Read Southern Kisi Chɔ̄ɔ̍sūāā 7 Bible Online

Chɔ̄ɔ̍sūāā 7 - Southern Kisi bible

Chɔ̄ɔ̍sūāā 7

¹Mi̍ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ di̍mūl I̍sɔ̄lūɛ̍i̍ya̍ māā ā tɛ̄ɛ̄mbu̍u̍ Chɛ̄lu̍i̍kō a̍ nyɛ̄ o̍ nyɛ̍ wa̍ lo̍ŋ. Kɛ̍ po̍ pi᷅lɛ̍ wa̍ I̍sɔ̄lūɛ̍i̍ya̍ tɛ̄ɛ̄ŋ dīōla̍ŋ āā E̍kāŋ, fi̍nyā ndɔ̍ dīōla̍ŋ āā ka̍a̍mī. Ka̍a̍mī ko̍ŋ fi̍nyā ndɔ̍ dīōla̍ŋ āā Sa̍bi̍dī. Sa̍bi̍dī yɛ̍ fi̍nyā ndɔ̍ wa̍ Sɛ̍lūā ni̍. O̍ yu̍ŋgu̍ Chu̍dā chōo̍ wāŋnda̍ ha̍ā nda̍ a̍a̍ fu̍la̍ ni̍. Mi̍ E̍kāŋ ko̍ŋ chūā nyɛ̄m Mɛ̄lɛ̄ka̍ dīmu̍l nda̍ mu̍ŋ māā ā tɛ̄ɛ̄mbu̍u̍ wo̍ŋ ŋ̄ ti̍ŋ. O̍ ko̍ŋ, mi̍ Mɛ̄lɛ̄ka̍ dūāūnu᷄ŋ tu̍mbe̍ a̍ I̍sɔ̄lūɛ̍i̍ya̍.

²Mɛ̄ɛ̍ I̍sɔ̄lūɛ̍i̍ya̍ chīi̍ Chɛ̄lu̍i̍kō yōmɔ̄ɔ̍, mi̍ Chɔ̄ɔ̍sūāā hɛ̍lī pūa̍a̍ mbo̍ vīām nda̍ su̍a̍ŋsu̍a̍ŋnde̍ŋ E̍yāī chi̍e̍e̍. E̍yāī wa̍ Bɛ̍ta̍vīŋ chi̍e̍e̍ i̍kɛ̍i̍, bā pāa̍le̍ŋ lē chāŋ ndo̍, kūmbū Bɛ̍tɛ̄ɛ̄l wo̍. Mi̍ Chɔ̄ɔ̍sūāā di̍mūl pūa̍a̍ su̍a̍ŋsu̍a̍ŋnda̍ ha̍ā āā, “Lā kɔ̍ mī lā kɔ̍ mɛ̍ɛ̍ndīa̍ŋ E̍yāī, a̍ tānda̍ ba̍lu̍ ndu̍ wo̍.” Mi̍ pūa̍a̍ su̍a̍ŋsu̍a̍ŋnda̍ ha̍ā ā kūā mɛ̄ɛ̍ Chɔ̄ɔ̍sūāā di̍mu̍l nda̍ yɛ̍.

³Mɛ̄ɛ̍ nda̍ mīīŋgu̍, ma̍ kɔ̍ do̍o̍nu᷄ŋ Chɔ̄ɔ̍sūāā ko̍na̍ āā, “Chi̍o̍o̍ E̍yāī o̍ cho̍ o̍ bɔ̍ɔ̍ le̍. Le̍la̍ŋ yɔ᷅ŋ so̍vɛ̄i̍ya̍ lo̍ŋ kpo̍u̍ le̍ lākɔ̄ sɔ̍ŋgā a̍ nda̍ le̍. Ō wā le̍tu̍u̍ mā yɔ̍ŋ so̍vɛ̄i̍ya̍ wāa̍la̍ŋ lā tīɔ̍ɔ̍ŋ ɔ̄ɔ̄ lā yāa̍.”

