Read Southern Kisi Ti̍mo̍tī Tāso̍o̍ 6 Bible Online

Ti̍mo̍tī Tāso̍o̍ 6 - Southern Kisi bible

Ti̍mo̍tī Tāso̍o̍ 6

¹Wānāā lāāla᷄ŋndā kpo̍u̍ ā cho̍ o̍ chɛ̄le̍ŋ ni᷄ŋ wa᷅ŋndā o̍ bā bɛ̄ŋgu̍ wā, ā nɔ̄ mā chu̍ā māsāā ndāā kāŋ māā wānāā nɔ̍ mā sɔ̄lā bɛ̄ɛ̄le̍ŋ tāu̍ wā ndā chō ni̍. O̍ ko̍ŋ, wānā o̍ wānā nɔ̍lā lɛ̍ mbō dīmi̍ dīōm wɔ̄ɔ̍ŋ ā Mɛ̄lɛ̄ka̍ o̍kɔ̄ɔ̄, kɛ̄lɛ̄ŋgāā ā pɛ̄ɛ̄kū nāā ho̍ō o̍kɔ̄ɔ̄ le̍.

²Ndu̍yɛ̍, wānāā cho̍ o̍ chɛ̄le̍ŋ ni᷄ŋ chāāŋāā ndāā wānāā lāāla᷄ŋndā o̍ bā bɛ̄ŋgu̍ wā, ā pu̍u̍lu᷄ŋ le̍ ko̍ŋ mā kɛ̄ɛ̍ le̍ ndā bɛ̄ɛ̄le̍ŋ kē le̍. Le̍ chō ndā chō chāāŋāā ndāā wānāā lāāla᷄ŋndā wo̍ kpe̍e̍kpe̍i̍ bɛ̍ɛ̍ ndā nɔ̄ ni̍ mā tōsāl ndā wāli̍ kɛ̍ndɔ̄ɔ̍. Kāni̍ fo̍ndōle̍, tē ā tōsā wāli̍ kɛ̍ndɔ̄ɔ̍ le̍ ndā pɛ̍, mɛ̄ɛ̍ chāāŋ ndā wānā lāāla᷄ŋndo̍ ō ndā kāālā wo̍, o̍ ndu̍ lo̍ tɔ̄nɔ̄ ko̍ŋ chō kɔ̄la̍ŋ ni̍. Ti̍mo̍tī, pɛ̍ɛ̍ku̍ wānāā nūmndā ndu̍yɛ̍, mā dɛ̄ɛ̄ni̍a̍a̍ ndā kɔ̄lta̍ŋ le̍ mā chu̍ā sīlālāŋ nda᷅ŋ.

³Wānā o̍ wānā pɛ̍ɛ̍ku̍ pɛ̍ wa᷅ŋndā pɛ̄ɛ̄kū chēle̍ŋ te̍ŋge̍ŋ o̍ cho̍ nyɛ̍ pīlɛ̍ ā Māsānɔ̍ nāā Chi̍i̍sū Ki̍li̍tī pɛ̄ɛ̄kū ndɔ̄ɔ̍ le̍ wo̍ pɛ̍, ndu̍yɛ̍ mbo̍ wā te̍ŋge̍ŋ ā pɛ̄ɛ̄kū nāā ho̍ō ā Mɛ̄lɛ̄ka̍ tīīnda᷄ŋndo̍ o̍kɔ̄ɔ̄ pɛ̍,

⁴mɛ̄ɛ̍ wānā wāā le̍nde̍ yōŋgāā hi̍u̍ŋ ndu̍ pu᷅ŋ ni̍, ndu̍yɛ̍ ō si̍nā nyɛ᷅ o̍ nyɛ̄ le̍. Ndu̍yɛ̍, sɔ̄ɔ̍ŋ wāā le̍nde̍ mu̍ŋ hu᷅ŋ ā pāŋa̍li̍āŋnda̍ŋ ni̍, ā sɛ̄ɛ̄ŋgi̍āŋnda̍ŋ, ā yīōūwa᷅ŋnda̍ŋ, ā wōna᷅ŋndo̍,

⁵ā dīōmndā hīŋa᷅ŋnda̍ŋ lɔ̍ɔ̍ lɔ̍ɔ̍ ni̍. Wāŋndā ha̍ā bōlle̍ bīī mi̍ ī tāmbū ndā. Ā si̍nā to᷅nya̍ Mɛ̄lɛ̄ka̍a̍ le̍. Ā chu̍ā māchūāā pɛ̄ɛ̄kōo̍ ho̍ō ā tīīnda᷄ŋndo̍ dɔ̄wɔ̄ɔ̍ o̍ Mɛ̄lɛ̄ka̍ ni᷄ŋ māā sūɛ̍i̍ wānā sɔ̍lā sūl lēni᷄ŋ.

