Read Southern Kisi Chɔ̄ɔ̍sūāā 10 Bible Online

Chɔ̄ɔ̍sūāā 10 - Southern Kisi bible

Chɔ̄ɔ̍sūāā 10

¹Mi̍ Ādōnīsi̍dɛ̍kī, māsāa̍ Chūlu̍sɛ̄lɛ̄m o̍ tu̍ɛ̍ī māā Chɔ̄ɔ̍sūāā bi̍ī E̍yāī mbo̍ tɛ̄ɛ̄mbūū nyɛ̄ o̍ nyɛ̍ wa̍ lo̍ŋ a̍ māsa̍ ndāa̍ lātūlu̍ mɛ̄ɛ̍ o̍ to̍sa̍ a̍ Chɛ̄lu̍i̍kō a̍ māsa̍ ndāa̍ yɛ̍. O̍ ko̍ŋ kɔ̍ɔ̍lī, mbo̍ tūɛ̄ī vɛ̄lɛ̄ māā wāŋnda̍ Ki̍bīɔ̄ŋ a̍ to̍sa̍ chɛ̄la᷅ŋ kɔ̄l nyūlōo̍ a̍ I̍sɔ̄lūɛ̍i̍ya̍ ma̍ wā ni᷅ŋ I̍sɔ̄lūɛ̍i̍ya̍ tɛ̄ɛ̄ŋ.

²Mɛ̄ɛ̍ Ādōnīsi̍dɛ̍kī nda̍ wānāā ndūa̍a̍ ā tūēī le̍nde̍, mi̍ sīōōŋīī bɛ̄ndūe̍i̍ bīī nda̍, kāni̍ fu̍u̍le̍ chi̍o̍o̍ pīla̍ Ki̍bīɔ̄ŋ o̍ wa̍ ni̍, ndu̍ o̍o̍ hīōū E̍yāī. Mɛ̄ɛ̍ chi̍e̍e̍ŋ bɛ̍ndūŋ lēmāsa᷄ŋ ŋ̄ wa̍ ŋ̄ bɛ̄ndū yɛ̍ ko̍ni̍ Ki̍bīɔ̄ŋ o̍ wa̍ ni̍. Ndu̍yɛ̍ pūa̍a̍ ndāa̍ chɔ̄ūwa̍ kpo̍u̍ sɔ̍ŋgɔ̄ɔ̍ pīla̍ nda̍ a̍a̍ sɔ̍ŋgā ni̍.

³O̍ ko̍ŋ, mi̍ Ādōnīsi̍dɛ̍kī o̍ yɔ᷅ŋ yōōŋgōo̍ nāa̍ chāāŋāā ndūāā ma̍sāa̍ chūā. Mbo̍ yɔ̄ŋ yōōŋgōo̍ nāa̍ Māsāa̍ Ho̍hām chu̍a̍ o̍ wa̍ Hi̍būlɔ̄ŋ ndo̍, a̍ Māsāa̍ Pi̍lūām, o̍ wa̍ Cha̍a̍mu̍tī wo̍, a̍ Māsāa̍ Chāfi̍yā, o̍ wa̍ La̍ki̍sī wo̍, a̍ Māsāa̍ Dɛ̍bi̍lūīī, o̍ wa̍ Ɛ̍ki̍lɔ̄ŋ ndo̍. Mbo̍ dīmūl nda̍ āā,

⁴“Lā hu᷄ŋ mī lā hu̍ŋ ma̍lā ya̍ sɔ̍ŋgɔ̄ɔ̍ a̍ wāŋnda̍ Ki̍bīɔ̄ŋ. Kāni̍ fu̍u̍le̍ I̍ tu̍e̍ī māā ā tōsa̍ chɛ̄la᷅ŋ kɔ̄l nyūlōo̍ a̍ Chɔ̄ɔ̍sūāā nda̍ wāŋnda̍ I̍sɔ̄lūɛ̄ī.”

