Read Southern Kisi Chɔ̄ɔ̍sūāā 6 Bible Online

Chɔ̄ɔ̍sūāā 6 - Southern Kisi bible

Chɔ̄ɔ̍sūāā 6

¹Mi̍ wāŋnda̍ Chɛ̄lu̍i̍kō a̍ ki̍i̍ndīāā dīōlā kpāki̍ ba̍lu̍ chi̍o̍o̍ la̍ŋ kpa̍ŋ kpa̍ŋ ma̍ kɛ̄sī so̍vɛ̄i̍ya̍ o̍ dīōla̍ŋ le̍ I̍sɔ̄lūɛ̍i̍ya̍. Nda̍ a̍a̍ chɛ᷅l mī wānā ndu̍ o̍o̍ fu̍la̍ le̍ kɛ̄lɛ̄ŋgāā mā lūɛ̄ī.

²O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Chɔ̄ɔ̍sūāā āā, “I̍ ma̍l nya̍ Chɛ̄lu̍i̍kō o̍ bā a̍ māsa̍ ndā bɛ̍ndōo̍ a̍ ku̍u̍ba̍a̍ ndāa̍ chɔ̄ūwa̍ kpo̍u̍.

³Le̍la̍ŋ, nūm nya̍ so̍vɛ̄i̍ya̍a̍ nu̍mnda̍, lā bālu̍ Chɛ̄lu̍i̍kō le̍ pālɛ̍i̍ ī ŋɔ᷄mpu᷅m pāa̍le̍ o̍ pāa̍le̍ lēpīlɛ̍.

⁴Wā nāa̍ so̍lī sa̍lāa̍ wa̍ ā ŋɔ᷄mmɛ̍ū nda̍ si̍m kɔ̍fu̍ si̍m le̍ kpe̍ma̍ nu̍u̍ wo̍ lāchī ni̍ a̍ bu̍lu̍la̍ lēēlā sāa̍ nda̍ o̍ lābā lā ŋɔ᷄mmɛ̍ū. Tē lā bālu̍ le̍nde̍ le̍ pālɛ̍i̍ ī ŋɔ᷄mpu᷅m pɛ̍, o̍ ŋɔ᷄mmɛ̍ū wo̍ lā bālu̍ lē ŋɔ᷄mmɛ̍ū, mī wānāa̍ so̍lī sa̍lāa̍ wa̍ ā kūā a̍ bu̍lu̍la̍ŋ hɔ̄ŋndo̍.

⁵O̍ bālɔ̄ɔ̄ lē ŋɔ᷄mmɛ̍ū wo̍ tē ā hɔ̍ŋ bu̍lu̍la̍ŋ pɛ̍ yɔ̍ŋge̍le̍ŋ, nya̍ kpo̍u̍ lā kūla̍ dīōm pīlɛ̍ kpu̍ū. Sāāsa̍ ba̍lu̍ chi̍o̍o̍ wo̍ chō kōmbā kpo̍u̍. Tē ō kōmba̍ pɛ̍ nya̍ kpo̍u̍ lā he᷄l chi̍e̍e̍ sa̍kpō.”

⁶O̍ ko̍ŋ kɔ̍ɔ̍lī, mi̍ Chɔ̄ɔ̍sūāā ve̍e̍lū wānāa̍ so̍lī sa̍lāa̍ o̍ Mɛ̄lɛ̄ka̍ lo̍ wa̍. Mbo̍ dīmūl nda̍ āā, “Lā chu̍a̍ kɔ̍fu̍ si̍m le̍ kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍, mī wānāā ŋɔ᷄mmɛ̍ū ā si᷄m nya̍ lāchī a̍ bu̍lu̍la̍ lēēlā sāa̍ nda̍ o̍ lābā.”

⁷O̍ ko̍ŋ kɔ̍ɔ̍lī, mbo̍ dīmūl so̍vɛ̄i̍ya̍a̍ ndūa̍a̍ āā, “Lā kāndu̍ Chɛ̍lu̍i̍kō bālɔ̄ɔ̍.” So̍vɛ̄i̍ya̍ ā si̍m wa̍nāa̍ cho̍ kɔ̄la̍ŋ a̍ kɔ̍fu̍ Mɛ̄lɛ̄ka̍ Ya̍a̍wɛ̄ɛ̄ wo̍ wa̍ lāchī a̍ nyɛ̄m nda̍ŋ chɔ̄ūwo̍ŋ.

