Read Southern Kisi Chɔ̄ɔ̍sūāā 5 Bible Online

Chɔ̄ɔ̍sūāā 5 - Southern Kisi bible

Chɔ̄ɔ̍sūāā 5

¹O̍ ko̍ŋ kɔ̍ɔ̍lī, A̍mɔ̍lu̍a̍i̍tīi̍ya̍ māsāa̍ ndāā bɛ̍ndūa̍a̍ wa̍ Chɔ̍ɔ̍dāŋ le̍e̍lōo̍ bā pāa̍le̍ŋ lē dēl lo̍ wa̍ ni̍, a̍ māsāā bɛ̍ndūāā māKēnāna̍i̍tīi̍ya̍a̍ wa̍ o̍ Pēe̍ Mɛ̄ŋmā Īhɛ᷄llo̍ Mɛ̄dītālu̍e̍nīāā hōlnɔ᷄ŋndo̍ wa̍ ā tūɛ̄ī māā Mɛ̄lɛ̄ka̍ Ya̍a̍wɛ̄ɛ̄ o̍ ve̍e̍li̍a̍a̍ Chɔ̍ɔ̍dāŋ nda̍ŋ le̍ mi̍ I̍sɔ̄lūɛ̍i̍ya̍ nda̍ a̍a̍ ta̍ŋ. Mɛ̄ɛ̍ nda̍ tūēī le̍nde̍, mi̍ sīōōŋīī bɛ̄ndūe̍i̍ bīī nda̍. Mi̍ yōōmūa̍ŋ mā fūlā nda̍ po̍ le̍ sɔ̍ŋgɔ̄ɔ̍ a̍ I̍sɔ̄lūɛ̍i̍ya̍.

²A̍ bōōndi̍i̍ ke̍ŋ mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Chɔ̄ɔ̍sūāā āā, “Chu̍a̍ po̍ū nda̍ vēēlū āā fīli̍ŋtī wo̍ ma̍ chɔ̄ū kūūso̍ŋ a̍ ndu̍ mā hi̍vi̍ wāŋ pīāāndūa̍a̍ wāŋnda̍ I̍sɔ̄lūɛ̄ī tɛ̍ɛ̄ŋ.” Ku̍ndā dīi̍ŋ ndɔ̄ɔ̍ wa̍ ho̍ō le̍ hīvīo̍o̍ sɔ̄lāa̍ o̍ chīɛ̄ī kɔ̄ɔ̄lī I̍sɔ̄lūɛ̍i̍ya̍ tɛ̄ɛ̄ŋ ni̍.

³Mi̍ Chɔ̄ɔ̍sūāā chu̍a̍ū kūūso̍ŋ mbo̍ hīvī nda̍ o̍ chīɛ̄ī kɔ̄ɔ̄lī o̍ fo̍ndāŋndo̍ dīōla̍ŋ āā pēmbīī hīvīāā o̍ chīɛ̄ī kɔ̄ɔ̄lī ve̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍.