⁵O̍ ko̍ŋ kɔ̍ɔ̍lī, mi̍ māsāa̍ māA̍mɔ̍lu̍a̍i̍tīi̍ya̍a̍ ŋu̍ɛ̍ɛ̍nu̍a̍a̍ ha̍ā, māsāa̍ Chūlu̍sɛ̄lɛ̄m a̍ māsāa̍ Hi̍būlɔ̄ŋ a̍ māsāa̍ Cha̍a̍mu̍tī, a̍ māsāa̍ La̍ki̍sī, a̍ māsāa̍ Ɛ̍ki̍lɔ̄ŋ a̍ chu̍u̍ŋgīāā so̍vɛ̄i̍ya̍a̍ ndāa̍ nāa̍ pi᷅lɛ̍ ma̍ hēl Ki̍bīɔ̄ŋ ma̍ kɔ̍ ba̍lū nda̍ ma̍ dēl nda̍ chōo̍.

⁶Mi̍ wāŋnda̍ Ki̍bīɔ̄ŋ a̍ yɔ᷅ŋ yōōŋgōo̍ nāa̍ Chɔ̄ɔ̍sūāā chu̍a̍ nāa̍ nda̍ wa̍ o̍ dɔ̍ɔ̍ŋgɔ̍ɔ̍ Ki̍lkāl wa̍ āā, “Ŋ̄ yɔ̄ŋgu̍ŋ ni᷅ŋ na̍a̍ pi̍la̍ nāa̍ nya̍ chūā le̍ mī lā mānda̍ na̍a̍, lā ma᷅l na̍a̍ le̍. Lā hu̍ŋ ma̍lā na̍a̍, lā hu̍ŋ chɔ̍ chɔ̍ mī lā hu̍ŋ chi̍i̍ndīāā na̍a̍. Māsāa̍ māA̍mɔ̍lu̍a̍i̍tīi̍ya̍a̍ cho̍ o̍ pēmbo᷄ŋ chōo̍ wa̍ kpo̍u̍ ā bīī ma̍ chūūŋgīāā so̍vɛ̄i̍ya̍a̍ ndāa̍ nāa̍ pi᷅lɛ̍ ma̍ hu᷄ŋ de᷅l na̍a̍ chōo̍ a̍ sɔ̍ŋgɔ̄ɔ̍.”

⁷O̍ ko̍ŋ, mi̍ Chɔ̄ɔ̍sūāā chu̍ā so̍vɛ̄i̍ya̍a̍ ndūa̍a̍ kpo̍u̍ a̍ pūa̍a̍ ndūa̍a̍ sɔ̍ŋgā sɔ̍ŋgā bɛ̄ndōo̍ wa̍ lātūlu̍, ma̍ māl nāa̍ nda̍ wa̍ Ki̍lkāl wa̍ ma̍ bīī kɔ̄la̍ŋ Ki̍bīɔ̄ŋ.

⁸Kɛ̍ lɔ̍ɔ̍pa̍ ma̍ māl, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Chɔ̄ɔ̍sūāā āā, “Sīōōŋīī bi̍ī nya̍ le̍ A̍mɔ̍lu̍a̍i̍tīi̍ya̍ le̍. I̍ ma̍l nda̍ nya̍ o̍ bā, ō pīlɛ̍ bɛ̍ɛ̍ o̍ nɔ̍lā mbō sīmu̍l nya̍ a̍ sɔ̍ŋgɔ̄ɔ̍ le̍.”

⁹Mi̍ Chɔ̄ɔ̍sūāā nda̍ so̍vɛ̄i̍ya̍a̍ ndūa̍a̍ ā lɔ̄ɔ̄lū īchɔ̄l kōŋ kɔ̄la̍ŋ pi̍i̍ chɔ̄nɔ᷄ŋndo̍ Ki̍lkāl le̍ kɔ̄la̍ŋ Ki̍bīɔ̄ŋ mā kɔ̍ wo̍o̍lū A̍mɔ̍lu̍a̍i̍tīi̍ya̍ a̍ sɔ̍ŋgɔ̄ɔ̍.