⁶O̍ nɛ̄īyo̍ ō pīlɔ̍ɔ̄ ni᷄ŋ, tē pɛ̄ɛ̄kōo̍ ho̍ō ā tīīnda᷄ŋndo̍ dɔ̄wɔ̄ɔ̍ o̍ Mɛ̄lɛ̄ka̍ ni᷄ŋ o̍ to̍sā pɛ̍ mī wāŋndo̍ hīni̍ kɔ̄l ā nyɛ̄ o̍ nɔ̍ o̍ bā wo̍ pɛ̍, ō nɔ̄lā mbō sīīŋgu̍u̍ ndu̍ wānā su̍lāā bɛ̄ndū.

⁷Kāni̍ fu̍u̍le̍, vīōlɔ̄ɔ̄ ndā vīālū nāā chi̍e̍ēŋ nāŋ ndo̍, ŋ̄ hi᷅ŋ ā nyɛ̄ o̍ nyɛ̄ o̍ bā le̍. Ndu̍yɛ̍ vɛ̍lɛ̄, tē ŋ̄ vī pɛ̍, ŋ̄ che᷅ŋ ā nyɛ̄ o̍ nyɛ̄ o̍ bā chi̍e̍ēŋ nāŋ mī ŋ̄ kūɛ̄ ā ndu̍ le̍.

⁸Le̍lāŋ, tē ŋ̄ sɔ̄lā nyɛ̄ dīāā nāā ŋ̄ dīā wo̍ pɛ̍, ndu̍yɛ̍ mī ŋ̄ sɔ̄lā nyɛ̄ chūɛ̄ɛ̄na᷄ŋndo̍ pɛ̍, mɛ̄ɛ̍ ŋ̄ nɔ̄ mī ŋ̄ hīni̍ kɔ̄l.

⁹Wānāā nɔ᷅ ha̍ā yēēmɛ̍i̍ le̍ sūllo̍ wā, Tɔ̄ɔ̄nda᷄ŋnda̍ fāŋgā fa̍ŋgā lā hūŋ ndā chōo̍, ndu̍yɛ̍ ā hāū o̍ yāŋɔ̄ɔ̄lā fāŋgā. Wāŋndā ha̍ā yēēmāŋ ŋ̄dīɔ̄mndo̍ŋ ŋ̍ hu᷅ŋ ā kpūndɔ̍ɔ̍ wo̍ŋ ŋ̄ lūɛ̄ī ndā ni᷄ŋ. Mɛ̄ɛ̍ yēēmāŋ ndāŋ mu᷅ŋ ŋ̄ na᷄ŋ ndā mānānāā o̍ kpūndɔ̍ɔ̍ ni᷄ŋ mi̍ ŋ̄ wā ndā tɛ̄ɛ̄mbūūwo̍.

¹⁰Kāni̍ fo̍ndōle̍, o̍ kāālā ŋ̄ka̍ni̍o̍o̍ ni᷄ŋ sɔ̄ɔ̍ŋ wɔ̍ɔ̍ŋ fāŋgā fa̍ŋgāŋ wāŋndā tōsā wo̍ŋ ŋ̄ chāŋ tu̍m ni̍. Ā pūm mɛ̄ɛ̍ yēēmɛ̍i̍ sɔ̍lāā nyɛ̄ sɔ̄lāā ī hīōū ndā o̍ kɔ̄l kɔ̄ɔ̄lī te̍i̍, mā māl tīīnda᷄ŋndo̍ dɔ̄wɔ̄ɔ̍ o̍ Mɛ̄lɛ̄ka̍ ni᷄ŋ. O̍ he̍ī ni᷄ŋ, mā lūēī ndā pi̍lā nyɛ̄ nɛ̄īyāā fāŋgā fa̍ŋgā.

