Read Southern Kisi Chɔ̄ɔ̍sūāā 20 Bible Online

Chɔ̄ɔ̍sūāā 20 - Southern Kisi bible

Chɔ̄ɔ̍sūāā 20

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Chɔ̄ɔ̍sūāā, āā,

²“Mi̍ di̍mūl Mūu̍sē lɔ̍ɔ̍ ko̍ŋ māā ō dīmu̍l nya̍ mī lā hɛ̄li̍ chi̍o̍o̍ŋ ŋ̄ ti᷄ŋ mī mu̍ŋ wa̍ te̍ŋge̍ŋ. Le̍ tē sūlɛ̍i̍ fūla̍ wāŋndo̍ o̍ bā pɛ̍ mbō dīī cha᷄ŋ ndɔ̍, wānā ko̍ŋ ō nyāānu̍ŋ o̍ chi̍e̍e̍ŋ mu̍ŋ ō pīlɛ̍ ni᷄ŋ nāa̍ wānā yɔ᷅ŋ ndu̍ nyɛ̄ le̍ wa̍, yɔ̄ŋi̍ wāna̍ o̍ di̍ī ko̍ŋ ndo̍ wāna̍ ndɔ̄ɔ̍ ō yɔ̍ŋ ndu̍ nyɛ̄ sɔ̍ŋgɔ̍ ko̍ŋ.

⁴Tē ō nyāānu̍ŋ o̍ chi̍e̍e̍ŋ mu᷅ŋ ō pīlɛ̍ ni᷄ŋ pɛ̍, ō kūɛ̄ nāa̍ nda̍ kɔ̄ɔ̄sā a̍ wāŋnda̍ o̍ dīō kpāki̍ chi̍o̍o̍ sōndōo̍ wa̍, ō kɔ̍ chɔ᷅m wāŋ bānāā o̍ cho̍ kōmāl lo̍ŋ nda̍ nyɛ᷄ yɔ̍nu̍ŋ ndo̍. Tē ō chɔ᷄m nda̍ pɛ̍ kpo̍u̍, wāŋ bānāā kāŋ ā chɛ᷄l ndu̍ le̍ wāa̍ o̍ chi̍e̍e̍ ko̍ŋ ni᷄ŋ, o̍ ko̍ŋ kɔ̍ɔ̍lī, ā ke᷄ ndu̍ yīya̍a̍ ā wa̍ lo̍ŋ nda̍ nda̍ā.

⁵Kɛ̍ tē wāna̍ o̍ di̍ī ko̍ŋ ndo̍ wāna̍ ndɔ̄ɔ̍ tōl ndu̍ kɔ̄ɔ̄lī lo̍ŋ pɛ̍ wāŋ bānāā kāŋ ā nɔ̍ mā ma̍l wāna̍ sūlɛ̍i̍ fūla̍ ko̍ŋ o̍ bā wo̍, wāna̍ ku̍ɛ̄ ndu̍ kɔ̄ɔ̄lī wo̍ o̍ bā le̍. Ā nɔ̄ mā mānda̍ ndu̍. Kāni̍ fu̍u̍le̍ sūlɛ̍i̍ fu̍la̍ ndu̍ o̍ bā ni̍. Ō tōsa̍ ndi̍ a̍ sīɛ̄lɛ̍i̍ mbō dīī ndu̍ le̍.

⁶Kɛ̍ ndu̍yɛ̍ wāna̍ sūlɛ̍i̍ fūla̍ ko̍ŋ o̍ bā wo̍ ō nɔ̄ mbō lo̍ o̍ chi̍e̍e̍ kōŋ ni̍ŋ ha̍a̍a̍ mā hu᷄ŋ kɔ̍ɔ̍sā a̍ ndu̍ wa᷅ŋnda̍ lāchī, le̍ mā sāālu̍ŋ tē sūlɛ̍i̍ fu̍la̍ ndu̍ o̍ bā ni̍. Ndu̍yɛ̍ ō nɔ̄ mbō lo̍ lo̍ŋ ha̍a̍a̍, mī wāna̍ cho̍ māsa̍ wānāa̍ so̍lī sa̍lāa̍ o̍ Mɛ̄lɛ̄ka̍ lo̍ a̍ te̍le̍ŋ ko̍ŋ ndo̍ ō vī. O̍ ko̍ŋ, mī wānā ko̍ŋ mīīŋgu̍ o̍ ndu̍ lo̍ chi̍e̍e̍. Le̍la̍ŋ di̍mu̍l ni̍ko̍ I̍sɔ̄lūɛ̍i̍ya̍ mā hɛ̄li̍ chi̍e̍e̍ŋ mu᷅ŋ.”

