Read Southern Kisi Chɔ̄ɔ̍sūāā 11 Bible Online

Chɔ̄ɔ̍sūāā 11 - Southern Kisi bible

Chɔ̄ɔ̍sūāā 11

¹Mɛ̄ɛ̍ māsāa̍ Cha̍bīŋ o̍ wa̍ Ha̍sɔ̄ɔ̄ wo̍ ō tūēī a̍ mɛ̄ɛ̍ I̍sɔ̄lūɛ̍i̍ya̍ yēm ya̍a̍mɔ̍ɔ̍wa̍a̍ ndāa̍ yɛ̍, mbo̍ yɔ̄ŋ yōōŋgūla̍ŋ nāa̍ chāāŋāā ndūāā ma̍sāa̍ chūā le̍ mā chūūŋgi̍a̍a̍ so̍vɛ̄i̍ya̍a̍ ndāa̍ nāa̍ pi᷅lɛ̍ mā sɔ̄ŋga̍ a̍ I̍sɔ̄lūɛ̍i̍ya̍. Māsāa̍ o̍ yɔ̍ŋ ka̍ŋ yo̍o̍ŋgūlā lāŋ nda̍ a̍ wa̍ ha̍ā ni̍. Mbo̍ yɔ̄ŋ yōōŋgōo̍ nāa̍ māsāa̍ Cho̍ba̍bī chu̍ā o̍ wa̍ Ma̍dɔ̄ŋ ndo̍, a̍ māsa̍ wa̍ Si̍mi̍lɔ̄ŋ ndo̍, a̍ ho̍ō Ākīsi̍a̍fī.

²Mbo̍ yɔ̄ŋ yōōŋgōo̍ nāa̍ māsāā bɛ̍ndūa̍a̍ chūā o̍ chi̍o̍o̍ŋ o̍ pēmbo᷄ŋ chōo̍ ba᷅ lūāŋndo̍, a̍ māsāa̍ o̍ chi̍o̍o̍ŋ Chɔ̍ɔ̍dāŋ kɔ̍ŋgɔ̍, te̍ wānā hi̍o̍ū Mɛ̄ŋmā Ībūŋga᷄ŋ Kāli̍lī pɛ̍, bā tōūwo̍, a̍ māsāa̍ o̍ chi̍o̍o̍ŋ o̍ pēmbo᷄ŋ bɛ̄ŋgu̍, a̍ māsāa̍ Dɔ̍ɔ̄chi̍e̍e̍ i̍kɛ̍i̍ bā pāa̍le̍ŋ lē dēl lo̍.

³O̍ ko̍ŋ kɔ̍ɔ̍lī, mbo̍ yɔ̄ŋ yōōŋgōo̍ nāa̍ Ke̍na̍na̍i̍tīi̍ya̍ chūā, a̍ wa̍ bā pāa̍le̍ŋ lē chāŋndo̍ wa̍, a̍ ha̍ā bā pāa̍le̍ŋ lē dēl lo̍. Mbo̍ yɔ̄ŋ yōōŋgōo̍ o̍ kāa̍la̍ŋ nda᷅ŋ lo̍. A̍mɔ̍lu̍a̍i̍tīi̍ya̍ a̍ Hi̍ta̍i̍tīi̍ya̍, a̍ Pɛ̍lu̍i̍sa̍i̍tīi̍ya̍, a̍ Chɛ̄bu̍sa̍i̍tīi̍ya̍ o̍ pēmbēi̍ chōo̍, a̍ Hi̍va̍i̍tīi̍ya̍ o̍ Pēmbīī Ha̍mɔ̄ŋnde̍ bɛ̄ŋgu̍ o̍ būŋgɛ̄ī Mi̍si̍pāāve̍ ni᷄ŋ.

⁴Wāŋnda̍ ha̍ā kpo̍u̍, ma̍ chūūŋgīāā so̍vɛ̄i̍ya̍a̍ ndāa̍ chɔ̄ūwa̍ nāa̍ pi᷅lɛ̍, lātūlu̍ a̍ su̍a̍ā chɔ̄ūwa̍, a̍ nyɛ̄lā chɔ̄ūlā su̍a̍a̍ ā nāŋ nda̍ŋ ku̍ndā bɛ̄ndōo̍.

