Read Southern Kisi Chɔ̄ɔ̍sūāā 24 Bible Online

Chɔ̄ɔ̍sūāā 24 - Southern Kisi bible

Chɔ̄ɔ̍sūāā 24

¹O̍ ko̍ŋ kɔ̍ɔ̍lī, mi̍ Chɔ̄ɔ̍sūāā ve̍e̍lū yu̍ŋgu̍la̍ I̍sɔ̄lūɛ̍i̍ya̍ kpo̍u̍ Si̍ɛ̍kɛ̄m chi̍e̍e̍. Mbo̍ lō o̍ ko̍ŋ mbo̍ vēēlū lāŋgba̍ā ndāā ka᷅lla̍, a̍ bōlīī lāyu̍ŋgu̍e̍i̍, a̍ wānāa̍ kɔ̍ɔ̍sā a̍ wāŋnda̍ wa̍, a̍ wānāa̍ cho̍ pūa̍a̍ chɔ̄ūwa̍ bōlle̍ wa̍ ma̍ kɔ̍ di̍i̍ŋ ku̍ndāa̍ Mɛ̄lɛ̄ka̍ lāchī.

²O̍ ko̍ŋ, mi̍ Chɔ̄ɔ̍sūāā di̍mūl nda̍ kpo̍u̍ āā, “Mɛ̄lɛ̄ka̍ Ya̍a̍wɛ̄ɛ̄, o̍ I̍sɔ̄lūɛ̍i̍ya̍ ā pīɛ̄īyo̍ nyɛ̄ o̍ di̍mi̍ wo̍ cho̍ ho̍ō ni̍. O̍ dīmi̍ āā, ‘Bōōndi̍i̍ fi̍nyāā nyāā ma̍māa̍ ā wa̍ sīndɛ̄ o̍ pēē bɛ̄ndōo̍ Yūfi̍lu̍a̍tīī le̍e̍lōo̍ ve̍, yɔ̄ŋi̍ nda̍ a̍a̍ so̍o̍lu̍u̍ ya̍, nyɛ̄m chēle̍ŋ ndo̍ŋ nda̍ wa̍ sōōlūūwo̍ māā mɛ̄lɛ̄ka̍a̍ ndā ni̍. Fi̍nyāā nyāā ma̍māā kāŋ ō pīlɔ̍ɔ̍ wa̍ Tɛ̍lūā, fi̍nyāa̍ E̍bīlāha᷅m nda̍ Na̍hɔ̄ɔ̄ ni̍.

³O̍ ko̍ŋ kɔ̍ɔ̍lī, mi̍ so̍lī E̍bīlāha᷅m fi̍nyā nyā o̍ Pīo̍o̍ Yūfi̍lu̍a̍tīī le̍e̍lōo̍ lo̍ŋ, mi̍ ke̍e̍kū a̍ ndu̍ o̍ lɛ̄ŋndē ke̍nāŋnde̍ŋ ni᷄ŋ kpo̍u̍. Mi̍ to̍sā mi̍ pūlāle̍ E̍bīlāha᷅mnde̍ŋ lē kūī ta̍u̍ ta̍u̍. Mi̍ ke᷅ ndu̍ pōo̍ dīōla̍ŋ āā Āa̍se̍.

⁴Mi̍ ke᷅ Āa̍se̍ pūa̍a̍ ā ŋīɔ̍ɔ̍ŋ, ō pīlɔ̍ɔ̍ dīōla̍ŋ āā Che̍kɔ̍pū, ho̍ō dīōla̍ŋ āā I̍īsɔ̄. Mi̍ ke᷅ I̍īsɔ̄ lɛ̄ŋndē īpēmbūle̍ŋ I̍dɔ̄m māā nyɛ̄ ndɔ̄. Kɛ̍ mi̍ Che̍kɔ̍pū fi̍nyā nya̍ ma̍ma̍ nda̍ pūa̍a̍ ndūa̍a̍ nda̍ nda̍ kūā o̍ lɛ̄ŋndē I̍chi̍pīle̍ŋ ni᷄ŋ.

