Read Southern Kisi Chɔ̄ɔ̍sūāā 22 Bible Online

Chɔ̄ɔ̍sūāā 22 - Southern Kisi bible

Chɔ̄ɔ̍sūāā 22

¹Mɛ̄ɛ̍ wāŋnda̍ I̍sɔ̄lūɛ̄ī a̍ chi̍i̍ lɛ̄ŋnde̍ŋ Chɔ̍ɔ̍dāŋ le̍e̍lōo̍ bā pāa̍le̍ŋ lē dēl lo̍ le̍ŋ yōmɔ̄ɔ̍ kpo̍u̍, mi̍ Chɔ̄ɔ̍sūāā ve̍e̍lū ni̍ko̍ yu̍ŋgu̍ Lūbɛ᷅ŋ ndo̍ a̍ yu̍ŋgu̍ Ka̍a̍dī wo̍, a̍ yu̍ŋgu̍ Mānāa̍sē wo̍ Ku̍ndāa̍ pīlɔ̍ɔ̍.

²Mbo̍ dīmūl nda̍ āā, “Lā chi̍i̍ nyɛ̄ bu̍ɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ Mūu̍sē o̍ di̍mu̍l nya̍ wo̍ tōsā. Ndu̍yɛ̍ vɛ̍lɛ̄ nyɛ̄ o̍ nyɛ̄ ya̍ I̍ di̍mu̍l nya̍ le̍ tōsāa̍ lā chīi̍ tōsā.

³Nyɛ̄ o̍ nyɛ̄ Mɛ̄lɛ̄ka̍ nyāa̍ Ya̍a̍wɛ̄ɛ̄ o̍ di̍mu̍l nya̍ le̍ tōsāa̍ ō pīlɛ̍ bɛ̍ɛ̍ lā mɛ̄i̍ ndu̍ mī lā kɛ̄ɛ̍ ndu̍ tōsā le̍. Le̍ te̍le̍ŋ vi̍lɛ̄ī lā chō chāāŋāā nyāā I̍sɔ̄lūɛ̍i̍ya̍ mālāa̍ lā me᷄l nda̍ le̍.

⁴Būŋgɛ̄ī Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ chu̍e̍l I̍sɔ̄lūɛ̍i̍ya̍ sīndɛ̄ māā ō chō nda̍ kɔ̄l nyūlōo̍ kē ve̍, mbo̍ pēēlū būŋgɛ̄ī kēŋ mbo̍ kē nda̍ kɔ̄l nyūlōo̍. Le̍la̍ŋ nya̍ lā mīīŋgu̍ ni̍ko̍ o̍ lɛ̄ŋndē nyāle̍ŋ ni᷄ŋ, lē Mūu̍sē, Mɛ̄lɛ̄ka̍ Ya̍a̍wɛ̄ɛ̄ bu̍ɛ̍ī ndɔ̄ɔ̍ o̍ ke̍ nya̍ Chɔ̍ɔ̍dāŋ le̍e̍lōo̍ le̍ŋ.

⁵Kɛ̍ ndu̍yɛ̍, nyɛ̄ o̍ nyɛ̄ Mūu̍sē o̍ di̍mu̍l nya̍ le̍ tōsāa̍, lā pu̍ɛ̍ɛ̍nu᷄ŋ le̍ ndu̍ tōsāa̍ le̍. Mbo̍ dīmūl nya̍ āā, ‘Lā kāāla̍ Mɛ̍lɛ̄ka̍ nyāa̍ Ya̍a̍wɛ̄ɛ̄ mī lā tōsa̍ nyɛ̄ o̍ di̍mu̍l nya̍ wo̍, ndu̍yɛ̍ mī lā chu̍a̍ sāwāla̍ ndɔ̄la̍ŋ. Lā sāāŋgi̍a̍l ndu̍ a̍ kɔ̄ltā nyāla̍ŋ kpo̍u̍, a̍ yēēma̍ŋ nya̍ŋ’ ”

