Read Southern Kisi Chɔ̄ɔ̍sūāā 21 Bible Online

Chɔ̄ɔ̍sūāā 21 - Southern Kisi bible

Chɔ̄ɔ̍sūāā 21

¹Bōōndi̍i̍ pi᷅lɛ̍, mi̍ I̍sɔ̄lūɛ̍i̍ya̍ ā chūūŋgi̍āŋ Si̍lɔ̄ɔ̄ chi̍e̍e̍ o̍ lɛ̄ŋndē Ke̍nāŋnde̍ŋ ni᷄ŋ. Mɛ̄ɛ̍ nda̍ chūūŋgi̍āŋ, mi̍ wāŋ bānāa̍ cho̍ yu̍ŋgu̍la̍ yɛ̍ yɛ̍la̍ fu̍la̍ o̍ yu̍ŋgu̍ Li̍va̍īyo̍ ni᷄ŋ nda̍ŋ bōlle̍ wa̍ ā hūŋ nāa̍ Ɛ̄li̍a̍a̍sā chu̍a̍ wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ a̍ Chɔ̄ɔ̍sūāā po᷄ Nu᷅ŋ ndo̍ a̍ wāŋ bānāa̍ wa̍ yu̍ŋgu̍la̍ I̍sɔ̄lūɛ̍i̍ya̍ bo̍lle̍ wa̍. Ma̍ dīmūl nda̍ āā, “Bōōndi̍i̍ pi᷅lɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē māā o̍ ke̍ yu̍ŋgu̍ nāa̍ chi̍o̍o̍ŋ ŋ̄ ti̍ŋ le̍ mī ŋ̄ cha᷄l lo̍ŋ, o̍ ko̍ŋ kɔ̍ɔ̍lī, a̍ fo̍ndāŋnda̍ ba̍lu̍ chi̍e̍e̍ŋ mu̍ŋ le̍ chɔ̄lūa̍a̍ dīo̍la̍ŋ nda̍ŋ le̍ chɔ̄lūāā nāa̍.”

³O̍ ko̍ŋ, mi̍ wāŋnda̍ I̍sɔ̄lūɛ̄ī a̍ to̍sā nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nda̍ wo̍. Ma̍ kē Li̍va̍īya̍ chi̍o̍o̍ŋ, a̍ fo̍ndāŋnda̍ ba̍lu̍ chi̍e̍e̍ŋ mu̍ŋ le̍ chɔ̄lūa̍a̍ dīo̍la̍ŋ nda̍ŋ o̍ būŋgāŋ nda̍ŋ ni̍ŋ.

⁴Yu̍ŋgu̍la̍ Li̍va̍īla̍ fu̍la̍ o̍ ku̍nda̍ Ko̍ha̍tī wo̍ chōo̍ la̍ŋ fɛ̍ɛ̍ŋ la̍ sɔ̍la̍ chi̍o̍o̍ŋ ŋ̍ nda̍ŋ. E̍lɔ̄ŋ, wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, yu̍ŋgu̍la̍ fu̍la̍ o̍ pūlālē ndɔ̄le̍ŋ chōo̍ la̍ŋ, mi̍ lā sɔ̄lā chi̍o̍o̍ŋ tɔ̍ a̍ ŋ̄ ŋgāa̍ o̍ būŋgɛ̄i̍ yu̍ŋgu̍ Chu̍dā ni᷄ŋ, a̍ o̍ būŋgɛ̄i̍ yu̍ŋgu̍ Si̍mīɔ̄ŋ ndo̍ ni᷄ŋ, a̍ o̍ būŋgɛ̄i̍ yu̍ŋgu̍ Bɛ̍ŋnja̍mīŋ ndo̍ ni᷄ŋ.

