Read Southern Kisi Ti̍mo̍tī Di̍i̍ŋ Ndɔ̄ɔ̍ 3 Bible Online

Ti̍mo̍tī Di̍i̍ŋ Ndɔ̄ɔ̍ 3 - Southern Kisi bible

Ti̍mo̍tī Di̍i̍ŋ Ndɔ̄ɔ̍ 3

¹Kɛ̍si̍ŋ o̍ kɔ̄l Ti̍mo̍tī māā tē pālɛ̍i̍ mɛ̍ɛ̍lɛ̄i̍ le̍ chi̍e̍ēŋndo̍ ho̍ō ī wā fūūlūūwo̍ pɛ̍, nyɛ̄ pālāā ō wā ni̍ŋ bɔ̍ɔ̍.

²Kāni̍ fo̍ndōle̍, ā bōōndi̍i̍ ke̍ŋ wāŋndā chīe̍e̍ya̍ ā nɔ᷅ ni̍ŋ yi̍ya᷄ŋ le̍ chāāŋāā ndāā wa᷅ŋndā chīe̍e̍ya̍ le̍, mɛ̄ɛ̍ le̍ ndā pi̍lā. Wānāā kāālā ŋ̄ka̍ni̍a̍a̍ ndā wā ni̍ŋ ni̍, wānāā hēēla᷄ŋnda̍, wānāā yōŋgāā, wānāā yi̍o̍ū chāāŋāā ndāā wā. Ā ve᷅ ni̍ŋ wānāā tu̍e̍ī wānāā ve̍lū ndā wā dīōm te̍. Ā ve᷅ ni̍ŋ wānāā sīnāā īkɛ̄ndɛ̄ le̍. Ā ve᷅ ni̍ŋ wānāā ke̍ Mɛ̄lɛ̄ka̍ lēbɛ̄ɛ̄ le̍.

³Ā nɔ᷅ ni̍ŋ i̍nyi̍ɛ̍ɛ̍ le̍, ndu̍yɛ̍, ā me᷅l wānā le̍ yɔ̄ŋ wɔ̄ɔ̍ŋ te̍. Wānāā bālū ā chāāŋnda̍ o̍ sōndō wā, ndā wā ni̍ŋ ni̍, wānāā kāŋgālāā, wānāā kɔ̄l vēsɛ̍i̍ya̍. Nyɛ̄ o̍ nyɛ̍ cho̍ nyɛ̄ kɛ̄ndɛ̄ mā tu᷄l ndu̍ lēyɛ̄.

⁴Wānāā lēyālāā ndā wā ni̍ŋ ni̍. Nyɛ̍ hu᷅ŋ ndā o̍ lākɔ̄l lo̍ ko̍ni̍ ndā tōsā ni̍. Ā wā ni̍ŋ wānāā hɔ̄lāā hēēlāā bɛ̄ndū. Kɔ̄l kɛ̄ndɛ̄ chi̍e̍ēŋndo̍ ndā kāālā ni̍ŋ ni̍. Ā kāālā ni̍ŋ Mɛ̍lɛ̄kā le̍.

⁵Mā chɔ᷄m ndā pi̍lā māā wānāā pīɛ̄īyāā Mɛ̄lɛ̄ka̍, kɛ̍, mī kāālā ndā tōsā lāŋ lā chɔ᷄m māā nyɛ̄ fo̍ndōo̍ fu̍u̍ pīɛ̄īlē ndāle̍ŋ lē chō ni̍. Lā ho̍lnu᷄ŋ wānāā wāā le̍nde̍ le̍.

⁶Wānāā wāā nu̍āā tē ā bīī pɛ̍, ā nūūvi̍a̍a̍ nɛ̄īla̍ŋ, ā lūɛ̄ī o̍ yu̍ŋgu̍lā pi̍la̍la̍ŋ tɛ̄ɛ̄ŋ. Wāŋ lāāndūāā wa᷅ nu̍āā ā nɛ̍ī mu̍lī le̍ wā, mā tīu̍ ndā bā. Ndā yɔ̍nūŋ ni̍ māā wāŋ lāāndūāā to̍sā nu̍āā yɔ̍ŋ wɔ̄ɔ̍ŋndo̍, mī kɔ̄ltā ndālāŋ lā wā kɔ̍ɔ̍sɔ̍ɔ̍ ā ndā wā. Wāŋ lāāndūāā wāā le̍ndi̍a̍a̍ ko̍ni̍ nɔ̍ kɔ̄lta̍ŋ mūlīo̍o̍ o̍ yēēmāŋ fāŋgā fāŋga᷄ŋ ni̍.