⁸O̍ ko̍ŋ, mi̍ wāŋnda̍ tōsā mɛ̄ɛ̍ Chɔ̄ɔ̍sūāā di̍mi̍ yɛ̍. Mi̍ wānāa̍ so̍lī sa̍lāa̍ wa̍ ā ŋɔ᷄mmɛ̍ū ā sīm lāchī, mā kūā a̍ bu̍lu̍la̍ŋ hɔ̄ŋndo̍. Mi̍ a̍ wa̍ kɔ̄la̍ŋ a̍ kɔ̍fu̍ si̍m le̍ kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ wa̍ ā sīm nda̍ kɔ̄ɔ̄lī.

⁹So̍vɛ̄i̍ya̍ wā kɔ̄la̍ŋ lāchī a̍ wōlɔ̄ɔ̄lā ndāla̍ chɔ̄ūla̍ŋ o̍ lābā. Ā wa̍ īsīsi̍ wa̍nāa̍ so̍lī sa̍lāa̍ wa̍, a̍ wa̍ kɔ̄la̍ŋ a̍ bu̍lu̍la̍ŋ hɔ̄ŋndo̍ wa̍ lāchī. Mi̍ ku̍ndā so̍vɛ̄i̍ya̍ ō pīlɔ̍ɔ̍ ō sīm wānāa̍ wa̍ kɔ̄la̍ŋ a̍ kɔ̍fu̍ Mɛ̄lɛ̄ka̍a̍ wa̍ kɔ̄ɔ̄lī. A̍ te̍le̍ŋ ko̍ŋ kpo̍u̍, ā wa̍ kɔ̄la̍ŋ a̍ bu̍lu̍la̍ŋ hɔ̄ŋndo̍.

¹⁰Kɛ̍ lɔ̍ɔ̍pa̍ mi̍ wāŋnda̍ kāndū chi̍o̍o̍ bālɔ̄ɔ̍, mi̍ Chɔ̄ɔ̍sūāā di̍mūl nda̍ āā, “Lā de̍ŋī le̍, lā su̍a̍ā le̍. Mɛ̄ɛ̍ mī di̍mu̍l nya̍ āā lā dēŋi̍, ma̍lāŋ nya̍ dēŋī.”

¹¹O̍ ko̍ŋ, mi̍ Chɔ̄ɔ̍sūāā to̍sā mi̍ wāŋnda̍ I̍sɔ̄lūɛ̄ī a̍ ba̍lū Chɛ̄lu̍i̍kō a̍ kɔ̍fu̍ si̍m le̍ kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍ le̍ pīlɛ̍. O̍ ko̍ŋ kɔ̍ɔ̍lī, ma̍ mīīŋgū o̍ dɔ̍ɔ̍ŋgɔ̍ nda̍ wa̍ wo̍ ma̍ kɔ̍ lɔ᷅l.

¹²Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, mi̍ Chɔ̄ɔ̍sūāā pe̍nā chɔ̄nɔ᷄ŋ mbo̍ dīmūl wānāā sōlīāā lāsa̍lāa̍, a̍ ku̍ā a̍ kɔ̍fu̍ Mɛ̄lɛ̄ka̍ Ya̍a̍wɛ̄ɛ̄ wo̍ wa̍ ma̍ chūā kɔ̍fu̍ Mɛ̄lɛ̄ka̍a̍.

¹³Mi̍ wānāā ŋɔ᷄mmɛ̍ūwāa̍ wa̍ kɔ̄la̍ŋ a̍ bu̍lu̍la̍ŋ nda̍ ā sīm nda̍ lāchī mā kūā a̍ bu̍lu̍la̍ŋ hɔ̄ŋndo̍. Mi̍ so̍vɛ̄i̍ya̍ ku̍ndāa̍ pīlɔ̍ɔ̍ sīm nda̍ lāchī. Mi̍ so̍vɛ̄i̍ya̍a̍ tu̍a̍ā ā sīm wānāa̍ wa̍ kɔ̄la̍ŋ a̍ kɔ̍fu̍ Mɛ̄lɛ̄ka̍ Ya̍a̍wɛ̄ɛ̄ wo̍ wa̍ kɔ̄ɔ̄lī.

