̍ pɛ̄ɛ̄kūlāŋ nda᷅ŋ chūāā pɛ̍, mɛ̄ɛ̍ ō cho̍ wa᷅nā chi̍e̍e̍ le̍ o̍ kɛ̍ɛ̍ dīōm te̍, mɛ̄ɛ̍ Mɛ̄lɛ̄ka̍ o̍ to̍sā mī Nyi̍nā ndɔ̄ Kāsīo̍o̍ tōl nyā kɔ̄ɔ̄lī wo̍, mɛ̄ɛ̍ ndu̍ o̍ kɛ̍ɛ̍ dīōm ni̍.

⁹A̍ chāāŋāā nyāā wānāā lāāla᷄ŋndā kāālāā o̍kɔ̄ɔ̄ ndu̍ ndu̍, I̍ nɔ̍ mī po̍o̍nyi̍a̍l nyā yāu̍ ā ndi̍ o̍kɔ̄ɔ̄ le̍. Kāni̍ fo̍ndōle̍, lā sɔ̄lā ni᷅ŋ pɛ̄ɛ̄kōo̍ Mɛ̄lɛ̄ka̍ pi̍lā o̍ bā, ā mɛ̄ɛ̍ nyā nɔ̄ mī lā kāāli̍āŋ ve᷅llāā vēllē yɛ̍.

¹⁰Ndu̍yɛ̍, ī chō tōnyā māā lā kāālā wānāā lāāla᷄ŋndā fa̍ū o̍ lɛ̄ŋndē Māsīdo̍o̍nīāāle̍ŋ ni᷄ŋ. Le̍lāŋ chāāŋāā nāā, lā hīo̍u̍ lāchi̍ ā sūɛ̍i̍ he̍ī tōsāā, mbō hīōū bɛ̍ɛ̍ māā pāāndū po̍lo̍ŋ.

¹¹Lā wā wānāā kɛ̍si̍ŋ le̍bɛ̍ɛ̍. Lā wo̍ū sōndō o̍ sūɛ̍i̍ pi̍lā ni᷄ŋ te̍. Ndu̍yɛ̍, nyā pi̍lā lā tōsā wa̍llo̍ le̍ bālā hāvɛ̍i̍la̍ nyālāŋ sōli᷄ŋndo̍ mɛ̄ɛ̍ nāā ŋ̄ dīmu̍l nyā pāāndū yɛ̍.

¹²Tē lā tōsā he̍ī pɛ̍, mɛ̄ɛ̍ wānāā cho̍ bɛ̍ɛ̍ wānāā lāāla᷄ŋ te̍ wā ā nɔ̄lā mā ke̍ nyā bɛ̄ɛ̄le̍ŋ. Ndu̍yɛ̍, ko̍ŋ to̍sā lā ti̍i̍ndāŋ wānā le̍ nyɛ̄ o̍ nyɛ̄ mālāŋ nyā sɔ̄lā le̍.

¹³Chāāŋāā nāā, ŋ̄ hɛ̄nāŋ mī lā sīnā pɛ̄ŋgu̍ wa̍la̍ŋ tē wāŋndo̍ vī pɛ̍, nyɛ̍ yɔ̍nūŋ ā ndu̍ wo̍. Ko̍ŋ to̍sā ā yɔ᷄ŋ bɛ̍ɛ̍ mī wāŋndo̍ ō vī nyā tɛ̄ɛ̄ŋ, lā te̍mbū kɔ̍l tāu̍ mɛ̄ɛ̍ wāŋndā ā pīli̍āā ā tāmbū kɔ̍l lɛ̍ le̍. Ndā yɔ̍nūŋ māā wānāā cho̍ le̍hɔ̍l o̍ nɛ̄ī le̍ lākɔ̄ ɛ̄chɛ̍nɛ̄ le̍ wā ni̍.

