Read Southern Kisi Ti̍mo̍tī Tāso̍o̍ 3 Bible Online

Ti̍mo̍tī Tāso̍o̍ 3 - Southern Kisi bible

Ti̍mo̍tī Tāso̍o̍ 3

¹Dīōmndā di̍mi̍ŋ la᷅ŋ ndāŋ lā chō tōnyā āā, “Wānā lāndu̍ŋ kɔ̍l le̍ wāā ku̍ndā wānāā lāāla᷄ŋndā lāchī wo̍ wāli̍ kɛ̍ndɛ̄ bɛ̄ndōo̍ pi̍lā o̍ ye̍e̍mā ko̍ŋ ni̍.”

²Le̍lāŋ, wānā cho̍ ho̍ō ku̍ndā wānāā lāāla᷄ŋndā lāchī wo̍ mɛ̄ɛ̍ o̍ nɔ̍ le̍ wāā yɛ̍ cho̍ ho̍ō ni̍. Ō ve᷅ wa᷅nā tɔ̍ɔ̍ wɔ̍ɔ̍ŋ chō chōo̍ le̍. La̍nɔ̍ɔ̍ ō pīlɛ̍ kpe̍ o̍ nɔ̍ ni̍ mbō nɔ̄. Ō nɔ̄ mbō wā wānā ti̍u̍ kɔ̄l ndɔ̄ɔ̍ bā. Ō nɔ̄ mbō wā wānā tāāsi̍. Ō nɔ̄ mbō wā wānā kɛ̍si̍ŋ le̍bɛ̍ɛ̍. Ō nɔ̄ mbō wā wānā chāā lāmīāl bīyɔ̄ɔ̄ o̍ ndu̍ lo̍ chi̍ɛ̍ī ni̍ŋ. Ō nɔ̄ mbō wā wānā chāā ŋ̍wāŋ pɛ̄ɛ̄kū.

³Ndu̍yɛ̍, ō ve᷅ wa᷅nā ko̍l māmūɛ̄ī mī mā bīī ndu̍ le̍. Ō ve᷅ wa᷅nā lāsɔ̍ŋgɔ̄ le̍. Wānā nɔ̍ i̍sɔ̍ɔ̍ ā wānā le̍ wo̍ o̍ nɔ̍ ni̍ mbō wā. Ō ve᷅ wa᷅nā lāsɛ̄ɛ̄ŋgi̍āŋ te̍. Ndu̍yɛ̍ ō ve᷅ wa᷅nā hɔ̄ltē nyɛ̄ sɔ̄lāā le̍.

⁴Ō nɔ̄ mbō wā wānā chāā yu̍ŋgu̍ ndɔ̄ɔ̍ māndā o̍ nɛ̄ī kɛ̍ndɛ̄ chōo̍, ndu̍yɛ̍, mbō tōsā mī chūāūwāā ndūāā tūēī ndu̍ dīōm, ndu̍yɛ̍, mā ke̍ ndu̍ bɛ̄ɛ̄le̍ŋ le̍ te̍le̍ŋ o̍ te̍le̍ŋ.

⁵Kāni̍ fo̍ndōle̍, tē wāŋndo̍ ō si̍nā mɛ̄ɛ̍ o̍ māndā yu̍ŋgu̍ ndɔ̍ ndu̍ pi̍la̍a̍ o̍ nɛ̄ī kɛ̍ndɛ̄ chōo̍ yɛ̍ le̍, vɛ̄ɛ̄ o̍ nɔ̍lā yɛ̍ mbō māndā ku̍ndā wānāā lāāla᷄ŋāā Mɛ̄lɛ̄ka̍a̍? Ō nɔ̍lā kpo̍so̍ŋ te̍.

