Read Southern Kisi Ti̍mo̍tī Tāso̍o̍ 5 Bible Online

Ti̍mo̍tī Tāso̍o̍ 5 - Southern Kisi bible

Ti̍mo̍tī Tāso̍o̍ 5

¹Tē ō wā pɛ̍, mī lāŋu̍nɔ̄ kālāā o̍ ku̍ndā wānāā lāāla᷄ŋndā tɛ̄ɛ̄ŋ, mbo̍ tōsā su̍ɛ̍i̍ wɔ̍ɔ̍ŋnde̍, hi̍ū īsɔ̄ɔ̍ nāā ndu̍ chu̍ā ō kālā kālā le̍. A̍ wā ndu̍ sīlāā pɛ̍, so̍o̍ nāā ndu̍ chu̍ā ā lēbɛ̄ɛ̄ mɛ̄ɛ̍ ŋ̄ sūāā nāā fi̍nyā ve̍lū nu̍m ndo̍ chūā yɛ̍. O̍ ko̍ŋ kɔ̍ɔ̍lī, mā bīī chūāā pīāāndūāā nyā tɛ̄ɛ̄ŋ māā pɔ̄mbūāā nūm.

²Ndu̍yɛ̍, mā bīī wɛ̄ɛ̄ŋāā kālla̍ māā kālāā nu̍m, mā bīī chūāā lāāndūāā māā yēmāā nu̍m o̍ nɛ̄ī di̍a̍ndāā ni᷄ŋ.

³Māndā wa᷅ŋ lāāndūāā vi̍i̍ku̍u̍ pīāāndūāā wā, ā nɔ̍ ha̍ā wānāā māndāā kpo̍so̍ŋ te̍ wā.

⁴Kɛ̍, tē ō wā pɛ̍, mī wānā la̍nɔ̍ vi̍i̍ wāā le̍nde̍ nɔ̍ chūāūwa̍, kɛ̄lɛ̄ŋgāā mbō nɔ̄ chūāūwāā māmāā pɛ̍, mɛ̄ɛ̍ chūāūwāā ndūāā kāŋ ndā nɔ̍ ni̍ mā māndā ndu̍. Kāni̍ fo̍ndōle̍, wāli̍ Mɛ̄lɛ̄ka̍a̍ ō tāse̍ ndā nɔ̄ le̍ tōsāā wo̍, ndu̍ cho̍ nyɛ̄ ndā nɔ̄ kūēē lē tōsāā le̍ yu̍ŋgu̍ ndāā wo̍ ni̍. Tē ā tōsā ko̍ŋ pɛ̍, mɛ̄ɛ̍ nyɛ̄ wānāā ve̍lū ndā wā ā tōsā le̍ ndā wo̍ mɛ̄ɛ̍ māā ko̍ŋ ndā chō ko̍ŋ mi̍ŋgīo̍o̍ ni̍. Ndu̍yɛ̍, nyɛ̍ bɛ̍ndā Mɛ̄lɛ̄ka̍ o̍ hɔ̄l le̍ tōsāā wo̍ cho̍ ho̍ō ni̍.

⁵Wānā la̍nɔ̍ vi̍i̍ku̍u̍ pɔ̍nɔ̍ɔ̍ ndu̍yɛ̍, mbo̍ wā ō nɔ̍ lɛ̍ wānā māndāā kpo̍so̍ŋ te̍ wo̍, ndu̍ ndu̍ Mɛ̄lɛ̄ka̍ ko̍ni̍ o̍ ti̍i̍ndāŋ ni̍. Ndu̍yɛ̍, wānā wāā nu̍āā ndu̍ ndu̍, le̍ pāāle̍ŋ ā nyūmndāŋ ō chō Mɛ̄lɛ̄ka̍ pīɛ̄īle̍ŋ le̍ ndu̍ mālāā.

⁶Kɛ̍, wānā la̍nɔ̍ vi̍i̍yo̍ o̍ lāndu̍ŋ kɔ̍l le̍ ndu̍ pi̍lā kɔ̄l ndɔ̄ kɛ̍ndɔ̄ɔ̍ su̍e̍e̍ wo̍ ndu̍ ndu̍, mi̍ chē bɛ̍ɛ̍ mbo̍ nɔ̄ yōōmū ŋ̄dīāl lo̍ ho̍ō ni̍, kɛ̍ ō vīlɛ̍i̍yo̍ pɛ̍ o̍ cho̍ ni̍.