⁵O̍ ko̍ŋ kɔ̍ɔ̍lī mi̍ ku̍ndā Ko̍ha̍tīi̍ya̍ ā pīli̍a̍a̍ ā sɔ̄lā chi̍o̍o̍ŋ tɔ̍ o̍ būŋgɛ̄i̍ yu̍ŋgu̍ E̍fi̍lūēm ndo̍ ni᷄ŋ a̍ o̍ būŋgɛ̄i̍ yu̍ŋgu̍ Da᷅ŋ ndo̍ ni᷄ŋ a̍ o̍ būŋgɛ̄i̍ yu̍ŋgu̍ Mānāa̍sē wo̍ bā pāa̍le̍ŋ lē dēl lo̍ ni᷄ŋ.

⁶O̍ ko̍ŋ kɔ̍ɔ̍lī, mi̍ ku̍ndā Kɛ̄sīɔ̄na̍i̍tīi̍ya̍ ā sɔ̄lā chi̍o̍o̍ŋ tɔ̍ a̍ ŋ̄ ŋgāa̍ o̍ būŋgɛ̄i̍ yu̍ŋgu̍ I̍sa̍a̍kā ni᷄ŋ a̍ o̍ būŋgɛ̄i̍ yu̍ŋgu̍ A̍sīɛ̄ɛ̄ wo̍ ni᷄ŋ a̍ o̍ būŋgɛ̄i̍ yu̍ŋgu̍ Nāfi̍ta̍lī yo̍ ni̍ŋ, a̍ o̍ būŋgɛ̄i̍ yu̍ŋgu̍ Mānāa̍sē wo̍ bā pāa̍le̍ŋ lē dēl lo̍ ni᷄ŋ o̍ tāndā Ba̍a̍sīāŋndo̍ ni᷄ŋ.

⁷O̍ ko̍ŋ kɔ̍ɔ̍lī, mi̍ ku̍ndā Mɛ̍lu̍a̍la̍i̍tīi̍ya̍ ā sɔ̄lā chi̍o̍o̍ŋ tɔ̍ a̍ ŋ̄ mūu̍ŋ o̍ būŋgɛ̄i̍ yu̍ŋgu̍ Lūbɛ᷅ŋ ndo̍ ni᷄ŋ a̍ o̍ būŋgɛ̄i̍ yu̍ŋgu̍ Ka̍a̍dī wo̍ ni᷄ŋ a̍ o̍ būŋgɛ̄i̍ yu̍ŋgu̍ Sɛ̍bu̍lɔ̄ŋ ndo̍ ni᷄ŋ.

⁸Mi̍ wāŋnda̍ I̍sɔ̄lūɛ̄ī a̍ ke᷅ yu̍ŋgu̍ Li̍va̍īyo̍ chi̍o̍o̍ŋ mu᷅ŋ kpo̍u̍ a̍ fo̍ndāŋnda̍ ba̍lu̍ chi̍e̍e̍ŋ mu̍ŋ le̍ chɔ̄lūa̍a̍ dīo̍la̍ŋ nda̍ŋ.[3] Ma̍ pīɔ̄ū nda̍ chi̍e̍e̍ŋ mu̍ŋ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ di̍mu̍l Mūu̍sē yɛ̍.

⁹Yu̍ŋgu̍la̍ Kɔ̍ha̍tīi̍la̍ fu̍la̍ o̍ yu̍ŋgu̍ Li̍va̍īyo̍ ni᷄ŋ nda̍ŋ nda̍ ke̍le̍ŋa̍ chi̍e̍e̍ŋ tāso̍ŋ sɔ̄lā ni̍. Chi̍e̍e̍ŋ nda̍ sɔ̄la̍ o̍ būŋgɛ̄i̍ yu̍ŋgu̍ Chu̍dā ni᷄ŋ a̍ o̍ būŋgɛ̄i̍ yu̍ŋgu̍ Si̍mīɔ̄ŋ ndo̍ ni᷄ŋ ndo̍ŋ mu̍ŋ ŋ̍ cho̍ mu᷅ŋ ni̍.

