Read Southern Kisi Chɔ̄ɔ̍sūāā 4 Bible Online

Chɔ̄ɔ̍sūāā 4 - Southern Kisi bible

Chɔ̄ɔ̍sūāā 4

¹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Chɔ̄ɔ̍sūāā āā,

²“Hɛ̍li̍ pu̍a̍a̍ tɔ̍ a̍, ā ŋīɔ̍ɔ̍ŋ wāŋnda̍ tɛ̄ɛ̄ŋ, yu̍ŋgu̍ o̍ yu̍ŋgu̍ wānā pi᷅lɛ̍.

³O̍ ko̍ŋ kɔ̍ɔ̍lī, mā di̍mu̍l nda̍ mā kɔ̍ chɔ̍ɔ̍vīāā pōūta̍ŋ tɔ̍ a̍ lā tīɔ̍ɔ̍ŋ, wānā o̍ wānā pōūwo̍ ō pīlɛ̍ nāa̍ wānāa̍ so̍lī sa̍lāa̍ wa̍ ā chō īsīsi̍ kpe̍e̍kpe̍i̍ya̍ mā kūɛ̄ a̍ la̍ŋ nāa̍ nya̍ chō lākɔ̄ chūɛ̄llɛ̄ŋ mālɔ̄ wa̍.” Mi̍ Chɔ̄ɔ̍sūāā to̍sā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍.

⁴Mbo̍ vēēlū pūa̍a̍ tɔ̍ a̍ ā ŋīɔ̍ɔ̍ŋāā o̍ hɛ̍li̍ o̍ yu̍ŋgu̍la̍ tɔ̍ a̍ lā tīɔ̍ɔ̍ŋnda̍ŋ tɛ̄ɛ̄ŋ nda̍.

⁵Mbo̍ dīmūl nda̍ āā, “Lā kɔ̍ o̍ pīo̍o̍ tɛ̄ɛ̄ŋ, nāa̍ nda̍ chō a̍ kɔ̍fu̍ Mɛ̄lɛ̄ka̍ nāa̍ Ya̍a̍wɛ̄ɛ̄ wo̍ wa̍ mī wānā o̍ wānā kɔ̍ chu̍ā pōūwo̍ ō pīlɛ̍ o̍ chōŋgu̍ mɛ̄ɛ̍ nya̍ chō o̍ yu̍ŋgu̍la̍ I̍sɔ̄lūɛ̍i̍la̍ŋ ni̍ŋ yɛ̍.

⁶Pōūta̍ŋ nda̍ŋ la̍ cho̍ wā tāāmāsi̍o̍o̍ nya̍ tɛ̄ɛ̄ŋ ni̍. Tē chūāūwāā nyāa̍ hu᷄ŋ nyu̍nā nya̍ fɛ̍ɛ̍ŋ pɛ̍, āā, ‘Le̍ yɛ̄ɛ̍nɛ̍ pōūta̍ŋ ndāŋ lā chō yɛ̍?’

⁷Lā dīmu̍l nda̍ māā sīndɛ̄ mi̍ Mɛ̄lɛ̄ka̍ tōsā mi̍ Chɔ̍ɔ̍dāŋ nda̍ŋ mā pɛ̄ŋgī hīōūwɔ̄ɔ̍, mi̍ wānāa̍ wa̍ kɔ̄la̍ŋ a̍ kɔ̍fu̍ Mɛ̄lɛ̄ka̍ Ya̍a̍wɛ̄ɛ̄ wo̍ wa̍ ā tāŋ lēe̍lo̍ō a̍ ndu̍. Le̍ wāa̍ lōōnɔ᷄ŋndo̍ a̍ nyɛ̄ Mɛ̄lɛ̄ka̍ tōsa̍ ko̍ŋ na̍nu᷄ŋ ndo̍ na̍a̍ ŋ̄ kɛ̄si̍ pōūta̍ŋ ndāŋ ni̍.”

⁸O̍ ko̍ŋ, mi̍ pūa̍a̍ tɔ̍ a̍, ā ŋīɔ̍ɔ̍ŋnda̍ ha̍ā ā tōsā mɛ̄ɛ̍ Chɔ̄ɔ̍sūāā di̍mu̍l nda̍ yɛ̍. Ma̍ kɔ̍ chɔ̍ɔ̍vīāā pōūta̍ŋ tɔ̍ a̍ lā tīɔ̍ɔ̍ŋ o̍ pīo̍o̍ tɛ̄ɛ̄ŋ, mɛ̄ɛ̍ yu̍ŋgu̍la̍ŋ lā chō I̍sɔ̄lūɛ̄ī yɛ̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ di̍mu̍l Chɔ̄ɔ̍sūāā yɛ̍. Ma̍ kɔ̍ di̍ī la̍ŋ nāa̍ nda̍ kɔ̍ lɔ᷅l īchɔ̄l kōŋ nda̍.