⁷Pɛ̄ɛ̄kū o̍ pɛ̄ɛ̄kū ndā chūu̍ ndā, ā yāŋ ndu̍ nīlāŋ. Kɛ̍, o̍ ko̍ŋ ni̍ŋ fa̍ū ā nɔ̍lā mā sīnā tōnyā Mɛ̄lɛ̄ka̍a̍ le̍.

⁸Wāŋndā ha̍ā ndā si̍mu̍l tōnyā Mɛ̄lɛ̄ka̍a̍ ni̍, mɛ̄ɛ̍ Cha̍ni̍nɛ̍sī ndā Cha̍mbi̍lu̍ɛ̍sī ā si̍mu̍l Mūu̍sē lɔ̍ɔ̍ ko̍ŋ yɛ̍. Wāŋndā ha̍ā bōlle̍ bīī mi̍ ī tāmbū ndā. Ndu̍yɛ̍, mi̍ tīīnda᷄ŋ ndā āā nɔ̍ o̍ Mɛ̄lɛ̄ka̍ ni᷄ŋ ndo̍ bɛ̍ɛ̍, mbo̍ tāmbū.

⁹Kɛ̍, le̍ te̍le̍ŋ bi̍ŋgī ko̍ni̍ ndā nɔ̄ ni̍ŋ kpāāyāā le̍ sɔ̄ɔ̍ŋ mu̍ŋ tōsāā ni̍, o̍ ko̍ŋ kɔ̍ɔ̍lī, mī ī yɔ̄nu̍ŋ ā ndā mɛ̄ɛ̍ i̍ yɔ̍nu̍ŋ ā pūāā ŋi̍ɔ̍ɔ̍ŋāā si̍mu̍l Mūu̍sē wā yɛ̍. Wānā o̍ wānā fe̍e̍ cha᷅ ni̍ŋ di̍ɔ̍mīī ndɛ̄i̍ wa̍la̍ŋ.

¹⁰Kɛ̍ nūm nūm Ti̍mo̍tī, ā sīnā sɔ̍ɔ̍ŋ yā I̍ pɛ̍ɛ̍ku̍ wāŋndā wo̍ŋ. Ā sīnā mɛ̄ɛ̍ kāā nūu̍ chō yɛ̍. Ndu̍yɛ̍, ā sīnā nyɛ᷅ yā I̍ kɛ̍ɛ̍si̍a̍a̍ le̍ tōsāā o̍ yōōmū nūu̍ ni᷄ŋ ndo̍, ā tīīnda᷄ŋ yā I̍ nɔ̍ o̍ Mɛ̄lɛ̄ka̍ ni᷄ŋ ndo̍. Ā sīnā ā mɛ̄ɛ̍ yā I̍ bi̍u̍ŋ yɛ̍. Ndu̍yɛ̍, ā sīnā ā mɛ̄ɛ̍ kāālāā chō o̍ kɔ̄l nūu̍ ni᷄ŋ yɛ̍. Ā sīnā ā mɛ̄ɛ̍ yā I̍ cho̍ īsīsi̍ o̍ tīīnda᷄ŋ Mɛ̄lɛ̄ka̍a̍ chōo̍ yi̍ yɛ̍.

¹¹Ā sīnā mɛ̄ɛ̍ wāŋndā chō yā nyɛ̄ pālāā tūsīo̍o̍ chōo̍ yɛ̍, ā dɛ̍nɛ̍la̍ pālāālā chēle̍ŋndā ke̍e̍ku̍ yā chōo̍ kpo̍lo̍to̍to̍ lāŋ. Nyɛ̄ o̍ nyɛ̍ yɔ̍nu̍ŋ yā, A̍ŋti̍ɔ̍ɔ̄ ā Āko̍o̍nɔ̄m ā Li̍stā, nūm ā sīnā fa̍ū. Ndu̍ yɔ̍nūŋ ā nyɛ̄ pālāā wāŋndā tūsi̍ yā chōo̍ o̍ chi̍o̍o̍ŋ mu᷅ŋ ni᷄ŋ ndo̍ ni̍. Kɛ̍ ndu̍yɛ̍, mi̍ Māsānɔ̄ɔ̍ Mɛ̄lɛ̄ka̍ so̍lī yā o̍ dɛ̍nɛ̍la̍ pālāālā lāŋ ni᷄ŋ kpo̍u̍.