¹⁰

¹¹Ma̍ kē nda̍ Hi̍būlɔ̄ŋ o̍ lɛ̄ŋndē īpēmbūle̍ŋ Chu̍dā. Wānāā sūlɛ̍i̍ ī hīālūŋ mā dīī wānā wa̍ chi̍e̍e̍ŋ nda̍ nyāānūŋ ndo̍ŋ,[4] ō pīlɛ̍ Hi̍būlɔ̄ŋ cho̍ ni̍. Nda̍ a̍a̍ ve̍e̍lū ndu̍ bōōndi̍i̍ ke̍ŋ āā chi̍e̍e̍ A̍bā wo̍. A̍bā ko̍ŋ ndu̍ vēlū A̍na̍kī ni̍. Kɛ̍ ndu̍yɛ̍ fo̍nda᷄ŋ ba̍lu̍ chi̍e̍e̍ ko̍ŋ ndo̍ a̍ sɔ̄ndɔ̄kɔ̍ltā ndɔ̄la̍ŋ lātūlu̍, Ke̍lɛ̍bī nda̍ a̍a̍ ke̍ sīndɛ̄ ni̍. Kɛ̍ Hi̍būlɔ̄ŋ pi̍la̍ a̍ fo̍nda̍ ba̍lu̍ ndu̍ le̍ chɔ̄lūa̍a̍ dīo̍la̍ŋ ndo̍ ma̍ kē ku̍ndā Ko̍ha̍tīi̍ya̍. O̍ ko̍ŋ kɔ̍ɔ̍lī, chi̍e̍e̍ŋ ndāŋ mu̍ŋ ŋ̄ pīlɔ̍ŋ ŋ̍ cho̍ mu᷅ŋ ni̍. Li̍bi̍nāā,

¹²

¹³

¹⁴a̍ Cha̍tɛ̄ɛ̄, a̍ Ɛ̄sītɛ̍mo̍wā,

¹⁵a̍ Ho̍lɔ̄ŋ, a̍ Dɛ̍bi̍lūīī,

¹⁶a̍ A̍yīŋ, a̍ Chu̍tāā, a̍ Bɛ̄tī Si̍ɛ̍mɛ̍sī, kpo̍u̍ kpo̍u̍ ā sɔ̄la̍ chi̍o̍o̍ŋ ŋ̄ ŋɔ̄ma̍hīɔ̍ɔ̍lu̍, a̍ fo̍ndāŋnda̍ ba̍lu̍ mu̍ŋ le̍ chɔ̄lūa̍a̍ dīo̍la̍ŋ nda̍ŋ o̍ būŋgāŋ yu̍ŋgu̍la̍ ti̍ɔ̍ɔ̍ŋnda̍ŋ ndāŋ ni᷄ŋ.

¹⁷O̍ ko̍ŋ kɔ̍ɔ̍lī, o̍ būŋgɛ̄i̍ yu̍ŋgu̍ Bɛ̍ŋnja̍mīŋ ndo̍ ni᷄ŋ bɛ̍ɛ̍, mi̍ ku̍ndā Ko̍ha̍tīi̍ya̍ ā sɔ̄lā chi̍o̍o̍ŋ ŋ̄ hīɔ̍ɔ̍lu̍ a̍ fo̍ndāŋnda̍ ba̍lu̍ mu̍ŋ le̍ chɔ̄lūa̍a̍ dīōla̍ŋ nda̍ŋ. Chi̍e̍e̍ŋ ndāŋ mu̍ŋ ŋ̍ cho̍ mu᷅ŋ ni̍. Ki̍bīɔ̄ŋ, a̍ Ɛ̄sīɔ̄ŋkɛ̍bɛ̄,

¹⁸a̍ A̍na̍tɔ̍tī a̍ A̍li̍mɔ̄ŋ.

