Read Southern Kisi Ti̍mo̍tī Di̍i̍ŋ Ndɔ̄ɔ̍ 1 Bible Online

Ti̍mo̍tī Di̍i̍ŋ Ndɔ̄ɔ̍ 1 - Southern Kisi bible

Ti̍mo̍tī Di̍i̍ŋ Ndɔ̄ɔ̍ 1

¹Yā Pɔ̍ɔ̍ cho̍ ho̍ō māā wānā Chi̍i̍sū Ki̍li̍tī ve᷅m hɔ̄ltē ndɔ̄ o̍ hɛ̄na᷄ŋ Mɛ̄lɛ̄ka̍a̍ ni᷄ŋ ndo̍, yā cho̍ yāu̍wo̍ ho̍ō pōōnyīāā ni̍. Ō vēm yā le̍ mī chɔ̍m wāŋndā ā būŋgɛ̄ī Mɛ̄lɛ̄ka̍ chūe̍l ndā, le̍ mbō ke̍ ndā yōōmū kpe̍e̍kpe̍i̍yo̍ ve̍. Ndu̍ yɔ̍nūŋ ni̍ māā yōōmū ndā sɔ̄lā sānāā o̍ wāā o̍ dīōm pīlɔ̍ɔ̍ ni᷄ŋ ā Chi̍i̍sū Ki̍li̍tī wo̍.

²I̍ cho̍ ndu̍ pōōnyīāā nāā nūm Ti̍mo̍tī chu̍ā, nūm yā I̍ kāālā ho̍ō māā po̍ nī wo̍. I̍ cho̍ Mɛ̄lɛ̄ka̍ fi̍nyā nāā pīɛ̄īyo̍ ā Māsānɔ̍ nāā Chi̍i̍sū Ki̍li̍ti̍, māā ā yīyāŋ nu̍m chōo̍ mā tūīīnu̍ŋ nu̍m īnyīɛ̍ɛ̍, ndu̍yɛ̍, mā ke̍ nu̍m kɔ̄l nyūlōo̍ fɔ̍.

³Mɛ̄lɛ̄ka̍ yā I̍ cho̍ sāāŋgīāllo̍ ā kɔ̄l dīāndāā kpo̍u̍, mɛ̄ɛ̍ fi̍nyāā nīāā māmāā ā wā ndu̍ sāāŋgīāllo̍ yɛ̍ wo̍, I̍ me̍l ndu̍ bāli̍ka̍ tāu̍. Le̍ pāāle̍ŋ ā nyūmndāŋ, tē I̍ wā Mɛ̄lɛ̄ka̍ pīɛ̄īyo̍ le̍ nūm pɛ̍, ba̍li̍kāā yā I̍ me᷅l ndu̍ le̍ nūm ni̍.

⁴Ndu̍yɛ̍, I̍ lo̍o̍nūŋ ā te̍le̍ŋ nāā ŋ̄ wā chōŋga᷅ŋndo̍ nāā nūm ndo̍, mɛ̄ɛ̍ ŋ̄ cha᷄ŋ yɛ̍. Ndu̍yɛ̍, yēēmɛ̍i̍ chō yā tāu̍ le̍ mī che᷅ nu̍m. He̍ī tōsā mī I̍ nāŋ kɔ̄l tāu̍.

⁵Ndu̍yɛ̍, I̍ lo̍o̍nūŋ ā mɛ̄ɛ̍ ŋ̄ dɔ̄ū tīīnda᷄ŋ nu̍mndo̍ o̍ Mɛ̄lɛ̄ka̍ ni᷄ŋ nyɛ̍ kɛ̄ndɛ̄ kpe̍e̍kpe̍i̍ yɛ̍. Lɔ̍ɔ̍sī māmā nu̍m, ndu̍ fɛ̍lɛ̍ŋ ndu̍ o̍o̍ nɔ̍ tīīnda᷄ŋ wāā le̍ndo̍o̍ o̍ Mɛ̄lɛ̄ka̍ ni᷄ŋ. Yu̍ni̍sī kālā nu̍m bɛ̍ɛ̍ le̍nde̍ ko̍ni̍. Ndu̍yɛ̍, I̍ si̍nā māā nūm bɛ̍ɛ̍ tīīnda᷄ŋ wāā le̍ndo̍o̍ ko̍ni̍ ŋ̄ nɔ̄ ni̍.

⁶Le̍ sābōo̍ ho̍ō I̍ cho̍ nu̍m yīyāla᷄ŋndo̍ māā nyɛ̄ Mɛ̄lɛ̄ka̍ ke̍ nu̍m bōōndi̍i̍ yā I̍ hāndu̍ nu̍m bālāŋ chōo̍ ve̍, to̍sā wa̍llo̍ ā ndu̍ nyɛ̍ kɛ̄ndɛ̄ kpe̍e̍kpe̍i̍.