⁵O̍ ko̍ŋ kɔ̍ɔ̍lī, mi̍ so̍lī Mūu̍sē nda̍ E̍lɔ̄ŋ mi̍ vi̍ām nda̍ I̍chi̍pī le̍ mā kɔ̍ so̍lī fi̍nyāā nyāā ma̍māa̍ lo̍ŋ. Mi̍ tu̍sī wāŋnda̍ I̍chi̍pi̍ nāāla̍ŋ cho̍o̍. O̍ ko̍ŋ, mi̍ so̍lī fi̍nyāā nyāā ma̍māa̍ I̍chi̍pī, mi̍ tɛ̍ɛ̍ŋgūū nda̍ pēe̍ mɛ̄ŋmā īhɛ᷄l nda̍ vēēlū āā pēē si̍a̍ŋāa̍ wo̍. Mɛ̄ɛ̍ so̍vɛ̄i̍ya̍a̍ māI̍chi̍pīāŋnda̍ ā wa̍ nda̍ tōūwɔ̄ɔ̍ a̍ nyɛ̄lā nyāāna᷄ŋnda̍ su̍a̍a̍ ā nāŋ nda̍ŋ, a̍ pūa̍a̍ chɔ̄ūwāa̍ wa̍ o̍ su̍a̍a̍ chōo̍ wa̍,

⁶

⁷mi̍ fi̍nyāā nyāā ma̍māa̍ ā chāŋ nāa̍ ya̍ chu̍a̍ le̍ mī ma̍la̍ nda̍. O̍ ko̍ŋ, mi̍ tu̍sī nda̍ nyūmnda̍ŋ tɛ̄ɛ̄ŋ nda̍ I̍chi̍pīāā kāŋ ti̍ŋgīsi̍. Mi̍ ya̍mbū nɛ̄īyo̍ o̍ pīo̍o̍ tɛ̄ɛ̄ŋ kpa̍la̍ŋ, mi̍ fi̍nyāā nyāā ma̍māa̍ ā tāŋ. Kɛ̍ mɛ̄ɛ̍ so̍vɛ̄i̍ya̍a̍ māI̍chi̍pīāŋnda̍ ā tōl nda̍ kɔ̄ɔ̄lī o̍ pēēlo̍, mi̍ to̍sā mi̍ mɛ̄ŋnda̍ŋ mā mīīŋgū nda̍ chōo̍ nda̍ kpo̍u̍ ma̍ wū. Ndu̍yɛ̍ nya̍ pi̍la̍ lā sīnā nyɛ᷅ ya̍ I̍ to̍sa̍ I̍chi̍pī wo̍. “ ‘O̍ ko̍ŋ kɔ̍ɔ̍lī, le̍ te̍le̍ŋ vi̍lɛ̄ī lā wa̍ o̍ po̍llo̍ ni᷄ŋ.

⁸O̍ ko̍ŋ, mi̍ hu᷅ŋ a̍ nya̍ o̍ lɛ̄ŋndē A̍mɔ̍lu̍a̍i̍tīi̍ya̍ ni᷄ŋ, a̍ wa̍ o̍ Chɔ̍ɔ̍dāŋ nda̍ŋ kūmbūe̍i̍ pīlɛ̍i̍ wa̍. Ma̍ hu᷄ŋ si̍mūl nya̍ a̍ sɔ̍ŋgɔ̄ɔ̍ kɛ̍ mi̍ ke᷅ nya̍ kpāāyāa̍ mi̍ lā yām nda̍. Mi̍ tɛ̍ɛ̍mbūū nda̍ kpo̍u̍ nya̍ lāchī. Mi̍ lā chūā lɛ̄ŋndē ndāle̍ŋ.