⁴Mi̍ Chɔ̄ɔ̍sūāā yɔ᷅ŋ so̍vɛ̄i̍ya̍ wāa̍la̍ŋ lā yāa̍ le̍ kɔ̄la̍ŋ wāŋnda̍ E̍yāī dēlɔ̄ɔ̍ cho̍o̍ a̍ sɔ̍ŋgɔ̄ɔ̍. Kɛ̍ mi̍ wāŋnda̍ E̍yāī a̍ kɔ̍ yo᷅m nda̍, ma̍ mīīŋgū a̍ kīlta̍ŋ.

⁵Mi̍ wāŋnda̍ E̍yāī a̍ chu̍ā nda̍ tōūwɔ̄ɔ̍ o̍ dīō kpāki̍ chi̍o̍o̍ sōndōo̍ ma̍ tūāl a̍ nda̍ pe̍mbēi̍, mā kūā a̍ nda̍ pɔ̍ɔ̍li̍, nāa̍ nda̍ kālā po̍ūta̍ŋ nda̍. Le̍ hūnɔ̄ɔ̍ o̍ pēmbēi̍ tōlɔ̄ɔ̍ mā dīī I̍sɔ̄lūɛ̍i̍ya̍ be̍le̍-ya̍a̍ a̍ ā ŋɔ᷄mpu᷅m. O̍ ko̍ŋ, mi̍ sīōōŋīī bɛ̄ndūe̍i̍ bīī I̍sɔ̄lūɛ̍i̍ya̍.

⁶Mi̍ Chɔ̄ɔ̍sūāā nda̍ wāŋ bānāā I̍sɔ̄lūɛ̍i̍ya̍ ā sɛ̄ɛ̄sīa̍ŋ do᷅māla̍ŋ lēkɔ̄ɔ̍ a̍ kɔ̄ltā tāmbɛ̍i̍la̍ŋ. Ma̍ kɔ̍ de᷅l lɛ̄ŋ kɔ̍fu̍ si̍m le̍ kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍ lāchī, ma̍ hīnī sa̍kpō. Ma̍ dūāūnu᷄ŋ chu̍ndo̍o̍ o̍ lēbōl. Ma̍ lō īhīni̍ lɛ᷅ŋ ndo̍ŋ ha̍a̍a̍ mi̍ pāa̍le̍ŋ lē dēl.

⁷Bōōndi̍i̍ nda̍ wa̍ ke̍ŋ i̍hi̍ni̍ lɛ᷅ŋ lo̍ŋ nde̍, mi̍ Chɔ̄ɔ̍sūāā pi̍ɛ̍ī Mɛ̄lɛ̄ka̍ āā, “Ōo̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, vɛ᷅ ma̍ tɛ̄ɛ̄ŋgūū na̍a̍ Chɔ̍ɔ̍dāŋ nda̍ŋ le̍e̍lōo̍ na̍nu᷄ŋ? Bāā le̍ na̍a̍ mālɔ̄ɔ̍ A̍mɔ̍lu̍a̍i̍tīi̍ya̍ o̍ bā mā tɛ̄ɛ̄mbu̍u̍ na̍a̍ ŋ̄ tɛ̄ɛ̄ŋgu̍u̍ na̍a̍ na̍nu᷄ŋ ni̍? Tē le̍nde̍ ni̍, mɛ̄ɛ̍ ndi̍ i̍i̍ wa᷅ i̍ kɛ̍ndɛ̄ mi̍ na̍a̍ ŋ̍ wa̍ŋnu̍ŋ le̍e̍lōo̍ lo̍ŋ.

⁸Ōo̍ māsānɔ̄ɔ̍ Mɛ̄lɛ̄ka̍, I̍sɔ̄lūɛ̍i̍ya̍ nyāānu̍ŋ ya̍a̍mɔ̍ɔ̍wa̍a̍ ndāa̍, I̍ si̍nā nyɛ᷅ ya̍ I̍ di̍mī wo̍ le̍.

