Read Southern Kisi Tɛ̄sālo̍nīāŋ Tāso̍o̍ 5 Bible Online

Tɛ̄sālo̍nīāŋ Tāso̍o̍ 5 - Southern Kisi bible

Tɛ̄sālo̍nīāŋ Tāso̍o̍ 5

¹Chāāŋāā nīāā, I̍ nɔ̍ mī pōōnyi̍a̍l nyā yāu̍ mī chɔ̍m nyā bōōndi̍i̍ kpe̍e̍kpe̍i̍ sɔ̄ɔ̍ŋ mu᷅ŋ ŋ̄ chō yɔ̄nɔ᷄ŋ ndo̍ŋ te̍.

²Kāni̍ fu̍u̍le̍, nyā pi̍lā lā sīnā cha̍la̍ŋ māā pāāle̍ Māsānɔ̄ɔ̍ Mɛ̄lɛ̄ka̍ chō hūnɔ̄ɔ̄ le̍ŋ, lē yɔ̄nūŋ ni̍ŋ māyɔ̍ŋna᷄ŋ su̍ɛ̍i̍ wo̍o̍lāā, mɛ̄ɛ̍ vīīnɔ̄ɔ̍ hūŋ nu̍āā ā nyūmndāŋ wānā ve᷅ ndu̍ kɔ̍l te̍ yɛ̍.

³Bōōndi̍i̍ wāŋndā chō wā dīmīo̍o̍ āā, “Kɔ̄l nyūlōo̍ chō ni᷅ŋ ō tīūwāā bā o̍ bā fe̍e̍. Mbɔ̄ wānā yɔ̍nūŋ ni᷅ŋ īsīōōŋ fu̍u̍,” ā bōōndi̍i̍ ke̍ŋ kpūndɛ̍ bɛ̄ndōo̍ dēl ni̍ŋ ndā chōo̍ o̍ lē pīlɛ̍ ni᷄ŋ kpe̍ ni̍. Ī yɔ̄nūŋ ni̍ŋ ko̍ mɛ̄ɛ̍ pūli̍i̍ vi̍ālɛ̄i̍ ī kpūwā nu̍āā wānā yo᷄llo̍ ā nɛ̄īyo̍ yɛ̍. Ndu̍yɛ̍ ā nɔ̍lā ni̍ŋ mā fūlā o̍ kpūndɛ̍ kōŋ ni᷄ŋ te̍.

⁴Kɛ̍ ndu̍yɛ̍ chāāŋāā nāā, nya̍ nya̍ cho̍ mɛ̄ɛ̍ wānāā cho̍ o̍ nyūmndāŋ ni᷄ŋ, ā si̍nā ā sɔ̄ɔ̍ŋ Mɛ̄lɛ̄ka̍ŋ o̍kɔ̄ɔ̄ le̍ wā ā chō yɛ̍ le̍. Nya̍ nya̍, pāāle̍ le̍ŋ lē wo̍o̍lū ni̍ŋ nyā mɛ̄ɛ̍ vīīnɔ̄ɔ̍ hūŋ nu̍āā wānā ve᷅ ndu̍ kɔ̍l te̍ yɛ̍ le̍.

⁵Nyā kpo̍u̍ lā chō māchūāā wānāā wāā o̍ nyɛ̄ wāwo̍ŋ ni̍ŋ. Wānāā wāā īpāla̍ nyā chō ni̍. Na̍a̍ na̍a̍ ŋ̄ cho̍ wānāā wāā īchɔ̄l, kɛ̄lɛ̄ŋgāā wānāā wāā o̍ mānyūm ni᷄ŋ te̍.

⁶Mɛ̄ɛ̍ ō wā māā yɔ̄ŋɔ̄ɔ̄ pɛ̍, ŋ̄ wānūŋ māā wāŋndā ā pīli̍āā ā cho̍nu᷄ŋ o̍ lūa̍a̍ŋ ndā le̍. Ŋ̄ nɔ̄ mī ŋ̄ wā lāhɔ̄l, ndu̍yɛ̍ mī ŋ̄ wā nyɛ̄ kɛ̄ndɛ̄ ye̍ke̍ŋ.

⁷A̍ nyūmndāŋ wāŋndā lɔ̄l ni̍. Ndu̍yɛ̍ ā nyūmndāŋ wāŋndā nɔ̄ vɛ̄lɛ̄ mūɛ̄īya̍ŋ kōlɔ̄ɔ̍ mī mā bīī ndā ni̍.