⁶Kɛ̍ lɔ̍ɔ̍pa̍ mi̍ yu̍ŋgu̍la̍ŋ ndāŋ lā māl le̍ kɔ̄la̍ŋ o̍ lɛ̄ŋndē ndāle̍ŋ ni᷄ŋ, mi̍ Chɔ̄ɔ̍sūāā du̍a̍ū nda̍ sa̍lā. Mbo̍ dīmī āā, “Mbɔ̄ māa̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍o̍u̍ la̍chi̍ a̍ nya̍ sa̍lāa̍ dɔ̄wɔ̄ɔ̍ fɔ̍. Lā chō mīīŋgōo̍ o̍ lɛ̄ŋndē nyāle̍ŋ ni᷄ŋ a̍ nyɔ̄ɔ̍ŋ ta̍u̍. Lā chō kɔ̄la̍ŋ a̍ chɔ̄lūa̍a̍ a̍ ka̍ni̍ŋ hu̍mbo̍ŋ, a̍ ko̍o̍līi̍yo̍ŋ, a̍ chīli̍ŋu̍ŋ būlɔ᷄ŋsīi̍ wo̍ŋ a̍ chīli̍ŋu̍ŋ yɔ̍ŋa᷄ŋ, a̍ nyɛ̄ chūɛ̄ɛ̄na᷄ŋndo̍ ta̍u̍. Lā kɔ̍ pi̍ɔ̍ū nyɛ̄m nya̍ bīu̍ mu̍ŋ ya̍a̍mɔ̍ɔ̍wa̍a̍ nyāa̍ o̍ bā wo̍ŋ nya̍ pi̍la̍ tɛ̄ɛ̄ŋ.” O̍ ko̍ŋ kɔ̍ɔ̍lī, ma̍ māl le̍ kɔ̄la̍ŋ o̍ lɛ̄ŋndē ndāle̍ŋ ni̍ŋ. Yu̍ŋgu̍ Mānāa̍sē wo̍ ō wa̍ ō pīɔ̄ūwa᷅ŋ tɛ̍ɛ̄ŋ ku̍ndāla̍ŋ lā tīɔ̍ɔ̍ŋ. Mūu̍sē ndu̍ o̍o̍ ke᷅ ni᷅ŋ ku̍ndāa̍ pīlɔ̍ɔ̍ lɛ̄ŋnde̍ŋ Chɔ̍ɔ̍dāŋ le̍e̍lōo̍ bā pāa̍le̍ŋ lē chāŋ ndo̍ o̍ tāndā Ba̍a̍sīāŋndo̍ ni᷄ŋ. Mi̍ Chɔ̄ɔ̍sūāā ke᷅ ku̍ndā tɔ̄ɔ̍ pīlɔ̍ɔ̍ lɛ̄ŋnde̍ŋ Chɔ̍ɔ̍dāŋ kūmbōo̍ pīlɔ̍ɔ̍ bā pāa̍le̍ŋ lē dēl lo̍, yu̍ŋgu̍la̍ I̍sɔ̄lūɛ̍i̍ya̍ lā pīlɛ̍ la̍ŋ tɛ̄ɛ̄ŋ.

⁷

⁸

⁹Mi̍ yu̍ŋgu̍la̍ŋ ndāŋ Lūbɛ᷅ŋ, a̍ Ka̍a̍dī, ā Mānāa̍sē ku̍ndāa̍ pīlɔ̍ɔ̍ mɛ̄ī I̍sɔ̄lūɛ̍i̍ya̍a̍ tu̍a̍a̍ Si̍lɔ̄ɔ̄ chi̍e̍e̍ o̍ lɛ̄ŋndē Ke̍nāŋnde̍ŋ ni᷄ŋ ma̍ mīīŋgū o̍ lɛ̄ŋndē ndāle̍ŋ ni᷄ŋ Ki̍li̍a̍a̍dī. Lɛ̄ŋndē Mūu̍sē ke̍ nda̍ Chɔ̍ɔ̍dāŋ le̍e̍lōo̍ le̍ŋ le̍ cho̍ le᷅ŋ ni̍. Lɛ̄ŋndē lēŋ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē ni̍ māā ō ke̍ nda̍.