⁴Bōōndi̍i̍ I̍sɔ̄lūɛ̍i̍ya̍ ma᷄l I̍chi̍pī ve̍, pūa̍a̍ kpo̍u̍ ā wa̍ ā hīvīāā. Kɛ̍ chɔ̍ŋ a̍ te̍le̍ŋ ko̍ŋ mbo̍ bīya᷅ŋ a̍ wɔ̄sīlā be̍le̍-hi̍ɔ̍ɔ̍lu̍la̍ nda̍ chīi̍ o̍ po̍llo̍ ni̍ŋ nda̍ŋ, po̍ o̍ po̍ nda̍ a̍a̍ ve̍lū ō pīlɛ̍ bɛ̍ɛ̍ ve̍ wɔ̍ o̍ hi̍vīāā le̍. Mɛ̄ɛ̍ le̍ sa̍bōo̍ ho̍ō Chɔ̄ɔ̍sūāā hi̍vi̍ nda̍ ni̍. Mālɔ̄ɔ̄ ndā ko̍ŋ I̍chi̍pī, mi̍ wāŋnda̍ I̍sɔ̄lūɛ̄ī a̍ kɛ̍ɛ̄ nyɛ̄ Mɛ̄lɛ̄ka̍ dīmu̍l nda̍ wo̍ tōsāa̍. O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ me̍na᷄ŋ po̍ māā ō cho̍ nda̍ chɛ̄lɔ̄ɔ̄ mā fūūlu̍u̍ o̍ lɛ̄ŋndē o̍ chu̍e̍l fi̍nyāā ndāā ma̍māa̍ būŋgɛ̄i̍ le̍ nda̍ kīo̍o̍ le̍ŋ ni̍ŋ te̍, lɛ̄ŋnde̍ cho̍ lē pīāā a̍ nyɛ̄m kɛ̄ndɔ᷄ŋ, ndu̍yɛ̍ mi̍ lē nɔ̄ fo̍ndāŋndā kɛ̄ndɛ̄lā tɔ̄lɔ̄ɔ̄la̍ŋ lā nāŋ nda̍ŋ nde̍ŋ. Pūa̍a̍ ma̍l I̍chi̍pī ma̍ wā bōōndi̍i̍ ku̍a̍ā o̍ chɔ̄ū wā ki̍nɛ̍i̍ ma̍ wū nɛ̄ī tɛ̍ɛ̄ŋ o̍ po̍llo̍ ni̍ŋ. Kɛ̍ mi̍ Mɛ̄lɛ̄ka̍ māndā chūāūwāā ndāa̍ sɔ̍ŋgɔ̍ ndāa̍. Chūāūwāā ndāā ka̍ŋ Chɔ̄ɔ̍sūāā hi̍vi̍ ka̍ŋ o̍ chīɛ̄ī kɔ̄ɔ̄lī ni̍.

⁸Mɛ̄ɛ̍ Chɔ̄ɔ̍sūāā chi̍i̍ nda̍ hīvī kpo̍u̍, mi̍ wāŋnda̍ I̍sɔ̄lūɛ̄ī a̍ lo᷅ o̍ dɔ̍ɔ̍ŋgɔ̍ nda̍ wa̍ ko̍ŋ ndo̍ ha̍a̍a̍ ma̍ sīāŋgū.

⁹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Chɔ̄ɔ̍sūāā āā, “Ō wa̍ sūɛ̍i̍ lāsi̍ɔ̍mbu̍ le̍ wānāā nīa̍a̍ wāa̍ o̍ chɛ̄le̍ŋ ni̍ŋ I̍chi̍pī. Kɛ̍, I̍ fa̍ŋa̍ nya̍ pāa̍le̍ hāūle̍ŋ si̍ɔ̍mbu̍la̍ la̍ŋ chōo̍.” Ma̍ kē fo̍ndā kōŋ dīōla̍ŋ āā Ki̍lkāl. Ndu̍yɛ̍ pāa̍le̍ hāūle᷅ŋ bɛ̍ɛ̍ dīōlā lāŋ nda̍ chō fo̍ndā kōŋ vēēlōo̍ ni̍.[2]

¹⁰O̍ pāŋgi̍i̍ ke̍ŋ ni̍ŋ mālɔ̄ tɔ̍ a̍ lē hīɔ̍ɔ̍lu̍ i̍chɔ᷅llo̍, mi̍ wāŋnda̍ I̍sɔ̄lūɛ̄ī a̍ bi̍ī bɔ̄ŋa᷅ŋndo̍ a̍ hīōūwɔ̄ɔ̄ chōo̍ wo̍ o̍kɔ̄ɔ̄ nāa̍ nda̍ wa̍ ka̍ŋ Ki̍lkāl o̍ lɛ̄ŋndē dɛ̍ŋgbɛ̍le̍ŋ ni̍ŋ Chɛ̄lu̍i̍kō i̍kɛ̍i̍ ya̍.

