Read Southern Kisi Chɔ̄ɔ̍sūāā 23 Bible Online

Chɔ̄ɔ̍sūāā 23 - Southern Kisi bible

Chɔ̄ɔ̍sūāā 23

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ma̍ndā wāŋnda̍ I̍sɔ̄lūɛ̍i̍ ya̍a̍mɔ̍ɔ̍wa̍a̍ ndāa̍ tɛ̄ɛ̄ŋ mbo̍ kūā a̍ wɔ̄sīlā fāŋgā. Mi̍ Chɔ̄ɔ̍sūāā yu̍wā ku̍ndɛ̄ɛ̄ bɛ̄ndū.

²O̍ ko̍ŋ, mi̍ Chɔ̄ɔ̍sūāā ve̍e̍lū I̍sɔ̄lūɛ̍i̍ya̍ kpo̍u̍ a̍ lāŋgba̍ā ndāā ka᷅lla̍ a̍ bōlīī lāyu̍ŋgu̍e̍i̍ a̍ wānāa̍ kɔ̍ɔ̍sā a̍ wāŋnda̍ wa̍, a̍ wānāa̍ cho̍ pūa̍a̍ chɔ̄ūwa̍ bōlle̍ wa̍. Mbo̍ lō o̍ ko̍ŋ mbo̍ dīmūl nda̍ āā, “I̍ yu̍wa̍ ni᷅ŋ bɔ̄ɔ̍.

³Nya̍ pi̍la̍ lā chē pɛ̍ɛ̍ŋ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄, ō na̍a̍ ŋ̄ pīɛ̄īyo̍ ō tōsa̍ a̍ ya̍a̍mɔ̍ɔ̍wa̍a̍ nāa̍ le̍ sa̍bū nāa̍ yɛ̍. Mɛ̄lɛ̄ka̍ Ya̍a̍wɛ̄ɛ̄, ō na̍a̍ ŋ̄ pīɛ̄īyo̍ ndu̍ pi̍la̍ kpe̍e̍kpe̍i̍ wa̍ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ nāa̍ le̍ na̍a̍ ni̍.

⁴I̍ chi̍i̍ yu̍ŋgu̍la̍ nyāla̍ŋ lɛ̄ŋnde̍ŋ kpo̍u̍ ke᷅, chɔ̍ŋ o̍ Pīo̍o̍ Chɔ̍ɔ̍dāŋ le̍e̍lōo̍ bā pāa̍le̍ŋ lē chāŋ ndo̍ mbo̍ kūā o̍ Pēe̍ Mɛ̄ŋmā Īhɛ᷄llo̍ Mɛ̄dītālu̍e̍e̍nīāā bā pāa̍le̍ŋ lē dēl lo̍. Wānāā na̍a̍ ŋ̄ yēm ni᷅ŋ nda̍ lɛ̄ŋndē ndāle̍ŋ ni̍ a̍ wānāā na̍a̍ ŋ̄ yi᷄m ndɔ̍ le̍ wa̍ lɛ̄ŋndē ndāle̍ŋ, kpo̍u̍ I̍ chi̍i̍ nya̍ kē.

⁵Mɛ̄lɛ̄ka̍ Ya̍a̍wɛ̄ɛ̄, ō na̍a̍ ŋ̄ pīɛ̄īyo̍ chō ya̍a̍mɔ̍ɔ̍wa̍a̍ nāa̍ cho̍ wɔ̄ o̍ lɛ̄ŋnde̍ŋ nde᷅ŋ ni᷄ŋ nda̍ tōūwɔ̄ɔ̄ nya̍ lāchī. Tē lā wa̍ fūūlūūwo̍ nda̍ īkɛ̄i̍ pɛ̍, ndu̍ pi̍la̍ cho̍ nda̍ nyīndɔ̄ɔ̄ nya̍ lāchī mī lā chūa̍ lɛ̄ŋndē ndāle̍ŋ mɛ̄ɛ̍ o̍ chu̍e̍l nya̍ būŋgɛ̄i̍ yɛ̍.