⁹Tē Ke̍na̍na̍i̍tīi̍ya̍, a̍ wāna̍ o̍ wāna̍ cho̍ o̍ lɛ̄ŋnde̍ŋ nde᷅ŋ ni̍ŋ a̍ tu̍e̍ī nyɛ̍ yɔ̍nu̍ŋ ho̍ō wo̍ pɛ̍, ā chō na̍a̍ hūnɔ̄ɔ̄ bālɔ̄ɔ̄ mā dīu̍ na̍a̍ kpo̍u̍. Ndu̍yɛ̍ tē ke̍ŋ i̍ yɔ̍nu̍ŋ pɛ̍, ō yɛ̄ɛ̍nɛ̍ ŋ̄ chō yɛ̄ tōsā le̍ mī wāŋnda̍ hīōū lāchī a̍ nu̍m bɛ̄ɛ̄le̍ŋ kīo̍o̍?”

¹⁰Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Chɔ̄ɔ̍sūāā āā, “Hi̍nī lɛ̄ŋ te̍, chɔ̍ŋ!

¹¹Wāŋnda̍ I̍sɔ̄lūɛ̄ī a̍ to̍sa̍ yɔ̄ŋ wɔ̄ɔ̍ŋndo̍. Dīōm chɛ̄la᷅ŋ wa̍ na̍a̍ tɛ̄ɛ̄ŋ na̍a̍ nda̍ā māā ā tɛ̄ɛ̄mbu̍u̍ Chɛ̄lu̍i̍kō, a̍ nyɛ̄ o̍ nyɛ̍ wa̍ lēni᷄ŋ ndo̍, ā tɛ̄ɛ̄mbu̍u̍ dīōm chɛ̄la᷅ŋ kōŋ. Nyɛ̄m ya̍ I̍ di̍mu̍l nda̍ mu̍ŋ māā ā tɛ̄ɛ̄mbu̍u̍ wo̍ŋ ā chu̍a̍ mu̍ŋ ŋ̄ ti̍ŋ. Mɛ̄ɛ̍ nda̍ chīīmbu̍u̍ mu̍ŋ, ma̍ kɔ̍ kɛ̍sī mu̍ŋ ō nyɛ̄m nda̍ŋ tɛ̄ɛ̄ŋ, ma̍ dīmī chōōla̍ŋ.

¹²Le̍la̍ŋ, wāŋnda̍ I̍sɔ̄lūɛ̄ī a̍ nɔ̍lā mā sīmu̍l ya̍a̍mɔ̍ɔ̍wa̍a̍ ndāa̍ le̍. Ā nyēēnu̍ŋ fu̍u̍ ya̍a̍mɔ̍ɔ̍wa̍a̍ ndāa̍ le̍, ya̍ i̍i̍ chi̍i̍ ni᷅ŋ nda̍ yāmɛ̍i̍ kīlūl le̍ nda̍ tɛ̄ɛ̄mbūūwo̍. Le̍la̍ŋ tē lā sōli̍ nyɛ᷅m mu᷅ŋ nya̍ tɛ̄ɛ̄ŋ mī lā tɛ̄ɛ̄mbu̍u̍ mu̍ŋ te̍ I̍ ve᷅ lɛ̍ nya̍ kɔ̄ɔ̄lī le̍.

¹³Chɔ̍ŋ mā kɔ̍ di̍mūl wāŋnda̍ I̍sɔ̄lūɛ̄ī mā dīndi̍ nda̍ pi̍la̍ mā sīmnu̍ŋ a̍ di̍a̍ndāā ya̍ o̍ hɔ̄l mā bɛ̄ɛ̄ndi̍a̍ŋ le̍ ya̍ hūnɔ̄ɔ̍ sīɔ̄dīi̍ si᷄mnda̍ŋ lāchī. Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ I̍ nɔ̍ īsɔ̄ɔ̍ le̍ nda̍ dīmūl. I̍ cho̍ nda̍ dīmūl a̍a̍, ‘Wāŋnda̍ I̍sɔ̄lūɛ̄ī, I̍ di̍mu̍l nya̍ māā lā tɛ̄ɛ̄mbu̍u̍ Chɛ̄lu̍i̍kō a̍ nyɛ̄ o̍ nyɛ̍ cho̍ lo̍ŋ kɛ̍ mi̍ lā chūā nyɛ̄m mu᷅ŋ ŋ̄ ti᷄ŋ mi̍ ŋ̄ wā nya̍ tɛ̄ɛ̄ŋ. Le̍la̍ŋ tē lā sōli̍ nyɛ᷅m mu᷅ŋ nya̍ tɛ̄ɛ̄ŋ te̍, lā nɔ̍lā mī lā sīmu̍l ya̍a̍mɔ̍ɔ̍wa̍a̍ nyāa̍ le̍.’

