Read Southern Kisi Chɔ̄ɔ̍sūāā 3 Bible Online

Chɔ̄ɔ̍sūāā 3 - Southern Kisi bible

Chɔ̄ɔ̍sūāā 3

¹Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, mi̍ Chɔ̄ɔ̍sūāā nda̍ wāŋnda̍ I̍sɔ̄lūɛ̄ī a̍ pe̍nā chɔ̄nɔ᷄ŋ nāa̍ nda̍ wa̍ Āke̍e̍sīāā wa̍ ma̍ tūāl Chɔ̍ɔ̍dāŋ o̍ pēēlo̍. Ma̍ tūāndū tɛ̍ndīi̍la̍ŋ o̍ pīo̍o̍ kɔ̄ŋgɔ̍ lo̍ŋ ma̍ chāl chūmndo̍ le̍ mī te̍le̍ŋ nda̍ a̍a̍ nɔ̍ le̍ tāŋɔ̄ɔ̍ wo̍ ō fūūlu̍u̍.

²Mɛ̄ɛ̍ pālɛ̍i̍ ya̍a̍ Ī hi̍o̍ū, mi̍ wānāā ndāā ba̍nāa̍ ā bālū nda̍ dīmūllo̍ āā, “Tē lā chē pɛ̍ wa̍nāa̍ so̍lī sa̍lāa̍ o̍ Mɛ̄lɛ̄ka̍ lo̍ wa̍ mā wa̍ kɔ̄la̍ŋ bā Chɔ̍ɔ̍dāŋ ndo̍ a̍ kɔ̍fu̍ si̍m le̍ kpe̍ma̍ Mɛ̄lɛ̄ka̍ nyāa̍ Ya̍a̍wɛ̄ɛ̄ wo̍ wo̍, lā bɛ̄ɛ̄ndi̍a̍ŋ lā tōl nda̍ kɔ̄ɔ̄lī.

⁴Lā hi᷄ŋ ndɔ̍ na̍nu᷄ŋ pa̍a̍ndū le̍. Nda̍ cho̍ nya̍ nɛ̄īyo̍ chɔ̄m ni̍. Kɛ̍ tē lā wa̍ nda̍ kɔ̄la̍ŋ kɔ̄ɔ̄lī pɛ̍ lā sɔ̍ɔ̍ŋgūū nda̍ īkɛ̄i̍ fi̍ɔ̍ɔ̍ fi̍ɔ̍ɔ̍ le̍. Fo̍ndāa̍ lo̍ nya̍ tɛ̄ɛ̄ŋ nya̍ nda̍ā le̍ mɛ̍ɛ̍līi̍yo̍ tɛ̄ndāa̍ tɛ̄ɛ̄ŋ.”

⁵O̍ ko̍ŋ kɔ̍ɔ̍lī, mi̍ Chɔ̄ɔ̍sūāā di̍mūl nda̍ kpo̍u̍ āā, “Lā dīndi̍ nya̍ pi̍la̍ Mɛ̄lɛ̄ka̍ o̍ hɔ̄l. Kāni̍ fu̍u̍le̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ sīɔ̄dīi̍ kɔ̄ndɔ̄fi̍lta̍ŋ tōsā nya̍ tɛ̄ɛ̄ŋ.”

⁶Mi̍ Chɔ̄ɔ̍sūāā dīmūl wānāā sōlīāā lāsa̍lāa̍ āā, “Lā chu̍a̍ kɔ̍fu̍ si̍m le̍ kpe̍ma̍ Mɛ̄lɛ̄ka̍a̍ wo̍ mī lā si᷄m wāŋnda̍ lāchī le̍ kɔ̄la̍ŋ.” Ma̍ chūā kɔ̍fu̍ si̍m le̍ kpe̍ma̍ Mɛ̄lɛ̄ka̍a̍ wo̍ ma̍ hīāū wāŋnda̍ lāchī.

