Read Southern Kisi Chɔ̄ɔ̍sūāā 17 Bible Online

Chɔ̄ɔ̍sūāā 17 - Southern Kisi bible

Chɔ̄ɔ̍sūāā 17

¹Chōo̍sɛ̍ po̍ ndɔ̍ tāso̍o̍ wa̍ Mānāa̍sē ni̍. Le̍ he̍ī, mi̍ Chɔ̄ɔ̍sūāā ke᷅ yu̍ŋgu̍ Mānāa̍sē wo̍ lɛ̄ŋnde̍ŋ le̍ nda̍le̍ŋ. Mānāa̍sē ko̍ŋ po̍ ndɔ̍ tāso̍o̍ wa̍ Māka̍yā ni̍. Māka̍yā ndu̍ o̍o̍ ve̍lū Ki̍li̍a̍a̍dī ni̍. Ku̍u̍ba̍nɔ̍ chɔ̄ūwo̍ Māka̍yā o̍ wa̍ ni̍. O̍ ko̍ŋ, mi̍ Chɔ̄ɔ̍sūāā ke᷅ ndu̍ būŋgɛ̄ī Ki̍li̍a̍a̍dīve̍ a̍ būŋgɛ̄ī Ba̍a̍sīāŋnde̍, Chɔ̍ɔ̍dāŋ le̍e̍lōo̍ bā pāa̍le̍ŋ lē chāŋ ndo̍.

²O̍ ko̍ŋ kɔ̍ɔ̍lī, mi̍ Chɔ̄ɔ̍sūāā ke᷅ yu̍ŋgu̍ Mānāa̍sē wo̍ bā pāa̍le̍ŋ lē dēl lo̍ lɛ̄ŋnde̍ŋ Chɔ̍ɔ̍dāŋ le̍e̍lōo̍ bā pāa̍le̍ŋ lē dēl lo̍. Mānāa̍sē po̍ Chōo̍si̍ɔ̍ɔ̍ pūa̍a̍ ndūa̍a̍ ā pīli̍a̍a̍ a̍ wa̍ ha̍ā ni̍. Ābīɛ̍ɛ̍sā, a̍ Hɛ̍lɛ̍kī, a̍ A̍si̍lūɛ̄ɛ̄, a̍ Si̍ɛ̍kɛ̄m, a̍ Hɛ̍fā, a̍ Si̍ɛ̍mi̍dā. Pūa̍a̍ ka̍ŋ kpo̍u̍ mi̍ yu̍ŋgu̍la̍ ndāla̍ŋ lā sɔ̄lā būŋga᷄ŋ.

³Mānāa̍sē yɛ̍ ndu̍ ve̍lū Māka̍yā ni̍, Māka̍yā ve̍lū Ki̍li̍a̍a̍dī ni̍, Ki̍li̍a̍a̍dī ndu̍ ve̍lū Hɛ̍fā ni̍, Hɛ̍fa̍ ve̍lū Sɛ̄lōfɛ̍ha̍dī ni̍. Sɛ̄lōfɛ̍ha̍dī ko̍ŋ ndu̍ ndu̍ o̍o̍ vi̍lu̍ wa̍nā pɔ̍nɔ̍ le̍ mɛ̄ɛ̍ wāŋ lāāndūa̍a̍. Ndu̍ o̍o̍ nɔ̍ wāŋ lāāndūa̍a̍ ā ŋūɛ̍ɛ̍nu̍. Wāŋ lāāndūāā kāŋ cho̍ ha̍ā ni̍, Ma̍a̍lāā, a̍ Nu̍u̍wā, a̍ Hɔ̍ki̍lāā a̍, Mi̍li̍kāā, a̍ Tɛ̍sāā.

⁴Pāa̍le̍ pi᷅lɛ̍, mi̍ wāŋ lāāndūāā ŋūɛ̍ɛ̍nu̍a̍a̍ ha̍ā ā kūā nāa̍ Ɛ̄li̍a̍a̍sā, wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ chūā, a̍ Chɔ̄ɔ̍sūāā po̍ Nu᷅ŋndo̍, a̍ wāŋ bānāā I̍sɔ̄lūɛ̍i̍ya̍. Ma̍ di̍mūl nda̍ āā, “Mi̍ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ di̍mūl Mūu̍sē sīndɛ̄ māā na̍a̍ bɛ̍ɛ̍ ō ke̍ na̍a̍ lɛ̄ŋnde̍ŋ mɛ̄ɛ̍ yēmāa̍ nāa̍ ā sɔ̄la̍ yɛ̍.” O̍ ko̍ŋ, mi̍ Chɔ̄ɔ̍sūāā to̍sā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ di̍mu̍l ndu̍ yɛ̍. Mbo̍ kē nda̍ lɛ̄ŋnde̍ŋ le̍ nda̍le̍ŋ mɛ̄ɛ̍ o̍ ke̍ yēmāa̍ ndāa̍ yɛ̍.