¹¹Kɛ̍ ndu̍yɛ̍, nūm Ti̍mo̍tī, nu᷄m cho̍ ō yɔ̄ŋga᷄ŋ o̍ Mɛ̄lɛ̄ka̍ lo̍ wo̍, kpɛ̍kpɛ̍la̍ ni̍ko̍ sɔ̍ɔ̍ŋ mu᷅ŋ kpo̍u̍. Lāndu̍ŋ kɔ̍l le̍ wāā sa̍kpō Mɛ̄lɛ̄ka̍ o̍ hɔ̄l, ā wāā wānā lāāla᷄ŋ kɛ̍ndɛ̄, ā tīīnda᷄ŋndo̍ dɔ̄wɔ̄ɔ̍ o̍ Mɛ̄lɛ̄ka̍ ni᷄ŋ, ā kāālāā nɔ̄ɔ̍, ā sīsi̍lāŋ o̍ tīīnda᷄ŋ Mɛ̄lɛ̄ka̍a̍ ni᷄ŋ yi̍, ā wāā wānā nɔ̍ i̍sɔ̍ɔ̍ ā wānā le̍ wo̍.

¹²O̍ ko̍ŋ kɔ̍ɔ̍lī, ki̍ndi̍ ā lābɛ̄ɛ̄la̍ kpe̍e̍kpe̍i̍ mā wā wānā dɔ̍ū tīīnda᷄ŋndo̍ o̍ Mɛ̄lɛ̄ka̍ ni᷄ŋ sākpō, ndu̍yɛ̍ mā sɔ̍lā yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍. Kāni̍ fu̍u̍le̍, le̍ yōōmū kpe̍e̍kpe̍i̍yo̍ ho̍ō Mɛ̄lɛ̄ka̍ vēēlu̍ nu̍m ā bōōndi̍i̍ ŋ̄ chɔ̄ɔ̄mu̍u̍ wānāā fāŋgā fa̍ŋgā o̍ hɔ̄l kpe̍nde̍ke̍le̍ māā ā ti̍i̍ndāŋ Mɛ̍lɛ̄kā ve̍ ni̍.

¹³Le̍lāŋ, sīlālā yā I̍ cho̍ la᷅ŋ nu̍m kīo̍o̍ lāŋ, Mɛ̄lɛ̄ka̍ o̍ to̍sā mī nyɛ̄ o̍ nyɛ̄ fe̍e̍ o̍ wā yōōmū wo̍ ni̍, ā Chi̍i̍sū Ki̍li̍tī o̍ chɔ̍m tōnyāā kpe̍nde̍ke̍le̍ Pɔ̍ŋti̍ɔ̍ɔ̍ Pāi̍lē o̍ hɔ̄l lo̍, ō wā māā lēse̍ī pɛ̍, ndā cho̍ se̍īya̍ ā lāŋ o̍kɔ̄ɔ̄ ni̍.

¹⁴Mī di̍mu̍l nu̍m, chu̍ā si̍lāla̍ŋ nda᷅ŋ nyɛ̄ kɛ̄ndɛ̄ sānāā. To̍sā īsɔ̄ɔ̍ o̍ īsɔ̄ɔ̍ mī wānā chɔ̍m sɔ̄ŋ nu̍m ā sīlālāŋ nda᷅ŋ o̍kɔ̄ɔ̄ le̍, ha̍a̍a̍ mbō lo̍ o̍ ko̍ŋ le̍nde̍ mī pāāle̍ Māsānɔ̍ nāā Chi̍i̍sū Ki̍li̍tī cho̍ hūnɔ̄ɔ̄ le̍ŋ lē fūūlu̍u̍.

¹⁵Ndu̍yɛ̍, Mɛ̄lɛ̄ka̍ nāā ŋ̄ nɔ̄ ho̍ō mī ŋ̄ līsā wo̍, o̍ cho̍ ho̍ō chi̍e̍ēŋndo̍ bōlle̍ŋ ndu̍ pīlɛ̍ kpe̍ wo̍, ndu̍yɛ̍ mbo̍ hīāū māsāā kpo̍u̍, mbo̍ hīāū wānāā bɛ̄ndūāā kpo̍u̍ kpāāyā wo̍, tē te̍le̍ŋ ndɔ̍ o̍ hɛ̍nāŋ ndo̍ ō fūūlu̍u̍ pɛ̍, ō tōsā Chi̍i̍sū Ki̍li̍tī hi᷅ŋ.