¹⁰Ndu̍yɛ̍ mɛ̄ɛ̍ A̍mɔ̍lu̍a̍i̍tīi̍ya̍ chē nda̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mi̍ sīōōŋīī bɛ̄ndūe̍i̍ bīī nda̍. Mi̍ I̍sɔ̄lūɛ̍i̍ya̍ dīū nda̍ ta̍u̍ Ki̍bīɔ̄ŋ. Ma̍ chūā nda̍ tōūwɔ̄ɔ̍ lo̍ŋ ma̍ kūā a̍ nda̍ o̍ nɛ̄i̍ he̍l Bɛ̄tī Ho̍lɔ̄ŋ ndo̍. O̍ ko̍ŋ kɔ̍ɔ̍lī, ma̍ lō kɔ̄la̍ŋ a̍ nda̍ dīūwo̍ ha̍a̍a̍ ma̍ fūūlūū Āsi̍kāā a̍ Ma̍kɛ̍dāā.

¹¹Ndu̍yɛ̍ a̍ te̍le̍ŋ I̍sɔ̄lūɛ̍i̍ya̍ wa̍ nda̍ ko̍ŋ ki᷅lta̍ŋ kɔ̄ɔ̄lī ma̍ wā pēmbīi̍ he̍l Bɛ̄tī ho̍lɔ̄ŋ nde̍ tōlɔ̄ɔ̍ wo̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ yɔ᷅ŋ pīɔ̄ɔ̄ ŋ̄kpūŋgbā bɛ̄ndōo̍ mbo̍ wā nda̍ dēlīo̍o̍ chōo̍ mbo̍ wā nda̍ dīūwo̍. Pīɔ̄ɔ̄ ŋ̄kpūŋgbā kōŋ ō lo̍ kɔ̄la̍ŋ a̍ nda̍ dīūwo̍ ha̍a̍a̍ ma̍ fūūlūū Āsi̍kāā. Wānāā pīɔ̄ɔ̄ ŋ̄kpūŋgbā kōŋ ō dīu̍ wa̍ nda̍ a̍a̍ hi̍o̍ū a̍ wānāā I̍sɔ̄lūɛ̍i̍ya̍ pīla̍ a̍ di̍u̍ wa̍.

¹²Pāa̍le̍ Mɛ̄lɛ̄ka̍ Ya̍a̍wɛ̄ɛ̄ o̍ ke̍ le̍ŋ I̍sɔ̄lūɛ̍i̍ya̍ kpāāyāa̍ ma̍ yām A̍mɔ̍lu̍a̍i̍tīi̍ya̍ le̍ŋ, mi̍ Chɔ̄ɔ̍sūāā si᷅m I̍sɔ̄lūɛ̍i̍ya̍ o̍ hɔ̄l mbo̍ dīmūl Mɛ̄lɛ̄ka̍ Ya̍a̍wɛ̄ɛ̄ āā, “Mɛ̄lɛ̄ka̍ Ya̍a̍wɛ̄ɛ̄, to̍sa̍ mī pāa̍le̍ŋ lē si᷄m Ki̍bīɔ̄ŋ, o̍ chi̍o̍o̍ chōo̍, Mī pāŋge̍i̍ si᷄m o̍ lɛ̄ŋndē dɛ̍ŋgbɛ̍le̍ŋ pēmbo᷄ŋ tɛ̄ɛ̄ŋ A̍i̍cha̍lɔ̄ŋ cho̍o̍.”