⁹Mi̍ Be̍la̍kī, po̍ Si̍pɔ̄ɔ̄ wo̍, o̍ wa̍ māsāa̍ o̍ lɛ̄ŋndē Mo̍wa̍bīle̍ŋ ni᷄ŋ ndo̍ ō bɛ̄ɛ̄ndīa̍ŋ le̍ sɔ̍ŋgɔ̄ɔ̍ a̍ nya̍. Mbo̍ yɔ̄ŋ le̍ Be̍la᷅m, po̍ Bi̍yɔ̄ɔ̄ wo̍, wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, le̍ mī ndu̍ o̍o̍ hu̍ŋ ha̍ndū nya̍ sēndi̍o̍o̍ chōo̍.

¹⁰Kɛ̍ I̍ chɛ̍l mī Be̍la᷅m mɛ̍na̍ nya̍ le̍, mi̍ to̍sā mbo̍ dūāū nya̍ sa̍lā. O̍ ko̍ŋ, mi̍ chi̍i̍ndīāā yōōmūlā nyāla̍ŋ Be̍la̍kī yɔ̍ŋ nya̍ nyɛ̄ le̍.

¹¹Mi̍ lā tāŋ Chɔ̍ɔ̍dāŋ nda̍ŋ mi̍ lā hūŋ Chɛ̄lu̍i̍kō. Hūnɔ̄ɔ̍ lo̍ŋ, mi̍ wāŋnda̍ Chɛ̄lu̍i̍kō a̍ hu̍ŋ sɔ̍ŋgā a̍ nya̍. Kɛ̍ mi̍ to̍sā mi̍ lā yām nda̍. Mi̍ A̍mɔ̍lu̍a̍i̍tīi̍ya̍ a̍ Pɛ̍lu̍i̍sa̍i̍tīi̍ya̍, a̍ Ke̍na̍na̍i̍tīi̍ya̍, a̍ Hi̍ta̍i̍tīi̍ya̍, a̍ Ka̍ka̍sa̍i̍tīi̍ya̍, a̍ Hi̍va̍i̍tīi̍ya̍, a̍ Chɛ̄bu̍sa̍i̍tīi̍ya̍, ā sɔ̄ŋgā vɛ̄lɛ̄ a̍ nya̍. Kɛ̍ nda̍ bɛ̍ɛ̍ mi̍ to̍sā mi̍ lā yām nda̍ kpo̍u̍.

¹²Mi̍ to̍sā mi̍ sīōōŋīī bɛ̄ndūe̍i̍ bīī nda̍, le̍ hāli̍ kpe̍ŋ mī ya̍ i̍i̍ so̍li̍ māsāa̍ māA̍mɔ̍lu̍a̍i̍tīi̍ya̍a̍ ŋi̍ɔ̍ɔ̍ŋnda̍. O̍ cho̍ kpa̍āya̍ nyā a̍ wōlɔ̄ɔ̄lā nyāla̍ lāchɔ̄ū le̍ ye᷅m wāŋnda̍ ha̍ā le̍. Ya̍ pi̍la̍ ye᷅m nda̍ ni̍.

¹³O̍ ko̍ŋ kɔ̍ɔ̍lī, mi̍ ke᷅ nya̍ lɛ̄ŋndē nya̍ tōsa̍ wa̍li̍ le̍ni̍ŋ te̍ le̍ŋ a̍ chi̍e̍e̍ŋ nya̍ tēŋgu̍l te̍ wo̍ŋ mi̍ lā wā hāū i̍cha̍li̍ le̍ni̍ŋ. Yɔ̄mīī mākīle̍pīi̍ nya̍ to᷄l te̍ ve̍ lā chō ni᷅ŋ hāū Ki᷅le̍pīi̍ma̍ ndūa̍ŋ dīo̍o̍. Yɔ̄mīī ɔ̄li̍fīi̍ wānāā chēle̍ŋ ā tɔ̄l le̍, lā chō ndi̍ ni᷅ŋ hāū tɔ̍nɔ̄ɔ̍ dīo̍o̍.’ ”

