Read Southern Kisi Chɔ̄ɔ̍sūāā 14 Bible Online

Chɔ̄ɔ̍sūāā 14 - Southern Kisi bible

Chɔ̄ɔ̍sūāā 14

¹Mi̍ Ɛ̄li̍a̍a̍sā, wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, a̍ Chɔ̄ɔ̍sūāā, a̍ wāŋ bānāa̍ wa̍ yu̍ŋgu̍la̍ I̍sɔ̄lūɛ̍i̍la̍ŋ bōlle̍ wa̍ ā pīɔ̄ū I̍sɔ̄lūɛ̍i̍ya̍ lɛ̄ŋndē Ke̍nāŋnde̍ŋ Chɔ̍ɔ̍dāŋ le̍e̍lōo̍ bā pāa̍le̍ŋ lē dēl lo̍.

²Ma̍ wūū nyɔ̄ɔ̍ mɛ̄ɛ̍ nda̍ wūū nu̍a̍ā kōllo̍ yɛ̍ le̍ sīnāa̍ būŋgɛ̄ī yu̍ŋgu̍ o̍ yu̍ŋgu̍ o̍ nɔ̍ mbō sɔ̄la̍ ve̍. Kāni̍ fo̍ndōle̍, le̍nde̍ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ di̍mu̍l Mūu̍sē ni̍ māā ā nɔ̄ mā pīɔ̍u̍ yu̍ŋgu̍la̍ ŋɔ̍ma̍hīɔ̍ɔ̍lu̍la̍ŋ a̍ yu̍ŋgu̍ Mānāa̍sē wo̍ ku̍ndāa̍ pīlɔ̍ɔ̍ lɛ̄ŋndē lēŋ tɛ̄ɛ̄ŋ.

³Mūu̍sē ndu̍ o̍o̍ chi̍i̍ ni᷅ŋ yu̍ŋgu̍la̍ ti̍ɔ̍ɔ̍ŋnda̍ŋ, a̍ yu̍ŋgo̍o̍ pīlɔ̍ɔ̍ ku̍ndāa̍ pīlɔ̍ɔ̍ lɛ̄ŋnde̍ŋ le̍ nda̍le̍ŋ kē Chɔ̍ɔ̍dāŋ le̍e̍lōo̍ bā pāa̍le̍ŋ lē chāŋ ndo̍. Kɛ̍ yu̍ŋgu̍ Li̍va̍īyo̍ ndu̍, Mūu̍sē ke̍ nda̍ lēlɛ̄ŋ o̍ lēlɛ̄ŋ yu̍ŋgu̍la̍ŋ lā pīlɛ̍ la̍ŋ tɛ̄ɛ̄ŋ te̍.

⁴Mi̍ wānāa̍ fu̍la̍ o̍ pūlāle̍ Chōo̍sɛ̍le̍ŋ chōo̍ wa̍ ā sīmnu᷄ŋ yu̍ŋgu̍la̍ŋ lā tīɔ̍ɔ̍ŋ, yu̍ŋgu̍ Mānāa̍sē wo̍ a̍ yu̍ŋgu̍ E̍fi̍lūēmndo̍. Kɛ̍ yu̍ŋgu̍ Li̍va̍īyo̍ ndu̍ nda̍ sɔ̄la̍ le̍lɛ᷅ŋ o̍ lēlɛ̄ŋ te̍. Mɛ̄ɛ̍ chi̍o̍o̍ŋ ŋ̄ ti᷄ŋ mi̍ Mūu̍sē ke᷅ nda̍ le̍ mā wa̍ lo̍ŋ, o̍ ko̍ŋ kɔ̍ɔ̍lī, a̍ fo̍ndālā māndāā lāchɔ̄lūla̍ŋ le̍ chɔ̄lūāā ndāa̍ māndāa̍.

⁵Nu̍a̍ā wāŋnda̍ I̍sɔ̄lūɛ̄ī a̍ pi̍ɔ̍u̍ lɛ̄ŋndē lēŋ ni̍, ma̍ pīɔ̄ū le̍ŋ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē yɛ̍.