⁶Le̍la̍ŋ nyɛ̄ o̍ nyɛ̍ cho̍ ō pōōnyīāā o̍ yāu̍ lāsāwa̍ Mūu̍sē wo̍ ni᷄ŋ lā pu̍ɛ̍ɛ̍ŋ le̍ ndu̍ tōsāa̍ le̍. Ō pīlɛ̍ bɛ̍ɛ̍ lā fa̍ŋā lēchōo̍ mī lā kɛ̄ɛ̍ ndu̍ tōsā le̍

⁷Lā ke᷅ŋna᷅ŋ ŋ̍la̍a̍ndū nya̍ wānāa̍ lo̍ ha̍ā nya̍ tɛ̄ɛ̄ŋ nda̍ le̍. Lā pi̍āl mɛ̄lɛ̄ka̍a̍ ndāa̍ lādīō nya̍ tɛ̄ɛ̄ŋ te̍. Lā ti̍a̍ŋnu᷄ŋ o̍ nda̍ le̍. Lā sa̍a̍ŋgīāl mɛ̄lɛ̄ka̍a̍ ndāa̍ le̍. Lā so̍o̍lūū nda̍ le̍.

⁸Lā nɔ̄ mī lā hīōū lāchī a̍ Mɛ̄lɛ̄ka̍ Ya̍a̍wɛ̄ɛ̍ sāāŋgīāllo̍ mī lā bīī sūɛ̍i̍ ndūɛ̍i̍ kpi̍ŋ māā pāāndū.

⁹Kāni̍ fu̍u̍le̍ lɛ̄ŋīī ndi̍ i̍i̍ nɔ̍ tɔ̍ɔ̍ mi̍ ndi̍ i̍i̍ nɔ᷅ kpāāyāa̍ ve̍ ī wa̍ na̍a̍ lāchī kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍a̍ū nda̍. Ndu̍yɛ̍ kɔ̍ bīya᷅ŋ a̍ te̍le̍ŋndo̍ ho̍ō ya̍a̍mɔ̍ɔ̍wa̍a̍ nāa̍ ō pīlɛ̍ bɛ̍ɛ̍ nɔ̍la̍ wɔ̍ na̍a̍ yōmɔ̄ɔ̄ le̍.

¹⁰Wānā pi᷅lɛ̍ kpe̍ nya̍ tɛ̄ɛ̄ŋ ō nɔ̄lā mbō sɔ̄ŋga̍ a̍ ya̍a̍mɔ̍ɔ̍wa̍a̍ nāa̍ wāa̍ ō pīlɛ̍ (1,000) mbō yēm nda̍. Kāni̍ fu̍u̍le̍, Mɛ̄lɛ̄ka̍ Ya̍a̍wɛ̄ɛ̄ ō nya̍ pīɛ̄īyo̍ ndu̍ pi̍la̍ cho̍ sɔ̍ŋgɔ̄ɔ̍ le̍ sa̍bū nyāa̍ ni̍, mɛ̄ɛ̍ o̍ chu̍e̍l nya̍ sīndɛ̄ būŋgɛ̄i̍ yɛ̍.

¹¹Le̍la̍ŋ lā mānda̍ŋ yɔ̄ŋi̍ nya̍ pūɛ̍ɛ̍ŋ le̍ Mɛ̄lɛ̄ka̍ Ya̍a̍wɛ̄ɛ̄, o̍ na̍a̍ ŋ̄ pīɛ̄īyo̍ kāālāa̍.

¹²Lā na̍āŋa᷅ŋ a̍ wānāā tūa̍a̍ lo̍ ha̍ā o̍ lɛ̄ŋnde̍ŋ nde᷅ŋ ni᷄ŋ nya̍ tɛ̄ɛ̄ŋ nda̍ le̍. Lā ke᷅ŋna᷅ŋ ŋ̍la̍a̍ndū nya̍ nda̍ā vēllāa̍ vēllē le̍.