⁶Ndu̍yɛ̍, wānā nɔ̍ ho̍ō mbō wā ku̍ndā wānāā lāāla᷄ŋndā lāchī wo̍ ō nɔ̍ mbō wā wānā lāāla᷄ŋ sɛ̍nɛ̄ī le̍. Kāni̍ fu̍u̍le̍, tē ō wā wānā lāāla᷄ŋ sɛ̍nɛ̄īyo̍ pɛ̍, ō wu̍ū le̍ mbō kāndu̍ yōŋgāā tōsāā. O̍ ko̍ŋ kɔ̍ɔ̍lī yɛ̍, mī Mɛ̄lɛ̄ka̍ kīlu̍l ndu̍ yāmɛ̍i̍ mbō tūsi̍ ndu̍ nyɛ̄ pālāā chōo̍, mɛ̄ɛ̍ i̍ yɔ̍nu̍ŋ ā Māsā Nyi̍nāā Wɔ̄ɔ̍ŋndā yɛ̍.

⁷Ndu̍yɛ̍, wānā nɔ̍ ko̍ŋ mbō wā chīla̍ŋ ndo̍ mɛ̄ɛ̍ mbō wā wānā nɔ̍ tɔ̍ɔ̍ kɛ̍ndɔ̄ɔ̍ wānāā cho̍ wānāā lāāla᷄ŋ te̍ wā tɛ̄ɛ̄ŋ. Yɔ̄ŋi̍ o̍ to̍lnu̍ŋ lāsi̍ɔ̍mbu̍, ndu̍yɛ̍, yɔ̄ŋi̍ o̍ de̍l Ma᷅sā Nyi̍nāā Wɔ̄ɔ̍ŋndā o̍ bā.

⁸Mɛ̄ɛ̍ wānāā mālāā o̍ ku̍ndā wānāā lāāla᷄ŋndā ni᷄ŋ ā nɔ̍ mā wā yɛ̍ ndu̍ cho̍ ho̍ō ni̍. Ā nɔ̄ mā wā wānāā lēbɛ̄ɛ̄, ndu̍yɛ̍, ā nɔ̍ mā wā wānāā sɔ̄ɔ̍ŋ le̍ di̍i̍ŋ di̍i̍ŋ te̍. Ā nɔ̍ mā wā wānāā hi̍u̍ māmūɛ̄ī kōlɔ̄ɔ̄ le̍. Ndu̍yɛ̍, ā nɔ̍ mā nɔ̄ hɔ̄ltē nyɛ̄ sɔ̄lāā le̍.

⁹Ā nɔ̄ mā hīōū lāchī ā wāā o̍ pɛ̄ɛ̄kūlā wānāā lāāla᷄ŋndā chōo̍, lā Mɛ̄lɛ̄ka̍ chɔ᷄m nāā lāŋ, kīīsa᷄ŋ o̍ kīīsa᷄ŋ ve᷅ ndā le̍.

¹⁰Ndu̍yɛ̍, lɔ̍ɔ̍ pā mā chu̍ā wānāā mālāā ha̍ā, ā nɔ̄ mā tōfā ā ndā o̍kɔ̄ɔ̄ fɛ̍lɛ̍ŋ. Tē ā bɛ̄ndā pɛ̍, ā chu̍ā ni᷅ŋ ndā le̍ mā tōsā wa̍llo̍ māā wānāā mālāā o̍ ku̍ndā wānāā lāāla᷄ŋndā ni᷄ŋ.

¹¹Ndu̍yɛ̍, lāāndāā ndāā bɛ̍ɛ̍ mɛ̄ɛ̍ mā wā wānāā lēbɛ̄ɛ̄. Ā nɔ̍ mā wā wānāā bālu̍ ā wānā o̍ sōndō le̍. Ā nɔ̄ mā wā wānāā ti̍u̍ kɔ̄ltā ndālāŋ bā. Ā nɔ̄ mā wā wānāā sānāā o̍ īsɔ̄ɔ̍ o̍ īsɔ̄ɔ̍ ni̍ŋ.

¹²Lāāndūāā ā pīlɛ̍ŋ wānāā mālāā nɔ̄ ni̍ mā nɔ̄. Ndu̍yɛ̍, ā nɔ̄ mā wā wānāā chāā chu̍a̍u̍wāā ndāā ā yu̍ŋgu̍lā ndālāŋ māndā o̍ nɛ̄ī kɛ̍ndɛ̄ ni᷄ŋ.