¹⁹Kpo̍u̍ kpo̍u̍ mi̍ wānāā sōlīāā lāsa̍lāa̍ a̍ fu̍la̍ o̍ pūlāle̍ E̍lɔ̄ŋnde̍ŋ chōo̍ wa̍ ā sɔ̄lā chi̍o̍o̍ŋ tɔ̍ a̍ ŋ̄ ŋgāa̍, a̍ fo̍ndāŋnda̍ ba̍lu̍ mu̍ŋ le̍ chɔ̄lūa̍a̍ dīōla̍ŋ nda̍ŋ.

²⁰O̍ ko̍ŋ kɔ̍ɔ̍lī, mi̍ ku̍ndā Ko̍ha̍tīi̍ya̍ ā tūa̍a̍ ā sɔ̄lā chi̍o̍o̍ŋ ŋ̄ hīɔ̍ɔ̍lu̍ a̍ fo̍ndāŋnda̍ ba̍lu̍ mu̍ŋ le̍ chɔ̄lūa̍a̍ dīo̍la̍ŋ nda̍ŋ o̍ būŋgɛ̄i̍ yu̍ŋgu̍ E̍fi̍lūēm ndo̍ ni᷄ŋ. Chi̍e̍e̍ŋ mu̍ŋ ŋ̍ cho̍ mu᷅ŋ ni̍.

²¹Si̍ɛ̍kɛ̄m, o̍ lɛ̄ŋndē īpēmbūle̍ŋ E̍fi̍lūēm. Wānāā sūlɛ̍i̍ ī hīālūŋ mā dīī wānā wa̍ chi̍e̍e̍ŋ nda̍ nyāānūŋ ndo̍ŋ ō pīlɛ̍ cho̍ Si̍ɛ̍kɛ̄m ni̍. O̍ ko̍ŋ kɔ̍ɔ̍lī, a̍ Kɛ̍sɛ̄ɛ̄,

²²a̍ Kībi̍sām, a̍ Bɛ̄tī Ho̍lɔ̄ŋ.

²³O̍ ko̍ŋ kɔ̍ɔ̍lī, ma̍ sɔ̄lā vɛ̄lɛ̄ chi̍o̍o̍ŋ a̍ fo̍ndāŋnda̍ ba̍lu̍ mu̍ŋ le̍ chɔ̄lūa̍a̍ dīo̍la̍ŋ nda̍ŋ o̍ būŋgɛ̄i̍ yu̍ŋgu̍ Da᷅ŋ ndo̍ ni᷄ŋ. Chi̍e̍e̍ŋ mu̍ŋ ŋ̍ cho̍ mu᷅ŋ ni̍. Ɛ̄li̍tɛ̍kɛ̄ɛ̄ a̍ Ki̍bi̍tɔ̄ŋ

²⁴a̍ A̍i̍cha̍lɔ̄ŋ, a̍ Kātīlu̍i̍mɔ̄ŋ.

²⁵Chi̍e̍e̍ŋ ku̍ndā Ko̍ha̍tīi̍ya̍ ā sɔ̄la̍ o̍ būŋgɛ̄i̍ yu̍ŋgu̍ Mānāa̍sē wo̍ bā pāa̍le̍ŋ lē dēl lo̍ ni̍ŋ ndo̍ŋ ŋ̍ cho̍ mu᷅ŋ ni̍. Tāāna̍kī, a̍ Kātīlu̍i̍mɔ̄m, chi̍o̍o̍ŋ ŋ̄ mūu̍ŋ a̍ fo̍ndāŋnda̍ ba̍lu̍ mu̍ŋ le̍ chɔ̄lūa̍a̍ dīo̍la̍ŋ nda̍ŋ.

²⁶Mɛ̄ɛ̍ kpo̍u̍ kpo̍u̍ mi̍ ku̍ndā Ko̍ha̍tīi̍ya̍ sɔ̄lā vɛ̄lɛ̄ chi̍o̍o̍ŋ tɔ̍, a̍ fo̍ndāŋnda̍ ba̍lu̍ mu̍ŋ le̍ chɔ̄lūa̍a̍ dīo̍la̍ŋ nda̍ŋ.