⁸Kɛ̍ na̍a̍ na̍a̍, mɛ̄ɛ̍ nāā ŋ̄ chō ni᷅ŋ wānāā wāā īpāla̍ yɛ̍, ŋ̄ wānu᷅ŋ ni̍ko̍ nyɛ̍ kɛ̄ndɛ̄ ye̍ke̍ŋ. Ŋ̄ chūānu᷅ŋ tīīnda᷄ŋndo̍ o̍ Mɛ̄lɛ̄ka̍ ni᷄ŋ ā kāālāā, le̍ nāā māndāā mɛ̄ɛ̍ pūāā chɔ̄ūwa̍ ā wōūnūŋ nyɛ̍ māndā ndā tākpāa̍ wo̍ yɛ̍. O̍ ko̍ŋ kɔ̍ɔ̍lī, ŋ̄ nɔ̄ mī ŋ̄ wā lēhɔ̄l o̍ nɛ̄ī kpe̍e̍kpe̍i̍ le̍ pīŋī Mɛ̄lɛ̄ka̍ pīŋī ni̍ŋ nāā wo̍. He̍ī ma̍ndā nāā ni̍, mɛ̄ɛ̍ pūāā chɔ̄ūwa̍ ā wōūnūŋ mɔ̍si̍lta̍ kālā kālāla̍ŋ le̍ ndā bōlle̍ māndāā yɛ̍.

⁹Kāni̍ fo̍ndōle̍, Mɛ̄lɛ̄ka̍ hɛ̄li̍ nāā le̍ mbō dɔ̄ūnu᷄ŋ tu̍mbe̍ ā nāā mbō tūsi̍ nāā nyɛ̄ pālāā chōo̍ le̍. Ō hɛ̄li̍ māhɛ̄līāā nāā, le̍ mī ŋ̄ sɔ̄lā pīŋīo̍o̍ sānāā o̍ sābu̍ Māsānɔ̄ɔ̍ Chi̍i̍sū Ki̍li̍tī wo̍ ni᷄ŋ.

¹⁰Ndu̍ vi᷅ le̍ nāā ni̍, le̍ hāli̍ kpe̍ŋ bōōndi̍i̍ o̍ cho̍ mīīŋgū ve̍, ŋ̄ wā ā vi̍lɛ̍i̍, kɛ̄lɛ̄ŋgāā ŋ̄ wā yo̍o̍mū, ŋ̄ nɔ̄lā mī ŋ̄ hu᷄ŋ wa᷅ lātūlu̍ nāā ndāā.

¹¹Le̍lāŋ lā wā kɔ᷅lta̍ŋ dɛ̄ɛ̄ni̍āŋndo̍ vēllāā vēllē. Ndu̍yɛ̍ lā wā māāli̍āŋndo̍ vēllāā vēllē le̍ dīāllūŋ kāla᷄ŋ sɔ̄lāā mɛ̄ɛ̍ nyā chō nu̍āā tōsāā yɛ̍.

¹²Chāāŋāā nāā, ŋ̄ chō nyā nyɔ̄ɔ̄lōo̍ māā, wānāā cho̍ ha̍ā mā wā fāfa̍la̍a̍ nyā tɛ̄ɛ̄ŋ ndā, lā ke̍ ndā bɛ̄ɛ̄le̍ŋ, ndā yɔ̍nūŋ ni̍ māā wānāā cho̍ nyā lāchī o̍ sūɛ̍i̍ Māsānɔ̄ɔ̍ Mɛ̄lɛ̄kɛ̍i̍ ni᷄ŋ, mā wā nyā pɛ̄ɛ̄kōo̍ wā.

¹³Lā chu̍ā wa᷅ŋndā ha̍ā māā wānāā nyāā bānā kpe̍e̍kpe̍i̍, ndu̍yɛ̍ mī lā kāālā ndā, kāni̍ fu̍u̍le̍, le̍ wāli̍ o̍ wāli̍ ndā chō tōsāā. Ndu̍yɛ̍ o̍ ko̍ŋ kɔ̍ɔ̍lī, lā nɔ̍ kɔ᷅ltā nyūlūla̍ŋ nyā pi̍lā tɛ̄ɛ̄ŋ vēllāā vēllē.

¹⁴Ŋ̄ chō nyā nyɔ̄ɔ̄lōo̍ chāāŋāā nāā, lā yāndi̍i̍, lā sīlā wānāā lāāla᷄ŋndā ā nɔ̍ sīɛ̄lɛ̍i̍ye̍ wā. O̍ ko̍ŋ kɔ̍ɔ̍lī, lā dɛ̄ɛ̄ni̍a̍a̍ wānāā nɔ̍ sīōōŋnde̍ wā mī sīōōŋnde̍ fūlā ndā. Ndu̍yɛ̍ lā mālā wānāā nɔ̍ di̍āllūŋ kālā o̍ tīīnda᷄ŋ ndāā o̍ Mɛ̄lɛ̄ka̍ ni᷄ŋ te̍ wā. Lā nɔ̍ kɔ᷅ltā bīūwa᷄ŋnda̍ŋ ā wānā o̍ wānā fe̍e̍.