¹⁰Mɛ̄ɛ̍ yu̍ŋgu̍ Lūbɛ᷅ŋ ndo̍ a̍ yu̍ŋgu̍ Ka̍a̍dī wo̍ a̍ yu̍ŋgu̍ Mānāa̍sē wo̍ bā pāa̍le̍ŋ lē dēl lo̍ ā wa̍ mīīŋgōo̍ ma̍ fūūlūū Kɛ̄līlɔ̍tī, Chɔ̍ɔ̍dāŋ nda̍ŋ īkɛ̄i̍, ma̍ tāŋgūl ma̍āŋ kɛ̄ndɛ̄ bɛ̄ndōo̍ lo̍ŋ lɔ̍ɔ̍pa̍ ma̍ tāŋ.

¹¹O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ tu̍ɛ̍ī māā yu̍ŋgu̍la̍ ya̍a̍la̍ŋ ndāŋ lā tāŋgu̍l ma̍āŋndo̍ Kɛ̄līlɔ̍tī chi̍e̍e̍ o̍ Pīo̍o̍ Chɔ̍ɔ̍dāŋ i̍kɛ̍i̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ.

¹²Mɛ̄ɛ̍ wāŋnda̍ I̍sɔ̄lūɛ̄ī a̍ tu̍e̍ī le̍nde̍, nda̍ kpo̍u̍ ma̍ chūūŋgi̍āŋ na̍a̍ pi᷅lɛ̍ Si̍lɔ̄ɔ̄ lo̍ŋ ma̍ kɛ̄ɛ̄sīāā le̍ kɔ̄la̍ŋ sɔ̍ŋgɔ̄ɔ̍ a̍ nda̍.

¹³O̍ ko̍ŋ kɔ̍ɔ̍lī, ma̍ hɛ̄lī wāŋnda̍ ā ti᷄ŋ le̍ nda̍ vīōmɔ̄ɔ̍ māā hɔ̄ltē ndā nāa̍ yu̍ŋgu̍la̍ŋ ndāŋ chu̍a̍. Ma̍ hɛ̄lī Fīni̍ha̍a̍sī, wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, Ɛ̄li̍a̍a̍sā po̍ ndɔ̄ɔ̍, lātu̍lu̍ a̍ wāŋ bānāā kɔ̄l kālu̍a̍a̍ ŋ̄wāŋ tɔ̍ o̍ yu̍ŋgu̍la̍ tɔ̍la̍ŋ tɛ̄ɛ̄ŋ, yu̍ŋgu̍ o̍ yu̍ŋgu̍ wānā pi᷅lɛ̍. Ndu̍yɛ̍ ŋ̄wāŋ tɔ̍ wa̍ ha̍ā, nda̍ wa̍ yu̍ŋgu̍la̍ ndāla̍ yɛ̍ yɛ̍la̍ŋ bōlle̍ ni̍. Ma̍ vīām nda̍ o̍ lɛ̄ŋndē Ki̍li̍a̍a̍dīle̍ŋ ni᷄ŋ o̍ yu̍ŋgu̍la̍ ya̍a̍la̍ŋ ndāŋ ndo̍.

¹⁴

¹⁵O̍ ko̍ŋ, ma̍ kūā nāa̍ yu̍ŋgu̍la̍ ya̍a̍la̍ŋ ndāŋ chūā o̍ lɛ̄ŋndē Ki̍li̍a̍a̍dīle̍ŋ ni᷄ŋ.