¹⁴Sīɔ̄dīi̍ lā pēna̍ ya̍ īsīsi̍ la̍chi̍ a̍ yu̍ŋgu̍la̍ŋ lā pīlɛ̍ŋ pi̍lɛ̍ŋ. Yu̍ŋgu̍ ya̍ I̍ cho̍ yūlɔ̄ɔ̄ wo̍ yu̍ŋgu̍ ko̍ŋ sīm a̍ Ku̍ndāla̍ŋ lā pīlɛ̍ŋ pi̍lɛ̍ŋ. Ku̍ndā ya̍ I̍ cho̍ yūlɔ̄ɔ̄ wo̍ ku̍ndā kōŋ si̍m a̍ chīɛ̄īla̍ŋ lā pīlɛ̍ŋ pi̍lɛ̍ŋ. Chīɛ̄ī ya̍ I̍ cho̍ yūlɔ̄ɔ̄ wo̍ chīɛ̄ī kōŋ si᷄m a̍ pūa̍a̍ le̍bo᷅lla̍ ā pīlɛ̍ŋ pi̍lɛ̍ŋ.

¹⁵Po̍ ya̍ I̍ cho̍ yūlɔ̄ɔ̄ mī lā sāālu̍ŋ nyɛ᷅m mu᷅ŋ ndu̍ o̍ bā wo̍ lā lo᷄m ndu̍ a̍ yu̍ŋgu̍ ndɔ̄ɔ̍ a̍ nyɛ̄ o̍ nyɛ̄ o̍ nɔ̍. Kāni̍ fu̍u̍le̍ ndu̍ tɛ̍ɛ̍mbu̍u̍ dīōm chɛ̄la᷅ŋ wa̍ na̍a̍ tɛ̄ɛ̄ŋ na̍a̍ I̍sɔ̄lūɛ̍i̍ya̍ wo̍, mbo̍ hūŋ a̍ si̍ɔ̍mbu̍la̍ŋ I̍sɔ̄lūɛ̍i̍ya̍ chōo̍ ni̍.”

¹⁶Dīi̍mā ndɔ̄ɔ̍, mi̍ Chɔ̄ɔ̍sūāā pe̍nā I̍sɔ̄lūɛ̍i̍ya̍ kpo̍u̍ si̍mī Mɛ̄lɛ̄ka̍ Ya̍a̍wɛ̄ɛ̍ o̍ hɔ̄l a̍ yu̍ŋgu̍la̍ŋ lā pīlɛ̍ŋ pi̍lɛ̍ŋ. Mi̍ Mɛ̄lɛ̄ka̍ Ya̍a̍wɛ̄ɛ̄ o̍ yu̍lū yu̍ŋgu̍ Chu̍dā wo̍.

¹⁷Mi̍ Chɔ̄ɔ̍sūāā o̍ si̍mī yu̍ŋgu̍ Chu̍dā wo̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l a̍ ku̍ndāla̍ŋ lā pīlɛ̍ŋ pi̍lɛ̍ŋ. Mi̍ Mɛ̄lɛ̄ka̍ Ya̍a̍wɛ̄ɛ̄ o̍ yu̍lū ku̍nda̍ Sɛ̍lūā wo̍. Mbo̍ sīmī ku̍nda̍ Sɛ̍lūā wo̍ Mɛ̄lɛ̄ka̍ o̍ hɔ̄l a̍ chīɛ̄īla̍ŋ lā pīlɛ̍ŋ pi̍lɛ̍ŋ. Mi̍ Mɛ̄lɛ̄ka̍ yu̍lū chīɛ̍i̍ Sa̍bi̍dī wo̍.