¹⁴O̍ ko̍ŋ kɔ̍ɔ̍lī, ma̍ bālū vɛ̄lɛ̄ pāa̍le̍ di̍i̍ŋ ndɔ̄lē lēŋ lē pīlɛ̍, ma̍ mīīŋgū o̍ dɔ̍ɔ̍ŋgɔ̍ ndāa̍. Ā bālu̍ le̍nde̍ le̍ pālɛ̍i̍ ī ŋɔ᷄mpu᷅m.

¹⁵O̍ pāa̍le̍ ŋɔ̍mmɛ̍ūle̍ŋ chōo̍, mi̍ I̍sɔ̄lūɛ̍i̍ya̍ ā pēnā chɔ̄nɔ᷄ŋ pu̍ŋ ma̍ sīm mɛ̄ɛ̍ nda̍ sīm pa̍a̍ndū yɛ̍, ma̍ bālū lē ŋɔ᷄mmɛ̍ū. Mɛ̄ɛ̍ pāa̍le̍le̍ŋ ma̍ bālū lē ŋɔ᷄mmɛ̍ū.

¹⁶Mɛ̄ɛ̍ nda̍ bālu̍ lē ŋɔ᷄mmɛ̍ū mi̍ wānāa̍ so̍lī sa̍lāa̍ wa̍ ā hɔ̄ŋ bu̍lu̍la̍ŋ yɔ̍ŋge̍le̍ŋ. Mi̍ Chɔ̄ɔ̍sūāā di̍mūl wāŋnda̍ I̍sɔ̄lūɛ̄ī āā, “Lā de̍ŋī cho̍o̍ cho̍o̍. Mɛ̄lɛ̄ka̍ Ya̍a̍wɛ̄ɛ̄ o̍ ma̍l Chɛ̄lu̍i̍kō na̍a̍ o̍ bā.

¹⁷Lā tɛ̄ɛ̄mbu̍u̍ ndu̍ a̍ nyɛ̄ o̍ nyɛ̍ cho̍ lēni᷄ŋ. Mɛ̄ɛ̍ nda̍ sōlī nu̍a̍ā sa̍lāa̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍ yɛ̍, le̍nde̍ nyɛ̍m cho̍ Chɛ̄lu̍i̍kō wo̍ŋ ŋ̄ wā ni̍ŋ ni̍. Mɛ̄ɛ̍ le̍ Lu̍e̍ha̍bī, wānā la̍nɔ̍ ti̍a̍māa̍ a̍ wānāa̍ cho̍ o̍ ndu̍lo̍ chi̍ɛ̍ī ni̍ŋ nda̍ mī lā mɛ̄i̍ yōōmū. Kāni̍ fu̍u̍le̍ ndu̍ ve᷅ŋ su̍a̍ŋsu̍a̍ŋa̍a̍ na̍a̍ ŋ̄ vēm lɛ̄ŋnde̍ŋ mɛ̄ɛ̄ndīa̍ŋndo̍ wa̍ ni̍.

¹⁸Nyɛ̄ o̍ nyɛ̄ ya̍ I̍ di̍mu̍l nya̍ le̍ tɛ̄ɛ̄mbūūwo̍, ō pīlɛ̍ bɛ̍ɛ̍ lā chu̍ā le̍, ō pīlɛ̍ bɛ̍ɛ̍ tē lā chu̍a̍ pɛ̍ mɛ̄ɛ̍ Mɛ̄lɛ̄ka̍ chō na̍a̍ nyɛ̄ pālāā bɛ̄ndōo̍ hāndɔ̄ɔ̄ chōo̍ ndu̍yɛ̍ mbō tɛ̄ɛ̄mbu̍u̍ na̍a̍.