¹⁴Mi̍ Chɔ̄ɔ̍sūāā hi̍a̍ū lāchī a̍ sūɛ̍i̍ mbo̍ dīmūl nda̍ āā, “Le̍la̍ŋ lā ke̍ Mɛ̄lɛ̄ka̍ Ya̍a̍wɛ̄ɛ̍ bɛ̄ɛ̄le̍ŋ mī lā sāāŋgi̍a̍l ndu̍ a̍ kɔ̄ltā nyāla̍ŋ kpo̍u̍ o̍ nɛ̄ī sa̍kpōo̍ chōo̍. Nyɛ̄m fi̍nyāā nyāā ma̍māa̍ nda̍ a̍a̍ so̍o̍lūū o̍ Pīo̍o̍ Yūfi̍lu̍a̍tīī le̍e̍lōo̍ a̍ I̍chi̍pī māā mɛ̄lɛ̄ka̍a̍ ndā wo̍ŋ lā tɛ̄ɛ̄mbu̍u̍ nyɛ᷅m mu᷅ŋ mī lā sōōlu̍u̍ Mɛ̄lɛ̄ka̍ Ya̍a̍wɛ̄ɛ̄ ndu̍ pīlɛ̍ kpe̍.

¹⁵Kɛ̍ tē lā yēēma̍ dɔ̍ɔ̍ mī lā sōōlu̍u̍ Mɛ̄lɛ̄ka̍ Ya̍a̍wɛ̄ɛ̄ le̍, mɛ̄ɛ̍ lā kɛ̄ɛ̄si̍a̍a̍ pa̍a̍le̍ hāūle̍ŋ, mī lā hɛ̄li̍ wāna̍ nya̍ sōōlūū ni̍ŋ ndo̍. Tē nyɛ̄m fi̍nyāā nyāā ma̍māa̍ nda̍ a̍a̍ so̍o̍lūū o̍ pīo̍o̍ lēe̍lo̍ō māā mɛ̄lɛ̄ka̍a̍ ndā wo̍ŋ nya̍ yēēma̍ ni̍, lā chūa̍. Tē mɛ̄lɛ̄ka̍a̍ A̍mɔ̍lu̍a̍i̍tīi̍ya̍ ā sōōlūū o̍ lɛ̄ŋndē nya̍ chō le᷅ŋ ni᷄ŋ nde̍ŋ nya̍ yēēma̍ vɛ̄lɛ̄ ni̍ lā chūa̍. Kɛ̍ ya̍ a̍ yu̍ŋgu̍ nūu̍ kpo̍u̍ o̍ ya̍lo̍ chi̍ɛ̍ī ni̍ŋ na̍a̍ Mɛ̄lɛ̄ka̍ Ya̍a̍wɛ̄ɛ̄ na̍a̍ ŋ̄ chō sōōlūū ni̍.”

¹⁶Mi̍ wāŋnda̍ lō o̍ ko̍ŋ ma̍ dīmūl Chɔ̄ɔ̍sūāā āā, “Mɛ̄lɛ̄ka̍ tu̍ɛ̍ī bɛ̍ɛ̍ le̍ ŋ̄ kɛ̍ɛ̄ Mɛ̄lɛ̄ka̍ Ya̍a̍wɛ̄ɛ̄ mī ŋ̄ mūli̍ŋ mɛ̍lɛ̄ka̍a̍ chēle̍ŋ sōōlūūwo̍ le̍.