⁵Māsāā bɛ̍ndūa̍a̍ ha̍ā kpo̍u̍ ma̍ dūāū so̍vɛ̄i̍ya̍a̍ ndāa̍ nāa̍ pi᷅lɛ̍ ma̍ chūūŋgi̍āŋ o̍ pīo̍o̍ dīōla̍ŋ Mɛ̍lɔ̄m le̍ sɔ̍ŋgɔ̄ɔ̍ a̍ I̍sɔ̄lūɛ̍i̍ya̍.

⁶Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Chɔ̄ɔ̍sūāā āā, “Sīōōŋīī bi̍ī nya̍ le̍ nda̍ le̍. I̍ cho̍ tōsā mī lā dīu̍ nda̍ kpo̍u̍. Te̍le̍ŋ wa̍ā nu̍a̍ā sīɔ̄dīi̍ nda̍ kpo̍u̍ ā wā ni᷅ŋ ā vīlɛ̍i̍ya̍. Tē sɔ̍ŋgɔ̄ɔ̍ chūū pɛ̍ kpo̍u̍ lā yīmi̍ su̍a̍ā ndāa̍ chɔ̄ūwa̍ pēlo̍ŋ, o̍ ko̍ŋ kɔ̍ɔ̍lī mī lā lōm nyɛ̄m ndāŋ nya̍a̍na᷄ŋndo̍ŋ.”

⁷O̍ ko̍ŋ kɔ̍ɔ̍lī, mi̍ Chɔ̄ɔ̍sūāā chu̍ā so̍vɛ̄i̍ya̍a̍ ndūa̍a̍ kpo̍u̍, ma̍ kɔ̍ de᷅l nda̍ chōo̍ o̍ Pīo̍o̍ Mɛ̍lɔ̄m a̍ te̍le̍ŋ nda̍ ve᷄ kɔ᷅l te̍ wo̍.

⁸Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ I̍sɔ̄lūɛ̍i̍ya̍ kpāāyāa̍ ma̍ yām nda̍. I̍sɔ̄lūɛ̍i̍ya̍ lo̍ nda̍ tōūwɔ̄ɔ̍ a̍ sɔ̍ŋgɔ̄ɔ̍ ha̍a̍a̍, ma̍ kūā a̍ nda̍ Sa̍i̍dɔ̄ŋ, a̍ Mɛ̄sīlūɛ̄fɔ̄tī Me᷅m. O̍ ko̍ŋ kɔ̍ɔ̍lī, ma̍ lō sɔ̍ŋgɔ̄ɔ̍ a̍ nda̍ ha̍a̍a̍ ma̍ kūā a̍ nda̍ ba᷅ pāa̍le̍ŋ lē chāŋ ndo̍ o̍ dɛ̍ŋgbɔ̍ɔ̍ Mi̍si̍pā. Ma̍ dīū nda̍ kpo̍u̍, wānā pi᷅lɛ̍ bɛ̍ɛ̍ ā mɛ̄i̍ le̍.

⁹Mi̍ Chɔ̄ɔ̍sūāā yi̍mī su̍a̍ā ndāa̍ chɔ̄ūwa̍ pēlo̍ŋ, o̍ ko̍ŋ kɔ̍ɔ̍lī, mbo̍ lūām nyɛ̄m ndāŋ nya̍a̍na᷄ŋndo̍ŋ, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍.

¹⁰Ndu̍yɛ̍ a̍ te̍le̍ŋ ko̍ŋ, Ha̍sɔ̄ɔ̄ wa̍ chi̍e̍e̍ lēmāsāa̍ o̍ būŋgɛ̄ī kēŋ ni᷄ŋ ni̍. O̍ ko̍ŋ kɔ̍ɔ̍lī, mi̍ Chɔ̄ɔ̍sūāā nda̍ pūa̍a̍ ndūa̍a̍ ā mīīŋgū o̍ chi̍e̍e̍ bɛ̍ndōo̍ Ha̍sɔ̄ɔ̄, ma̍ kɔ̍ de᷅l ndu̍ chōo̍ ma̍ bīī ndu̍. Ma̍ dīī māsa̍ ndāa̍

¹¹a̍ wānāa̍ wa̍ lo̍ŋ nda̍ kpo̍u̍ wānā pi᷅lɛ̍ bɛ̍ɛ̍ ā mɛ̄i̍ le̍. O̍ ko̍ŋ kɔ̍ɔ̍lī, ma̍ māl Ha̍sɔ̄ɔ̄ o̍ yīŋ mbo̍ ŋūā kpo̍u̍.

