Read Southern Kisi Chɔ̄ɔ̍sūāā 16 Bible Online

Chɔ̄ɔ̍sūāā 16 - Southern Kisi bible

Chɔ̄ɔ̍sūāā 16

¹Yu̍ŋgu̍la̍ fu̍la̍ o̍ pūlāle̍ Chōo̍sɛ̍le̍ŋ chōo̍ la̍ŋ būŋgɛ̄ī ndɛ̄i̍ pɛ̍ŋgu̍la̍ ndɔ̄la̍ŋ la̍ cho̍ la᷅ŋ ni̍. Chɔ̍ŋ o̍ Pīo̍o̍ Chɔ̍ɔ̍dāŋ, Chɛ̄lu̍i̍kō i̍kɛ̍i̍ o̍ pēēla̍ pɔ̍mbɔ̄la̍ŋ Chɛ̄lu̍i̍kō bā pāa̍le̍ŋ lē chāŋ ndo̍, mi̍ lā kūā o̍ po̍llo̍ ni᷄ŋ. Mɛ̄ɛ̍ la̍ chɛ̍ŋ Chɛ̄lu̍i̍kō mi̍ lā kūā a̍ lɛ̄ŋndē īpēmbūle̍ŋ, mi̍ lā fūūlūū Bɛ̍tɛ̄ɛ̄l chi̍e̍e̍ di̍.

²Mi̍ pɛ̄ŋgu̍la̍ ndāla̍ŋ lā cha᷄ŋ Bɛ̍tɛ̄ɛ̄l o̍ nɔ̍ vɛ̄lɛ̄ dīōla̍ŋ āā Lu̍u̍sī wo̍ mi̍ lā kūā a̍ Ātālɔ̍tī chi̍e̍e̍, nāa̍ A̍ka̍i̍tīi̍ya̍ ā chō wa̍.

³Chɔ̄nɔ᷄ŋndo̍ lo̍ŋ mi̍ lā tūūsū bā pāa̍le̍ŋ lē dēl lo̍ o̍ būŋgɛ̄ī Cha̍fi̍lɛ̍i̍tīi̍ya̍ ni᷄ŋ mi̍ lā hīāū o̍ būŋgɛ̄ī Bɛ̄tī Ho̍lɔ̄ŋnde̍ ni᷄ŋ ma̍to̍ū. O̍ ko̍ŋ kɔ̍ɔ̍lī, mi̍ lā kūā a̍ Kɛ̍sɛ̄ɛ̄ chi̍e̍e̍ mi̍ lā kɔ̍ mɛ̍ɛ̍lū o̍ Pēe̍ Mɛ̄ŋmā Īhɛ᷄llo̍ Mɛ̄dītālu̍e̍e̍nīāā.

⁴Pūa̍a̍ Chōo̍sɛ̍ wa̍, Mānāa̍sē nda̍ E̍fi̍lūēm, būŋgɛ̄ī yu̍ŋgu̍la̍ ndāla̍ŋ lā sɔ̄la̍ ve̍ i̍ cho̍ ke̍ŋ ni̍.

⁵Yu̍ŋgu̍la̍ yɛ̍ yɛ̍la̍ fu̍la̍ o̍ yu̍ŋgu̍ E̍fi̍lūēmndo̍ chōo̍ la̍ŋ būŋgɛ̄ī ndɛ̄i̍ I̍ cho̍ he̍ī ni̍. Pɛ̄ŋgu̍la̍ būŋgɛ̄ī ndɛ̄i̍ bā pāa̍le̍ŋ lē chāŋ ndo̍ mi̍ lā cha᷄ŋ Ātālɔ̍tī A̍dā, Bɛ̄tī Ho̍lɔ̄ŋ lu̍ām.

⁶Chɔ̍ŋ lo̍ŋ mi̍ lā fūūlūū o̍ Pēe̍ Mɛ̄ŋmā Īhɛ᷄llo̍ Mɛ̄dītālu̍e̍e̍nīāā. Chɔ̍ŋ Mīkīmɛ̍ta̍tī chi̍e̍e̍ bā lūāŋndo̍ mi̍ pɛ̄ŋgu̍la̍ būŋgɛ̄ī ndɛ̄i̍ lā mūli̍ŋ ba᷅ pāa̍le̍ŋ lē chāŋ ndo̍ kūmbū Tāānātī Si̍lɔ̄ɔ̄ chi̍e̍e̍ wo̍, mi̍ lā hīāū Cha̍no̍wāā chi̍e̍e̍.

⁷Chɔ̍ŋ Cha̍no̍wāā chi̍e̍e̍ mi̍ lā tūāl a̍ Ātālɔ̍tī, mi̍ lā kūā a̍ Na̍a̍lūā. O̍ ko̍ŋ kɔ̍ɔ̍lī, mi̍ la̍ kɔ̍ pi̍la̍ŋ Chɛ̄lu̍i̍kō chi̍e̍e̍ mi̍ lā kɔ̍ mɛ̍ɛ̍lū o̍ Pīo̍o̍ Chɔ̍ɔ̍dāŋ.

⁸Mi̍ pɛ̄ŋgu̍la̍ŋ lā cha᷄ŋ Ta̍pūāā chi̍e̍e̍ mi̍ lā kūā bā pāa̍le̍ŋ lē dēl lo̍, mi̍ lā kūā o̍ pēē pɔ̍mbɔ̄ɔ̍ Ka̍nāā, mi̍ lā kɔ̍ mɛ̍ɛ̍lū o̍ Pēe̍ Mɛ̄ŋmā Īhɛ᷄llo̍ Mɛ̄dītālu̍e̍e̍nīāā.

⁹Chi̍e̍e̍ŋ bɔ̍ɔ̍ bɔ̍ɔ̍ a̍ sɔ̄ndɔ̄kɔ̍ltā ndɔ̄la̍ŋ lātūlu̍, o̍ būŋgɛ̄i̍ yu̍ŋgu̍ Mānāa̍sē wo̍ ni᷄ŋ ŋ̍ wa̍ ni̍, kɛ̍ mi̍ Chɔ̄ɔ̍sūāā ke᷅ yu̍ŋgu̍ E̍fi̍lūēmndo̍ kpo̍u̍.

¹⁰Kɛ̍ wāŋnda̍ E̍fi̍lūēm a̍ nɔ̍la̍ mā sōli̍ Ke̍na̍na̍i̍tīi̍ya̍ a̍ wa̍ Kɛ̍sɛ̄ɛ̄ chi̍e̍e̍ wa̍ le̍. Mɛ̍ɛ̍ nyɛ̄ ko̍ŋ to̍sa̍ ni̍ mi̍ Ke̍na̍na̍i̍tīi̍ya̍ ā wā pāa̍le̍ hāūle᷅ŋ wāŋnda̍ E̍fi̍lūēm tɛ̍ɛ̄ŋ. Kɛ̍ mi̍ wāŋnda̍ E̍fi̍lūēm a̍ si̍i̍ŋgūū Ke̍na̍na̍i̍tīi̍ya̍ chīa̍a̍ ndā.