⁹O̍ ko̍ŋ kɔ̍ɔ̍lī, mi̍ Chɔ̄ɔ̍sūāā ta̍ŋgūl vɛ̄lɛ̄ pōūtā tɔ̍ a̍ lā tīɔ̍ɔ̍ŋ ndā chēle̍ŋ nāa̍ wānāa̍ wa̍ kɔ̄la̍ŋ a̍ kɔ̍fu̍ Mɛ̄lɛ̄ka̍a̍ wa̍ ā wa̍ īsīsi̍ o̍ pīo̍o̍ tɛ̄ɛ̄ŋ nda̍. Bōōndi̍i̍ yāu̍wo̍ ho̍ō chō pōōnyīa̍ŋndo̍ ve̍ bɛ̍ɛ̍ pōūtālāŋ lā chō lo̍ŋ.

¹⁰Wānāa̍ so̍lī sa̍lāa̍ o̍ Mɛ̄lɛ̄ka̍ lo̍ wa̍, a̍ ku̍ā a̍ kɔ̍fu̍ Mɛ̄lɛ̄ka̍a̍ wa̍ ā lo̍ īsīsi̍ o̍ pīo̍o̍ tɛ̄ɛ̄ŋ ha̍a̍a̍ mi̍ nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ di̍mu̍l Chɔ̄ɔ̍sūāā le̍ mī wāŋnda̍ tōsa̍ ō chūū tōsā. Ma̍ tōsā nyɛ̄ o̍ nyɛ̄ mɛ̄ɛ̍ Mūu̍sē ndu̍ o̍o̍ di̍mu̍l Chɔ̄ɔ̍sūāā yɛ̍. Mi̍ wāŋnda̍ I̍sɔ̄lūɛ̄ī a̍ ke̍lēŋā ma̍ tāŋ chɔ̍ chɔ̍.

¹¹Mɛ̄ɛ̍ nda̍ chīi̍ dɔ̍ɔ̍ tāŋɔ̄ɔ̄ kpo̍u̍ mi̍ wānāa̍ so̍lī sa̍lāa̍ wa̍ a̍ ku̍ā a̍ kɔ̍fu̍ si̍m le̍ kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ wa̍ ā hīāū wāŋnda̍ lāchī.

¹²O̍ ko̍ŋ kɔ̍ɔ̍lī, mi̍ pūa̍a̍ fu̍la̍ o̍ yu̍ŋgu̍ Lūbɛ᷅ŋ ndo̍ ni̍ŋ, a̍ yu̍ŋgu̍ Ka̍a̍dī wo̍, a̍ yu̍ŋgu̍ Mānāa̍sē wo̍ bā pāa̍le̍ŋ lē dēl lo̍ wa̍ ā bɛ̄ɛ̄ndīa̍ŋ a̍ nyɛ̄m nda̍ŋ chɔ̄ūwo̍ŋ. Ma̍ sīm wāŋnda̍ ā tūa̍a̍ lāchī mɛ̄ɛ̍ Mūu̍sē di̍mu̍l nda̍ yɛ̍.

¹³Nda̍ wa̍ ka̍ŋ a̍ bɛ̍ɛ̍ndīa̍ŋ le̍ chɔ̄ūwo̍ ma̍ tāŋ lēe̍lo̍ō o̍ lɛ̄ŋndē dɛ̍ŋgbɛ̍le̍ŋ ni̍ŋ Chɛ̄lu̍i̍kō i̍kɛ̍i̍ ya̍, ā wa̍ kpo̍u̍ kpo̍u̍ wāa̍la̍ŋ be̍le̍-hi̍ɔ̍ɔ̍lu̍ (40,000). Ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄ o̍ wa̍ a̍ nda̍ lātūlu̍.

¹⁴Mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā pāa̍le̍ le̍ŋ, mi̍ Chɔ̄ɔ̍sūāā si̍mnu᷄ŋ o̍ bɛ̍ndū I̍sɔ̄lūɛ̍i̍ya̍ o̍ hɔ̄l. Ndu̍yɛ̍ ma̍ lō ndu̍ bɛ̄ɛ̄le̍ŋ kīo̍o̍ ha̍a̍a̍ a̍ te̍le̍ŋ o̍ wa̍ yōōmū wo̍ mɛ̄ɛ̍ nda̍ ke̍ Mūu̍sē bɛ̄ɛ̄le̍ŋ yɛ̍.