¹⁷Mɛ̄lɛ̄ka̍ Ya̍a̍wɛ̄ɛ̄ ō na̍a̍ ŋ̄ pīɛ̄īyo̍ ndu̍ so̍li̍ na̍a̍ a̍ fi̍nyāā nāā ma̍māa̍ o̍ chɛ̄le̍ŋ ni᷄ŋ I̍chi̍pī ni̍. Ndu̍yɛ̍ ŋ̄ chē sɔ̍ɔ̍ŋ kɔ̄ndɔ̄fi̍li̍ŋ o̍ to̍sa̍ na̍a̍ o̍ hɔ̄l lo̍ŋ ndo̍ŋ. Bōōndi̍i̍ na̍a̍ ŋ̄ wa̍ hūnɔ̄ɔ̍ ve̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ma̍ndā na̍a̍ lɛ̄ŋīī na̍a̍ ŋ̄ kēi̍ ni᷄ŋ nde̍ tɛ̄ɛ̄ŋ ā yɔ᷄ŋ na̍a̍ nyɛ̄ o̍ nyɛ̄ le̍.

¹⁸A̍mɔ̍lu̍a̍i̍tīi̍ya̍ wa̍ na̍a̍ lāchī a̍ te̍le̍ŋ ko̍ŋ, kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ so̍lī nda̍ kpo̍u̍ le̍ na̍a̍. Le̍la̍ŋ na̍a̍ bɛ̍ɛ̍ ndu̍ na̍a̍ ŋ̄ chō sōōlūū ni̍. Kāni̍ fu̍u̍le̍, ndu̍ pīlɛ̍ kpe̍ cho̍ Mɛ̄lɛ̄ka̍ nāa̍ ni̍.”

¹⁹Mi̍ Chɔ̄ɔ̍sūāā di̍mūl nda̍ āā, “Lā nɔ̍lā mī lā sāāŋgi̍a̍l Mɛ̄lɛ̄ka̍ Ya̍a̍wɛ̄ɛ̄ le̍. Mɛ̄lɛ̄ka̍ Ya̍a̍wɛ̄ɛ̄ wānā di̍a̍ndāa̍ o̍ cho̍ ni̍. Ndu̍ ndu̍ ō yēēma̍ māā ndu̍ pīlɛ̍ kpe̍ wānā so̍o̍lūū ni̍. Tē lā sōli̍ ndu̍ dīōm pɛ̍, mī lā tōsa̍ yɔ̄ŋ wɔ̄ɔ̍ŋndo̍ a̍ ndu̍ ō me᷅l nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ te̍.

²⁰Ndu̍yɛ̍ tē lā kɛ̄ɛ̍ ndu̍ pɛ̍ mī lā mūli̍ŋ mɛ̍lɛ̄ka̍a̍ chēle̍ŋ sōōlūūwo̍, mi̍ chē bɛ̍ɛ̍ mi̍ ndu̍ o̍o̍ wa᷅ wānā kɛ̍ndɛ̄ nāa̍ nya̍ chūā pāāndū, kɛ̍ ō chō tu̍mbe̍ dɔ̍ɔ̍nɔ᷄ŋ a̍ nya̍ mbō tɛ̄ɛ̄mbu̍u̍ nya̍ kpo̍u̍.”

²¹Ma̍ dīmūl Chɔ̄ɔ̍sūāā āā, “Sāko̍, ŋ̄ kɛ̍ɛ̄ Mɛ̄lɛ̄ka̍ Ya̍a̍wɛ̄ɛ̄ le̍, ndu̍ na̍a̍ ŋ̄ chō sāāŋgīāl ni̍.”

²²Mi̍ Chɔ̄ɔ̍sūāā di̍mūl nda̍ āā, “Mɛ̄ɛ̍ nya̍ pi̍la̍ dīmi̍ māā Mɛ̄lɛ̄ka̍ Ya̍a̍wɛ̄ɛ̄ nya̍ chō sāāŋgīāl ni̍ yɛ̍, mɛ̄ɛ̍ nya̍ pi̍la̍ chō ŋ̄se̍ī.”

