Read Southern Kisi Ti̍mo̍tī Di̍i̍ŋ Ndɔ̄ɔ̍ 4 Bible Online

Ti̍mo̍tī Di̍i̍ŋ Ndɔ̄ɔ̍ 4 - Southern Kisi bible

Ti̍mo̍tī Di̍i̍ŋ Ndɔ̄ɔ̍ 4

¹I̍ cho̍ nu̍m sīlālāŋ nda᷅ŋ kīo̍o̍ Māsānɔ̄ɔ̍ Mɛ̄lɛ̄ka̍ o̍ hɔ̄l, ā Chi̍i̍sū Ki̍li̍tī o̍ cho̍ hūnɔ̄ɔ̄ kɔ̍ɔ̍sɔ̍ ā wāŋndā kpo̍u̍ wo̍, wānāā cho̍ yōōmū wā ni̍ ā wānāā vi᷅ ni᷅ŋ ndā. Ndu̍yɛ̍, I̍ cho̍ nu̍m sīlāā, kāni̍ fu̍u̍le̍, le̍ mīīŋgū Chi̍i̍sū Ki̍li̍tī cho̍ nāŋ ndo̍, ā le̍ mɛ̄ɛ̍ o̍ cho̍ hūnɔ̄ɔ̄ wā māsā yɛ̍.

²Di̍mu̍l wa᷅ŋndā sūɛ̍i̍ Mɛ̄lɛ̄kɛ̍i̍. Ke̍ ndā ndi̍ te̍le̍ŋ o̍ te̍le̍ŋ, ō wā ā te̍le̍ŋ kɛ̍ndɛ̄, ō wa᷅ ā te̍le̍ŋ kɛ̍ndɛ̄ le̍. Chɔ̍ɔ̍mu̍u̍ pɛ̍ɛ̍kūlā lāchōōwāla̍ŋ. Mi̍ŋgi̍ wa᷅ŋndā o̍ nɛ̄ī. Dɛ̄ɛ̄ni̍a̍a̍ wa᷅ŋndā kɔ̄lta̍ŋ ā tīīnda᷄ŋndo̍ dɔ̄wɔ̄ɔ̍ o̍ Mɛ̄lɛ̄ka̍ ni᷄ŋ o̍kɔ̄ɔ̄. Wā wānā bi̍u̍wa᷄ŋ lɔ̍ɔ̍ lɔ̍ɔ̍, ndu̍yɛ̍, mā wā wāŋndā pɛ̄ɛ̄kōo̍ lɔ̍ɔ̍ lɔ̍ɔ̍.

³Kāni̍ fo̍ndōle̍, bōōndi̍i̍ cho̍ hūnɔ̄ɔ̄ fūūlūū wāŋndā ā chɛ᷅l ni̍ŋ mā chu̍ā pɛ̄ɛ̄kū kpe̍e̍kpe̍i̍yo̍ ā Mɛ̄lɛ̄ka̍ o̍kɔ̄ɔ̄ le̍. Pɛ̄ɛ̄kūlā sɛ̄nɛ̄īla̍ŋ ndā hɛ̄nāŋ ni̍ŋ le̍ wāā tūēīyɔ̄ɔ̍ ni̍, le̍ yēēmɛ̍i̍ ndɛ̍i̍ pēēlōo̍. Le̍ he̍ī, ā chūūŋgīāā ni̍ŋ wa᷅ŋndā le̍ ndā sɔ̄ɔ̍ŋ ndā hɛ̄nāŋ le̍ tūēīyɔ̄ɔ̍ wo̍ŋ pɛ̄ɛ̄kōo̍.

⁴Ndu̍yɛ̍, ā mūlūl ni̍ŋ to᷅nya̍ Mɛ̄lɛ̄ka̍a̍ kɔ̄ɔ̍, mā yɔ̄ŋgu̍ŋ o̍ bu̍ndɔ᷄ŋ lāchōōwa᷄ŋ nīlāŋ yāŋɔ̄ɔ̍.

⁵Kɛ̍ nūm nūm wā wa᷅nā tāāsi̍ o̍ dɛ̍nɛ̍ o̍ dɛ̍nɛ̍ ni̍ŋ. Ndu̍yɛ̍, hi̍o̍u̍ lāchi̍ ā bīūwɔ᷄ŋndo̍ o̍ nyɛ̄ pālāā ni᷄ŋ. Hi̍o̍u̍ lāchi̍ ā wāŋndā Yōōŋgū Kɛ̄ndɛ̍ Mɛ̄lɛ̄ka̍a̍ dīmūllo̍. Ndu̍yɛ̍, to̍sā wāli̍ o̍ wāli̍ cho̍ nu̍m ō kēna᷄ŋ māā bu̍ɛ̍i̍ Mɛ̄lɛ̄ka̍.