¹⁶Mɛ̄ɛ̍ nda̍ fūūlu̍u̍, ma̍ dōo̍ŋ nda̍ ko̍na̍ āā, “Mɛ̄lɛ̄ka̍ Ya̍a̍wɛ̄ɛ̄ wānāā ndūa̍a̍ kpo̍u̍ nda̍ ve᷅m na̍a̍ nāa̍ nya̍ chūā ni̍ māā hɔ̄ltē ndā. Ā dīmi̍ māā na̍a̍ ŋ̄ nyūna̍ nya̍ āā, ‘Le̍ yɛ̄ɛ̍nɛ̍ nya̍ tōsa̍ yɛ̄ sūɛ̍i̍ wɔ̍ɔ̍ŋ ī wāā nu̍a̍ā a̍ Mɛ̄lɛ̄ka̍ I̍sɔ̄lūɛ̍i̍ya̍ pīɛ̄īyo̍? La̍ vɛ᷅ Mɛ̄lɛ̄ka̍ Ya̍a̍wɛ̄ɛ̍ mālɔ̄ɔ̍ mi̍ lā tāŋgūl ma̍āŋ chēle̍ŋ le̍ nya̍ pi̍la̍?

¹⁷Lā lōōnu̍ŋ ndɔ̍ yɔ᷅ŋ wɔ̄ɔ̍ŋ bɛ̄ndū na̍a̍ ŋ̄ to̍sa̍ a̍ Mɛ̄lɛ̄ka̍ Ya̍a̍wɛ̄ɛ̄ bōōndi̍i̍ na̍a̍ ŋ̄ wa̍ o̍ lɛ̄ŋndē Pi̍ɔ̍ɔ̄le̍ŋ ni᷄ŋ ndo̍. Le̍ yɔ̄ŋ wɔ̄ɔ̍ŋ kōŋ, mi̍ Mɛ̄lɛ̄ka̍ tūsī na̍a̍ dɛ̍nɛ̍ pa̍lāa̍ chōo̍, mbo̍ tūsī na̍a̍ nāāla̍ŋ chōo̍ mi̍ lā dīū wāŋnda̍ ta̍u̍ ta̍u̍. Ndu̍yɛ̍ pāa̍le̍ hāūle᷅ŋ bɛ̍ɛ̍ ŋ̄ chō wɔ̄ o̍ dɛ̍nɛ̍ pa̍lāā kōŋ ni᷄ŋ. Bāā ko̍ŋ cho̍ wɔ̍ le̍tu̍u̍ le̍, mɛ̄ɛ̍ mī lā chɔ̄ɔ̄lu̍ ō chēle̍ŋ?

¹⁸Kīɔ̍ɔ̍ nya̍ chō ni᷅ŋ Mɛ̄lɛ̄ka̍ Ya̍a̍wɛ̄ɛ̄ nu̍a̍ā ni̍? Kɛ̍ ndu̍yɛ̍, tē lā kɛ̄ɛ̍ ndu̍ pɛ̍, ō chō sīɔ̄dīi̍ tu̍mbe̍ dɔ̍ɔ̍nɔ᷄ŋ a̍ I̍sɔ̄lūɛ̍i̍ya̍ kpo̍u̍.

¹⁹Tē ō wa̍ pɛ̍ māā lɛ̄ŋndē nyāle̍ŋ lē dīndu̍ Mɛ̍lɛ̄ka̍ o̍ hɔ̄l le̍ ndu̍ sōōlūū lēni᷄ŋ te̍, mɛ̄ɛ̍ lā ta̍ŋ le̍e̍lōo̍ o̍ lɛ̄ŋndē nāāle̍ŋ ni᷄ŋ na̍nu᷄ŋ nāa̍ Mɛ̄lɛ̄ka̍ Ya̍a̍wɛ̄ɛ̄ Tɛ̍ndīi̍ cho̍ le̍ ndu̍ sōōlūū wo̍ ō chō ō tāŋgūlāā wa̍. Lā ta̍ŋ o̍ lɛ̄ŋndē nāāle̍ŋ ni᷄ŋ na̍nu᷄ŋ mī ŋ̄ nūe̍l nya̍ fo̍ndāa̍ mī ŋ̄ wa᷅ŋ na̍nu᷄ŋ na̍a̍ nya̍ā. Yɔ̄ŋi̍ nya̍ kɛ̍ɛ̍ Mɛ̄lɛ̄ka̍ Ya̍a̍wɛ̄ɛ̄ mī lā tōsa̍ mī ŋ̄ sīmnu̍ŋ wa̍nāā yɔ̄ŋ wɔ̄ɔ̍ŋ ndu̍ o̍ hɔ̄l yɛ̍, mɛ̄ɛ̍ lā ta᷄ŋ le̍e̍lōo̍ na̍nu᷄ŋ. Lā ta̍ŋgūl lɛ̄ ma̍āŋ chēle̍ŋ o̍ ma̍āŋ Mɛ̄lɛ̄ka̍ Ya̍a̍wɛ̄ɛ̄ wo̍ kɔ̄ɔ̄lī le̍.