¹³O̍ ko̍ŋ, mi̍ pāa̍le̍ŋ lē sīm yi̍, ndu̍yɛ̍ pāŋge̍i̍ bɛ̍ɛ̍ ī fēŋa̍ŋ nāa̍ i̍ wa̍ wa̍ le̍. Mbo̍ lō le̍nde̍ ha̍a̍a̍ mi̍ I̍sɔ̄lūɛ̍i̍ya̍ chīī ya̍a̍mɔ̍ɔ̍wa̍a̍ ndāa̍ yōmɔ̄ɔ̄. Dīōmnda̍ŋ ndāŋ lā chō lā pōōnyīāā o̍ yāū Cha̍su̍lūā wo̍ ni̍ŋ. Mi̍ pāa̍le̍ŋ lē sīm chōo̍ cho̍o̍ o̍ bōlle̍ŋ tɛ̄ɛ̄ŋ le̍ pāa̍le̍ŋ kpɛ᷅ŋ.

¹⁴Nyɛ̍ yɔ̍nu̍ŋ pa̍a̍le̍ le̍ŋ ndo̍, kāni̍ bɛ̍ɛ̍ chɔ̍ŋ a̍ te̍le̍ŋ ndu̍ o̍o̍ yɔ̍nu̍ŋ ndɔ̍ bɛ̍ɛ̍ le̍ wo̍ mbo̍ bīya᷅ŋ a̍ te̍le̍ŋ yāu̍wo̍ ho̍ō ō chō pōōnyīa̍ŋndo̍ wo̍, ī wāā le̍nde̍ i̍ yɔ̍nu̍ŋ ndɔ̍ le̍. Pāa̍le̍ le̍ŋ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ya᷅ŋ nīla̍ŋ o̍ nyɛ̄ wāna̍ chīo̍o̍ ō dīmu̍l ndu̍ wo̍. Mɛ̄lɛ̄ka̍ Ya̍a̍wɛ̄ɛ̄ ndu̍ pi̍la̍ kpe̍e̍kpe̍i̍ wa̍ sɔ̍ŋgɔ̄ɔ̍ le̍ I̍sɔ̄lūɛ̍i̍ya̍ ni̍.

¹⁵Mɛ̄ɛ̍ Chɔ̄ɔ̍sūāā nda̍ I̍sɔ̄lūɛ̍i̍ya̍ ā chīi̍ A̍mɔ̍lu̍a̍i̍tīi̍ya̍ yōmɔ̄ɔ̄ kpo̍u̍, ma̍ mīīŋgū nāa̍ nda̍ wa̍ o̍ dɔ̍ɔ̍ŋgɔ̍ ndāa̍ Ki̍lkāl wa̍.

¹⁶Kɛ̍ mi̍ māsāa̍ māA̍mɔ̍lu̍a̍i̍tīi̍ya̍a̍ ŋu̍ɛ̍ɛ̍nu̍a̍a̍ ā hīālu᷄ŋ I̍sɔ̄lūɛ̍i̍ya̍ ma̍ kɔ̍ vi̍o̍ŋnu᷄ŋ Ma̍kɛ̍dāā o̍ būūlōo̍ ni᷄ŋ.

¹⁷Kɛ̍ mi̍ wāŋndo̍ sāālu᷄ŋ nda̍ mbo̍ kɔ̍ di̍mūl Chɔ̄ɔ̍sūāā.

¹⁸Mi̍ Chɔ̄ɔ̍sūāā di̍mūl pūa̍a̍ ndūa̍a̍ āā, “Lā pīmbu̍l po̍ūtā bɛ̄ŋnda̍ŋ o̍ būūlū ko̍ŋ sōndōo̍ mī lā kɛ̄si̍ pūa̍a̍ lo̍ŋ a̍ ti̍ŋ mā wa̍ ndu̍ to̍fāa̍.

