Read Southern Kisi Tɛ̄sālo̍nīāŋ Di̍i̍ŋ Ndɔ̄ɔ̍ 2 Bible Online

Tɛ̄sālo̍nīāŋ Di̍i̍ŋ Ndɔ̄ɔ̍ 2 - Southern Kisi bible

Tɛ̄sālo̍nīāŋ Di̍i̍ŋ Ndɔ̄ɔ̍ 2

¹I̍ di̍mūl lɔ̍ nyā ā Māsānɔ̍ nāā Chi̍i̍sū Ki̍li̍tī, hūnɔ̄ɔ̄ ndɔ̄ɔ̍ o̍kɔ̄ɔ̄. Ndu̍yɛ̍, I̍ cho̍ vɛ̄lɛ̄ nyā chɔ̄m ā mɛ̄ɛ̍ o̍ chu̍u̍ŋgīāā ni̍ŋ nāā kpo̍u̍ ndu̍ pi̍lā īkɛ̄i̍ yɛ̍.

²Wānāā pūm ā chō dīmīo̍o̍ māā pāāle̍ Māsānɔ̄ɔ̍ nɔ̄ le̍ hūnɔ̄ɔ̍ le̍ŋ lē chūū ni᷅ŋ hīōūwɔ̄ɔ̄. Kɛ̍ ndu̍yɛ̍, I̍ cho̍ nyā nyɔ̄ɔ̄lōo̍, lā yāndi̍i̍ chāāŋāā nīāā, lā chɛ᷅l mī wānāā wāā le̍nde̍ ā to̍sā mī kɔ̄ltā nyālāŋ lā lāāsi̍a̍ŋ, kɛ̄lɛ̄ŋgāā mī lā būūlāŋ ā sūɛ̍i̍ he̍ī o̍kɔ̄ɔ̄ le̍. Kɛ̄lɛ̄ŋgāā dɔ̍ɔ̍, wānāā pu᷄m ā wā yōōŋgu̍ chɛ̍ŋ o̍ Mɛ̄lɛ̄ka̍ lo̍ wo̍ dīmīo̍o̍ ni̍, mā dīmūl nyā māā pāāle̍ le̍ŋ lē hīōū ni᷅ŋ. Kɛ̄lɛ̄ŋgāā dɔ̍ɔ̍, mbō wā wānāā pu᷄m ā wā wāŋndā sūɛ̍i̍ Mɛ̄lɛ̄kɛ̍i̍ dīmūllo̍ ni̍, mā dīmī le̍nde̍. Ɔ̄ɔ̄ mī wānāā pūm ā dīmi̍ dɔ̍ɔ̍ māā le̍nde̍ nāā ŋ̄ pōōnyi̍a̍a̍ o̍ yāu̍lā nāā ŋ̄ yɔ᷄ŋ ndāŋ ni᷄ŋ ni̍.

³Kɛ̍ ndu̍yɛ̍, lā chɛ᷅l mī wānā o̍ wānā hu̍i̍ nyā o̍ sūɛ̍i̍ he̍ī ni᷄ŋ o̍ nɛ̄ī o̍ nɛ̄ī ni᷄ŋ te̍. Kāni̍ fu̍u̍le̍, lā nɔ̄ mī lā sīnā pɛ̄ŋgu̍, māā lɔ̍ɔ̍ pā mī pāāle̍ le̍ŋ lē fūūlu̍u̍, sɔ̄ɔ̍ŋ pūm chō mɛ̄ɛ̍ mī ŋ̄ yɔ̄nu̍ŋ. Mɛ̄ɛ̍ mī bōōndi̍i̍ fu̍u̍lu̍u̍, mī wāŋndā sīmu̍l Mɛ̄lɛ̄ka̍. Ndu̍yɛ̍, wānā cho̍ ho̍ō mbo̍ kɛ̄ɛ̄ nyɛ̄ o̍ nyɛ̄ fe̍e̍ Mɛ̄lɛ̄ka̍ ō dīmi̍ wo̍ wo̍, mɛ̄ɛ̍ mbō hīŋ. Ndu̍ Mɛ̄lɛ̄ka̍ tɛ̄ɛ̄mbūū ni̍ŋ mbō chīi̍ ā ndu̍ ni̍.

⁴Ndu̍yɛ̍, wānā kɛ̍ɛ̄ ni̍ŋ ko̍ŋ nyɛ᷅ Mɛ̄lɛ̄ka̍ dīmī wo̍ wo̍, ō sīmūl ni̍ŋ nyɛ᷅ o̍ nyɛ̄ wāŋndā chu̍ā māā Mɛ̄lɛ̄ka̍ ndā, kɛ̄lɛ̄ŋgāā mā wā mu̍ŋ sōōlūū wo̍. O̍ ko̍ŋ, mbō chu̍ā ndu̍ pi̍lā māā ndu̍ hi̍o̍ū ā mu̍ŋ kpo̍u̍. Ō fūlā o̍ ko̍ŋ kɔ̍ɔ̍lī, mbō lūɛ̄ī bɛ̍ɛ̍ o̍ chīɛ̍i̍ Mɛ̄lɛ̄ka̍a̍ ni᷄ŋ mbō cha᷄l, mbō dīmi̍ māā ndu̍ cho̍ Mɛ̄lɛ̄ka̍ ni̍.