¹⁵A̍ bōōndi̍i̍ wāŋnda̍ wa̍ ke̍ŋ ta̍ŋɔ̄ɔ̍ ve̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Chɔ̄ɔ̍sūāā māā,

¹⁶ō dīmu̍l wa̍nāa̍ so̍lī sa̍lāa̍ o̍ Mɛ̄lɛ̄ka̍ lo̍ wa̍, a̍ ku̍ā a̍ kɔ̍fu̍ si̍m le̍ kpe̍ma̍ ndɔ̄ɔ̍ wa̍ mā fūla̍ o̍ pēēlo̍.

¹⁷Mi̍ Chɔ̄ɔ̍sūāā to̍sā mɛ̄ɛ̍ o̍ di̍mu̍l ndu̍ yɛ̍.

¹⁸Dīmīo̍o̍ nu̍a̍ā mi̍ wānāā sōlīāā lāsa̍lāa̍ ā hēl o̍ kɔ̄ŋgɔ̍, mi̍ Chɔ̍ɔ̍dāŋ nda̍ŋ mā mīīŋgū bɛ̍ɛ̍ hi̍o̍u̍wɔ̄ɔ̍. Mi̍ mā pīā mi̍ mā chōŋ o̍ dālāla̍ŋ ni̍ŋ māā pāāndū.

¹⁹O̍ pāŋgi̍i̍ tāse̍i̍ ni᷄ŋ, o̍ wɔ̄sīo̍o̍ ni᷄ŋ mālɔ̄ tɔ̍ I̍sɔ̄lūɛ̍i̍ya̍ ta᷄ŋ Chɔ̍ɔ̍dāŋ nda̍ŋ ni̍. Mɛ̄ɛ̍ nda̍ ta̍ŋ, ma̍ tūāndū tɛ̍ndɛ̄i̍la̍ ndāla̍ŋ o̍ chi̍e̍e̍ pi᷅lɛ̍ īkɛ̄i̍ dīōla̍ŋ āā Ki̍lkāl,[1] kūmbū Chɛ̄lu̍i̍kō wo̍ bā pāa̍le̍ŋ lē chāŋ ndo̍.

²⁰Ki̍lkāl lo̍ŋ Chɔ̄ɔ̍sūāā di̍ī pōūtā tɔ̍ a̍ lā tīɔ̍ɔ̍ŋ ndā nda̍ chɔ̄ɔ̄vi̍a̍a̍ Chɔ̍ɔ̍dāŋ nda̍ŋ ni̍.

²¹Mi̍ Chɔ̄ɔ̍sūāā lo᷅ o̍ ko̍ŋ, mbo̍ dīmūl wāŋnda̍ I̍sɔ̄lūɛ̄ī āā, “Tē chūāā nyāa̍ hu᷄ŋ nyu̍nā nya̍ fɛ̍ɛ̍ŋ pɛ̍ le̍ sa̍bū pōūta̍ŋnda᷅ŋ lā chō wo̍,

²²lā dīmu̍l nda̍ āā, ‘Sīndɛ̄ mi̍ Chɔ̍ɔ̍dāŋ nda̍ŋ mā pɛ̄ŋgī hīōūwɔ̄ɔ̍, mi̍ I̍sɔ̄lūɛ̍i̍ya̍ kēī o̍ lɛ̄ŋndē vēsɛ̍i̍le̍ŋ chōo̍ ma̍ tāŋ.’

²³Kāni̍ fu̍u̍le̍ mɛ̄ɛ̍ Mɛ̄lɛ̄ka̍ nyāa̍ Ya̍a̍wɛ̄ɛ̄ o̍ ve̍e̍li̍a̍a̍ sīndɛ̄ pēe̍ mɛ̄ŋmā īhɛ᷄l nda̍ vēēlū āā pēē si̍a̍ŋāa̍ mi̍ wānāā nāa̍ tāŋ yɛ̍, le̍nde̍ ko̍ o̍ ve̍e̍li̍a̍a̍ Chɔ̍ɔ̍dāŋ nda̍ŋ ni̍ mi̍ ŋ̄ tāŋ.

²⁴Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ he̍ī le̍ mī wāŋnda̍ kpo̍u̍ o̍ chi̍e̍ēŋndo̍ ni̍ŋ a̍ si̍na̍ māā ō chō wāna̍ kpāāyā bɛ̍ndū. Ndu̍yɛ̍ nya̍ bɛ̍ɛ̍ he̍ī cho̍ tōsā ni̍ mī lā hīōū lāchī a̍ Mɛ̄lɛ̄ka̍ nyāa̍ Ya̍a̍wɛ̄ɛ̍ bɛ̄ɛ̄le̍ŋ kīo̍o̍ le̍ fɛ̍ɛ̍ŋ a̍ fɛ̍ɛ̍ŋ.”