¹⁹Kɛ̍ nya̍ pi̍la̍ lā cha᷅l lo̍ŋ te̍. Lā hīo̍u̍ la̍chi̍ a̍ ya̍a̍mɔ̍ɔ̍wa̍a̍ tu̍a̍a̍ kīlta̍ŋ kɔ̄ɔ̄lī. Lā ma᷅l nda̍ mā mīīŋgu̍ o̍ chi̍e̍e̍ŋ ndāŋ ni̍ŋ te̍. Kāni̍ fu̍u̍le̍ Mɛ̄lɛ̄ka̍ nyāa̍ Ya̍a̍wɛ̄ɛ̄ o̍ ma̍l nda̍ nya̍ o̍ bā.”

²⁰Mi̍ Chɔ̄ɔ̍sūāā nda̍ I̍sɔ̄lūɛ̍i̍ya̍ ā dīū nda̍ ta̍u̍ ta̍u̍. Mɛ̄ɛ̍ ā pɔ̄mpɔ̍mbūa̍a̍ hɛ̍lu᷄ŋ ma̍ mīīŋgū o̍ chi̍e̍e̍ŋ ndāa̍ŋ kpākīla̍ bɛ̄ndūla̍ŋ lā wa̍ lā bālāā wo̍ŋ ni᷄ŋ nda̍ ma̍ lō yōōmū.

²¹Kɛ̍ pūa̍a̍ Chɔ̄ɔ̍sūāā wa̍ ō pīlɛ̍ bɛ̍ɛ̍ o̍ yɔ̍nu̍ŋ nyɛ᷅ le̍. Nda̍ kpo̍u̍ ma̍ mīīŋgū nāa̍ Chɔ̄ɔ̍sūāā chu̍a̍ o̍ dɔ̍ɔ̍ŋgɔ̍ ndāa̍ Ma̍kɛ̍dāā yɛ̍lɛ̍kɛ̍lɛ̍ɛ̍. Wānā pi᷅lɛ̍ bɛ̍ɛ̍ chu̍e̍ so̍ndō ndɔ̄ɔ̍ chɔ̍ mbō dīmi̍ dīōmndē wɔ̄ɔ̍ŋ a̍ I̍sɔ̄lūɛ̍i̍ya̍ le̍.

²²Mi̍ Chɔ̄ɔ̍sūāā di̍mūl pūa̍a̍ ndūa̍a̍ āā, “Lā kūmbi̍ bu̍u̍lōo̍ mī lā sōli̍ māsāā ŋūɛ̍ɛ̍nu̍a̍a̍ ka̍ŋ.”

²³O̍ ko̍ŋ, mi̍ pūa̍a̍ kūmbī būūlōo̍ ma̍ sōlī māsāa̍ Chūlu̍sɛ̄lɛ̄m, a̍ māsāa̍ Hi̍būlɔ̄ŋ, a̍ māsāa̍ Cha̍a̍mu̍tī, a̍ ho̍ō La̍ki̍sī, a̍ ho̍ō Ɛ̍ki̍lɔ̄ŋ.

²⁴Ma̍ kūā a̍ nda̍ nāa̍ Chɔ̄ɔ̍sūāā chu̍a̍. Mi̍ Chɔ̄ɔ̍sūāā ve̍e̍lū pūa̍a̍ I̍sɔ̄lūɛ̄ī kpo̍u̍ na̍a̍ pi᷅lɛ̍. Mbo̍ dīmūl wānāa̍ wa̍ so̍vɛ̄i̍ya̍ bōlle̍ŋ nda̍ āā, “Lā hu᷄ŋ na̍nu᷄ŋ mī lā hu᷄ŋ ha̍ndū māsāa̍ ha̍ā pēlo̍ŋ o̍ ŋ̄kɛ̄su̍.” Ma̍ kɔ̍ ha̍ndū nda̍ pēlo̍ŋ o̍ ŋ̄kɛ̄su̍.