²³Ma̍ dīmūl Chɔ̄ɔ̍sūāā āā, “Ŋ̄ chɛ᷄l, na̍a̍ pi̍la̍ ŋ̄ chō ŋ̄se̍ī.” Mi̍ Chɔ̄ɔ̍sūāā di̍mūl nda̍ āā, “Mɛ̄ɛ̍ lā tɛ̄ɛ̄mbu̍u̍ nyɛ᷅m chēle̍ŋ wāŋnda̍ sōōlūū māā mɛ̄lɛ̄ka̍a̍ ndā mi̍ ŋ̄ wā nya̍ tɛ̄ɛ̄ŋ ndo̍ŋ mī lā yɔ̄ŋgu̍ kɔ̄ltā nyāla̍ŋ kpo̍u̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍, I̍sɔ̄lūɛ̍i̍ya̍ Mɛ̄lɛ̄ka̍ nda̍ pīɛ̄īyo̍.”

²⁴Ma̍ dīmūl Chɔ̄ɔ̍sūāā āā, “Ŋ̄ chō Mɛ̄lɛ̄ka̍ Ya̍a̍wɛ̄ɛ̄ ō na̍a̍ ŋ̄ pīɛ̄īyo̍ sāāŋgīāl ndu̍yɛ̍ mī ŋ̄ tōsa̍ nyɛ̄ o̍ di̍mūl na̍a̍ wo̍.”

²⁵O̍ ko̍ŋ kɔ̍ɔ̍lī, mi̍ Chɔ̄ɔ̍sūāā yi̍ī kpe̍ma̍a̍ a̍ Mɛ̄lɛ̄ka̍ Ya̍a̍wɛ̄ɛ̄ pāa̍le̍ le̍ŋ Si̍ɛ̍kɛ̄m chi̍e̍e̍ lo̍ŋ le̍ nda̍ kpo̍u̍. Ndu̍yɛ̍ o̍ kpe̍ma̍ o̍ yi̍i̍ ko̍ŋ ndo̍ ni᷄ŋ mbo̍ kē nda̍ sāwāla̍ nda̍ nɔ̄ mā tōl kɔ̄ɔ̄lī la̍ŋ.

²⁶O̍ ko̍ŋ kɔ̍ɔ̍lī, mi̍ Chɔ̄ɔ̍sūāā po̍o̍nyīāā sāwāla̍ la̍ŋ o̍ yāu̍ lāsāwa̍ Mɛ̄lɛ̄ka̍a̍ ni᷄ŋ. Mbo̍ chūā pōū bɛ̄ndōo̍ mbo̍ kɛ̄sī o̍ yɔ̄m bɛ̄ndu̍[5] wa̍ o̍ fo̍nda᷄ŋ cho̍ ō yɔ̄ŋga᷄ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍ wo̍ īkɛ̄i̍ yo̍ bɛ̄ŋgu̍.

²⁷O̍ ko̍ŋ kɔ̍ɔ̍lī, mbo̍ dīmūl nda̍ āā, “Lā chē pōūwo̍ ho̍ō, pōūwo̍ ho̍ō ndu̍ cho̍ se̍ī nyāa̍ ni̍. Nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l na̍a̍, pōūwo̍ ho̍ō tūēī kpo̍u̍. Le̍la̍ŋ ndu̍ cho̍ se̍īyo̍ ni̍. Ndu̍ cho̍ tōsā ni̍ lā so̍lī Mɛ̄lɛ̄ka̍ Ya̍a̍wɛ̄ɛ̍ dīōm te̍.”

²⁸O̍ ko̍ŋ kɔ̍ɔ̍lī, mi̍ Chɔ̄ɔ̍sūāā ma᷅l nda̍ mi̍ wa̍nā o̍ wānā mi̍i̍ŋgū o̍ ndu̍ lo̍.

²⁹O̍ ko̍ŋ kɔ̍ɔ̍lī, mɛ̄ɛ̍ te̍le̍ŋ ti̍ŋ ō hīo̍u̍, mi̍ bu̍ɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ Chɔ̄ɔ̍sūāā po̍ Nu᷅ŋ ndo̍ ō wū. Ō wa̍ wɔ̄sīla̍ŋ kɛ̄mɛ̄ a̍ tɔ̍ (110) mbo̍ wū.