⁵I̍ di̍mu̍l nyā ni᷅ŋ sɔ̄ɔ̍ŋ mu᷅ŋ fa̍ū bōōndi̍i̍ yā I̍ wā nyā tɛ̄ɛ̄ŋ nde̍. Bāā lā pūɛ̄ɛ̄nu̍ŋ?

⁶Nyā pi̍lā lā sīnā nyɛ̍ cho̍ wāŋndo̍ ho̍ō kūūnā hūnɔ̄ɔ̍ pɛ̄ŋgo̍o̍ ho̍ō wo̍. He̍ī yɔ̄nu̍ŋ le̍ mbō lo̍ o̍ ko̍ŋ mī bōōndi̍i̍ o̍ nɔ̍ le̍ hūnɔ̄ɔ̍ ve̍ ī fūūlu̍u̍ fɛ̍lɛ̍ŋ.

⁷Dīōm kɛ̄yāā ho̍ō le̍ nyɛ̄ Mɛ̄lɛ̄ka̍ dīmi̍ wo̍ tōsāā, ō chō ni᷅ŋ bɛ̍ɛ̍ yɔ̍nɔ᷄ŋndo̍, kɛ̍ ī fūlā wɔ̍ kpe̍nde̍ke̍le̍ le̍. Kɛ̍ ndu̍yɛ̍, wānā chāl sūɛ̍i̍ he̍ī lāchī wo̍, ō chō hīōūwɔ̄ɔ̄ lāchī ā cha᷄lle̍ ndi̍ lāchī hāāā, mbō lo̍ o̍ ko̍ŋ mī Mɛ̄lɛ̄ka̍ fāŋā ndu̍ lāchī.

⁸Tē Mɛ̄lɛ̄ka̍ fāŋā ndu̍ lāchī pɛ̍, o̍ ko̍ŋ, wānā cho̍ ho̍ō mbo̍ kɛ̄ɛ̄ nyɛ̄ o̍ nyɛ̄ fe̍e̍ Mɛ̄lɛ̄ka̍ dīmi̍ wo̍ wo̍, ō hīŋ. Kɛ̍ ndu̍yɛ̍, Māsānɔ̄ɔ̍ Chi̍i̍sū cho̍ ndu̍ dīyɔ̄ɔ̄ ā hūēīye̍ ndu̍ o̍ sōndō, ndu̍yɛ̍, mbō tɛ̄ɛ̄mbu̍u̍ ndu̍ ā yēlēŋgi̍ ye̍lēŋgi̍ cho̍ ndu̍ wā ō bālāā o̍ hūnɔ̄ɔ̄ ndɔ̄ɔ̍ wo̍.

⁹Wānā kɛ̍ɛ̍ ko̍ŋ nyɛ᷅ o̍ nyɛ̄ Mɛ̄lɛ̄ka̍ dīmi̍ wo̍ wo̍, tē ō hīŋ pɛ̍, Sēta̍nā o̍ cho̍ māsā nyi̍nāā wɔ̄ɔ̍ŋndā wo̍, ā kpāāyā ndɔ̄ɔ̍ o̍ hu᷅ŋ ni̍ŋ ni̍. Ndu̍yɛ̍ ō tōsā ni̍ŋ sɔ̍ɔ̍ŋ kɔ̄ndɔ̄fi̍li̍ŋ fāŋgā fa̍ŋgā, ā kpālōla̍ lāchōōwāla̍ŋ, ā ka̍a̍ma̍āla̍ŋ.

¹⁰Ndu̍yɛ̍, ō tōsā ni̍ŋ sɔ̍ɔ̍ŋ wɔ̍ɔ̍ŋ fāŋgā fa̍ŋgā, le̍ mbō hūi̍ wānāā nɔ̍ ha̍ā le̍ kɔ̄la̍ŋ o̍ nyɛ̄ pālāā ni᷄ŋ ndā. Sābū ndā kūā ni̍ŋ o̍ nyɛ̄ pālāā ni᷄ŋ ndo̍ cho̍ ni̍ māā, le̍ mɛ̄ɛ̍ ndā kāālā yo̍o̍ŋgū tōnyāā ho̍ō le̍ yɛ̍. Kāni̍ fo̍ndōle̍, tē ndā āā kāālā yōōŋgōo̍ ho̍ō pɛ̍, nu̍āā Mɛ̄lɛ̄ka̍ ndu̍ o̍o̍ pi̍ŋī ndā.