⁶Ya̍ ya̍ te̍le̍ŋndo̍ fūūlu̍u̍ le̍ mā sōli̍ yā sālāā. Te̍le̍ŋndo̍ chō ni᷅ŋ kpɛ̍ɛ̍lūŋ le̍ mī I̍ fāŋāŋ o̍ chi̍e̍ēŋndo̍ chōo̍.

⁷I̍ ki̍ndi̍ ā lābɛ̄ɛ̄la̍ kpe̍e̍kpe̍i̍ le̍ mī I̍ wā māā wānā dɔ̍ū tīīnda᷄ŋndo̍ o̍ Mɛ̄lɛ̄ka̍ ni᷄ŋ. Ya̍ ya̍ I̍ chi̍i̍ wa̍llo̍ o̍ nu̍u̍ tōsā. I̍ lo̍ īsīsi̍ sākpō o̍ tīīnda᷄ŋ yā nɔ̍ o̍ Mɛ̄lɛ̄ka̍ ni᷄ŋ ndo̍ chōo̍.

⁸Ndu̍yɛ̍, Mɛ̄lɛ̄ka̍ kɛ̄su̍l lā fāndāa̍. Ndu̍ yɔ̍nūŋ ni̍ māā sīīŋgūūwo̍ yā wānā sākpō ndu̍ pi̍lā o̍ hɔ̄l. Māsānɔ̄ɔ̍ Mɛ̄lɛ̄ka̍ o̍ cho̍ wānā kɔ̍ɔ̍sā ā wāŋndā o̍ nɛ̄ī sākpōo̍ chōo̍ wo̍, ō chō yā ndu̍ kē o̍ pāāle̍ o̍ kɔ̍ɔ̍sā ni̍ŋ ā wāŋndā le̍ŋ chōo̍. Ndu̍yɛ̍, ō ve᷅ ni̍ŋ ko̍ yā le̍ o̍ ke᷅ ni̍ŋ fāndāa̍ ho̍ō le̍. Wānā o̍ wānā cho̍ ā yēēmɛ̍i̍ tāu̍ le̍ hūnɔ̄ɔ̄ ndɔ̄ɔ̍, ndā bɛ̍ɛ̍ ō chō ndā ndu̍ kē.

⁹Ki̍ndi̍ŋ mā ke̍le̍ŋa̍ hūnɔ̄ɔ̄ yā īkɛ̄i̍.

¹⁰De̍ma̍sī mu̍li̍ kɔ̄llo̍ o̍ yēēmɛ̍i̍ nyɔ̄ɔ̍ŋ chi̍e̍ēŋ nānu᷄ŋ, mbo̍ mɛ̄ī yā mbo̍ kūānu᷄ŋ Tɛ̄sālōna̍i̍kā chi̍e̍e̍. Ki̍lɛ̍sīŋ, ndu̍ ku̍ɛ̄ o̍ būŋgɛ̄ī Kāle̍e̍sīāve̍ ni᷄ŋ, mi̍ Ta̍tɔ̄ɔ̄ ndu̍ ku̍ā o̍ būŋgɛ̄ī Dālīma̍tīāā ve̍ ni᷄ŋ.

¹¹Lu̍kū ndu̍ pīlɛ̍ kpe̍ ko̍ni̍ cho̍ yā īkɛ̄i̍ nānu᷄ŋ ni̍. A̍ wā hūnɔ̄ɔ̍ pɛ̍ di̍mu̍l Ma̍kī mī lā hīŋ nyā ndu̍. Kāni̍ fo̍ndōle̍, ō nɔ̄lā mbō mālā yā o̍ wa̍llo̍ ni᷄ŋ.

¹²I̍ ve᷅m Ti̍chi̍kɔ̄ɔ̍ Ɛ̍fi̍sīā.

¹³Tē ā wā hūnɔ̄ɔ̍ pɛ̍, chu̍u̍ yā dōmā nī le̍cho̍o̍ wo̍, ō yā I̍ mɛ̍i̍ To̍wāā chi̍e̍e̍ Ka̍pɔ̄ɔ̄ o̍ bā wo̍. Mā chu̍u̍ yā yāu̍lā nīlāŋ bɛ̍ɛ̍, tāāmā lā cho̍ lā tōōsīāā ā yāu̍lā vīsīla̍ŋ ndāŋ.