⁵Mɛ̄ɛ̍ nyɛ̄ ko̍ŋ to̍sa̍ ni̍ mi̍ yu̍ŋgu̍ Mānāa̍sē wo̍ sɔ̄lā būŋga᷄ŋ tɔ̍ Chɔ̍ɔ̍dāŋ le̍e̍lōo̍ bā pāa̍le̍ŋ lē dēl lo̍, o̍ ko̍ŋ kɔ̍ɔ̍lī, a̍ būŋgāŋ mūu̍ŋndo̍ŋ, būŋgɛ̄ī Ki̍li̍a̍a̍dīve̍ a̍ būŋgɛ̄ī Ba̍a̍sīāŋnde̍, Chɔ̍ɔ̍dāŋ le̍e̍lōo̍ bā pāa̍le̍ŋ lē chāŋ ndo̍.

⁶Kāni̍ fu̍u̍le̍, wāŋ lāāndūa̍a̍ fu̍la̍ o̍ yu̍ŋgu̍ Mānāa̍sē wo̍ ni᷄ŋ nda̍ bɛ̍ɛ̍ mi̍ Chɔ̄ɔ̍sūāā ke᷅ nda̍ lɛ̄ŋnde̍ŋ mɛ̄ɛ̍ o̍ ke̍ yēmāa̍ ndāa̍ yɛ̍. Mi̍ Chɔ̄ɔ̍sūāā ke᷅ yu̍ŋgu̍ Mānāa̍sē wo̍ bā pāa̍le̍ŋ lē dēl lo̍ lɛ̄ŋndē Ki̍li̍a̍a̍dīle̍ŋ.

⁷Būŋgɛ̄ī yu̍ŋgu̍ Mānāa̍sē wo̍ sɔ̄la̍ ve̍ mi̍ ī cha̍ŋ o̍ pɛ̄ŋgu̍la̍ŋ a̍ būŋgɛ̄i̍ yu̍ŋgu̍ A̍sīɛ̄ɛ̄ wo̍, mi̍ ī kūā a̍ Mīchīmɛ̍tāā chi̍e̍e̍, hīōūwɔ̄ɔ̍ Si̍ɛ̍kɛ̄m, bā pāa̍le̍ŋ lē chāŋ ndo̍. O̍ ko̍ŋ kɔ̍ɔ̍lī mi̍ pɛ̄ŋgu̍la̍ būŋgɛ̄ī ndɛ̄i̍ lā tūūsū bā tōūwo̍ mi̍ lā kūā a̍ tāndā wāŋnda̍ Ɛ̄nīta̍pu̍wāā.

⁸Yu̍ŋgu̍ Mānāa̍sē wo̍ ndu̍ o̍o̍ nɔ̍ lɛ̄ŋndē Ta̍pūāāle̍ŋ ni̍. Kɛ̍ ndu̍yɛ̍ Ta̍pūāā pi̍la̍, o̍ cho̍ o̍ pɛ̄ŋgu̍la̍ŋ a̍ būŋgɛ̄i̍ yu̍ŋgu̍ Mānāa̍sē wo̍ ve̍ mi̍ nda̍ a̍a̍ ke᷅ yu̍ŋgu̍ E̍fi̍lūēmndo̍.

⁹Chɔ̍ŋ lo̍ŋ, mi̍ pɛ̄ŋgu̍la̍ būŋgɛ̄i̍ yu̍ŋgu̍ Mānāa̍sē wo̍ lā tūāl a̍ pīo̍o̍ dīōla̍ŋ Ka̍nāā. Chi̍e̍e̍ŋ cho̍ o̍ pēē ko̍ŋ bā tōūwo̍, o̍ būŋgɛ̄i̍ yu̍ŋgu̍ Mānāa̍sē wo̍ ni᷄ŋ ndo̍ŋ, yu̍ŋgu̍ E̍fi̍lūēmndo̍ nɔ̍ mu̍ŋ ni̍. Chɔ̍ŋ vɛ̍lɛ̄ lo̍ŋ mi̍ lā hēēlū, a̍ pēē pɔ̍mbɔ̄ kōŋ bā lūāŋndo̍, mi̍ lā kɔ̍ mɛ̍ɛ̍lū o̍ Pēe̍ Mɛ̄ŋmā Īhɛ᷄llo̍ Mɛ̄dītālu̍e̍e̍nīāā.