¹⁶Ndu̍ Mɛ̍lɛ̄kā ndu̍ pīlɛ̍ kpe̍ vi᷅ le̍ ni̍. Pa̍ŋgēle̍ o̍ cho̍ lēni᷄ŋ ndo̍ wānā nɔ̍lā mā sɔ̍ɔ̍ŋgu̍u̍ ndu̍ īkɛ̄i̍ le̍ ā dīōndɔ̄ɔ̍. Wānā o̍ wānā chi̍ wɔ̍ bɛ̍ɛ̍ Mɛ̍lɛ̄kā le̍. Ndu̍yɛ̍ wānā nɔ̍lā mbō chē ndu̍ le̍. Bɛ̄ɛ̄le̍ŋ lē wā ndu̍ lē kēna᷄ŋ, ndu̍yɛ̍, mbō nɔ̄ kpāāyāā le̍ fɛ̍ɛ̍ŋ ā fɛ̍ɛ̍ŋ. I̍ yɔ̄nu̍ŋ le̍nde̍ fɔ̍.

¹⁷Ndu̍yɛ̍, si̍lā wānāā sūlāā ā chu̍ā ndā pi̍lā māā, ā chō ā bɛ̄ndū mā hīāū ā chāāŋnda̍ le̍. Di̍mu̍l ndā ā du̍a̍ū tīīnda᷄ŋndo̍ o̍ sūltā ndālāŋ ni᷄ŋ te̍. Kāni̍ fu̍u̍le̍, nyɛ̄ sɔ̄lāā ō cho̍ nyɛ᷅ wānā dɔ̍ū tīīnda᷄ŋ le̍ni̍ŋ te̍. Mɛ̄lɛ̄ka̍ ndu̍ pīlɛ̍ kpe̍ ndā dɔ̄u̍ ti̍i̍nda᷄ŋndo̍ o̍ ndu̍ ni̍ŋ ni̍. Mɛ̄lɛ̄ka̍ chō wānā īkɛ̄ndɛ̄ nāa̍ na̍a̍ chūā. Nyɛ̄ o̍ nyɛ̍ cho̍ nyɛ̄ kɛ̄ndɛ̄, kīo̍o̍ o̍ ke᷅ nāā mu̍ŋ ta̍u̍ ta̍u̍ ni̍, le̍ mī ŋ̄ na᷄ŋ kɔ̄l.

¹⁸Di̍mu̍l wānāā sūlāā ā tōsāl wa᷅ŋndā tōnyāā. Ā wā wānāā nɔ̍ kɛ̄ndɛ̄i̍ ta̍u̍ ta̍u̍ wā. Ā wā wānāā sāndu̍ lābā. Ndu̍yɛ̍, ā wā ā chɛ̍lāā le̍ chāāŋāā ndāā mālāā ā nyɛ̄m ndā nɔ̄ wo̍ŋ.

¹⁹Tē ā tōsā le̍nde̍ pɛ̍, mɛ̄ɛ̍ sūllo̍ ō ndā sīm ni̍ŋ le̍cho̍o̍ si̍ɔ̍dīi̍ yo̍, ndu̍ ndā chō ko̍ŋ māndāā ni̍, o̍ ko̍ŋ, ā nɔ̄lā mā sɔ̄lā yōōmu̍ cho̍ yōōmū kpe̍e̍kpe̍i̍yo̍ wo̍.

²⁰Nyɛ̄ Mɛ̄lɛ̄ka̍ ō yɔ̄ŋgu̍ nu̍m le̍ tōsāā wo̍ Ti̍mo̍tī, to̍sā ndu̍ nyɛ̄ kɛ̄ndɛ̄ kɛ̄ndɛ̍ī. Wo̍ū sōndō nūm o̍ dīɔ̄mndo̍ŋ ni᷄ŋ dīōmnda̍ŋ hīŋa᷅ŋndo̍ o̍ sɔ̄ɔ̍ŋ fo̍ndo᷄ŋ chōo̍ le̍. Wāŋndā ndā vēēlu̍ ko̍ŋ āā dɛ̍nɛ̍ si̍nāā, kɛ̍ ko̍ŋ cho̍ dɛ̍nɛ̍ si̍nāā kpo̍so̍ŋ te̍.

²¹Mi̍ wāŋndā ā pūm ā dīmī o̍ sōndō ndā ni̍ŋ māā ā sīnā dɛ̍nɛ̍. O̍ he̍ī ni᷄ŋ mā māl nɛ̄īyo̍ ā Mɛ̄lɛ̄ka̍ tīīnda᷄ŋndo̍ o̍kɔ̄ɔ̄. Mbɔ̄ Mɛ̄lɛ̄ka̍ yīyāŋ nyā chōo̍ fɔ̍.