²⁰Nya̍ pi̍la̍ lā lōōnūŋ a̍ nyɛ̍ yɔ̍nu̍ŋ a̍ E̍kāŋ, po᷄ Sɛ̍lūāā wo̍ wo̍. Bōōndi̍i̍ Mɛ̄lɛ̄ka̍ Ya̍a̍wɛ̄ɛ̄ di̍mi̍ le̍ nyɛ̄m na̍a̍ ŋ̍ nɔ̍ le̍ tɛ̄ɛ̄mbūūwo̍ wo̍ŋ tɛ̄ɛ̄mbūūwo̍ kpo̍u̍ wo̍ŋ ndo̍, mi̍ E̍kāŋ so̍lī Mɛ̄lɛ̄ka̍ dīōm. O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ dūāūnu᷄ŋ tu̍mbe̍ a̍ I̍sɔ̄lūɛ̍i̍ya̍ kpo̍u̍ mbo̍ tūsī na̍a̍ dɛ̍nɛ̍ pa̍lāa̍ chōo̍. Mi̍ E̍kāŋ sɔ̍lā pīɔ̍mndo̍ le̍ yɔ̄ŋ wɔ̄ɔ̍ŋ o̍ to̍sa̍ ko̍ŋ ndo̍. Kɛ̍ ō fūla̍ o̍ ndu̍ kɔ̍ɔ̍lī, mi̍ wānāā chēle̍ŋ ā sɔ̄lā pīɔ̍mndo̍ le̍ nyɛ̄ o̍ to̍sa̍ ko̍ŋ ndo̍.’ ”

²¹O̍ ko̍ŋ kɔ̍ɔ̍lī, mi̍ wāŋnda̍ o̍ yu̍ŋgu̍ Lūbɛ᷅ŋ ndo̍ ni᷄ŋ a̍ yu̍ŋgu̍ Ka̍a̍dī wo̍, a̍ yu̍ŋgu̍ Mānāa̍sē wo̍ bā pāa̍le̍ŋ lē dēl lo̍ ā dīmūl wānāā nda̍ vēm ka̍ŋ nda̍ āā,

²²“Ŋ̄ mēna᷄ŋ o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ hi̍o̍ū kpo̍u̍ wo̍ lo̍ māā ŋ̄ tēŋgu̍l ma̍āŋndo̍ ho̍ō le̍ ndu̍ Ma̍sānɔ̄ɔ̍ Mɛ̄lɛ̄ka̍ kɛ̄ɛ̄ le̍. Tē le̍ ndu̍ kīɔ̍ɔ̍ na̍a̍ ŋ̄ tāŋgu̍l ndu̍ ni̍ mɛ̄ɛ̍ wāŋnda̍ I̍sɔ̄lūɛ̄ī a̍ di̍u̍ na̍a̍ pāa̍le̍ hāūle᷅ŋ. Mɛ̄lɛ̄ka̍ ndu̍ si̍nā māā ō cho̍ le̍ ndu̍ kɛ̄ɛ̄ le̍ na̍a̍ ŋ̄ tāŋgu̍l ma̍āŋndo̍ ho̍ō le̍. Ndu̍yɛ̍ nya̍ I̍sɔ̄lūɛ̍i̍ya̍ bɛ̍ɛ̍ ŋ̄ yēēma̍ nya̍ mī lā sīna̍ māā ŋ̄ tēŋgu̍l ma̍āŋndo̍ ho̍ō le̍ sa̍lā o̍ sa̍lā sōlī lēchōo̍ le̍. Mɛ̄lɛ̄ka̍ tūsi̍ na̍a̍ nyɛ̄ pālāa̍ chōo̍, tē le̍ ndu̍ kīɔ̍ɔ̍ na̍a̍ ŋ̄ tāŋgu̍l ma̍āŋndo̍ ho̍ō ni̍.