⁷Kāni̍ fu̍u̍le̍ Nyi̍nā Mɛ̄lɛ̄ka̍a̍ ō Mɛ̍lɛ̄kā tōsā mbo̍ tūāl nāā kɔ̄ɔ̄lī wo̍ ō cho̍ Nyi̍nā to̍sā mī ŋ̄ nɔ̄ īsīōōŋ te̍ o̍ cho̍ le̍. Kpāāyāā Nyi̍nā Mɛ̄lɛ̄ka̍a̍ ō kē nāā tāu̍ ni̍. Ndu̍yɛ̍, ō tōsā mī ŋ̄ nɔ̄ kāālāā le̍ wāŋndā chīe̍e̍ya̍. Ō tōsā vɛ̍lɛ̄ mī ŋ̄ māndā nāā pi̍lā nyɛ̄ kɛ̄ndɛ̄ kɛ̍ndɛ̄.

⁸Le̍lāŋ, si̍ɔ̍mbu̍lā wa᷅ nu̍m le̍ wāŋndā īsɔ̄ɔ̍ di̍mūl ā ndu̍ Māsānɔ̄ɔ̍ Mɛ̄lɛ̄ka̍ o̍kɔ̄ɔ̄ le̍. Ndu̍yɛ̍, si̍ɔ̍mbu̍lā wa᷅ nu̍m wāŋndā o̍ hɔ̄l, le̍ yā cho̍ ho̍ō o̍ chīɛ̄ī mānyūmndo̍ ni᷄ŋ le̍ ndu̍ Māsānɔ̄ɔ̍ wo̍ le̍. Ndu̍yɛ̍, nūm bɛ̍ɛ̍ wā o̍ bɛ̍ɛ̍ndīāŋ, le̍ mā sɔ̍lā nyɛ̄ pālāā le̍nde̍ le̍ Yōōŋgū Kɛ̄ndɛ̍ Mɛ̄lɛ̄ka̍a̍. Mɛ̄lɛ̄ka̍ chō nu̍m kpāāyāā kē le̍ mā bi̍u̍ŋ.

⁹Ndu̍ pi̍ŋi̍ nāā, mbo̍ vēēlū nāā le̍ mī ŋ̄ wā wānāā cho̍ ā yɔ̄ŋga᷄ŋ o̍ ndu̍ lo̍ wā ni̍. Ndu̍yɛ̍, ō cho̍ le̍ wāli̍ nāā kɛ̍ndɛ̄ le̍ Mɛ̄lɛ̄ka̍ tōsā ke̍ŋ te̍. Ō tōsā mātōsāā ndi̍, kāni̍ fu̍u̍le̍, le̍nde̍ o̍ kɛ̍ɛ̍si̍a̍a̍ ni̍. Ndu̍yɛ̍, ō tōsā ndi̍ le̍ kɛ̄ndɛ̄i̍ o̍ to̍sāl nāā ve̍. Mɛ̄lɛ̄ka̍ ndu̍ o̍o̍ to̍o̍si̍āā wɔ̍ chi̍e̍ēŋndo̍ le̍ mbo̍ tōsāl nāā kɛ̄ndɛ̄i̍ ndūɛ̍i̍ mbo̍ kē nāā Chi̍i̍sū Ki̍li̍tī.

¹⁰Ndu̍yɛ̍, kɛ̄ndɛ̄i̍ Mɛ̄lɛ̄ka̍ tōsāl nāā he̍ī ye̍, ī chɔ̄mnu̍ŋ ni᷅ŋ nāā sānāā o̍ hūnɔ̄ɔ̄ wānā nāā pīŋīa̍a̍ Chi̍i̍sū Ki̍li̍tī hi᷅ŋ mbo̍ hu᷄ŋ po̍o̍ndā kpāāyā pīɔ̍mndo̍ ndu̍ o̍o̍ nɔ̍ ŋ̄wāŋndā chīe̍e̍ cho̍o̍ wo̍. O̍ ko̍ŋ kɔ̍ɔ̍lī, mbo̍ chūū nāā yōōmū wānā nɔ᷅ ā vi᷅ lɛ̍ le̍ wo̍.

¹¹Mɛ̄lɛ̄ka̍ hɛ̄li̍ māhɛ̄līāā yā Pɔ̍ɔ̄ le̍ wāā wānā Chi̍i̍sū ve᷅m māā hɔ̄ltē ndɔ̄ le̍ mī di̍mu̍l wāŋndā yōōŋgū ndɔ̄ kɛ̍ndɔ̄ɔ̍ ndu̍yɛ̍, mī I̍ lo̍ o̍ ko̍ŋ mī I̍ pɛ̍ɛ̍ku̍ ndā ndu̍.