¹⁹Kɛ̍ ka̍ni̍ŋ hu̍mbo᷄ŋ kpo̍u̍, a̍ ko̍o̍līi̍yo̍ŋ, a̍ nyɛ̄m lāāndu᷄ŋ cho̍ ŋ̄ tōōsīāā a̍ chīli̍ŋi̍i̍ nda̍ vēēlū āā būlɔ᷄ŋsīi̍ye̍ ve̍, a̍ chīli̍ŋndo̍ŋ, mu̍ŋ mu̍ŋ le̍ wa̍li̍ Mɛ̄lɛ̄ka̍ Ya̍a̍wɛ̄ɛ̄ wo̍ ŋ̍ cho̍ ni̍. Nyɛ̄m mu᷅ŋ ki̍nɛ̍i̍ ŋ̄ nɔ̄ mī ŋ̄ dɔ̄ū mu̍ŋ nāa̍ na̍a̍ ŋ̄ kɛ̄sī nyɛ̍m Mɛ̄lɛ̄ka̍ Ya̍a̍wɛ̄ɛ̄ wo̍ŋ nda̍.”

²⁰O̍ ko̍ŋ kɔ̍ɔ̍lī, mi̍ wānāa̍ so̍li̍ sa̍lāa̍ o̍ Mɛ̄lɛ̄ka̍ lo̍ wa̍ ā hɔ̄ŋ bu̍lu̍la̍ŋ yɔ̍ŋge̍le̍ŋ mɛ̄ɛ̍ nda̍ dīmu̍l nda̍ yɛ̍. Dīmīo̍o̍ nu̍a̍ā mi̍ wāŋnda̍ tūɛ̄ī bu̍lu̍la̍ŋ nda̍ kpo̍u̍ ma̍ kūlā chōo̍ cho̍o̍ kpu̍ū. O̍ ko̍ŋ, mi̍ kpāki̍ ba̍lu̍ Chɛ̄lu̍i̍kō wo̍ ō kōmbā o̍ lēpīlɛ̍ ni̍ŋ kpo̍u̍. Nda̍ kpo̍u̍ ma̍ hēl chi̍e̍e̍ sa̍kpō ma̍ bīī chi̍o̍o̍.

²¹Ma̍ tɛ̄ɛ̄mbūū nyɛ̄ o̍ nyɛ̍ wa̍ lo̍ŋ. Wānā pɔ̍nɔ̍ ni̍, wānā la̍nɔ̍ ni̍, chūāāmbɔ̄ ni̍ bɛ̄ndū ni̍, kpo̍u̍ ma̍ dīū. Chɔ̄lū o̍ chɔ̄lu̍ wa̍ lo̍ŋ, nāūwa̍, sāa̍, sōfɛ̍li̍a̍a̍ kpo̍u̍ ma̍ dīū vɛ̄lɛ̄.

²²Kɛ̍ mi̍ Chɔ̄ɔ̍sūāā di̍mūl su̍a̍ŋsu̍a̍ŋa̍a̍ o̍ ve᷅m lɛ̄ŋnde̍ŋ mɛ̄ɛ̄ndīa̍ŋndo̍ wa̍ āā, “Lā chūe̍l Lu̍e̍ha̍bī, chu̍a̍ kɛ̍sī pɔ̍nɔ̍ le̍ wo̍ būŋgɛ̄i̍ mi̍ lā mēnēla᷄ŋ ndu̍ māā lā chō ndu̍ chīīndīāā a̍ wānāā ndūa̍a̍ kpo̍u̍ o̍ ndu̍lo̍ chi̍ɛ̍ī ni̍ŋ. Le̍la̍ŋ lā kɔ̍ ni̍ko̍ o̍ ndu̍ lo̍ chi̍ɛ̍ī ni̍ŋ mī lā kɔ̍ hu᷅ŋ a̍ nda̍ o̍ bɛ̄ɛ̄ na̍nu᷄ŋ.”