²³

²⁴Ō cho̍ le̍ ke̍ŋ te̍ na̍a̍ ŋ̄ tāŋgu̍l ndu̍ le̍. Ŋ̄ tāŋgu̍l mātāŋgūlāā ma̍āŋndo̍ ho̍ō le̍ chɔ̄mndo̍ māā ŋ̄ kāāla̍ Māsānɔ̄ɔ̍ Mɛ̄lɛ̄ka̍. Ndu̍yɛ̍ ŋ̄ hɛ̄na̍ŋ mī chūāā nyāa̍ ā hu᷄ŋ di̍mūl fɛ̍ɛ̍ŋ chu̍a̍ā nāa̍ māā chūāā nāa̍ ā nɔ̍ mā sōōlu̍u̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ le̍ le̍. Ŋ̄ yēēma̍ mā hu᷄ŋ di̍mūl chūāā nāa̍ māā Mɛ̄lɛ̄ka̍ hāndu̍ nda̍ Chɔ̍ɔ̍dāŋ nda̍ŋ māā pɛ̄ŋgu̍la̍ŋ nda̍ tɛ̄ɛ̄ŋ nda̍ chūāā nāa̍ yu̍ŋgu̍ Lūbɛ᷅ŋ ndo̍ a̍ yu̍ŋgu̍ Ka̍a̍dī wo̍, le̍la̍ŋ chūāā nāa̍ nɔ̍ mā sōōlu̍u̍ Mɛ̄lɛ̄ka̍ Ya̍a̍wɛ̄ɛ̄ le̍ le̍. Tē ke̍ŋ i̍ yɔ̍nu̍ŋ pɛ̍, mɛ̄ɛ̍ ā kūūna̍ chūāā nāa̍ Mɛ̄lɛ̄ka̍ sōōlūū.

²⁵

²⁶Mɛ̄ɛ̍ le̍ sa̍bōo̍ ho̍ō na̍a̍ ŋ̄ tāŋgu̍l ma̍āŋndo̍ ho̍ō ni̍ kɛ̍ ō cho̍ le̍ sa̍lā o̍ sa̍lā sōlī lēchōo̍ ɔ̄ɔ̄ le̍ kē yɔ̄ŋgū lēcho̍ō le̍ na̍a̍ ŋ̄ tāŋgu̍l ndu̍ le̍.