¹²Mɛ̄ɛ̍ le̍ sābōo̍ ho̍ō yā I̍ cho̍ mɔ̍nɛ̍i̍ he̍ī bīyɔ̄ɔ̍ ni̍. Kɛ̍ ndu̍yɛ̍, kɔ̄l tāmbɛ̍i̍ bɛ̍ɛ̍ cho̍ yā le̍, kāni̍ fu̍u̍le̍, I̍ si̍nā wa᷅nā su̍u̍ yā I̍ dɔ̍ū tīīnda᷄ŋ nūu̍ o̍ ndu̍ ni̍ŋ ndo̍. Ndu̍yɛ̍, I̍ si̍nā wa̍la̍ŋ māā yōōŋgū ndɔ̄ kɛ̍ndɛ̄ o̍ yɔ̍ŋgu̍ yā le̍ kɔ̄la̍ŋ wāŋndā dīmūllo̍ wo̍, ndu̍ pi̍lā nɔ̍ kpāāyāā mbō lo̍ ndu̍ māndā hāāā, mbō lo̍ o̍ ko̍ŋ mī pāāle̍ mɛ̍ɛ̍lāāle̍ŋ lē fūūlu̍u̍.

¹³Dīōmndā tōnyālā yā I̍ pɛ̍ɛ̍ku̍ nu̍m ndāŋ bi̍i̍ lāŋ nyɛ̄ kɛ̄ndɛ̄ kpi̍ŋ. Lāŋ lā cho̍ tāāmāsi̍ ŋ̄ nɔ̄ mā tōl kɔ̄ɔ̄lī wo̍ ni̍. Hi̍o̍u̍ lāchi̍ ā tīīnda᷄ŋndo̍ dɔ̄wɔ̄ɔ̍ o̍ Mɛ̄lɛ̄ka̍ ni᷄ŋ ā kāālāā nɔ̄ɔ̍, ō nāā ŋ̄ sɔ̄lā o̍ wāā o̍ dīōm pīlɔ̍ɔ̍ ni᷄ŋ ā Chi̍i̍sū Ki̍li̍tī wo̍.

¹⁴Nyɛ̄m kɛ̄ndɛ̄ŋ Mɛ̄lɛ̄ka̍ ke̍ nu̍m le̍ māndāā wo̍ŋ, māndā mu̍ŋ nyɛ̄ kɛ̄ndɛ̍ī ā kpāāyā Nyi̍nā Kāsīo̍o̍ ō kē nu̍m ndo̍. Ndu̍ yɔ̍nūŋ ni̍ māā Nyi̍nā Mɛ̄lɛ̄ka̍ cho̍ nāā kɔ̄ɔ̄lī wo̍.

¹⁵Nūm pi̍lā ā sīnā māā, wānā o̍ wānā cho̍ o̍ būŋgɛ̄ī E̍e̍sīāve̍ ni᷄ŋ mā māl lā. Fi̍kɛ̍lɔ̍ɔ̍sī ni̍, ā Hɛ̄mɔ̄chi̍nɛ̍sī, ndā bɛ̍ɛ̍ mā māl lā.

¹⁶Ndu̍yɛ̍, I̍ cho̍ Māsānɔ̄ɔ̍ Mɛ̄lɛ̄ka̍ pīɛ̄īyo̍ māā ō tūīīnu̍ŋ yu̍ŋgu̍ Ōnɛ̄sīfɔ̍lūɔ̄ɔ̄ wo̍ īnyīɛ̍ɛ̍ fɔ̍. Kāni̍ fu̍u̍le̍, ō dɛ̄ɛ̄ni̍a̍a̍ yā kɔ̄llo̍ ni᷄ŋ le̍ te̍le̍ŋndā fāŋgā. Si̍ɔ̍mbu̍lā bi̍i̍ ndu̍ wāŋndā o̍ hɔ̄l le̍ chīɛ̄ɛ̄li̍āŋndo̍ ā yā le̍ mɛ̄ɛ̍ yā wā o̍ chīɛ̄ī mānyūmndo̍ ni᷄ŋ yɛ̍ le̍.

¹⁷Mɛ̄ɛ̍ o̍ fu̍u̍lu̍u̍ dɔ̍ɔ̍ Lu̍o̍m chi̍e̍e̍, mbo̍ kāndū bɛ̍ɛ̍ yā nūūvīāā. Ō lo̍ yā nūūvīāā mɛ̄ɛ̍ mbo̍ sāālu᷄ŋ yā.

¹⁸I̍ cho̍ Māsānɔ̄ɔ̍ Mɛ̄lɛ̄ka̍ pīɛ̄īyo̍ māā ō tūīīnu̍ŋ ndu̍ īnyīɛ̍ɛ̍ o̍ pāāle̍ mɛ̍ɛ̍lāāle̍ŋ chōo̍ fɔ̍. Nūm pi̍lā bɛ̍ɛ̍ ā sīnā wa̍la̍ŋ ā mɛ̄ɛ̍ kpɛ̍ o̍ mālā yā bōōndi̍i̍ yā I̍ wā Ɛ̍fi̍sīā chi̍e̍e̍ ve̍ yɛ̍.