⁷Le̍lāŋ, wāŋ lāāndūāā vīi̍yā ni̍ ā yu̍ŋgu̍lā ndālāŋ, si̍lā ndā sīlālāŋ nda᷅ŋ, o̍ ko̍ŋ, wānā o̍ wānā ho᷅l ndā sɔ̄ɔ̍ŋ wāā le̍nde̍ le̍.

⁸Wānā o̍ wānā cho̍ wānā lāāla᷄ŋ, tē ō kɛ̄ɛ̍ le̍ wānāā ndūāā māndāā pɛ̍, tāāmā fa̍ū yu̍ŋgu̍ ndɔ̄ɔ̍, mɛ̄ɛ̍ tīīnda᷄ŋ wānāā lāāla᷄ŋndā nɔ̄ o̍ Mɛ̄lɛ̄ka̍ ni̍ŋ ndo̍ ndu̍ o̍ māl ko̍ŋ ni̍. Wānā wāā le̍nde̍ ō wɔ̄u̍ mbo̍ hīāū bɛ̍ɛ̍ wa᷅nā cho̍ wānā lāāla᷄ŋ te̍ wo̍.

⁹Wānāā nyā nɔ̄ mī lā chu̍ā le̍ wāā o̍ ku̍ndā wāŋ lāāndūāā vīi̍yā ni᷄ŋ ndo̍, ndā cho̍ ha̍ā ni̍. Mɛ̄ɛ̍ mī wāŋndo̍ chīŋā wɔ̄sīla̍ŋ be̍le̍-ŋɔ̍mpu᷅m. Ndu̍yɛ̍, pɔ̍nɔ̍ɔ̍ ō pīlɛ̍ kpe̍ o̍ nɔ̍ mbō kēi̍ o̍ bā ni̍.

¹⁰Ndu̍yɛ̍, mɛ̄ɛ̍ mbō wā wānā wāŋndā chāndu̍ māā ō chō wānā kɛ̍ndɛ̄. Ndu̍yɛ̍, mɛ̄ɛ̍ mbō wā wānā māndā chūāūwāā ndūāā o̍ nɛ̄ī kɛ̍ndɛ̄ ni᷄ŋ. Mɛ̄ɛ̍ mbō wā wānā chāā lāmīāl bīyɔ̄ɔ̄ o̍ ndu̍ lo̍ chi̍ɛ̍ī ni̍ŋ. Ndu̍yɛ̍, mɛ̄ɛ̍ mbō wā wānā di̍i̍ku̍ŋ ni᷅ŋ wānāā Mɛ̄lɛ̄ka̍a̍. Mɛ̄ɛ̍ mbō wā wānā mālā ni᷅ŋ wānā nyɛ̄ pālāā wā chōo̍ wo̍. Ndu̍yɛ̍, mɛ̄ɛ̍ mbō wā wānā ki̍ndi̍ o̍ nɛ̄ī o̍ nɛ̄ī ni̍ŋ le̍ wāŋndā mālāā.

¹¹Lā chu̍ā chūāā lāāndūāā ā vi̍i̍ku̍u̍ pīāāndūāā wā le̍ wāā o̍ ku̍ndā wāŋ lāāndūāā vīi̍yā ni᷄ŋ te̍. Kāni̍ fo̍ndōle̍, tē yēēmɛ̍i̍ chūāā pɔ̍nɔ̍ɔ̍ ī bīī ndā pɛ̍ ā mūlu̍l bɛ̍ɛ̍ Ki̍li̍ti̍ kɔ̄ɔ̍.

¹²Tē ī yɔ̄nu̍ŋ yɛ̍ le̍nde̍ pɛ̍, Mɛ̄lɛ̄ka̍ ki̍lu̍l ndā yāmɛ̍i̍ ō tūsi̍ ndā nyɛ̄ pālāā chōo̍ le̍ būŋgɛ̄ī ndā chu̍ā o̍ Ki̍li̍tī lo̍ ve̍ tɛ̄ɛ̄mbūūwo̍.

¹³Ndu̍yɛ̍ vɛ̍lɛ̄, chūāā lāāndūāā vi̍i̍ya̍a̍ wāā le̍ndi̍a̍a̍, ā hɛ̍nāŋ le̍ nyɛ̄ o̍ nyɛ̄ tōsā le̍ mɛ̄ɛ̍ bālɔ̄ɔ̍, ā fūlā pɛ̍ o̍ chīɛ̄īyo̍ ho̍ō, ā lūɛ̄ī o̍ chīɛ̄īyo̍ ho̍ō. I̍ wɔ̍u̍ bɛ̍ɛ̍ wɔ̍ūlē bɛ̄ndūle̍ŋ nde̍, ndi̍ cho̍ bālɔ̄ɔ̄ ndā bālū ā wāŋndā o̍ sōndō wo̍ ni̍. Ndu̍yɛ̍, sōndōla̍ŋ wōūwo̍ o̍ sɔ̄ɔ̍ŋ cho̍ sɔ̍ɔ̍ŋ ndā le̍ wo̍ŋ ni᷄ŋ, mā sūāā sɔ̍ɔ̍ŋ ndā nɔ̍ bɛ̍ɛ̍ mā sōō ā mu̍ŋ o̍kɔ̄ɔ̄ le̍ wo̍ŋ.