¹³Tē lā chu̍e̍ si̍lā kōŋ te̍ mɛ̄ɛ̍ lā nɔ̍ ni̍ko̍ o̍ lākɔ̄l māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ hi̍o̍u̍wɔ̄ɔ̄ lāchī a̍ ya̍a̍mɔ̍ɔ̍wa̍a̍ nyāa̍ ha̍ā tōūwɔ̄ɔ̍ nya̍ lāchi̍ le̍. Ndu̍yɛ̍ tē ke̍ŋ i̍ yɔ̍nu̍ŋ pɛ̍, wāŋnda̍ ha̍ā ā wā ni̍ŋ nya̍ tɛ̄ɛ̄ŋ le̍ nya̍ nyɛ̄ pālāa̍ tūsīo̍o̍ chōo̍ mɛ̄ɛ̍ nda̍ yēŋ nu̍a̍ā vīsīo̍o̍ yāŋɔ̄ɔ̄le̍ŋ yɛ̍, mɛ̄ɛ̍ kpa̍kpa̍le̍ŋ lē wā nu̍a̍ā vīsīo̍o̍ lāchī yɛ̍. Mɛ̄ɛ̍ nda̍ wā nu̍a̍ā wāŋndo̍ kɔ̄ɔ̍ lɔ̄ɔ̍ a̍ sīōŋnde̍ŋ mī nyɔ̄ɔ̍ wa̍ ndu̍ nɛ̄īyo̍ yɛ̍, le̍nde̍ nda̍ wā ni̍ŋ nya̍ mɔ̍nɛ̍i̍ lūēīyo̍ ni̍. Mɛ̄ɛ̍ yūɛ̍i̍ ī hūāū nu̍a̍ā wāŋndo̍ hɔ̄lte̍ŋ mī nyɔ̄ɔ̍ wa̍ ndu̍ nɛ̄īyo̍ yɛ̍, le̍nde̍ nda̍ wā ni̍ŋ nya̍ sāŋgāa̍ tūsīo̍o̍ chōo̍ ni̍. Ā lō ni̍ŋ nya̍ nyɛ̄ pālāa̍ tūsīo̍o̍ chōo̍ ha̍a̍a̍ mī lā chūu̍ kpo̍u̍, wānā pi᷅lɛ̍ bɛ̍ɛ̍ lo᷅ o̍ lɛ̄ŋndē kɛ̄ndɛ̄lē Mɛ̄lɛ̄ka̍ Ya̍a̍wɛ̄ɛ̄, ō nya̍ pīɛ̄īyo̍ ō ke̍ le᷅ŋ nya̍ le̍ŋ ni᷄ŋ te̍.

¹⁴“I̍ nɔ̍ lɛ̍ hāū te̍le̍ŋ vi̍lɛ̄ī le̍ wāa̍ yōōmū le̍. Nya̍ pi̍la̍ lā sīnā o̍ kɔ̄ltā nyāla̍ŋ ni᷄ŋ wa̍la̍ŋ māā nyɛ̄ o̍ nyɛ̄ kɛ̄ndɛ̄ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ chu̍e̍l na̍a̍ sīndɛ̄ būŋgɛ̄i̍ ō chīi̍ na̍a̍ tōsāl. Nyɛ̄ o̍ nyɛ̄ ndu̍ o̍o̍ chu̍e̍l na̍a̍ būŋgɛ̄i̍, ō pīlɛ̍ bɛ̍ɛ̍ ō mɛ̄i̍ ndu̍ mbō kɛ̄ɛ̍ ndu̍ tōsā le̍.

¹⁵Kɛ̍ ndu̍yɛ̍ kpe̍ma̍ Mɛ̄lɛ̄ka̍ Ya̍a̍wɛ̄ɛ̄, ō na̍a̍ ŋ̄ pīɛ̄īyo̍ ō yīi̍ a̍ nya̍ mbo̍ dīmūl nya̍ māā lā kɛ̄si̍ ndu̍ wo̍ lā pu̍ɛ̍ɛ̍ŋ a̍ kpe̍ma̍ ko̍ŋ te̍. Tē lā kɛ̄ɛ̍ ndu̍ pɛ̍ mī lā mūli̍ŋ mɛ̍lɛ̄ka̍a̍ chēle̍ŋ sōōlūūwo̍ ō chō tu̍mbe̍ dɔ̍ɔ̍nɔ᷄ŋ a̍ nya̍ mbō tūsi̍ nya̍ nyɛ̄ pālāa̍ chōo̍. Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ pe̍e̍lu̍ nu̍a̍ā būŋgɛ̄ī ndūɛ̍i̍ mbo̍ tōsāl nya̍ nyɛ̄ o̍ nyɛ̄ kɛ̄ndɛ̄ ndu̍ o̍o̍ chu̍e̍l nya̍ būŋgɛ̄i̍ yɛ̍, le̍nde̍ ko̍ni̍ o̍ tu̍sī ni̍ŋ nya̍ nyɛ̄ pālāa̍ chōo̍ ni̍, mbō tōsa̍ nyɛ̄ o̍ nyɛ̄ wɔ̄ɔ̍ŋ o̍ kɔ̍ŋgɔ̍la̍ŋ le̍ tōsāa̍ a̍ nya̍. Ō be̍ndū bɛ̍ɛ̍ ti᷅ŋ te̍, mbō chīi̍ nya̍ kpo̍u̍, wānā pi᷅lɛ̍ bɛ̍ɛ̍ lo᷅ o̍ lɛ̄ŋndē kɛ̄ndɛ̄lē o̍ ke̍ le᷅ŋ nya̍ le̍ŋ ni᷄ŋ te̍.”