¹⁰Būŋgɛ̄i̍ yu̍ŋgu̍ E̍fi̍lūēm ndo̍ ndi̍ cho̍ bā tōūwo̍, mi̍ būŋgɛ̄i̍ yu̍ŋgu̍ Mānāa̍sē wo̍ ī wā bā lūāŋndo̍. Pēe̍ mɛ̄ŋmā īhɛ᷄llo̍ Mɛ̄dītālu̍e̍e̍nīāā cho̍ pɛ̄ŋgu̍ būŋgɛ̄i̍ yu̍ŋgu̍ Mānāa̍sē wo̍ bā pāa̍le̍ŋ lē dēl lo̍ ni̍. Mi̍ būŋgɛ̄i̍ yu̍ŋgu̍ Mānāa̍sē wo̍ ī bɔ̄ŋā a̍ būŋgɛ̄i̍ yu̍ŋgu̍ A̍sīɛ̄ɛ̄ wo̍ bā lūāŋndo̍. O̍ ko̍ŋ kɔ̍ɔ̍lī, mi̍ ī bɔ̄ŋā vɛ̄lɛ̄ a̍ būŋgɛ̄i̍ yu̍ŋgu̍ I̍sa̍a̍kā wo̍ bā pāa̍le̍ŋ lē chāŋ ndo̍.

¹¹Mi̍ yu̍ŋgu̍ Mānāa̍sē wo̍ sɔ̄lā chi̍o̍o̍ŋ ŋ̄ ti᷄ŋ a̍ sɔ̄ndɔ̄kɔ̍ltā chi̍e̍e̍ŋ mu̍ŋ o̍ būŋgɛ̄i̍ yu̍ŋgu̍ I̍sa̍a̍kā wo̍ tɛ̄ɛ̄ŋ a̍ būŋgɛ̄i̍ yu̍ŋgu̍ A̍sīɛ̄ɛ̄ wo̍. Chi̍e̍e̍ŋ mu̍ŋ ŋ̍ cho̍ mu᷅ŋ ni̍. Bɛ̄tī Si̍āŋ a̍ sɔ̄ndɔ̄kɔ̍ltā ndɔ̄la̍ŋ, a̍ I̍bi̍līām, a̍ sɔ̄ndɔ̄kɔ̍ltā ndɔ̄la̍ŋ, a̍ wānāa̍ cho̍ Dɔ̍ɔ̄ wa̍, a̍ wānāa̍ cho̍ o̍ sɔ̄ndɔ̄kɔ̍ltā Dɔ̍ɔ̄la̍ŋ nda̍, a̍ wānāa̍ cho̍ Ɛ̍ni̍dɔ̄ɔ̄ wa̍ a̍ wānāa̍ cho̍ o̍ sɔ̄ndɔ̄kɔ̍ltā Ɛ̍ni̍dɔ̄ɔ̄ la̍ŋ ni̍ŋ nda̍, a̍ wānāa̍ cho̍ Tāāna̍kī wa̍, a̍ wānāa̍ cho̍ o̍ sɔ̄ndɔ̄kɔ̍ltā Tāāna̍kī la̍ŋ ni᷄ŋ nda̍, a̍ wānāa̍ cho̍ Mɛ̍ki̍dɔ̄ɔ̄ wa̍ a̍ wānāa̍ cho̍ o̍ sɔ̄ndɔ̄kɔ̍ltā Mɛ̍ki̍dɔ̄ɔ̄ la̍ŋ ni᷄ŋ nda̍.

¹²Kɛ̍ ndu̍yɛ̍ yu̍ŋgu̍ Mānāa̍sē wo̍ nɔ̄la̍ mā sōli̍ Ke̍na̍na̍i̍tīi̍ya̍ a̍ wa̍ o̍ chi̍e̍e̍ŋ mu̍ŋ ni᷄ŋ nda̍ le̍. O̍ ko̍ŋ, mi̍ Ke̍na̍na̍i̍tīi̍ya̍ hīāū lāchī a̍ nda̍ wāa̍ tɛ̄ɛ̄ŋ.

¹³Kɛ̍ mɛ̄ɛ̍ te̍le̍ŋ ti̍ŋ hīōū, mi̍ I̍sɔ̄lūɛ̍i̍ya̍ sɔ̄lā kpāāyāa̍, ma̍ sīīŋgūū Ke̍na̍na̍i̍tīi̍ya̍ chīa̍a̍ ndā. Kɛ̍ ā sōli̍ lɛ̍ nda̍ kpo̍u̍ o̍ lɛ̄ŋndē lēŋ ni᷄ŋ te̍.