²⁷Ku̍ndā Kɛ̄sīɔ̄na̍i̍tīi̍yāa̍ fu̍la̍ o̍ yu̍ŋgu̍ Li̍va̍ī yo̍ ni᷄ŋ ndo̍ ma̍ sɔ̄lā chi̍o̍o̍ŋ ŋ̄ mūu̍ŋ a̍ fo̍ndāŋnda̍ ba̍lu̍ mu̍ŋ le̍ chɔ̄lūa̍a̍ dīōla̍ŋ nda̍ŋ, o̍ būŋgɛ̄i̍ yu̍ŋgu̍ Mānāa̍sē wo̍ bā pāa̍le̍ŋ lē dēl lo̍ ni᷄ŋ. Chi̍e̍e̍ŋ mu̍ŋ ŋ̍ cho̍ mu᷅ŋ ni̍. Ko̍lāŋ o̍ tāndā Ba̍a̍sīāŋndo̍ ni᷄ŋ. Wānāā sūlɛ̍i̍ ī hīālūŋ mā dīī wānā wa̍ chi̍e̍e̍ŋ nda̍ nyāānūŋ ndo̍ŋ ō pīlɛ̍ cho̍ ko̍lāŋ ni̍. O̍ ko̍ŋ kɔ̍ɔ̍lī, a̍ Bɛ̄ɛ̄sītɛ̍lūā.

²⁸Ma̍ sɔ̄lā vɛ̄lɛ̄ chi̍o̍o̍ŋ ŋ̄ hīɔ̍ɔ̍lu̍ a̍ fo̍ndāŋnda̍ ba̍lu̍ mu̍ŋ le̍ chɔ̄lūa̍a̍ dīo̍la̍ŋ nda̍ŋ o̍ būŋgɛ̄i̍ yu̍ŋgu̍ I̍sa̍a̍kā ni᷄ŋ. Chi̍e̍e̍ŋ mu̍ŋ ŋ̍ cho̍ mu᷅ŋ ni̍. Ki̍sīɔ̄ŋ a̍ Dābɛ̄si̍ɛ̍tī,

²⁹a̍ Cha̍a̍mɔ̍tī, a̍ Ɛ̄nīka̍nīm.

³⁰O̍ ko̍ŋ kɔ̍ɔ̍lī, mi̍ ku̍ndā Kɛ̄sīɔ̄na̍i̍tīi̍ya̍ sɔ̄lā vɛ̄lɛ̄ chi̍o̍o̍ŋ ŋ̄ hīɔ̍ɔ̍lu̍ a̍ fo̍ndāŋnda̍ ba̍lu̍ mu̍ŋ le̍ chɔ̄lūa̍a̍ dīo̍la̍ŋ nda̍ŋ o̍ būŋgɛ̄ī yu̍ŋgu̍ A̍sīɛ̄ɛ̄ ve̍ ni̍ŋ. Chi̍e̍e̍ŋ mu̍ŋ ŋ̍ cho̍ mu᷅ŋ ni̍. Mɛ̍si̍a̍kī a̍ A̍bi̍dɔ̄ŋ,

³¹a̍ Hɛ̄līka̍tī a̍ Lu̍i̍ho̍bī.

³²O̍ ko̍ŋ kɔ̍ɔ̍lī, ma̍ sɔ̄lā vɛ̄lɛ̄ chi̍o̍o̍ŋ ŋ̄ ŋgāa̍ a̍ fo̍ndāŋnda̍ ba̍lu̍ mu̍ŋ le̍ chɔ̄lūa̍a̍ dīo̍la̍ŋ nda̍ŋ o̍ būŋgɛ̄i̍ yu̍ŋgu̍ Nāfi̍ta̍lī yo̍ ni᷄ŋ. Chi̍e̍e̍ŋ mu̍ŋ ŋ̍ cho̍ mu᷅ŋ ni̍. Kɛ̍dɛ̍sī o̍ lɛ̄ŋndē Kāli̍līle̍ŋ ni᷄ŋ. Wānāā sūlɛ̍i̍ ī hīālūŋ mā dīī wānā wa̍ chi̍e̍e̍ŋ nda̍ nyāānūŋ ndo̍ŋ ō pīlɛ̍ cho̍ Kɛ̍dɛ̍sī ni̍. O̍ ko̍ŋ kɔ̍ɔ̍lī, a̍ Hāmīmo̍tī Dɔ̍ɔ̄, a̍ Ka̍a̍tāŋ.