¹³Tē wānāā mālāā o̍ ku̍ndā wānāā lāāla᷄ŋndā ni᷄ŋ ā to̍sā wāli̍ ndā nɔ̄ le̍ tōsāā wo̍ nyɛ̄ kɛ̄ndɛ̍ī pɛ̍, bɛ̄ɛ̄le̍ŋ pi̍lā ndā sɔ̄lā chāāŋāā ndāā wānāā lāāla᷄ŋndā o̍ bā ni̍. Ndu̍yɛ̍ o̍ ko̍ŋ kɔ̍ɔ̍lī, ā nɔ̄lā mā sōō wa̍kpā wa̍kpā ā tīīnda᷄ŋ ndā nɔ̄ o̍ Chi̍i̍sū Ki̍li̍tī ni̍ŋ ndo̍ o̍kɔ̄ɔ̄.

¹⁴Mi̍ chē bɛ̍ɛ̍ mi̍ nɔ᷅ o̍ kɔ̄l le̍ hūnɔ̄ɔ̍ lo̍ŋ o̍ te̍le̍ŋ bi̍ŋgī bɛ̄ŋgu̍, kɛ̍ ndu̍yɛ̍, I̍ cho̍ nu̍m sɔ̄ɔ̍ŋ mu᷅ŋ pōōnyīāl o̍ yāu̍ ni̍ŋ.

¹⁵Tē I̍ ke̍le̍ŋa̍ yɛ̍ dɔ̍ɔ̍ hūnɔ̄ɔ̄ le̍, mɛ̄ɛ̍ yāu̍wo̍ ho̍ō nɔ̄ mbō chɔ᷄m nu̍m mɛ̄ɛ̍ ŋ̄ nɔ̄ le̍ wāā māā wānā cho̍ o̍ yu̍ŋgu̍ Mɛ̄lɛ̄ka̍a̍ chōo̍ yɛ̍. Ndu̍yɛ̍, Mɛ̄lɛ̄ka̍ cho̍ le̍ fɛ̍ɛ̍ŋ fɛ̍ɛ̍ŋndo̍, ku̍ndā wānāā lāāla᷄ŋāā ndūāā, ndā cho̍ yu̍ŋgo̍o̍ ho̍ō ni̍. Ndu̍yɛ̍, ku̍ndāā ho̍ō ndu̍ cho̍ sūŋgbu̍le̍ sāā tōnyā cho̍ ā Mɛ̄lɛ̄ka̍ o̍kɔ̄ɔ̄, mi̍ lē wā ndu̍ māndāā le̍ŋ ni̍.

¹⁶Mī ŋ̄ dīmu̍l wāŋndā wa̍la̍ŋ māā, tōnyā wā ho̍ō ō vīāŋna᷄ŋ ā nyɛ̄ nāā ŋ̄ lāāla̍ŋ ā Mɛ̄lɛ̄ka̍ o̍kɔ̄ɔ̄ wo̍, ō chō sūɛ̍i̍ kɔ̄ndɔ̄fi̍li̍i̍ bɛ̄ndū. Chi̍i̍sū hi᷅ŋ o̍ chi̍e̍ēŋndo̍ chōo̍ māā wānā chi̍e̍e̍. Mi̍ Nyi̍nā Mɛ̄lɛ̄ka̍a̍ kē ndu̍ di̍. Mi̍ ki̍i̍la̍a̍ Mɛ̄lɛ̄ka̍a̍ chā ndu̍. Mi̍ wāŋndā kɔ̍ di̍mūl wāŋndā lēkāa̍ o̍ lēkāa̍ ā ndu̍ o̍kɔ̄ɔ̄. Mi̍ wānāā fāŋgā bā o̍ bā fe̍e̍ o̍ chi̍e̍ēŋndo̍ chōo̍ ā du̍a̍ū tīīnda᷄ŋndo̍ o̍ ndu̍ ni̍ŋ. Mi̍ Mɛ̄lɛ̄ka̍ hēl ā ndu̍ ɛ̄chɛ̍nɛ̄.