²³O̍ ko̍ŋ, mi̍ chūāā pīāāndūa̍a̍ to̍sa̍ su̍a̍ŋsu̍a̍ŋnde̍ŋ nda̍ ā kɔ̍ hu᷅ŋ a̍ Lu̍e̍ha̍bī a̍ wānāā ndūa̍a̍ kpo̍u̍. Ndu̍ ni̍, fi̍nyā ndɔ̄ ni̍, kāla̍ ndɔ̄ ni̍, yēmāa̍ ndūa̍a̍ ni̍, a̍ wānā o̍ wāna̍ wa̍ wāna̍ ndɔ̄, nda̍ kpo̍u̍ ma̍ kɔ̍ kɛ̍sī nda̍ o̍ dɔ̍ɔ̍ŋgɔ̍ I̍sɔ̄lūɛ̍i̍ya̍ ā wa̍ wo̍ īkɛ̄i̍ yɔ̄ŋi̍ nda̍ a̍a̍ wu̍.

²⁴O̍ ko̍ŋ kɔ̍ɔ̍lī, ma̍ lūām Chɛ̄lu̍i̍kō a̍ nyɛ̄ o̍ nyɛ̍ wa̍ lo̍ŋ. Kɛ̍ ko̍o̍līi̍yo̍ŋ a̍ ka̍ni̍ŋ hu̍mbo̍ŋ a̍ nyɛ̄m lāāndu᷄ŋ wa̍ ŋ̄ tōōsīāā a̍ chīli̍ŋi̍i̍ nda̍ vēēlū āā būlɔ᷄ŋsīi̍ye̍ ve̍, a̍ chīli̍ŋndo̍ŋ, mu̍ŋ mu̍ŋ ā lu᷄m mu̍ŋ te̍. Mā chūā mu̍ŋ ma̍ kɔ̍ dɔ̍ū mu̍ŋ nāa̍ nda̍ kɛ̄sī nyɛ̍m Mɛ̄lɛ̄ka̍ Ya̍a̍wɛ̄ɛ̄ wo̍ŋ nda̍.

²⁵Kɛ̍ mi̍ Chɔ̄ɔ̍sūāā chi̍i̍ndīāā Lu̍e̍ha̍bī, a̍ wānāā ndūa̍a̍ kpo̍u̍. Kāni̍ fu̍u̍le̍ ndu̍ ve᷅ŋ pūa̍a̍ su̍a̍ŋsu̍a̍ŋa̍a̍ o̍ ve᷅m lɛ̄ŋnde̍ŋ mɛ̄ɛ̄ndīa̍ŋndo̍ wa̍ ni̍. A̍ bōōndi̍i̍ yāu̍wo̍ ho̍ō ō chō pōōnyīa̍ŋndo̍ ve̍ bɛ̍ɛ̍, wānāa̍ fu̍la̍ o̍ pūlāle̍ Lu̍e̍ha̍bīle̍ŋ chōo̍ wa̍ ā chō I̍sɔ̄lūɛ̍i̍ya̍ tɛ̄ɛ̄ŋ I̍sɔ̄lūɛ̄ī.

²⁶O̍ ko̍ŋ kɔ̍ɔ̍lī, mi̍ Chɔ̄ɔ̍sūāā dīmī āā, “Wānā o̍ wāna̍ ki̍ndi̍ le̍ Chɛ̄lu̍i̍kō mīŋgī tāŋgūl pɛ̍, wānā ko̍ŋ, Mɛ̄lɛ̄ka̍ Ya̍a̍wɛ̄ɛ̄ o̍ ha̍ndu̍ ndu̍ nyɛ̄ pālāā bɛ̄ndōo̍ chōo̍ fɔ̍. Tē ō kīla̍ chīyīī sāāsa̍ ba̍lu̍ chi̍o̍o̍ wo̍ lɛ̄ŋ pɛ̍, po̍ ndɔ̍ tāso̍o̍ wu᷄ fɔ̍. Tē ō dɔ̄ū dīōlā sāāsa̍ ba̍lu̍ chi̍o̍o̍ wo̍ pɛ̍, po̍ ndɔ̄ lu᷅m ndo̍ wu᷄ fɔ̍.”

²⁷Mɛ̄lɛ̄ka̍ Ya̍a̍wɛ̄ɛ̄ o̍ wa̍ Chɔ̄ɔ̍sūāā kɔ̄ɔ̄lī. Ndu̍yɛ̍ le̍ he̍ī, mi̍ tɔ̍ɔ̍ ndɔ̄ɔ̍ tīū o̍ lɛ̄ŋndē lēŋ ni̍ŋ kpo̍u̍.