³³Mɛ̄ɛ̍ vēllāa̍ vēllē kpo̍u̍ mi̍ ku̍ndā Kɛ̄sīɔ̄na̍i̍tīi̍ya̍ sɔ̄lā chi̍o̍o̍ŋ tɔ̍ a̍ ŋ̄gāa̍, a̍ fo̍ndāŋnda̍ ba̍lu̍ mu̍ŋ le̍ chɔ̄lūa̍a̍ dīo̍la̍ŋ nda̍ŋ.

³⁴Mi̍ ku̍ndā Mɛ̍lu̍a̍la̍i̍tīi̍ya̍a̍ fu̍la̍ o̍ yu̍ŋgu̍ Li̍va̍ī yo̍ ni᷄ŋ ndo̍ ā sɔ̄lā chi̍o̍o̍ŋ ŋ̄ hīɔ̍ɔ̍lu̍ a̍ fo̍ndāŋnda̍ ba̍lu̍ mu̍ŋ le̍ chɔ̄lūa̍a̍ dīo̍la̍ŋ nda̍ŋ o̍ būŋgɛ̄i̍ yu̍ŋgu̍ Sɛ̍bu̍lɔ̄ŋ nde̍ ni᷄ŋ. Chi̍e̍e̍ŋ mu̍ŋ ŋ̍ cho̍ mu᷅ŋ ni̍. Cho̍ki̍nīɛ̄m, a̍ Ka̍a̍tā,

³⁵a̍ Di̍mi̍nāā, a̍ Na̍ha̍lāl chi̍o̍o̍ŋ ŋ̄ hīɔ̍ɔ̍lu̍, chi̍e̍e̍ o̍ chi̍e̍e̍ a̍ fo̍nda̍ ba̍lu̍ ndu̍ le̍ chɔ̄lūa̍a̍ dīo̍la̍ŋ ndo̍.

³⁶O̍ ko̍ŋ kɔ̍ɔ̍lī, ma̍ sɔ̄lā chi̍o̍o̍ŋ ŋ̄ hīɔ̍ɔ̍lu̍ a̍ fo̍ndāŋnda̍ ba̍lu̍ mu̍ŋ le̍ chɔ̄lūa̍a̍ dīo̍la̍ŋ nda̍ŋ o̍ būŋgɛ̄i̍ yu̍ŋgu̍ Lūbɛ᷅ŋ nde̍ ni̍ŋ. Chi̍e̍e̍ŋ mu̍ŋ ŋ̍ cho̍ mu᷅ŋ ni̍. Bɛ̍sā, a̍ Cha̍ha̍sī,

³⁷a̍ Kɛ̍dɛ̍mɔ̍tī, a̍ Mɛ̄fa̍a̍tī.