⁷O̍ ko̍ŋ, mi̍ wāŋnda̍ I̍sɔ̄lūɛ̄ī a̍ hɛ̍lī chi̍o̍o̍ŋ ŋ̄ ŋgāa̍ Chɔ̍ɔ̍dāŋ le̍e̍lōo̍ bā pāa̍le̍ŋ lē dēl lo̍. Chi̍e̍e̍ŋ mu̍ŋ ŋ̍ cho̍ mu᷅ŋ ni̍. Kɛ̍dɛ̍sī, o̍ būŋgɛ̄ī Kāli̍līve̍ ni᷄ŋ o̍ lɛ̄ŋndē īpēmbūle̍ŋ Nāfi̍ta̍lī, a̍ Si̍ɛ̍kɛ̄m, o̍ lɛ̄ŋndē īpēmbūle̍ŋ E̍fi̍lūēm, a̍ Kīlīāātī A̍bā, o̍ nɔ̍ vɛ̄lɛ̄ dīōla̍ŋ āā Hi̍būlɔ̄ŋ ndo̍, o̍ lɛ̄ŋndē īpēmbūle̍ŋ Chu̍dā.

⁸O̍ ko̍ŋ kɔ̍ɔ̍lī, ma̍ hɛ̄lī vɛ̄lɛ̄ chi̍o̍o̍ŋ ŋ̄ ŋgāa̍ Chɔ̍ɔ̍dāŋ le̍e̍lōo̍ bā pāa̍le̍ŋ lē chāŋndo̍. Chi̍e̍e̍ŋ mu̍ŋ ŋ̍ cho̍ mu᷅ŋ ni̍. Bɛ̍sɛ̄ɛ̄ o̍ po̍llo̍ ni᷄ŋ Chɛ̄lu̍i̍kō i̍kɛ̍i̍, o̍ būŋgɛ̄i̍ yu̍ŋgu̍ Lūbɛ᷅ŋ ndo̍ ni᷄ŋ, a̍ Lu̍a̍mɔ̍tī, o̍ tāndā Ki̍li̍a̍a̍dī wo̍ ni᷄ŋ o̍ būŋgɛ̄i̍ yu̍ŋgu̍ Ka̍a̍dī wo̍ ni᷄ŋ, a̍ Ko̍lāŋ, o̍ tāndā Ba̍a̍sīāŋndo̍ ni᷄ŋ o̍ būŋgɛ̄i̍ yu̍ŋgu̍ Mānāa̍sē wo̍ ni᷄ŋ.

⁹Chi̍o̍o̍ŋ mu᷅ŋ ŋ̄ chō ŋ̄ hɛ̄līa̍ŋ le̍ I̍sɔ̄lūɛ̍i̍ya̍ kpo̍u̍, lātūlu̍ a̍ mīālāa̍ cho̍ nda̍ tɛ̄ɛ̄ŋ nda̍. Le̍ tē sūlɛ̍i̍ fūla̍ wānā pi᷅lɛ̍ o̍ bā nda̍ tɛ̄ɛ̄ŋ pɛ̍ mbō dīī cha᷄ŋ ndɔ̍ wānā ko̍ŋ nyāānu̍ŋ o̍ chi̍e̍e̍ŋ mu̍ŋ ō pīlɛ̍ ni᷄ŋ nāa̍ wānā yɔ᷅ŋ ndu̍ nyɛ̄ le̍ wa̍, yɔ̄ŋi̍ wāna̍ o̍ di̍ī ko̍ŋ ndo̍ wāna̍ ndɔ̄ɔ̍ wō yɔ᷄ŋ ndu̍ nyɛ̄ sɔ̍ŋgɔ̍ ko̍ŋ. Lo̍ŋ wānā ko̍ŋ ō lō ni̍ ha̍a̍a̍ mā hu᷄ŋ kɔ̍ɔ̍sā a̍ ndu̍ wa᷅ŋnda̍ o̍ hɔ̄l le̍ mā sāālu̍ŋ tē sūlɛ̍i̍ fu̍la̍ ndu̍ o̍ bā ni̍.