¹¹Kɛ̍ ndu̍yɛ̍, le̍ mɛ̄ɛ̍ ndā kāālā yo̍o̍ŋgōo̍ ho̍ō le̍ yɛ̍, mi̍ Mɛ̄lɛ̄ka̍ lāāsīāā nda̍ hūlla̍ŋ la̍a̍sī la̍a̍sī, le̍ mā lāāla̍ŋ ā sɔ̄ɔ̍ŋ cho̍ to᷅nya̍ le̍ wo̍ŋ.

¹²O̍ he̍ī ni᷄ŋ, wānā o̍ wānā cho̍ mā kāālā yɔ̄ŋ wɔ̄ɔ̍ŋndo̍ tōsāā yɔ̄ŋi̍ ndā āā lāāla̍ŋ ā yōōŋgū tōnyāā yɛ̍, wānāā kāŋ Mɛ̄lɛ̄ka̍ chō ndā yāmɛ̍i̍ kīlūl, mbō tūsi̍ ndā nyɛ̄ pālāā chōo̍.

¹³Chāāŋāā nāā, nyā Māsānɔ̄ɔ̍ Mɛ̄lɛ̄ka̍ kāālā ha̍ā wā, le̍ te̍le̍ŋ o̍ te̍le̍ŋ ŋ̄ nɔ̄ mī ŋ̄ me᷄l Mɛ̄lɛ̄ka̍ ba̍li̍kāā le̍ nyā, le̍ mɛ̄ɛ̍ Mɛ̄lɛ̄ka̍ hɛ̄li̍ nyā o̍ kāndɔ᷄ŋndo̍ di̍, le̍ mbō pīŋi̍ nyā yɛ̍. Ō tōsā he̍ī sānāā ā nyi̍nā ndɔ̄ɔ̍, o̍ si̍i̍ŋgu̍u̍ nyā wānāā cho̍ ā yɔ̄ŋga᷄ŋ o̍ Mɛ̄lɛ̄ka̍ lo̍ wā, ndu̍yɛ̍ o̍ ko̍ŋ kɔ̍ɔ̍lī, ā tīīnda᷄ŋ nyā nɔ̄ o̍ tōnyā cho̍ ā Mɛ̄lɛ̄ka̍ o̍kɔ̄ɔ̄ wo̍ ni᷄ŋ ndo̍.

¹⁴Ndu̍yɛ̍, Mɛ̄lɛ̄ka̍ vēēlu̍ ma̍ve̍e̍lāā nyā vēēlōo̍ ho̍ō sānāā ā yōōŋgū ndɔ̄ kɛ̍ndɛ̄ nāā ŋ̄ dīmu̍l nyā wo̍, le̍ nyā bɛ̍ɛ̍ mī lā sɔ̄lā nāŋɔ̄ɔ̍ Māsānɔ̄ nāā Chi̍i̍sū Ki̍li̍tī wo̍.

¹⁵Le̍lāŋ chāāŋāā nāā, lā si᷄m nyɛ̍ kɛ̄ndɛ̄ yi̍ o̍ lāāla᷄ŋ nyāā chōo̍, ndu̍yɛ̍ mī lā bīī sɔ̄ɔ̍ŋ nāā ŋ̄ pɛ̄ɛ̄ku̍ nyā wo̍ŋ kpi̍ŋ, ŋ̄ nāā ŋ̄ pɛ̄ɛ̄ku̍ nyā ā sōndō wo̍ŋ ni̍, ā ŋ̄ nāā ŋ̄ pōōnyi̍a̍l nyā yāu̍wo̍ ā mu̍ŋ o̍kɔ̄ɔ̄ wo̍ŋ.

¹⁶I̍ cho̍ Māsānɔ̍ nāā Chi̍i̍sū Ki̍li̍tī pi̍lā pīɛ̄īle̍ŋ ndā Mɛ̄lɛ̄ka̍ Fi̍nyā nāā o̍ kāālā nāā wo̍ le̍ nyā. Ndu̍ yɔ̍nūŋ ni̍ māā Mɛ̄lɛ̄ka̍ ō tōsāl nāā kɛ̄ndɛ̄i̍ ndūɛ̍i̍ mbo̍ kē nāā kɔ̄ltā sīmūlāāla̍ŋ le̍ fɛ̍ɛ̍ŋ ā fɛ̍ɛ̍ŋ, ndu̍yɛ̍, mbo̍ tōsā mi̍ ŋ̄ wā hɔ̄lte̍ŋ o̍ nɛ̄ī nyɛ̄ kɛ̄ndɛ̄ kɛ̍ndɛ̍ī yo̍.

¹⁷Mbɔ̄ ā dɛ̄ɛ̄ni̍a̍a̍ nyā kɔ̄lta̍ŋ fɔ̍. Ā sīmu̍l nyā kɔ̄lta̍ŋ pɛ̄ŋgu̍ o̍ pɛ̄ŋgu̍ le̍ wa̍lta̍ kɛ̍ndɛ̄la̍ŋ tōsāā ā sɔ̄ɔ̍ŋ kɛ̍ndɔ᷄ŋ dīmīo̍o̍ fɔ̍.