¹²Mi̍ Chɔ̄ɔ̍sūāā nda̍ so̍vɛ̄i̍ya̍a̍ ndūa̍a̍ ā bīī chi̍e̍e̍ŋ mu̍ŋ kpo̍u̍ a̍ māsāa̍ ndāa̍ lātūlu̍. Wāna̍ o̍ wāna̍ wa̍ lo̍ŋ ma̍ dīū nda̍ kpo̍u̍. Ma̍ tɛ̄ɛ̄mbūū mu̍ŋ kpo̍u̍ mɛ̄ɛ̍ bu̍ɛ̍ī Mɛ̄lɛ̄ka̍ Ya̍a̍wɛ̄ɛ̄ wo̍ Mūu̍sē o̍ di̍mi̍ pāāndū yɛ̍.

¹³Kɛ̍ chi̍e̍e̍ŋ wa̍ ŋ̄ tāŋgūlāā o̍ pɔ̄mnda̍ŋ chōo̍ wo̍ŋ ki̍nɛ̍i̍ ō fūla̍ o̍ Ha̍sɔ̄ɔ̄ kɔ̍ɔ̍lī, o̍ pīlɛ̍ bɛ̍ɛ̍ I̍sɔ̄lūɛ̍i̍ya̍ lu᷄m te̍.

¹⁴Nyɛ̄m kɛ̄ndɛ᷄ŋ wa̍ o̍ chi̍e̍e̍ŋ bɛ̍ndūŋ mu᷅ŋ ni᷄ŋ ndo̍ŋ ki̍nɛ̍i̍ a̍ chɔ̄lūa̍a̍ wa̍ lo̍ŋ nda̍ mi̍ I̍sɔ̄lūɛ̍i̍ya̍ chūā le̍ nda̍ pi̍la̍. Kɛ̍ wānā o̍ wāna̍ wa̍ lo̍ŋ ma̍ dīū nda̍ kpo̍u̍ ō pīlɛ̍ bɛ̍ɛ̍ ā mɛ̄i̍ le̍.

¹⁵Ndu̍yɛ̍ le̍nde̍ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ di̍mu̍l bu̍ɛ̍ī ndɔ̄ɔ̍ Mūu̍sē ni̍, mi̍ Mūu̍sē di̍mūl Chɔ̄ɔ̍sūāā, mi̍ Chɔ̄ɔ̍sūāā to̍sā. Nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē le̍ tōsāa̍, mi̍ Chɔ̄ɔ̍sūāā chi̍ī tōsā.

¹⁶Mi̍ Chɔ̄ɔ̍sūāā bi̍ī lɛ̄ŋndē lēŋ kpo̍u̍. Lɛ̄ŋndē īpēmbūle̍ŋ, a̍ lɛ̄ŋndē po̍lte̍ŋ kpo̍u̍, a̍ lɛ̄ŋndē Ko̍sīɛ̄ŋnde̍ŋ kpo̍u̍, a̍ o̍ pēmbo᷄ŋ bɛ̄ŋgu̍ bā pāa̍le̍ŋ lē dēl lo̍, a̍ o̍ Chɔ̍ɔ̍dāŋ kɔ̍ŋgɔ̍, a̍ pēmbo᷄ŋ I̍sɔ̄lūɛ̄ī, a̍ o̍ pēmbūŋ mu᷅ŋ bɛ̄ŋgu̍.

¹⁷Chɔ̍ŋ o̍ pēmbēi̍ Ha̍la̍kī o̍ lɛ̄ŋndē I̍dɔ̄mnde̍ŋ īkɛ̄i̍, mbo̍ kūā a̍ Ba̍līka̍dī chi̍e̍e̍ o̍ dɛ̍ŋgbɔ̍ɔ̍ Le̍ba̍nɔ̄ŋ o̍ Pēmbīī Ha̍mɔ̄ŋnde̍ lēbɛ̄ŋgu̍ lɛ̄ŋndē lēŋ kpo̍u̍ mi̍ Chɔ̄ɔ̍sūāā bi̍ī le̍ŋ. Mi̍ Chɔ̄ɔ̍sūāā sɔ̍ŋgā a̍ māsāā bɛ̍ndūa̍a̍ wa̍ o̍ lɛ̄ŋndē lēŋ ni᷄ŋ nda̍ le̍ te̍le̍ŋ vi̍lɛ̄ī. Ndu̍yɛ̍ mbo̍ bīī nda̍ mbo̍ dīū nda̍ kpo̍u̍.