³⁰O̍ ko̍ŋ, mi̍ wāŋnda̍ I̍sɔ̄lūɛ̄ī a̍ kɔ̍ chɔ᷅ dīāllūŋ ndɔ̍ŋ o̍ lɛ̄ŋndē ndɔ̄le̍ŋ ni᷄ŋ, Tīmīnātī Sɛ̍lūāā chi̍e̍e̍, o̍ lɛ̄ŋndē īpēmbūle̍ŋ E̍fi̍lūēm, kūmbū Pēmbīī Ka̍a̍sāve̍ bā lūāŋndo̍.

³¹Chɔ̍ŋ a̍ te̍le̍ŋ Chɔ̄ɔ̍sūāā mi̍i̍ŋgu̍ I̍sɔ̄lūɛ̍i̍ya̍ chīla̍ŋ ndo̍, I̍sɔ̄lūɛ̍i̍ya̍ lo̍ Mɛ̄lɛ̄ka̍ Ya̍a̍wɛ̄ɛ̍ sāāŋgīāllo̍ ha̍a̍a̍ mi̍ Chɔ̄ɔ̍sūāā wu᷅. Ndu̍yɛ̍ mɛ̄ɛ̍ o̍ vi᷅ ma̍ hīāū vɛ̄lɛ̄ lāchī a̍ Mɛ̄lɛ̄ka̍ sāāŋgīāllo̍ ha̍a̍a̍ mi̍ lāŋgba̍ā ndāā ka᷅lla̍ a̍ che᷅ nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍l I̍sɔ̄lūɛ̍i̍ya̍ wa̍ ā chūū wu᷄.

³²Mi̍ Che̍kɔ̍pū, I̍sɔ̄lūɛ̍i̍ya̍ fi̍nyā ndā ma̍mā ndu̍ o̍o̍ pi̍a̍ndū sīndɛ̄ lɛ̄ŋnde̍ŋ a̍ ka̍ni̍ŋ hu̍mbo᷄ŋ kɛ̄mɛ̄ pūa̍a̍ Ha̍mɔ̄ɔ̄ wa̍ o̍ bā. Ha̍mɔ̄ɔ̄ ko̍ŋ yɛ̄ ndu̍ wa̍ fi̍nyāa̍ Si̍ɛ̍kɛ̄m ni̍. Bōōndi̍i̍ I̍sɔ̄lūɛ̍i̍ya̍ wa̍ mālɔ̄ɔ̍ I̍chi̍pī ve̍, ma̍ chūā dīāllūŋ vīlɛ̍i̍ Chōo̍sɛ̍ fi̍nyā ndā ma̍mā wo̍ŋ ma̍ hūŋ a̍ mu̍ŋ, ma̍ hu᷄ŋ chɔ᷅ mu̍ŋ o̍ lɛ̄ŋndē lēŋ ni᷄ŋ Si̍ɛ̍kɛ̄m. Ndu̍yɛ̍ wānāa̍ fu̍la̍ o̍ pūlāle̍ Chōo̍sɛ̍le̍ŋ chōo̍ wa̍ nda̍ a̍a̍ sɔ̍la̍ lɛ̄ŋnde̍ŋ nde᷅ŋ ni̍.

³³O̍ ko̍ŋ kɔ̍ɔ̍lī, mi̍ Ɛ̄li̍a̍a̍sā po̍ E̍lɔ̄ŋ ndo̍ ō wu᷅. Mi̍ I̍sɔ̄lūɛ̍i̍ya̍ chɔ̄ ndu̍ Ki̍bīāā chi̍e̍e̍ o̍ lɛ̄ŋndē īpēmbūle̍ŋ E̍fi̍lūēm. Ndu̍yɛ̍ Fi̍ni̍ha̍a̍sī po̍ Ɛ̄li̍a̍a̍sā wo̍, ndu̍ nda̍ a̍a̍ ke̍ chi̍o̍o̍ ho̍ō ni̍.