²⁵Mi̍ Chɔ̄ɔ̍sūāā di̍mūl nda̍ āā, “Lā yɔ᷅ŋ īsīōōŋ te̍, lā ma᷅l te̍. Lā sīmu̍l kɔ᷅llo̍, ndu̍yɛ̍ mī lā vēsa̍ hɔ̄lla̍. Ya̍a̍mɔ̍ɔ̍wa̍a̍ nya̍ chō hūnɔ̄ɔ̄ sɔ̍ŋgā a̍ nda̍ wa̍ kpo̍u̍ nu̍a̍ā Mɛ̄lɛ̄ka̍ Ya̍a̍wɛ̄ɛ̄ o̍ cho̍ tōsā a̍ nda̍ ni̍.”

²⁶O̍ ko̍ŋ kɔ̍ɔ̍lī, mi̍ Chɔ̄ɔ̍sūāā di̍ū māsāā ka̍ŋ, mbo̍ lāndū dīāllūŋ nda̍ŋ o̍ yɔ̄mnde̍ chōo̍ ndi̍ i̍ ŋu̍ɛ̍ɛ̍nu̍. Mi̍ dīāllūŋ mu᷅ŋ ŋ̄ nīīlū lo̍ŋ kpɛ᷅ŋ.

²⁷A̍ pāa̍le̍ de̍lāā le̍ŋ, mi̍ Chɔ̄ɔ̍sūāā di̍mūl pūa̍a̍ ndūa̍a̍ ma̍ kɔ̍ tu̍sī dīāllūŋ mu᷅ŋ ma̍ kɔ̍ vi̍o̍ū mu̍ŋ o̍ būūlu̍ nda̍ wa̍ ko̍ŋ a̍ vi̍a̍ŋna᷄ŋ le̍ni̍ŋ ndo̍ ni̍ŋ. O̍ ko̍ŋ kɔ̍ɔ̍lī, ma̍ dīī pōūta̍ŋ o̍ būūlū ko̍ŋ sōndōo̍. A̍ te̍le̍ŋ yāu̍wo̍ ho̍ō ō chō pōōnyīa̍ŋndo̍ wo̍ bɛ̍ɛ̍ pōūtālāŋ lā chō lo̍ŋ.

²⁸O̍ pāa̍le̍ pi᷅lɛ̍lē lēŋ chōo̍ kpe̍, mi̍ Chɔ̄ɔ̍sūāā nda̍ pūa̍a̍ ndūa̍a̍ ā kūā Ma̍kɛ̍dāā chi̍e̍e̍, ma̍ kɔ̍ de᷅l ndu̍ chōo̍ ma̍ bīī ndu̍. Ma̍ dīī māsa̍ ndāa̍ a̍ wānāa̍ wa̍ o̍ chi̍e̍e̍ ko̍ŋ ni̍ŋ nda̍ kpo̍u̍. Wānā pi᷅lɛ̍ bɛ̍ɛ̍ ā mɛ̄i̍ le̍. Mɛ̄ɛ̍ nda̍ tōsa̍ a̍ māsāa̍ Chɛ̄lu̍i̍kō yɛ̍, le̍nde̍ ko̍ nda̍ tōsa̍ a̍ māsāa̍ Ma̍kɛ̍dāā ni̍.

²⁹O̍ ko̍ŋ kɔ̍ɔ̍lī, mi̍ Chɔ̄ɔ̍sūāā nda̍ pūa̍a̍ ndūa̍a̍ ā cha᷄ŋ vɛ̍lɛ̄ Ma̍kɛ̍dāā ma̍ kūā Li̍bi̍nāā chi̍e̍e̍ ma̍ kɔ̍ de᷅l ndu̍ chōo̍.

³⁰Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ma᷅l nda̍ vɛ̄lɛ̄ Li̍bi̍nāā o̍ bā a̍ māsa̍ ndāa̍ lātūlu̍. Wānā o̍ wāna̍ wa̍ lo̍ŋ ma̍ dīū nda̍ kpo̍u̍. Lo̍ŋ bɛ̍ɛ̍ wānā pi᷅lɛ̍ bɛ̍ɛ̍ ā mɛ̄i̍ le̍. Ma̍ tōsā a̍ māsa̍ ndāa̍ mɛ̄ɛ̍ nda̍ tōsa̍ a̍ māsāa̍ Chɛ̄lu̍i̍kō yɛ̍.