⁶Bōōndi̍i̍ I̍sɔ̄lūɛ̍i̍ya̍ ā wa̍ Ki̍lkāl ve̍, mi̍ pūa̍a̍ pu᷅m, fūlāa̍ o̍ yu̍ŋgu̍ Chu̍dā chōo̍ a̍ ku̍ā nāa̍ Chɔ̄ɔ̍sūāā chu̍a̍ pāa̍le̍ pi᷅lɛ̍. Po᷄ pi᷅lɛ̍ wa̍ nda̍ tɛ̄ɛ̄ŋ dīōla̍ŋ āā Ke̍lɛ̍bī. Fi̍nyā ndɔ̍ dīōla̍ŋ āā Chɛ̍fu̍nɛ̄ɛ̄, fūlāa̍ o̍ ku̍nda̍ Kēnīsa̍i̍tī wo̍ ni᷄ŋ. Mi̍ Ke̍lɛ̍bī di̍mūl Chɔ̄ɔ̍sūāā āā, “Bōōndi̍i̍ na̍a̍ ŋ̄ wa̍ Ka̍dɛ̍sī Ba̍a̍nīāā chi̍e̍e̍ ve̍ mi̍ Mūu̍sē su̍a̍ā sōndo̍ Mɛ̄lɛ̄ka̍ Ya̍a̍wɛ̄ɛ̄ wo̍ mbo̍ dīmī īsɔ̄ɔ̍ a̍ na̍a̍ nūm o̍kɔ̄ɔ̄. Ā sīnā nyɛ᷅ o̍ di̍mi̍ ko̍ŋ ndo̍.

⁷Ya̍ Ke̍lɛ̍bī, I̍ wa̍ wɔ̄sīla̍ŋ be̍le̍-hi̍ɔ̍ɔ̍lu̍, mi̍ bu̍ɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ Mūu̍sē o̍ vi̍ām yā su̍a̍ŋsu̍a̍ŋnde̍ŋ o̍ lɛ̄ŋnde̍ŋ nde̍ŋ ni᷄ŋ, chɔ̄nɔ᷄ŋndo̍ Ka̍dɛ̍sī Ba̍a̍nīāā. Ndu̍yɛ̍ mɛ̄ɛ̍ ya̍ I̍ mīīŋgu̍ a̍ ko̍na̍a̍, nyɛ̄ o̍ nyɛ̄ ya̍ I̍ hu̍ŋ chɔ᷅, mi̍ kɔ̍ do̍o̍ŋ ndu̍ ko̍na̍, nyɛ̄ o̍ nyɛ̄ I̍ mɛ̍i̍ le̍.

⁸Kɛ̍ pūa̍a̍ na̍a̍ ŋ̄ hīŋ su̍a̍ŋsu̍a̍ŋnde̍ŋ na̍a̍ nda̍ā wa̍ nda̍, ma̍ kɔ̍ lu̍e̍ī wāŋnda̍ sīōōŋnde̍ ta̍u̍ a̍ ko̍na̍ nda̍ dɔ̄ɔ̍ŋ ndo̍. Kɛ̍ ya̍ ya̍ mi̍ du̍a̍ū tīīnda̍ŋ nūu̍ o̍ Mɛ̄lɛ̄ka̍ ni̍ŋ a̍ kɔ̄l nūu̍ kpo̍u̍.

⁹O̍ ko̍ŋ, mi̍ Mūu̍sē chu̍ēl la̍ būŋgɛ̄i̍ āā, ‘Le̍ tīīnda᷄ŋ ŋ̄ dɔ̄ū o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ a̍ kɔ̄l nūmndo̍ kpo̍u̍ wo̍, lɛ̄ŋndē ō lɛ̄ŋndē ŋ̄ bālu̍ lēchōo̍, ō chō nu̍m nde̍ŋ kē mī lē wa̍ le̍ nūm a̍ yu̍ŋgu̍la̍ nu̍mnda̍ŋ le̍ fɛ̍ɛ̍ŋ.’

¹⁰Bōōndi̍i̍ na̍a̍ I̍sɔ̄lūɛ̍i̍ya̍ ŋ̄ wa̍ kɔ̄la̍ŋ o̍ po̍llo̍ ni᷄ŋ nde̍, o̍ ko̍ŋ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē dīōmnda̍ŋ nda̍ŋ ni̍. Chɔ̍ŋ a̍ te̍le̍ŋ ko̍ŋ mbo̍ kɛ̄sī ya̍ yōōmū le̍ wɔ̄sīla̍ŋ be̍le̍-hi̍ɔ̍ɔ̍lu̍ a̍ lā ŋūɛ̍ɛ̍nu̍. To̍fa̍ wɔ̍ ni᷅ŋ mɛ̄ɛ̍ ya̍ I̍ cho̍ yɛ̍. I̍ cho̍ ni᷅ŋ wɔ̄sīla̍ŋ be̍le̍-ŋɔ̍ma̍a̍ a̍ lā ŋūɛ̍ɛ̍nu̍.

