Read Southern Kisi Tɛ̄sālo̍nīāŋ Di̍i̍ŋ Ndɔ̄ɔ̍ 3 Bible Online

Tɛ̄sālo̍nīāŋ Di̍i̍ŋ Ndɔ̄ɔ̍ 3 - Southern Kisi bible

Tɛ̄sālo̍nīāŋ Di̍i̍ŋ Ndɔ̄ɔ̍ 3

¹Nyɛ̄ yā I̍ hɛ̍nāŋ le̍ nyā mɛ̄ɛ̄lū dīmūllo̍ wo̍ ndu̍ cho̍ ho̍ō ni̍. Lā pīɛ̍i̍ Mɛ̍lɛ̄kā le̍ nāā māā yōōŋgu̍ chɛ̍ŋ ho̍ō o̍ Māsānɔ̄ɔ̍ Mɛ̄lɛ̄ka̍ lo̍ wo̍ ō kēle̍ŋā ti̍ū bā o̍ bā fe̍e̍. Ndu̍yɛ̍, mī wāŋndā ā ke̍ yōōŋgū kālāā bɛ̄ɛ̄le̍ŋ, mɛ̄ɛ̍ i̍ yɔ̍nu̍ŋ nu̍āā nyā tɛ̄ɛ̄ŋ yɛ̍.

²Ndu̍yɛ̍, lā pīɛ̍i̍ vɛ̍lɛ̄ le̍ nāā māā mī Mɛ̄lɛ̄ka̍ tōsā ā sābū wānāā kɔ̄l vēsɛ̍i̍ya̍a̍ wɔ̍ɔ̍ŋndā ha̍ā ā ti̍ū bā mā yɔ᷄ŋ nāā nyɛ̄ le̍. Kāni̍ fo̍ndōle̍, ō cho̍ wa᷅ŋndā fa̍ū le̍ ā dɔ̍ū tīīnda᷄ŋndo̍ o̍ Mɛ̄lɛ̄ka̍ ni᷄ŋ te̍.

³Kɛ̍ ndu̍yɛ̍, Māsānɔ̄ɔ̍ Mɛ̄lɛ̄ka̍ chō wāna̍ wānā dɔ̍ū tīīnda᷄ŋ o̍ ndu̍ ni̍ŋ. Ō tōsā mī lā wā ā kɔ̄ltā sīmūlāā. Ndu̍yɛ̍, ō nɔ̄lā mbō māndā nyā, ō ndā vēēlū āā, Wānā Wɔ̍ɔ̍ŋndo̍ wo̍ ō yɔ᷅ŋ nyā nyɛ̄ le̍.

⁴Ndu̍yɛ̍, Māsānɔ̄ɔ̍ Mɛ̍lɛ̄kā ō tōsā mi̍ ŋ̄ nɔ̄ lāāla᷄ŋndo̍ ā nyā. Ŋ̄ sīnā kpe̍e̍kpe̍i̍ māā sɔ̄ɔ̍ŋ nāā ŋ̄ dīmu̍l nyā le̍ tōsāā wo̍ŋ māā mu̍ŋ nyā chō tōsāā ni̍. Ndu̍yɛ̍, ŋ̄ lāāla̍ŋ kpe̍e̍kpe̍i̍ māā lā chō hīōūwɔ̄ɔ̄ lāchī ā tōsāā le̍nde̍.

⁵Mbɔ̄ Māsānɔ̄ɔ̍ Mɛ̄lɛ̄ka̍ ō tōsā ā sābū, mī lā chɔ̄ɔ̄lu̍ sīnā pɛ̄ŋgo̍o̍ sɔ̄lā ā kāālā o̍ kāālā nyā wo̍ o̍kɔ̄ɔ̄, o̍ ko̍ŋ kɔ̍ɔ̍lī, ā kɔ̄l bīūwa᷄ŋ Ki̍li̍tī ke᷅ nyā wo̍ fɔ̍.

⁶Chāāŋāā nāā, Māsānɔ̄ɔ̍ Chi̍i̍sū Ki̍li̍tī o̍ kpāāyā ndɔ̄ɔ̍ ni᷄ŋ nāā ŋ̄ chō nyā sūɛ̍i̍ he̍ī dīmūllo̍ ni̍, māā wānā o̍ wānā cho̍ wānā lāāla᷄ŋ mbō wā wānā sīɛ̄lɛ̍i̍yo̍ pɛ̍, ndu̍yɛ̍ mbō kɛ̄ɛ̍ le̍ nyɛ̄ nāā ŋ̄ pɛ̄ɛ̄ku̍ nyā wo̍ tōsāā pɛ̍, lā chi̍ɛ̍ɛ̄li̍āŋ ā ndu̍ le̍.

⁷Nyā pi̍lā lā sīnā cha̍la̍ŋ māā lā nɔ̄ mī lā chu̍ā kāālā nāālāŋ. Kāni̍ fo̍ndōle̍, bōōndi̍i̍ nāā ŋ̄ wā nyā tɛ̄ɛ̄ŋ nde̍, ŋ̄ ve̍ wānāā sīɛ̄lɛ̍i̍ le̍.

⁸Nyɛ̄ o̍ nyɛ̄ dīāā wāŋndā wā nāā kīo̍o̍, pāāwāā nāā ŋ̍ pāāwā le̍ ndu̍ ni̍. O̍ he̍ī ni᷄ŋ, le̍ pāāle̍ŋ ā nyūmndāŋ ŋ̄ wā fāfa̍la̍a̍, mi̍ ŋ̄ wā wa̍llo̍ ō kālā kālā. Kāni̍ fu̍u̍le̍, nāā ŋ̍ hɛ̍nāŋ nyā ki̍nɛ̍i̍ mī wānā pi᷅lɛ̍ lūɛ̄ī bɔ̄nɔ̄ le̍ nāā le̍.