³¹O̍ ko̍ŋ kɔ̍ɔ̍lī, ma̍ māl vɛ̄lɛ̄ Li̍bi̍nāā ma̍ kɔ̍ ba̍lū La̍ki̍sī, ma̍ dēl ndu̍ chōo̍.

³²Mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ nda̍ vɛ̄lɛ̄ kpāāyāa̍ ma̍ bīī La̍ki̍sī. Ndu̍yɛ̍ pāa̍le̍ di̍i̍ŋ ndɔ̄lē sɔ̍ŋgɔ̄le̍ŋ le̍ wa̍ le̍ŋ ni̍. Ma̍ dīū wānāa̍ wa̍ lo̍ŋ nda̍ kpo̍u̍ mɛ̄ɛ̍ nda̍ tōsa̍ a̍ Li̍bi̍nāā yɛ̍. Wānā pi᷅lɛ̍ bɛ̍ɛ̍ ā mɛ̄i̍ le̍.

³³A̍ te̍le̍ŋ ko̍ŋ, mi̍ Ho̍lūām, māsā bɛ̍ndōo̍ Kɛ̍sɛ̄ɛ̄ o̍ hu᷅ŋ a̍ so̍vɛ̄i̍ya̍a̍ ndūa̍a̍ le̍ wāŋnda̍ La̍ki̍si̍ mālāa̍, kɛ̍ mi̍ Chɔ̄ɔ̍sūāā nda̍ pūa̍a̍ ndūa̍a̍ ā yām ndu̍ a̍ so̍vɛ̄i̍ya̍a̍ ndūa̍a̍ ma̍ dīū nda̍ kpo̍u̍.

³⁴O̍ ko̍ŋ kɔ̍ɔ̍lī, mi̍ Chɔ̄ɔ̍sūāā nda̍ pūa̍a̍ ndūa̍a̍ ā mālnu̍ŋ vɛ̍lɛ̄ La̍ki̍sī, ma̍ kɔ̍ ba̍lū Ɛ̍ki̍lɔ̄ŋ, ma̍ dēl nda̍ chōo̍.

³⁵Pāa̍le̍ pi᷅lɛ̍lē lēŋ ma̍ bīī E̍ki̍lɔ̄ŋ, ma̍ dīū wānāa̍ wa̍ lo̍ŋ nda̍ kpo̍u̍ mɛ̄ɛ̍ nda̍ tōsa̍ a̍ La̍ki̍sī yɛ̍.

³⁶O̍ ko̍ŋ kɔ̍ɔ̍lī, ma̍ māl E̍ki̍lɔ̄ŋ ma̍ hēl Hi̍būlɔ̄ŋ chi̍e̍e̍, ma̍ kɔ̍ de᷅l nda̍ chōo̍.

³⁷Ma̍ bīī Hi̍būlɔ̄ŋ a̍ chi̍e̍e̍ŋ pɔ̍mbɔ᷄ŋ wa̍ ndu̍ i̍kɛ̍i̍ yo̍ŋ. Ma̍ dīī māsa̍ wa̍ Hi̍būlɔ̄ŋ ndo̍ a̍ wānā o̍ wāna̍ wa̍ Hi̍būlɔ̄ŋ, a̍ o̍ chi̍e̍e̍ŋ pɔ̍mbɔ̄ŋ mu᷅ŋ ni̍ŋ. Wānā pi᷅lɛ̍ bɛ̍ɛ̍ ā mɛ̄i̍ le̍. Ma̍ tɛ̄ɛ̄mbūū Hi̍būlɔ̄ŋ mɛ̄ɛ̍ nda̍ to̍sa̍ a̍ E̍ki̍lɔ̄ŋ yɛ̍.