¹¹Ndu̍yɛ̍ pāa̍le̍ hāūle᷅ŋ bɛ̍ɛ̍ I̍ cho̍ wɔ̄ a̍ dīāllūŋ kālā mɛ̄ɛ̍ ya̍ I̍ wa̍ a̍ te̍le̍ŋ Mūu̍sē ve᷅m ya̍ su̍a̍ŋsu̍a̍ŋnde̍ŋ ndo̍ yɛ̍. Ā yɔ᷄ŋ bɛ̍ɛ̍ le̍ kɔ̄lā wāā o̍ chɔ̄ū, I̍ cho̍ wɔ̄ a̍ dīāllūŋ kālā māā te̍le̍ŋ ko̍ŋ.

¹²Le̍la̍ŋ ke̍ ya̍ ni̍ko̍ lɛ᷅ŋndē īpēmbūlē Mɛ̄lɛ̄ka̍ Ya̍a̍wɛ̄ɛ̄ o̍ chūe̍l la̍ būŋgɛ̄i̍ pāa̍le̍ le̍ŋ nde̍ŋ. Nūm pi̍la̍ tu̍e̍ī ni᷅ŋ pāa̍le̍ le̍ŋ a̍ A̍na̍ka̍i̍tīi̍ya̍ ha̍ā o̍kɔ̄ɔ̄, a̍ mɛ̄ɛ̍ nda̍ tāŋgu̍l chi̍e̍e̍ŋ ndāŋ bɛ̍ndo̍ŋ ma̍ bālū mu̍ŋ a̍ kpākīla̍ lāpōūtā kālā ka̍lāla̍ŋ yɛ̍. Kɛ̍ ndu̍yɛ̍ a̍ ko̍ŋ kpo̍u̍ tē Mɛ̄lɛ̄ka̍ Ya̍a̍wɛ̄ɛ̄ o̍ cho̍ ya̍ kɔ̄ɔ̄lī pɛ̍, I̍ cho̍ nda̍ yōmɔ̄ɔ̄ mī so̍li̍ nda̍ lo̍ŋ kpo̍u̍ mɛ̄ɛ̍ ndu̍ pi̍la̍ di̍mi̍ yɛ̍.”

¹³O̍ ko̍ŋ, mi̍ Chɔ̄ɔ̍sūāā du̍a̍ū Ke̍lɛ̍bī po̍ Chɛ̍fu̍nɛ̄ɛ̄ wo̍ sa̍lā, mbo̍ kē ndu̍ Hi̍būlɔ̄ŋ māā nyɛ̄ ndɔ̄.

¹⁴Chɔ̍ŋ a̍ te̍le̍ŋ ko̍ŋ mi̍ Hi̍būlɔ̄ŋ o̍ si̍mnu᷄ŋ chi̍e̍e̍ Ke̍lɛ̍bī wo̍, Ke̍lɛ̍bī, po̍ Chɛ̍fu̍nɛ̄ɛ̄ wo̍, fūlāa̍ o̍ ku̍nda̍ Kēnīsa̍i̍tī wo̍ chōo̍. Kāni̍ fu̍u̍le̍ le̍ tīīnda᷄ŋ o̍ dɔ̍ū a̍ kɔ̄l ndɔ̄ɔ̍ kpo̍u̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ, Mɛ̄lɛ̄ka̍ I̍sɔ̄lūɛ̍i̍ya̍ wo̍.

¹⁵Kɛ̍ lɔ̍ɔ̍pa̍ mi̍ chi̍e̍e̍ ko̍ŋ ō sīmnu᷄ŋ chi̍e̍e̍ Ke̍lɛ̍bī wo̍, nu̍a̍ā nda̍ a̍a̍ ve̍e̍lū ndu̍ pāāndū ni̍ āā chi̍e̍e̍ A̍bā wo̍. Po̍ ndu̍ o̍o̍ nɔ̍ ko̍ŋ di̍ōla̍ŋ āā A̍bā wo̍ wāna̍ tɔ̍ɔ̍ pīla̍ o̍ wa̍ A̍na̍ka̍i̍tīi̍ya̍ tɛ̄ɛ̄ŋ ni̍ O̍ ko̍ŋ kɔ̍ɔ̍lī, mi̍ lɛ̄ŋnde̍ŋ lē pɛ̄ŋgī a̍ sɔ̍ŋgɔ̄ɔ̍.