¹⁴Le̍lāŋ ya̍ ya̍, I̍ hɛ̍nāŋ mī chūāā lāāndūāā vīi̍yā ā chu̍ā pīāāndūāā, mā vēlū chūāūwa̍, ndu̍yɛ̍, mā nɔ̄ yu̍ŋgu̍la̍ŋ le̍ māndāā. Ko̍ŋ hi̍a̍ū nāŋɔ̄ɔ̄. Tē ke̍ŋ i̍ yɔ̍nu̍ŋ pɛ̍, ya̍a̍mɔ̍ɔ̍wa̍a̍ nāā ā sɔ̍lā fo̍ndāŋ mā sɛ̄ŋi̍ tɔ̍ɔ̍ wɔ̍ɔ̍ŋndo̍ ā nāā wānāā lāāla᷄ŋndā o̍kɔ̄ɔ̄ le̍.

¹⁵Kāni̍ fo̍ndōle̍, wāŋ lāāndūāā vīi̍yā ā pūm, ā ma᷄l ni᷅ŋ bɛ̍ɛ̍ ku̍ndā wānāā lāāla᷄ŋndā mā tūāl Sēta̍nā, māsā nyi̍nāā wɔ̄ɔ̍ŋndā kɔ̄ɔ̄lī.

¹⁶Kɛ̍ ndu̍yɛ̍, tē wānā la̍nɔ̍ lāāla᷄ŋndo̍ ō nɔ̄ pɛ̍ wa᷅ŋ lāāndūāā vīi̍yā o̍ yu̍ŋgu̍ ndɔ̄ɔ̍ chōo̍, mɛ̄ɛ̍ wānā lāāla᷄ŋ ko̍ŋ ō māndā vi̍i̍ya̍a̍ wāā le̍nde̍. Ō chu̍ā lɛ̄ ndā mbō yɔ̄ŋgu̍ ndā o̍ ku̍ndā wānāā lāāla᷄ŋndā lo̍ le̍ ndā māndā, mī wōlɔ̄ɔ̄ lūsu̍lɛ̍i̍ ko̍ŋ wā ku̍ndā wānāā lāāla᷄ŋndā chōo̍ le̍. Tē he̍ī yɔ̄nu̍ŋ pɛ̍, mɛ̄ɛ̍ ku̍ndā wānāā lāāla᷄ŋndā tīū bā mbō māndā wāŋ lāāndūāā vīi̍yā, ā nɔ̍ wānā māndāā kpo̍so̍ŋ te̍ wā.

¹⁷Lāŋgba̍ā kālla̍ ā cho̍ ku̍ndā wānāā lāāla᷄ŋndā lāchī, mā wā wāli̍ kɛ̍ndɔ̄ɔ̍ wā, ō bɛ̄ndā mā sɔ̄lā pāāwā cho̍ le̍ ndā wo̍ sālā tīɔ̍ɔ̍ŋ, tāāmā ā to̍sā wa̍llo̍ ō kālā kālā o̍ sūɛ̍i̍ Mɛ̄lɛ̄kɛ̍i̍ dīmīo̍o̍ ni᷄ŋ ā wāŋndā pɛ̄ɛ̄kōo̍ wā.

¹⁸Kāni̍ fu̍u̍le̍, Yāu̍ Mɛ̄lɛ̄ka̍a̍ dīmi̍ āā, “Tē ā nāŋgu̍ nāūwo̍ tɔ̄lɔ̄ɔ̄ nūmndo̍ nɛ̄īyo̍ pɛ̍, ā yi̍ī ndu̍ sōndōo̍ māā yɔ̄ŋi̍ o̍ di̍o̍ tɔ̍lɔ̄ɔ̄ kōŋ ō ti᷄ŋ te̍ le̍.” Mbo̍ dīmī vɛ̄lɛ̄ āā, “Wānā wa̍llo̍ nɔ̄ mbō sɔ̄lā pāāwā ndɔ̄ɔ̍.”