²⁷Ŋ̄ tāŋgu̍l ndu̍ mātāŋgūlāā le̍ wāa̍ māā tāāmāsi̍ māā le̍ wānāā nāa̍, a̍ wānāā nyāa̍ a̍ chūāā nāā ma̍māa̍ vēllāa̍ vēllē. Ŋ̄ yēēma̍ mā sīna̍ māā na̍a̍ bɛ̍ɛ̍ tɛ̍ndi̍i̍ cho̍ le̍ Mɛ̍lɛ̄ka̍ Ya̍a̍wɛ̄ɛ̍ sōōlūūwo̍ mbo̍ wā o̍ lɛ̄ŋndē nyāle̍ŋ ni᷄ŋ na̍nu᷄ŋ ndo̍, o̍ tɛ̍ndi̍i̍ ko̍ŋ sōndōo̍ na̍a̍ ŋ̄ sōōlūū Mɛ̍lɛ̄ka̍ Ya̍a̍wɛ̄ɛ̄ ni̍. Ndu̍yɛ̍ mā sīna̍ māā sa̍lālā na̍a̍ ŋ̄ lūām nda̍ŋ ni̍ a̍ nyɛ̄m na̍a̍ ŋ̄ chūū Mɛ̍lɛ̄ka̍ wo̍ŋ, lo̍ŋ na̍a̍ ŋ̄ kūā a̍ la̍ŋ ni̍. Ko̍ŋ to̍sā ni̍ chūāā nyāā ma̍māa̍ ā di̍mūl lɛ̍ chūāā nāā ma̍māa̍ fɛ̍ɛ̍ŋ māā chūāā nāa̍ ā cho̍ o̍ ku̍nda̍ wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍ chōo̍ le̍ ni̍.

²⁸Ndu̍yɛ̍ mi̍ ŋ̄ yīya᷄ŋ māā ā yɔ̍ŋ ni᷅ŋ bɛ̍ɛ̍ fɛ̍ɛ̍ŋ mī chūāā nyāā ma̍māa̍ ā hu᷄ŋ di̍mī ī wāā le̍nde̍, chūāā nāā ma̍māa̍ ā nɔ̄lā mā dīmu̍l nda̍ āā, ‘Lā tōfa̍ wɔ̍ ma̍āŋ fi̍nyāā nāā ma̍māa̍ ā tāŋgu̍llo̍. Mɛ̄ɛ̍ ma̍āŋ Mɛ̄lɛ̄ka̍ Ya̍a̍wɛ̄ɛ̄ wo̍ ō chō yɛ̍ ko̍ ndu̍ bɛ̍ɛ̍ cho̍ ni̍. Ō cho̍ le̍ sa̍lā o̍ sālā sōlī lēcho̍ō le̍ nda̍ tāŋgu̍l ndu̍ le̍. Ā tāŋgu̍l ndu̍ mātāŋgūlāā le̍ mbō wa̍ na̍a̍ tɛ̄ɛ̄ŋ na̍a̍ nya̍ā māā tāāmāsi̍.’

²⁹Mbɔ̄ ke̍ŋ kɔ̍ŋ po̍lo̍ŋ. Ŋ̄ kɛ̍ɛ̄ Mɛ̍lɛ̄ka̍ Ya̍a̍wɛ̄ɛ̄ le̍. Ŋ̄ fe̍ēŋ ndu̍ kɔ̄ɔ̄lī, mī ŋ̄ tāŋgu̍l ma̍āŋ chēle̍ŋ le̍ sa̍lā o̍ sa̍lā sōlī lēchōo̍ le̍. Tɛ̍ndɛ̄i̍ cho̍ le̍ Mɛ̄lɛ̄ka̍ nāa̍ Ya̍a̍wɛ̄ɛ̍ sōōlūūwo̍ wo̍, ō fūla̍ o̍ ma̍āŋ cho̍ o̍ tɛ̍ndi̍i̍ ko̍ŋ sōndōo̍ wo̍ kɔ̄ɔ̄lī, ŋ̄ te̍ŋgūl lɛ̍ ma̍āŋ chēle̍ŋ kpo̍so̍ŋ le̍ sa̍lā o̍ sālā sōlī lēchōo̍ le̍.”

³⁰Mɛ̄ɛ̍ Fi̍ni̍ha̍a̍sī, wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, a̍ wāŋ bānāā ŋ̄wāŋ tɔ̍ wa̍ nda̍ hɛ̄li̍ o̍ yu̍ŋgu̍la̍ tɔ̍la̍ŋ tɛ̄ɛ̄ŋ nda̍, a̍ wa̍ yu̍ŋgu̍la̍ ndāla̍ŋ bōlle̍ wa̍ ā tūēī nyɛ̄ yu̍ŋgu̍la̍ ya̍a̍la̍ŋ ndāŋ lā dīmu̍l nda̍ wo̍, ma̍ hīnī kɔ̄l ta̍u̍ a̍ nyɛ̄ nda̍ dīmi̍ wo̍.