¹⁹O̍ lɛ̄ŋndē lēŋ ni᷄ŋ ki̍nɛ̍i̍ mɛ̄ɛ̍ Ki̍bīɔ̄ŋ nāa̍ Hi̍va̍i̍tīi̍ya̍ ā wa̍ wa̍ mbo̍ tōsā chɛ̄la᷅ŋ kɔ̄l nyūlōo̍ a̍ I̍sɔ̄lūɛ̍i̍ya̍. Kɛ̍ chi̍e̍e̍ŋ bɛ̍ndūŋ tɔ᷄ŋ kpo̍u̍ mi̍ I̍sɔ̄lūɛ̍i̍ya̍ yām nda̍.

²⁰Mɛ̄lɛ̄ka̍ Ya̍a̍wɛ̄ɛ̄ pi̍la̍ ndu̍ o̍o̍ ki̍ndi̍ wāŋnda̍ ha̍ā bo̍lle̍ ni̍ le̍ sɔ̍ŋgɔ̄ɔ̍ a̍ I̍sɔ̄lūɛ̍i̍ya̍, kāni̍ fu̍u̍le̍ ndu̍ o̍o̍ ye̍e̍ma̍ mī I̍sɔ̄lūɛ̍i̍ya̍ nda̍ a̍a̍ di̍u̍ nda̍ kpo̍u̍ īnyīɛ̍ɛ̍ bɛ̍ɛ̍ nda̍ a̍a̍ tu̍i̍i̍nūŋ nda̍ chōo̍ le̍. Ndu̍yɛ̍ le̍nde̍ ndu̍ o̍o̍ di̍mu̍l Mūu̍sē le̍ tōsāa̍ ni̍.

²¹O̍ ko̍ŋ kɔ̍ɔ̍lī, mi̍ Chɔ̄ɔ̍sūāā ya᷅m vɛ̄lɛ̄ wānāā dīāllūŋ kālāā bɛ̄ndūāā nda̍ a̍a̍ ve̍e̍lū āā A̍na̍ka̍i̍tīi̍ya̍ wa̍ mbo̍ tɛ̄ɛ̄mbūū nda̍ kpo̍u̍, a̍ chi̍e̍e̍ŋ ndāŋ bɛ̍ndūŋ nda̍ wa̍ wo̍ŋ lātūlu̍. Chi̍e̍e̍ŋ wāŋnda̍ ha̍ā ā wa̍ wo̍ŋ ŋ̍ cho̍ mu᷅ŋ ni̍. Hi̍būlɔ̄ŋ, a̍ Dɛ̍bi̍lūīī, a̍ A̍na̍bī, a̍ o̍ pēmbo᷄ŋ Chu̍dā cho̍o̍ kpo̍u̍ a̍ I̍sɔ̄lūɛ̄ī. Mi̍ Chɔ̄ɔ̍sūāā ya᷅m wāŋnda̍ ha̍ā mbo̍ tɛ̄ɛ̄mbūū nda̍ a̍ chi̍e̍e̍ŋ ndāŋ bɛ̍ndo̍ŋ lātūlu̍.

²²A̍na̍ka̍i̍tīi̍nɔ̍ pi᷅lɛ̍ bɛ̍ɛ̍ ō mɛ̄i̍ o̍ lɛ̄ŋndē lēŋ ni᷄ŋ te̍ mɛ̄ɛ̍ ā pɔ̄mbūa̍a̍ wa̍ Ka̍a̍sā chi̍e̍e̍ a̍ ka̍a̍tī, a̍ A̍si̍dɔ̍dī wa̍, ma̍ lō yōōmū.

²³Mi̍ Chɔ̄ɔ̍sūāā bi̍ī lɛ̄ŋndē lēŋ kpo̍u̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē yɛ̍. O̍ ko̍ŋ kɔ̍ɔ̍lī, mbo̍ pīɔ̄ū le̍ŋ yu̍ŋgu̍la̍ I̍sɔ̄lūɛ̍i̍la̍ŋ tɛ̄ɛ̄ŋ a̍ būŋga᷄ŋ. Yu̍ŋgu̍ o̍ yu̍ŋgu̍ būŋgɛ̄i̍ I̍ nda̍. O̍ ko̍ŋ kɔ̍ɔ̍lī, mi̍ I̍sɔ̄lūɛ̍i̍ya̍ pɛ̄ŋgī a̍ sɔ̍ŋgɔ̄ɔ̍.