³⁸Ma̍ sɔ̄lā vɛ̄lɛ̄ chi̍o̍o̍ŋ ŋ̄ hīɔ̍ɔ̍lu̍ a̍ fo̍ndāŋnda̍ ba̍lu̍ mu̍ŋ le̍ chɔ̄lūa̍a̍ dīo̍la̍ŋ nda̍ŋ o̍ būŋgɛ̄i̍ yu̍ŋgu̍ Ka̍a̍dī ve̍ ni᷄ŋ. Chi̍e̍e̍ŋ mu̍ŋ ŋ̍ cho̍ mu᷅ŋ ni̍. Lu̍a̍mɔ̍tī, o̍ būŋgɛ̄ī Ki̍li̍a̍a̍dī ve̍ ni᷄ŋ. Wānāā sūlɛ̍i̍ ī hīālūŋ mā dīī wānā wa̍ chi̍e̍e̍ŋ nda̍ nyāānūŋ ndo̍ŋ ō pīlɛ̍ cho̍ Lu̍a̍mɔ̍tī ni̍. O̍ ko̍ŋ kɔ̍ɔ̍lī, a̍ Ma̍ha̍nēm,

³⁹a̍ Hɛ̍si̍bɔ̄ŋ a̍ Cha̍sɛ̄ɛ̄.

⁴⁰Ku̍ndā Mɛ̍lu̍a̍la̍i̍tīi̍ya̍, yu̍ŋgu̍ Li̍va̍ī yo̍ ō tɔ̄ɔ̍ chi̍e̍e̍ŋ nda̍ sɔ̄la̍ wo̍ŋ ŋ̄ chō kpo̍u̍ kpo̍u̍ tɔ̍ a̍ ŋ̄ mūu̍ŋ.

⁴¹Mɛ̄ɛ̍ dīōm pīlɛ̍ kpo̍u̍, mi̍ yu̍ŋgu̍la̍ I̍sɔ̄lūɛ̍i̍ya̍ la̍ ke᷅ yu̍ŋgu̍ Li̍va̍ī yo̍ chi̍o̍o̍ŋ be̍le̍-hi̍ɔ̍ɔ̍lu̍ a̍ ŋ̄ ŋɔ̄ma̍a̍ a̍ fo̍ndāŋnda̍ ba̍lu̍ mu̍ŋ le̍ chɔ̄lūa̍a̍ dīo̍la̍ŋ nda̍ŋ o̍ būŋgāŋ nda̍ŋ ni᷄ŋ.

⁴²Chi̍e̍e̍ o̍ chi̍e̍e̍ a̍ fo̍ndāa̍ ō bālāā le̍ chɔ̄lūa̍a̍ dīo̍la̍ŋ.

⁴³Mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ I̍sɔ̄lūɛ̍i̍ya̍ lɛ̄ŋndē o̍ lɛ̄ŋndē o̍ chu̍e̍l fi̍nyāā ndāā ma̍māa̍ sīndɛ̄ būŋgɛ̄i̍ le̍ŋ le̍nde̍ kpɛ̍ kpɛ̍. O̍ ko̍ŋ, mi̍ I̍sɔ̄lūɛ̍i̍ya̍ ā chūā lɛ̄ŋndē lēŋ kpo̍u̍ ma̍ wā lo̍ŋ.

⁴⁴Mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mi̍ I̍sɔ̄lūɛ̍i̍ya̍ yām ya̍a̍mɔ̍ɔ̍wa̍a̍ ndāa̍ kpo̍u̍. Ya̍a̍mɔ̍ɔ̍wa̍a̍ ndāa̍ ō pīlɛ̍ bɛ̍ɛ̍ nɔ̍la̍ nda̍ yōmɔ̄ɔ̄ le̍. Mbo̍ kē I̍sɔ̄lūɛ̍i̍ya̍ kɔ̄l nyūlōo̍ o̍ lɛ̄ŋndē lēŋ ni᷄ŋ kpo̍u̍ mɛ̄ɛ̍ o̍ chu̍e̍l fi̍nyāā ndāā ma̍māa̍ sīndɛ̄ būŋgɛ̄i̍ yɛ̍.

⁴⁵Nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ chu̍e̍l I̍sɔ̄lūɛ̍i̍ya̍ būŋgɛ̄i̍, mbo̍ tōsā kpo̍u̍, ō pīlɛ̍ bɛ̍ɛ̍ ō mɛ̄i̍ mbō kɛ̄ɛ̍ ndu̍ tōsā le̍.