¹⁵Lā chɛ᷅l mī wānā o̍ wānā mi̍ŋgu̍l chāāŋ ndɔ̍ māā o̍ māā le̍. Dɛ̍nɛ̍ kɛ̍ndɔ̄ɔ̍ ndu̍ nyā kīndi̍ lɔ̍ɔ̍ lɔ̍ɔ̍ le̍ tōsa̍la᷅ŋndo̍ vēllāā vēllē ni̍, ā nāā wānā o̍ wānā fe̍e̍ chu̍ā.

¹⁶Lā wā ā kɔ̄l kɛ̄ndɛ̄ le̍ pɛ̄ŋgu̍ o̍ pɛ̄ŋgu̍.

¹⁷Ndu̍yɛ̍ lā wā Mɛ̍lɛ̄kā pīɛ̄īyo̍ te̍le̍ŋ o̍ te̍le̍ŋ.

¹⁸Lā me᷄l Mɛ̍lɛ̄kā bāli̍ka̍ o̍ īsɔ̄ɔ̍ o̍ īsɔ̄ɔ̍ fe̍e̍ ni̍ŋ. Kāni̍ fu̍u̍le̍, he̍ī Mɛ̄lɛ̄ka̍ hɛ̄nāŋ mī nyā wānāā Chi̍i̍sū Ki̍li̍tīa̍a̍ lā wā tōsāā ni̍.

¹⁹Ndu̍yɛ̍, lā ku̍u̍nā Nyi̍nā Kāsīo̍o̍ o̍ wa̍llo̍ le̍.

²⁰Lā pɛ̍ɛ̍sā yōōŋgū wānāā su̍āā le̍ Mɛ̄lɛ̄ka̍ wā ā dīmūl nyā wo̍ le̍.

²¹Kɛ̍ ndu̍yɛ̍ lā mɛ̄ɛ̄ndāŋ ndu̍ nyɛ̄ kɛ̄ndɛ̄ kɛ̍ndɛ̍ī, tē o̍ Mɛ̄lɛ̄ka̍ lo̍ le̍kɛ̍ndɛ̍ī o̍ fu̍lā ni̍. Ndu̍yɛ̍ lā chu̍ā i̍sɔ̍ɔ̍ o̍ īsɔ̄ɔ̍ cho̍ sūɛ̍i̍ kɛ̍ndɛ̄,

²²mī lā kɛ̄ɛ̍ īsɔ̄ɔ̍ o̍ īsɔ̄ɔ̍ cho̍ sūɛ̍i̍ wɔ̍ɔ̍ŋ.

²³Mbɔ̄ Mɛ̄lɛ̄ka̍ pi̍lā, o̍ ke̍ nāā ho̍ō kɔ̄l ndɔ̄ nyu̍lōo̍ wo̍, ō tōsā mī lā sīmnu᷄ŋ wānāā cho̍ ā yɔ̄ŋga᷄ŋ nāā ndu̍ chu̍ā kpe̍e̍kpe̍i̍ fɔ̍. Ndu̍yɛ̍ Mɛ̄lɛ̄ka̍ māndā yo̍o̍mūlā nyālāŋ kpo̍u̍, ā nyi̍nāā nyāā, ā dīāllūŋ nyāa̍ŋ, māā tē Māsānɔ̍ nāā Chi̍i̍sū Ki̍li̍tī hi᷅ŋ pɛ̍, tɛ̄ɛ̄ o̍ tɛ̄ɛ̄ ve᷅ nyā chōo̍ le̍ fɔ̍.

²⁴Mɛ̄lɛ̄ka̍ o̍ ve̍e̍lu̍ nāā wo̍ ō nɔ̄lā mbō tōsā ke̍ŋ, kāni̍ fu̍u̍le̍, nyɛ̄ o̍ di̍mī le̍ tōsāā wo̍, tōsāā o̍ to̍sā ndu̍ ni̍.

²⁵Nāā bɛ̍ɛ̍ lā pīɛ̍i̍ Mɛ̍lɛ̄kā le̍ nāā.

²⁶Chāāŋāā nāā, nyā kpo̍u̍ lā wā yi᷅la᷅ŋndo̍ vēllāā vēllē o̍ kāālāā ni᷄ŋ māā wānāā lāāla᷄ŋ o̍ Chi̍i̍sū ni̍ŋ.

²⁷I̍ cho̍ nyā sūɛ̍i̍ he̍ī dīmūllo̍ lɛ̍kɛ̍ lɛ̍kɛ̍, māā Māsānɔ̄ɔ̍ Mɛ̄lɛ̄ka̍ bu̍ɛ̍ī ndɔ̄, māā lā to̍mbo̍la̍ di̍ōmndā cho̍ o̍ yāu̍wo̍ ho̍ō ni᷄ŋ ndāŋ nāā chāāŋāā nāā kpo̍u̍ chu̍ā.

²⁸Mbɔ̄ Māsānɔ̍ nāā Chi̍i̍sū Ki̍li̍tī ō yīyāŋ nyā chōo̍ fɔ̍.