¹⁴Pāa̍le̍ pi᷅lɛ̍, mi̍ wānāa̍ fu̍la̍ o̍ pūlāle̍ Chōo̍sɛ̍le̍ŋ chōo̍ wa̍ ā kūā nāa̍ Chɔ̄ɔ̍sūāā chu̍a̍. Ma̍ dīmūl ndu̍ āā, “Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ mi̍ ŋ̄ kūī ta̍u̍ ta̍u̍. Nūm pi̍la̍ che᷅ mɛ̄ɛ̍ nāa̍ ŋ̄ chō ku̍ndā yɛ̍ ā mīī na̍a̍ būŋgɛ̄i̍ kē ī pīlɛ̍?”

¹⁵Mi̍ Chɔ̄ɔ̍sūāā mu̍lī āā, “Mɛ̄ɛ̍ nya̍ dīmi̍ māā lā chō ku̍ndā ta̍u̍ lɛ̄ŋndē īpēmbūle̍ŋ E̍fi̍lūēm le̍ cho̍ le̍ tu̍u̍ a̍ nya̍ le̍ yɛ̍, mɛ̄ɛ̍ lā kɔ̍ fɛ̍ɛ̍yā yōndō kālā Pɛ̍lu̍i̍sa̍i̍tīi̍ya̍ a̍ wāŋnda̍ Lu̍ɛ̍fēm, mbō wa̍ nyɛ̄ nyā.”

¹⁶O̍ ko̍ŋ, ma̍ dīmūl Chɔ̄ɔ̍sūāā āā, “Le̍nde̍ kpe̍e̍kpe̍i̍, i̍ cho̍ ni̍, lɛ̄ŋndē īpēmbūle̍ŋ E̍fi̍lūēm le̍ cho̍ le̍tu̍u̍ a̍ na̍a̍ le̍. Ndu̍yɛ̍ Ke̍na̍na̍i̍tīi̍ya̍a̍ cho̍ o̍ lɛ̄ŋndē dɛ̍ŋgbɛ̍le̍ le̍ŋ ni᷄ŋ nda̍, nda̍ yɔ̍nūŋ ni̍ māā ha̍ā Bɛ̄tī Si̍āŋ chi̍e̍e̍ a̍ lɛ̄ŋnde̍ ba̍lu̍ ndu̍ le̍ŋ a̍ ha̍ā o̍ lɛ̄ŋndē dɛ̍ŋgbɛ̍le̍ŋ Chɛ̍si̍lūɛ̄ɛ̄ ā chō wānāā kpāāyāā bɛ̍ndū. Nyɛ̄m ndāŋ nya̍a̍na᷄ŋ nda̍ kūā o̍ chɔ̄ūwo̍ wo̍ŋ bɛ̍ɛ̍ a̍ chīli̍ŋndo̍ŋ ŋ̍ cho̍ ŋ̄ tōōsīāā, ni̍.”

¹⁷Mi̍ Chɔ̄ɔ̍sūāā di̍mūl yu̍ŋgu̍la̍ ti̍ɔ̍ɔ̍ŋnda̍ŋ nda̍ŋ, E̍fi̍lūēm a̍ Mānāa̍sē āā, “Le̍nde̍ i̍ cho̍ ni̍, lā chō ku̍ndā ta̍u̍ ndu̍yɛ̍ lā nɔ̄ kpāāyāa̍ ta̍u̍. Lā nɔ̍ mī lā sɔ̄la̍ būŋgɛ̄i̍ ī pīlɛ̍ ko̍ni̍ le̍.

¹⁸I̍ cho̍ nya̍ lɛ̄ŋndē īpēmbūle̍ŋ chɔ̄ɔ̄lū kē o̍ būŋgɛ̄ī nyɛ̄i̍ chōo̍. Mi̍ chē bɛ̍ɛ̍ mbo̍ wā yōndō kālāa̍ kɛ̍ lā nɔ̄lā mī lā fɛ̄ɛ̄ya̍ ndu̍ mī lā tɛ̄ɛ̄nu̍u̍ ndu̍ kpo̍u̍ mbō wa̍ le̍ nya̍. Ndu̍yɛ̍ mi̍ chē bɛ̍ɛ̍ mi̍ wānāa̍ cho̍ lo̍ŋ nda̍ ā nɔ̄ nyɛ̄m nyāāna᷄ŋ cho̍ ŋ̄ tōōsīāā a̍ chīli̍ŋndo̍ŋ ndo̍ ndu̍yɛ̍ ma̍ wā wānāā kpāāyāā bɛ̍ndū kɛ̍ ndu̍yɛ̍ lā chō nda̍ sōlī o̍ lɛ̄ŋndē ndāle̍ŋ ni᷄ŋ kpo̍u̍.”