¹²Si̍nā pɛ̍ŋgu̍ māā, wānā o̍ wānā nɔ̍ yēēmɛ̍i̍ le̍ mī yōōmū ndɔ̄ɔ̍ ō wā sākpō māā wānā cho̍ o̍ dīōm pīlɛ̍ ni᷄ŋ ā Chi̍i̍sū Ki̍li̍tī wo̍ pɛ̍, nyɛ̄ pālāā wāŋndā tūsī nu̍m chōo̍ ni̍.

¹³Ndu̍yɛ̍, wānāā dɛ̍nɛ̍ wɔ̍ɔ̍ŋndā ā wānāā lāchōōwāā, ā hīāū ni̍ŋ lāchi̍ ā dɛ̍nɛ̍la̍ wɔ̍ɔ̍ŋndāŋ tōsāā mbō hīōū māā pāāndū. Ā hūī ni̍ŋ wa᷅ŋndā, o̍ ko̍ŋ kɔ̍ɔ̍lī, ndā bɛ̍ɛ̍ mī wāŋndā hūi̍ ndā.

¹⁴Kɛ̍ nūm nūm Ti̍mo̍tī, tōnyā ndā pɛ̄ɛ̄ku̍ nu̍m ndo̍ ā lāāla᷄ŋ bɛ̍ndū ŋ̄ lāāla̍ŋ ndo̍, hi̍o̍u̍ lāchi̍ ā sīsi̍lāŋ lēchōo̍ nyɛ̍ kɛ̄ndɛ̄ yi̍. Wānāā pɛ̍ɛ̍ku̍ nu̍m ndā, nūm pi̍lā si̍nā wānāā su̍u̍ ndā chō wā.

¹⁵Lo̍o̍nu̍ŋ māā chɔ̍ŋ ā bōōndi̍i̍ ŋ̄ wā chūāāmbɔ̄ ve̍ mā pɛ̄ɛ̄kū nu̍m sɔ̄ɔ̍ŋ cho̍ o̍ Yāu̍ Mɛ̄lɛ̄ka̍a̍ ni᷄ŋ ndo̍ŋ, mā sīnā mu̍ŋ. Dīōmndā lāŋ lā nɔ̄lā mī lā ke̍ nu̍m kɔ̄l kālo̍o̍ o̍ chɔ᷅m nu̍m nɛ̄īyo̍ le̍ pīōŋɔ̄ɔ̍ sɔ̄lāā sānāā o̍ tīīnda᷄ŋndo̍ dɔ̄wɔ̄ɔ̍ o̍ Chi̍i̍sū Ki̍li̍tī ni̍ŋ ndo̍.

¹⁶Dīōm o̍ dīo̍m cho̍ o̍ Yāu̍ Mɛ̄lɛ̄ka̍a̍ ni᷄ŋ, Nyi̍nā Mɛ̄lɛ̄ka̍a̍ to̍sā ni̍ mā pōōnyīāā lāŋ. Ndu̍yɛ̍, lā chō dīōmndā nɔ̍ mālāā lēni᷄ŋ. Kāni̍ fu̍u̍le̍, lā chō le̍ wāŋndā tōnyā cho̍ ā Mɛ̄lɛ̄ka̍ o̍kɔ̄ɔ̄ wo̍ pɛ̄ɛ̄kōo̍. Lā chō le̍ pɛ̄ɛ̄kūlā lāchōōwāla̍ŋ chɔ̄ɔ̄mūūwo̍, ndu̍yɛ̍, lā chō le̍ wāŋndā mīŋgīo̍o̍ o̍ nɛ̄ī. Lā chō vɛ̄lɛ̄ le̍ wāŋndā pɛ̄ɛ̄kōo̍ mɛ̄ɛ̍ ndā wā wānāā sākpō Mɛ̄lɛ̄ka̍ o̍ hɔ̄l lɛ̍.

¹⁷Mu᷅ŋ fa̍ū ŋ̄ chō māchūāā le̍ bu̍ɛ̍i̍ Mɛ̄lɛ̄ka̍a̍ bɛ̄ɛ̄ndīāā mbō wā ō bɛ̄ndāā kpe̍e̍kpe̍i̍ le̍ wa̍llo̍, ndu̍yɛ̍, mbō wā ō bɛ̄ɛ̄ndīāŋ le̍ wāli̍ o̍ wāli̍ kɛ̍ndɛ̄ tōsāā.