¹⁴Mi̍ Ālɛ̄kīsa̍ndā su᷅mnɔ̄, to̍sāl lā sūɛ̍i̍ wɔ̍ɔ̍ŋnde̍ tāu̍. Kɛ̍ ndu̍yɛ̍, Māsānɔ̄ɔ̍ Mɛ̄lɛ̄ka̍ chō hūnɔ̄ɔ̄ ndu̍ nyɛ̄ pālāā tūsī chōo̍ le̍ nyɛ̄ o̍ to̍sā wo̍.

¹⁵Nūm bɛ̍ɛ̍ pu̍ɛ̍ɛ̍nu᷄ŋ ā ndu̍ le̍. Kāni̍ fo̍ndōle̍, ō sīmu̍l bɔ̄ɔ̍ yo̍ōŋgu̍ Mɛ̄lɛ̄ka̍ nāā ŋ̄ chō ho̍ō wāŋndā dīmūllo̍ wo̍.

¹⁶Mī di̍mu̍l vɛ̄lɛ̄ nu̍m Ti̍mo̍tī, māā bōōndi̍i̍ tāsi̍i̍ ndā wā kɔ̍ɔ̍sɔ̍ɔ̍ ā yā ve̍, wānā o̍ wānā pi᷅lɛ̍ bɛ̍ɛ̍ si̍m mbō sōō le̍ yā le̍. Wāŋndā kpo̍u̍ mā māl lā. Kɛ̍ ndu̍yɛ̍, I̍ cho̍ pīɛ̄īle̍ŋ māā Mɛ̄lɛ̄ka̍ ō chɔ᷅m ndā nyɛ̄ ndā tōsā ko̍ŋ ndo̍ chōo̍ le̍.

¹⁷Mi̍ chē bɛ̍ɛ̍ mā māl lā ni̍, kɛ̍ Māsānɔ̄ɔ̍ Mɛ̄lɛ̄ka̍ ndu̍ wā yā kɔ̄ɔ̄lī. Mbo̍ kē yā kpāāyāā le̍ mī nɔ̍lā mi̍ di̍mūl wāŋndā Yōōŋgū Kɛ̄ndɛ̍ Mɛ̄lɛ̄ka̍a̍ mɛ̄ɛ̍ o̍ cho̍ fa̍ū le̍ mī wānāā cho̍ ā Chu̍ū le̍ wā kpo̍u̍ mā tūēī. Ndu̍yɛ̍, mi̍ Māsānɔ̄ɔ̍ Mɛ̄lɛ̄ka̍ pīŋī yā ā dīi̍ yā le̍.

¹⁸Ndu̍yɛ̍, Māsānɔ̄ɔ̍ chō yā sōlī o̍ īsɔ̄ɔ̍ o̍ īsɔ̄ɔ̍ wɔ̍ɔ̍ŋ ni᷄ŋ wāŋndā kīndi̍ le̍ yā tōsāllo̍. Ndu̍yɛ̍, ō chō yā pīŋī mbō kūɛ̄ ā yā o̍ māsāle̍ ndɔ̄le̍ŋ ni᷄ŋ, ɛ̄chɛ̍nɛ̄. Sāŋgālāā wā Mɛ̍lɛ̄kā ō kēna᷄ŋ le̍ fɛ̍ɛ̍ŋ ā fɛ̍ɛ̍ŋ. Āmi̍i̍nā.

¹⁹Yi̍l lā Pīlīsi̍lā ndā Āku̍i̍lā, ā yu̍ŋgu̍ Ōnɛ̄sīfɔ̍lūɔ̄ɔ̄.

²⁰Īlūāsi̍tɔ̄ɔ̄ ndu̍ lo̍ Kɔ̍līŋ chi̍e̍e̍. Tīlōfi̍mɔ̄ɔ̄ ndu̍ ndu̍, I̍ mɛ̍i̍ ndu̍ Mīle̍tɔ̄ɔ̄ chi̍e̍e̍ ā nāā.

²¹Ki̍ndi̍ kpo᷅ke̍ mā hīŋ lɔ̍ɔ̍ pā wɔ̄ɔ̄lē pɔ̄mbɔ̄le̍ŋ lē fūūlūū. Yu̍bu̍lɔ̄ɔ̄ ndā Pu̍dɛ̄ŋ, ā La̍nɔ̍ɔ̍sī, ā Kīla̍dīɔ̄ɔ̄, ā chāāŋāā nāā wānāā lāāla᷄ŋndā kpo̍u̍ ā yi᷄l nyā.

²²I̍ cho̍ pīɛ̄īle̍ŋ māā Māsānɔ̄ɔ̍ Mɛ̄lɛ̄ka̍ ō māndā nyi̍nā nūmndo̍ fɔ̍. Mbɔ̄ Mɛ̄lɛ̄ka̍ yīyāŋ nyā chōo̍ fɔ̍.