⁷Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Chɔ̄ɔ̍sūāā āā, “I̍ cho̍ hāū to̍sā mī I̍sɔ̄lūɛ̍i̍ya̍ kpo̍u̍ a̍ ka̍ndu̍ nu̍m bɛ̄ɛ̄le̍ŋ kīo̍o̍. Ndu̍yɛ̍ I̍ cho̍ tōsā mā sīna̍ māā mɛ̄ɛ̍ ya̍ I̍ wa̍ a̍ Mūu̍sē la̍tu̍lu̍ yɛ̍, le̍nde̍ ko̍ ya̍ I̍ cho̍ a̍ nūm la̍tu̍lu̍ ni̍.

⁸Di̍mu̍l wa̍nāa̍ so̍lī sa̍lāa̍ o̍ ya̍ lo̍ mā kūā a̍ kɔ̍fu̍ si̍m le̍ kpe̍ma̍ nūu̍ wa̍ āā, ‘Tē lā fūūlu̍u̍ o̍ pēēlo̍ pɛ̍, lā to᷄l ti᷅ŋ o̍ mɛ̄ŋnda̍ŋ ni᷄ŋ mī lā si᷄m o̍ kɔ̄ŋgɔ̍ɔ̍ īkɛ̄i̍.’ ”

⁹Mi̍ Chɔ̄ɔ̍sūāā ve̍e̍lū I̍sɔ̄lūɛ̍i̍ya̍ kpo̍u̍ na̍a̍ pi᷅lɛ̍, mbo̍ dīmūl nda̍ āā, “Lā hu᷄ŋ mī lā hu᷄ŋ tu̍e̍ī nyɛ̄ Mɛ̄lɛ̄ka̍ nāa̍ Ya̍a̍wɛ̄ɛ̄ o̍ nɔ̍ le̍ dīmīo̍o̍ wo̍.

¹⁰Lā chō pāa̍le̍ hāūle᷅ŋ sīnā māā Mɛ̄lɛ̄ka̍ cho̍ yōōmū wo̍ ō chō lātūlu̍ a̍ nya̍. Ndu̍yɛ̍ ō chō nyɛ̄ o̍ di̍mi̍ wo̍ tōsā mbō tōū yu̍ŋgu̍la̍ŋ ndāŋ na̍a̍ lāchī, Ke̍na̍na̍i̍tīi̍ya̍, a̍ Hi̍ta̍i̍tīi̍ya̍, a̍ Hi̍va̍i̍tīi̍ya̍ a̍, Pɛ̍lu̍i̍sa̍i̍tīi̍ya̍, a̍ Ka̍ka̍sa̍i̍tīi̍ya̍, a̍ A̍mɔ̍lu̍a̍i̍tīi̍ya̍, a̍ Chɛ̄bu̍sa̍i̍tīi̍ya̍.

¹¹Māsānɔ̄ɔ̍ Mɛ̄lɛ̄ka̍ nɔ̍ chi̍e̍ēŋndo̍ ho̍ō kpo̍u̍ wo̍ wānāa̍ so̍lī sa̍lāa̍ o̍ ndu̍ lo̍ wa̍ ā chō lākɔ̄ nya̍ lāchī a̍ kɔ̍fu̍ si̍m le̍ kpe̍ma̍ ndɔ̄ɔ̍ wo̍. Ā chō tōlɔ̄ɔ̄ o̍ pēēlo̍ nya̍ lāchī.

¹²Le̍la̍ŋ lā hɛ̄li̍ pu̍a̍a̍ tɔ̍ a̍, ā ŋīɔ̍ɔ̍ŋ o̍ yu̍ŋgu̍la̍ŋ I̍sɔ̄lūɛ̄ī tɛ̍ɛ̄ŋ, yu̍ŋgu̍ o̍ yu̍ŋgu̍ pōo̍ pīlɛ̍.