¹⁹Ndu̍yɛ̍, ā yɔ᷄ŋ bɛ̍ɛ̍ mī wāŋndo̍ chɔ᷄m īsɔ̄ɔ̍ ā lāŋu̍nɔ̄ kālāā o̍kɔ̄ɔ̄ māā yɔ̄ŋ wɔ̄ɔ̍ŋ wāā nu̍āā ndo̍ō o̍ to̍sā ni̍, tē ō cho̍ yɛ̍ mī wānāā ŋīɔ̍ɔ̍ŋ kɛ̄lɛ̄ŋgāā ā yāā mā fūlā kɔ̄ɔ̄lī māā le̍nde̍ le̍ o̍ to̍sā le̍, lā chu̍ā ndi̍ māā īsɔ̄ɔ̍ le̍.

²⁰Lā sōli̍ wānāā to̍sā yɔ᷅ŋ wɔ̄ɔ̍ŋndo̍ wā kpe̍nde̍ke̍le̍ mī lā sīlā ndā. Ko̍ŋ to̍sā mī wāŋndā ā tūāā ā yɔ᷄ŋ sīōōŋnde̍.

²¹I̍ cho̍ sīlāā ho̍ō yɔ̄ŋgōo̍ Mɛ̄lɛ̄ka̍ o̍ hɔ̄l, ā Chi̍i̍sū Ki̍li̍tī, ā ki̍i̍la̍a̍ Mɛ̄lɛ̄ka̍a̍. Ndā cho̍ se̍i̍yāā nīāā le̍ nyɛ̄ yā I̍ cho̍ ho̍ō nu̍m dīmūllo̍ wo̍ ni̍. Chu̍ā si̍lālā yā I̍ si̍lā nu̍m la᷅ŋ ndāŋ. To̍sā sīm kɔ̄ɔ̄lī kɛ̄lɛ̄ŋgāā mā to̍sā la̍ka̍fā ā mɛ̄ɛ̍ ŋ̄ bīī wa᷅ŋndā yɛ̍ le̍.

²²Ndu̍yɛ̍, lā lɛ̍ɛ̍ŋ le̍ kēlēŋā wānā o̍ wānā chu̍ā mī lā pīɛ̍i̍ Mɛ̄lɛ̄ka̍ ndu̍ chōo̍ le̍ ndu̍ yɔ̄ŋndo̍ o̍ kpe̍ku̍ Mɛ̄lɛ̄ka̍a̍ ni᷄ŋ te̍. Ndu̍yɛ̍, bālā nūmndā wa᷅ o̍ yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ wānā ni̍ŋ te̍. Māndā nu᷅m pi̍lā, mī yōōmū nūmndo̍ wā ō dīāndāā.

²³Mɛ̄ɛ̍ dēmbōo̍ ō nɛ̄ī nu̍m ndu̍yɛ̍, lɔ̍ɔ̍ lɔ̍ɔ̍ ā chō nāā yɛ̍, wa᷅ lɛ̄ ko̍ mɛ᷅ŋndāŋ su̍e̍e̍ ko̍lɔ̄ɔ̍ le̍. Wā mu̍ɛ̍īya̍ŋ kōlɔ̄ɔ̍ nyɛ̄ pɔ̄mbɔ̄.

²⁴Wāŋndā ā pūm, yɔ̄ŋndā wɔ̄ɔ̍ŋndā ndā tōsā lāŋ, mī lā chɔ̄mnu̍ŋ kpe̍nde̍ke̍le̍ mī wāŋndā sīnā, lɔ̍ɔ̍ pā bɛ̍ɛ̍ wānā o̍ wānā du̍a̍ū su̍ɛ̍i̍ ndɛ̄i̍ ŋ̄wāŋ lāchī. Ā pūm yɛ̍, wānā ya̍lā yɔ᷅ŋndā ndālā wɔ̍ɔ̍ŋndāŋ sīnā le̍, mɛ̄ɛ̍ mbō fūūlu̍u̍ ā ībōōndu̍.

²⁵Le̍nde̍ ko̍ni̍ sɔ̄ɔ̍ŋ kɛ̍ndɛ̄ŋ wāŋndā tōsā wo̍ŋ, ŋ̄ chɔ̍mnu̍ŋ kpe̍nde̍ke̍le̍ mī wāŋndā sīnā ni̍. Sɔ̄ɔ̍ŋ kɛ̍ndɛ̄ŋ ndā tōsā bɛ̍ɛ̍ wānā chi᷅ bɛ̍ɛ̍ mu̍ŋ kpe̍nde̍ke̍le̍ le̍ wo̍ŋ mu̍ŋ bɛ̍ɛ̍ ŋ̄ lo᷅ ni̍ŋ ŋ̍ vi̍āŋna᷄ŋ te̍.