³¹Mi̍ Fi̍ni̍ha̍a̍sī po̍ Ɛ̄li̍a̍a̍sā wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ ō dīmūl nda̍ āā, “Ŋ̄ sīna̍ ni᷅ŋ kpe̍e̍kpe̍i̍ māā Mɛ̄lɛ̄ka̍ Ya̍a̍wɛ̄ɛ̄ cho̍ na̍a̍ kɔ̄ɔ̄lī. Ŋ̄ sīna̍ ni᷅ŋ māā ō cho̍ kɛ̍ɛ̄ le̍ nya̍ kɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ le̍. Lā pīŋi̍ yōōmūlā wāŋnda̍ I̍sɔ̄lūɛ̄ī. Mɛ̄lɛ̄ka̍ Ya̍a̍wɛ̄ɛ̄ tu̍sī lɛ̍ na̍a̍ nyɛ̄ pālāā chōo̍ le̍.”

³²O̍ ko̍ŋ kɔ̍ɔ̍lī, mi̍ Fi̍ni̍ha̍a̍sī, wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ a̍ wāŋ bānāā o̍ ku̍ɛ̄ kɔ̄ɔ̄lī wa̍ ā māl Ki̍li̍a̍a̍dī, nāa̍ nda̍ wa̍ ā bɔ̄ɔ̄ŋi̍āŋ a̍ yu̍ŋgu̍la̍ ya̍a̍la̍ŋ nda̍ŋ nda̍ ma̍ mīīŋgū o̍ lɛ̄ŋndē Ke̍nāŋnde̍ŋ ni᷄ŋ ma̍ kɔ̍ do̍o̍ŋ wa̍nāa̍ ve᷅m nda̍ wa̍ ko̍na̍.

³³Ndu̍yɛ̍ mɛ̄ɛ̍ wāŋnda̍ I̍sɔ̄lūɛ̄ī a̍ tu̍e̍ī ko̍na̍ nda̍ dɔ̄ɔ̍ŋ ndo̍, ma̍ hīnī kɔ̄l. Ma̍ sāŋgālā Mɛ̄lɛ̄ka̍ le̍ nyɛ᷄ yɔ̍nu̍ŋ ndo̍. O̍ ko̍ŋ kɔ̍ɔ̍lī, kɛ̄ɛ̄sīāā nda̍ a̍a̍ kɛ̍ɛ̍si̍a̍a̍ le̍ kɔ̄la̍ŋ sɔ̍ŋgɔ̍ɔ̍ a̍ yu̍ŋgu̍la̍ ya̍a̍la̍ŋ ndāŋ mā tɛ̄ɛ̄mbu̍u̍ lɛ̄ŋndē ndāle̍ŋ kpo̍u̍ wo̍, ā dīmi̍ lɛ̍ a̍ ndi̍ o̍kɔ̄ɔ̄ le̍.

³⁴O̍ ko̍ŋ, mi̍ wāŋnda̍ o̍ yu̍ŋgu̍ Lūbɛ᷅ŋ ndo̍ ni᷄ŋ a̍ yu̍ŋgu̍ Ka̍a̍dī wo̍ ā kē ma̍āŋ kōŋ dīōla̍ŋ āā, tāāmāsi̍o̍o̍. Kāni̍ fo̍ndōle̍ ma̍ dīmī āā, “Ma̍āŋndo̍ ho̍ō ō chō māchūāā na̍a̍ tɛ̄ɛ̄ŋ māā tāāmāsi̍ le̍ chɔ̄mndo̍ māā Mɛ̄lɛ̄ka̍ Ya̍a̍wɛ̄ɛ̄ cho̍ Mɛ̄lɛ̄ka̍ ni̍.”