¹⁸Mbo̍ sīmī pūa̍a̍ o̍ Sa̍bi̍dī lo̍ chīɛ̄īni̍ŋ a̍ pi̍lɛ̍ŋ pi̍lɛ̍ŋ. Mi̍ Mɛ̄lɛ̄ka̍ yūlū E̍kāŋ po᷄ Ka̍a̍mī wo̍, Sa̍bi̍dī po᷄ ndɔ̄ ma̍māa̍.

¹⁹Mi̍ Chɔ̄ɔ̍sūāā di̍mūl E̍kāŋ āā, “Po᷄ nūu̍, chɔ̍ɔ̍mu̍u̍ nyɛ᷅ ŋ̄ tōsa̍ wo̍ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ I̍sɔ̄lūɛ̍i̍ya̍ Mɛ̄lɛ̄ka̍ ndāa̍. Di̍mu̍l la̍ nyɛ̄ ŋ̄ tōsa̍ wo̍, vi᷅ŋ ya̍ le̍.”

²⁰Mi̍ E̍kāŋ mu̍lī āā, “Ī chō tōnya̍ I̍ to̍sa̍ yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍ Ya̍a̍wɛ̄ɛ̄, I̍sɔ̄lūɛ̍i̍ya̍ Mɛ̄lɛ̄ka̍ ndāa̍. Nyɛ̄ ya̍ I̍ to̍sa̍ wo̍ cho̍ ho̍ō ni̍.

²¹O̍ nyɛ̄m na̍a̍ ŋ̄ wa̍ mu̍ŋ tɛ̍ɛ̍mbūūwo̍ Chɛ̄lu̍i̍kō wo̍ŋ tɛ̄ɛ̄ŋ, mi̍ cha᷅ dōmā kɛ̍ndɛ̄ bɛ̄ndū nda̍ tōōsi̍a̍a̍ o̍ lɛ̄ŋndē Ba̍bi̍lɔ̄ŋnde̍ŋ ni̍ŋ ndo̍, a̍ ka̍ni̍ŋ hu̍mbo̍ŋ lu̍su̍llo̍ pa᷅ŋnda̍ŋ lā ŋūɛ̍ɛ̍nu̍, a̍ ko̍o̍līi̍yo̍ŋ pa᷅ŋndo̍ a̍ nyɛ̄ pɔ̄mbɔ̄. Mɛ̄ɛ̍ ya̍ I̍ che᷅ nyɔ̄ɔ̍ŋ mu᷅ŋ, mi̍ lu̍ɛ̍ī lēhɔ̄l o̍ mu̍ŋ, mi̍ chu̍ā mu̍ŋ. Kɛ̍ tē lā kūɛ̄ o̍ Tɛ̍ndīi̍ nūu̍ ni̍ŋ pɛ̍, lā chō mu̍ŋ sāālɔ᷄ŋ ŋ̍ tu̍wāā lɛ̄ŋ, a̍ ka̍ni̍ŋ hu̍mbūŋ mu᷅ŋ lēbɛ̄ŋgu̍.”

²²O̍ ko̍ŋ, mi̍ Chɔ̄ɔ̍sūāā vi̍ām pūa̍a̍ ma̍ nyāānu̍ŋ o̍ tɛ̍ndīi̍ E̍kāŋ ndo̍ ni̍ŋ. Ndu̍yɛ̍ lēkɛ̍ndɛ̍ī, ma̍ kɔ̍ sa̍a̍lu̍ŋ nyɛ᷅m mu᷅ŋ ŋ̄ tūwāā lɛ̄ŋ, a̍ ka̍ni̍ŋ hu̍mbo̍ŋ lēbɛ̄ŋgu̍.