¹³Dīmīo̍o̍ nu̍a̍ā mī wānāā sōlīāā lāsa̍lāa̍ a̍ ku̍ā a̍ kɔ̍fu̍ Mɛ̄lɛ̄ka̍ Ya̍a̍wɛ̄ɛ̄ wo̍, o̍ cho̍ māsāa̍ le̍ chi̍e̍ēŋndo̍ ho̍ō kpo̍u̍ wo̍ wa̍ ā pīla̍ pēlo̍ŋ o̍ pēēlo̍, mī Chɔ̍ɔ̍dāŋ nda̍ŋ mā pɛ̄ŋgi̍ hīōūwɔ̄ɔ̍. Mī mɛ̄ŋma̍ cha᷅ŋ ma̍lu̍āŋ nda̍ŋ mā chūūŋgi̍āŋ na̍a̍ pi᷅lɛ̍.”

¹⁴O̍ ko̍ŋ kɔ̍ɔ̍lī, mi̍ I̍sɔ̄lūɛ̍i̍ya̍ ā māl nāa̍ nda̍ wa̍ īchāli̍ wa̍ ma̍ bīī kɔ̄la̍ŋ le̍ mā kɔ̍ ta᷅ŋ Chɔ̍ɔ̍dāŋ nda̍ŋ. Wānāa̍ wa̍ kɔ̄la̍ŋ a̍ kɔ̍fu̍ si̍m le̍ kpe̍ma̍ Mɛ̄lɛ̄ka̍a̍ wo̍ wa̍ ā wa̍ nda̍ īsīsi̍ la̍chi̍ a̍ kɔ̍fū kōŋ.

¹⁵Ndu̍yɛ̍ a̍ bōōndi̍i̍ nda̍ kūāū chīɔ̄ɔ̄ŋ nde̍ ki̍nɛ̍i̍ nda̍ ma᷄l le̍ kɔ̄la̍ŋ tāŋɔ̄ɔ̍ ni̍. Bōōndi̍i̍ ke̍ŋ ki̍nɛ̍i̍ Chɔ̍ɔ̍dāŋ nda̍ŋ mā hūŋ hu̍nɔ̄ɔ̄ bɛ̄ndōo̍ ni̍. Kɛ̍ dīmīo̍o̍ nu̍a̍ā mi̍ wānāa̍ wa̍ kɔ̄la̍ŋ a̍ kɔ̍fu̍ Mɛ̄lɛ̄ka̍a̍ wa̍ ā tūsī pēlo̍ŋ o̍ pēēlo̍,

¹⁶mi̍ mɛ̄ŋnda̍ŋ mā pɛ̄ŋgī bɛ̍ɛ̍ hi̍o̍u̍wɔ̄ɔ̍. Mi̍ mɛ̄ŋma̍ cha᷅ŋ pi̍o̍o̍ lūāŋ nda̍ŋ mā chūūŋgi̍āŋ ma̍lu̍āŋ pɔ̍ɔ̍li̍ o̍ chi̍e̍e̍ bɛ̍ndōo̍ dīōla̍ŋ āā, A̍dām, o̍ cho̍ Sa̍lu̍ɛ̍tāŋ chi̍e̍e̍ i̍kɛ̍i̍ yo̍. Mi̍ mɛ̄ŋma̍ wa̍ tūūsōo̍ mātōū o̍ pēe̍ mɛ̄ŋmā īhɛ᷄l nda̍ vēēlū āā Ālu̍a̍bā wo̍ wa̍ŋ mā pɛ̄ŋgī hīōūwɔ̄ɔ̍. Mi̍ I̍sɔ̄lūɛ̍i̍ya̍ tāŋ Chɔ̍ɔ̍dāŋ nda̍ŋ Chɛ̄lu̍i̍kō i̍kɛ̍i̍.

¹⁷Wānāa̍ so̍lī sa̍lāa̍ o̍ Mɛ̄lɛ̄ka̍ lo̍ wa̍, a̍ ku̍ā a̍ kɔ̍fu̍ si᷅m le̍ kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ wa̍ ā lo̍ īsīsi̍ o̍ pīo̍o̍ tɛ̄ɛ̄ŋ o̍ lɛ̄ŋndē vēsɛ̍i̍le̍ŋ chōo̍ ha̍a̍a̍ mi̍ I̍sɔ̄lūɛ̍i̍ya̍ chūū tāŋɔ̄ɔ̄ kpo̍u̍.