¹⁴Ŋ̄ lāāla̍ŋ kpe̍e̍kpe̍i̍ māā mɛ̄ɛ̍ Chi̍i̍sū vi᷅, mi̍ Mɛ̄lɛ̄ka̍ mīŋgī ndu̍ yōōmū. He̍ī chɔ᷄m māā tē Chi̍i̍sū wā hūnɔ̄ɔ̍ pɛ̍, Mɛ̄lɛ̄ka̍ chō tōsā mī wānāā dɔ̍ū tīīnda᷄ŋndo̍ o̍ Mɛ̄lɛ̄ka̍ ni᷄ŋ, kɛ̍ mi̍ ndā āā wu᷅ wā, mā hīŋ lātūlu̍ ndā Chi̍i̍sū wāā.

¹⁵O̍ ko̍ŋ kɔ̍ɔ̍lī, nyɛ̄ Māsānɔ̄ɔ̍ Chi̍i̍sū pɛ̍ɛ̍ku̍ nāā wo̍, ndu̍ nāā ŋ̄ chō ni᷅ŋ ho̍ō nyā dīmūllo̍ ni̍, māā nāā ŋ̍ lo᷅ ni̍ŋ yo̍o̍mū mbō lo̍ o̍ ko̍ŋ mī Māsānɔ̄ɔ̍ Mɛ̄lɛ̄ka̍ hīŋ ndā, ŋ̄ hi̍ū ni̍ŋ wānāā lāāla᷄ŋndā ā vi᷅ wā lāchī le̍.

¹⁶A̍ bōōndi̍i̍ ke̍ŋ, Mɛ̄lɛ̄ka̍ pi̍lā cho̍ īsɔ̄ɔ̍ cho̍o̍ cho̍o̍ kpe̍le̍ŋ, ndu̍yɛ̍, mī ki̍i̍la̍nɔ̍ Mɛ̄lɛ̄ka̍a̍ o̍ cho̍ ki̍i̍la̍a̍ Mɛ̄lɛ̄ka̍a̍ kpo̍u̍ bo᷅lle̍ŋ ndo̍, mbō sōō. Ndu̍yɛ̍, mī wāŋndā tūēī mī bu̍lu̍ Mɛ̄lɛ̄ka̍a̍ sōō. O̍ ko̍ŋ, mī Māsānɔ̄ɔ̍ chɛ᷄ŋ ɛ̄chɛ̍nɛ̄ mbō hīŋ. O̍ ko̍ŋ, wānāā dɔ̍ū tīīnda᷄ŋ ndāā o̍ Mɛ̄lɛ̄ka̍ ni᷄ŋ fɛ̍lɛ̍ŋ mālāŋ ndā wū wā, ndā fɛ̍lɛ̍ŋ cho̍ mīīŋgū yōōmū.

¹⁷Tē ā mīīŋgu̍ yōōmū pɛ̍, nāā ŋ̍ cho̍ wā yōōmū bōōndi̍i̍ ke̍ŋ ndā, Mɛ̄lɛ̄ka̍ tōsā nāā kpo̍u̍, ŋ̄ chūūŋgi̍āŋ di̍ōm pīlɛ̍ chōo̍ cho̍o̍, le̍ Māsānɔ̄ɔ̍ Mɛ̄lɛ̄ka̍ bɔ̄ŋāā o̍ ha̍la̍a̍ ni᷄ŋ. O̍ ko̍ŋ kɔ̍ɔ̍lī, nāā kpo̍u̍ mī ŋ̄ wā lātūlu̍ ā Māsānɔ̄ɔ̍ Mɛ̄lɛ̄ka̍ le̍ fɛ̍ɛ̍ŋ ā fɛ̍ɛ̍ŋ.

¹⁸Le̍lāŋ, lā dɛ̄ɛ̄ni̍āŋ kɔ᷅lta̍ŋ vēllāā vēllē ā dīōmnda̍ŋ nda᷅ŋ.