²³Ma̍ fūlā a̍ mu̍ŋ, ma̍ kūā a̍ mu̍ŋ nāa̍ Chɔ̄ɔ̍sūāā nda̍ I̍sɔ̄lūɛ̍i̍ya̍ chūā, mā kɛ̄sī mu̍ŋ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l.

²⁴O̍ ko̍ŋ kɔ̍ɔ̍lī, mi̍ Chɔ̄ɔ̍sūāā nda̍ I̍sɔ̄lūɛ̍i̍ya̍ ā bīī E̍kāŋ ma̍ kūā a̍ ndu̍ o̍ pēmbo᷄ŋ tɛ̄ɛ̄ŋ, o̍ dɛ̍ŋgbɛ̍ nda̍ vēēlū āā dɛ̍ŋgbɛ̍ dɛ̍nɛ̍ pa̍lāa̍ wo̍, lātūlu̍ a̍ nyɛ̄ o̍ nyɛ̄ ndu̍ o̍o̍ nɔ̍. Ka̍ni̍ŋ hu̍mbūŋ o̍ chu̍a̍ mu̍ŋ ndo̍ŋ ni̍, a̍ dōmā ko̍ŋ, a̍ ko̍o̍līi̍yo̍ŋ, a̍ chūāā ndūāā pi̍a̍a̍ndūa̍a̍, a̍, ā lāāndūa̍a̍, a̍ nāūwāā ndūa̍a̍ a̍ Sōfɛ̍li̍a̍a̍ ndūa̍a̍, a̍ sāa̍ ndūa̍a̍, a̍ tɛ̍ndīi̍ ndɔ̄ɔ̍ a̍ nyɛ̄ o̍ nyɛ̄ ndu̍ o̍o̍ nɔ̍ ma̍ kūā a̍ mu̍ŋ o̍ dɛ̍ŋgbɛ̍ kōŋ ni᷄ŋ.

²⁵O̍ ko̍ŋ, mi̍ Chɔ̄ɔ̍sūāā lo̍ lo᷅ŋ mbo̍ di̍mūl E̍kāŋ, āā, “Nu̍m chu̍u̍ na̍a̍ dɛ̍nɛ̍ pa̍lāā bɛ̄ndōo̍ ho̍ō ni̍. Le̍la̍ŋ nūm bɛ̍ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ nu̍m hāū dɛ̍nɛ̍ pa̍lāā bɛ̄ndōo̍ tūsī chōo̍.” Mi̍ I̍sɔ̄lūɛ̍i̍ya̍ kpo̍u̍ a̍ vi̍ī nda̍ a̍ pōūta̍ŋ ma̍ dīū nda̍. O̍ ko̍ŋ kɔ̍ɔ̍lī, ma̍ lūām dīāllūŋ nda᷄ŋ lātūlu̍ a̍ nyɛ̄ o̍ nyɛ̄ ndu̍ o̍o̍ nɔ̍.

²⁶Ma̍ dīī pōūta̍ŋ ku̍ndā bɛ̍ndōo̍ nāa̍ nda̍ lōm ka̍ŋ di̍a̍llūŋ ndāŋ mu̍ŋ nda̍. A̍ te̍le̍ŋ yāu̍wo̍ ho̍ō ō chō pōōnyīa̍ŋndo̍ wo̍ bɛ̍ɛ̍ pōūtālāŋ lā chō lo̍ŋ. Nyɛ̄ ko̍ŋ to̍sa̍ ni̍ mi̍ wāŋnda̍ wā wɔ̄ fo̍ndā kōŋ vēēlōo̍ āā, dɛ̍ŋgbɛ̍ dɛ̍nɛ̍ pa̍lāā bɛ̄ndōo̍. Ndu̍yɛ̍ mɛ̄ɛ̍ nda̍ dīī E̍kāŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ pɔ̍lu̍l kɔ̄l, ō hīu̍ lɛ̍ lāchī a̍ tu̍mbo̍o̍ le̍.