¹¹Mɛ̄ɛ̍ bɔ̄ŋa᷅ŋ kōŋ ō hīōū, mi̍ pāa̍le̍ŋ le̍ sīā dīi̍mā ndɔ̄ɔ̍, pāa̍le̍ le̍ŋ kpe̍e̍kpe̍i̍ nda̍ dē nyɛ̄ dīāā wāā o̍ lɛ̄ŋndē lēŋ ni̍ŋ ni̍, bēe̍dīi̍ nda̍ do̍ū yi̍i̍sīi̍ le̍ wo̍, a̍ ba̍a̍līi̍ŋ tu̍a̍ŋa᷄ŋ.

¹²Chɔ̍ŋ a̍ pāa̍le̍ le̍ŋ nyɛ̄ dīāā Mɛ̄lɛ̄ka̍ ndu̍ o̍o̍ ke᷅ I̍sɔ̄lūɛ̍i̍ya̍ pāāndū mā vēēlū ndu̍ āā ma̍nɛ̄i̍yo̍ wo̍, mbo̍ pɛ̄ŋgī nda̍ ndu̍ kīo̍o̍. Kɛ̍ ma̍ hīāū lāchī a̍ nyɛ̄ dīāā wāā o̍ lɛ̄ŋndē Ke̍nāŋnde̍ŋ ni̍ŋ di̍o̍o̍ wɔ̄sī kōŋ.

¹³Bōōndi̍i̍ Chɔ̄ɔ̍sūāā nda̍ wāŋnda̍ I̍sɔ̄lūɛ̄ī a̍ wa̍ o̍ dɔ̍ɔ̍ŋgɔ̍ɔ̍ ni̍ŋ Chɛ̄lu̍i̍kō i̍kɛ̍i̍ ye̍, o̍ lēpīlɛ̍ ni᷄ŋ kpe̍ mi̍ Chɔ̄ɔ̍sūāā cha̍nu᷄ŋ po̍o̍ ndu̍ īsīsi̍ la̍chi̍ a̍ mūɛ̄ī fāŋnde̍ o̍ bā. Mi̍ Chɔ̄ɔ̍sūāā sɔ̍ɔ̍ŋgūū ndu̍ īkɛ̄i̍ mbo̍ nyūnā ndu̍, āā, “Kūmbū nāa̍ ŋ̄ chō ni̍ bāā kūmbū ya̍a̍mɔ̍ɔ̍wa̍a̍ nāa̍?”

¹⁴Mi̍ pōo̍ dīmūl ndu̍ āā, “I̍ cho̍ ku̍mbū nyā le̍, I̍ cho̍ vɛ̍lɛ̄ kūmbū ya̍a̍mɔ̍ɔ̍wa̍a̍ nyā le̍. Ya̍ cho̍ so̍vɛ̄i̍ya̍a̍ Mɛ̄lɛ̄ka̍ Ya̍a̍wɛ̄ɛ̄ wa̍ bōlle̍ŋ ni̍, le̍la̍ŋ ya̍ I̍ hi᷅ŋ ni̍.” Mi̍ Chɔ̄ɔ̍sūāā tu̍ndu᷄ŋ ndu̍ o̍ lābɛ̄ŋgu̍ ni̍ŋ le̍ ndu̍ bɛ̄ɛ̄le̍ŋ kīo̍o̍. Mbo̍ dīmūl ndu̍, āā, “Bu̍ɛ̍ī nūmndo̍ ya̍ I̍ cho̍ ni̍ māsānɔ̄ɔ̍. Ō yɛ̄ɛ̍nɛ̍ ŋ̄ yēēma̍ yɛ̄ ya̍ mī to̍sa̍?”

¹⁵Mi̍ wānā ko̍ŋ dīmūl ndu̍ āā, “So̍li̍ kɔ̍ɔ̍vɛ̍i̍la̍ŋ nu̍m o̍ ŋ̄pēlū, kāni̍ fu̍u̍le̍ lɛ̄ŋndē ŋ̄ si᷄m chōo̍ le̍ŋ, le̍ Mɛ̄lɛ̄ka̍ Ya̍a̍wɛ̄ɛ̄ le̍ cho̍ ni̍.” Mi̍ Chɔ̄ɔ̍sūāā so̍lī kɔ̄vɛ̄i̍la̍ŋ ndu̍ o̍ ŋ̄pēlū.