³⁸O̍ ko̍ŋ kɔ̍ɔ̍lī, mi̍ Chɔ̄ɔ̍sūāā nda̍ so̍vɛ̄i̍ya̍a̍ ndūa̍a̍ ā mīīŋgū Dɛ̍bi̍lūīī chi̍e̍e̍ ma̍ kɔ̍ de᷅l ndu̍ chōo̍.

³⁹Ma̍ bīī vɛ̄lɛ̄ Dɛ̍bi̍lūīī a̍ māsa̍ ndāa̍ a̍ chi̍e̍e̍ŋ ndɔ̄ŋ pɔ̍mbɔ᷄ŋ kpo̍u̍. Wānā o̍ wāna̍ wa̍ Dɛ̍bi̍lūīī a̍ o̍ chi̍e̍e̍ŋ pɔ̍mbɔ̄ŋ mu᷅ŋ ni̍ŋ, ma̍ dīū nda̍ kpo̍u̍. Mɛ̄ɛ̍ nda̍ tōsa̍ a̍ Hi̍būlɔ̄ŋ, a̍ Li̍bi̍nāā, a̍ māsāa̍ ndāa̍ lātūlu̍ yɛ̍ le̍nde̍ ko̍ nda̍ tōsa̍ a̍ Dɛ̍bi̍lūīī a̍ māsa̍ ndā bɛ̍ndōo̍ ni̍.

⁴⁰Mi̍ Chɔ̄ɔ̍sūāā nda̍ pūa̍a̍ ndūa̍a̍ ā bīī lɛ̄ŋndē lēŋ kpo̍u̍ o̍ pēmbo᷄ŋ chōo̍, a̍ o̍, pēmbo᷄ŋ lāndɔ᷄ŋndo̍ bā pāa̍le̍ŋ lē chāŋ ndo̍, a̍ o̍ pēmbo᷄ŋ bɛ̄ŋgu̍ bā pāa̍le̍ŋ lē dēl lo̍, a̍ po̍llo̍ bā lūāŋndo̍. Māsāa̍ wa̍ o̍ fo̍ndāŋndā lāŋ nda̍ kpo̍u̍ a̍ wānāā ndāa̍ lātūlu̍ ma̍ dīū nda̍ kpo̍u̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nda̍ yɛ̍. Wānā pi᷅lɛ̍ bɛ̍ɛ̍ ā mɛ̄i̍ yo̍o̍mū le̍.

⁴¹Mi̍ Chɔ̄ɔ̍sūāā nda̍ pūa̍a̍ ndūa̍a̍ ā bīī chi̍o̍o̍ŋ kpo̍u̍ chɔ̍ŋ Ka̍dɛ̍sī Ba̍a̍nīāā chi̍e̍e̍ mbo̍ kūā Ka̍a̍sā, a̍ chɔ̍ŋ o̍ tāndā Ko̍sīɛ̄ŋndo̍ ni̍ŋ mbo̍ kūā Ki̍bīɔ̄ŋ.

⁴²Mi̍ Chɔ̄ɔ̍sūāā nda̍ wāŋnda̍ I̍sɔ̄lūɛ̄ī a̍ bi̍ī māsāā ka̍ŋ kpo̍u̍ a̍ lɛ̄ŋndē ndāle̍ŋ o̍ bālɔ̄ɔ̄ lēpīlɔ̍ɔ̍ bɛ̄ŋgu̍. Kāni̍ fu̍u̍le̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ ndu̍ wa̍ sɔ̍ŋgɔ̄ɔ̍ le̍ nda̍ ni̍.

⁴³O̍ ko̍ŋ kɔ̍ɔ̍lī, mi̍ Chɔ̄ɔ̍sūāā nda̍ wāŋnda̍ I̍sɔ̄lūɛ̄ī a̍ mi̍i̍ŋgū o̍ dɔ̍ɔ̍ŋgɔ̍ɔ̍ Ki̍lkāl.