⁹Nāā ŋ̍ nɔ̍ di̍ kpe̍e̍kpe̍i̍ le̍ mī nāā ŋ̍ nyu̍nā nyā le̍ nyɛ̄ nāā di̍a̍a̍, nāā ŋ̍ pāāwā le̍ ndu̍ le̍. Kɛ̍ ndu̍yɛ̍, sābū nāā ŋ̄ nyūnā nyā le̍ wo̍, kɛ̍ mi̍ ŋ̄ wā wa̍llo̍ le̍nde̍ o̍ kālā kālā wo̍ cho̍ ni̍, māā mī nyɛ̄ nāā ŋ̄ wā tōsāā wo̍ ndu̍ o̍o̍ wā māā tāāmāsi̍ le̍ nyā.

¹⁰Bōōndi̍i̍ nāā ŋ̄ wā ke̍ŋ lātu̍lu̍ nāā nyāā ve̍, mi̍ ŋ̄ dīmūl nyā māā wānā o̍ wānā kɛ̍ɛ̍ le̍ wa̍llo̍ pɛ̍, lā ke᷅ ndu̍ nyɛ̄ dīāā le̍.

¹¹Le̍ sābū nāā ŋ̄ chō sɔ̄ɔ̍ŋ mu᷅ŋ dīmīo̍o̍ wo̍ cho̍ ni̍ māā, ŋ̄ chō tūēīyɔ̄ɔ̍ māā wānāā pūm ā chō nyā tɛ̄ɛ̄ŋ mā nɔ̄ sīɛ̄lɛ̍i̍ to̍sāā nyɔ̄ɔ̍. Nyɛ̄ o̍ nyɛ̄ ā to̍sā le̍, mɛ̄ɛ̍ kēī sōndōla̍ŋ wōūwo̍ o̍ sɔ̄ɔ̍ŋ pi̍lāŋ ni᷄ŋ.

¹²Nyā wānāā wāā nu̍āā ŋ̄ chō nyā dīmūllo̍, ndu̍yɛ̍, mi̍ ŋ̄ wā nyā sīlāā o̍ kpāāyā Māsānɔ̄ɔ̍ Chi̍i̍sū Ki̍li̍tīo̍o̍ ni᷄ŋ, māā lā wā wānāā mānda᷄ŋ ā kāālā nyālāŋ o̍kɔ̄ɔ̄, ndu̍yɛ̍, mī nyā pi̍lā tōsā wa̍llo̍ le̍ nyɛ̄ nyā di̍a̍a̍.

¹³Kɛ̍ ndu̍yɛ̍, chāāŋāā nāā, mī ŋ̄ dīmu̍l nyā, lā sāŋgā ā sɔ̄ɔ̍ŋ kɛ̍ndɔ᷄ŋ tōsāā le̍.

¹⁴Kɛ̍ mī wānā wā dɔ̍ɔ̍ nāā tɛ̄ɛ̄ŋ mbō kɛ̄ɛ̍ le̍ nyɛ̄ nāā ŋ̄ dīmu̍l nyā o̍ yāu̍wo̍ ho̍ō ni᷄ŋ ndo̍ tōsā. Tē wānā wāā le̍nde̍ wā nyā tɛ̄ɛ̄ŋ pɛ̍, lā fūlā ndu̍ mākɔ̄ɔ̄. Ndu̍yɛ̍, lā nɔ᷅ kpe̍ku̍ o̍ kpe̍ku̍ ā ndu̍ le̍, le̍ mī Si̍ɔ̍mbu̍la̍ŋ lā bīī ndu̍.

¹⁵Kɛ̍ ndu̍yɛ̍, lā chu̍ā ndu̍ māā ya̍a̍mɔ̍ɔ̍ nyā le̍. Lā nɔ̄ mānūāā mī lā sīlā wānā wāā le̍nde̍ mɛ̄ɛ̍ wānā si̍lā chāāŋ nūm wānā lāāla᷄ŋndo̍ yɛ̍.

¹⁶Mbɔ̄ Māsānɔ̄ɔ̍ Mɛ̄lɛ̄ka̍ pi̍lā o̍ ke᷅ wa᷅ŋndā kɔ̄l nyūlōo̍ wo̍, ō ke̍ nyā kɔ̄l nyūlōo̍ te̍le̍ŋ o̍ te̍le̍ŋ o̍ nɛ̄ī o̍ nɛ̄ī ni̍ŋ fɔ̍. Nyā kpo̍u̍ Māsānɔ̄ɔ̍ Mɛ̄lɛ̄ka̍ wā lātu̍lu̍ ā nyā fɔ̍.

¹⁷Yā Pɔ̍ɔ̄ pi̍lā cho̍ ni᷅ŋ yīlɔ̄ɔ̍ ho̍ō pōōnyīāā ni̍. I̍ yi̍l nyā lāpi̍. Nu̍āā yā I̍ po̍o̍nyīāā di̍o̍lā nīlāŋ o̍ yāu̍lā nīlāŋ mɛ̄ɛ̄lu̍lāŋ kpo̍u̍ ni̍. Nu̍āā yā I̍ po̍o̍nyīāā ni̍.

¹⁸Mbɔ̄ Māsānɔ̍ nāā Chi̍i̍sū Ki̍li̍tī ō yīyāŋ nyā chōo̍ fɔ̍.