Read Southern Kisi Ta̍i̍tɔ̄ɔ̄ 1 Bible Online

Ta̍i̍tɔ̄ɔ̄ 1 - Southern Kisi bible

Ta̍i̍tɔ̄ɔ̄ 1

¹Yā Pɔ̍ɔ̄ yā cho̍ ho̍ō bu̍ɛ̍i̍ Mɛ̄lɛ̄ka̍a̍, ndu̍yɛ̍, mi̍ wa᷅ māā wānā Chi̍i̍sū Ki̍li̍tī ve᷅m hɔ̄ltē ndɔ̄ wo̍, yā cho̍ yāu̍wo̍ ho̍ō pōōnyīāā ni̍. Mɛ̄lɛ̄ka̍ vēm yā māvīāmāā, le̍ mī I̍ to̍sā mī wānāā Mɛ̄lɛ̄ka̍ hɛ̄li̍ wā, ā dɔ̄ū tīīnda᷄ŋ ndāā o̍ Mɛ̄lɛ̄ka̍ ni᷄ŋ. Ndu̍yɛ̍, ō vēm yā le̍ mī mālā ndā mā sīnā tōnyā cho̍ ho̍ō ā Mɛ̄lɛ̄ka̍ tīīnda᷄ŋndo̍ o̍kɔ̄ɔ̄ wo̍.

²Tīīnda᷄ŋndo̍ ho̍ō o̍ Mɛ̄lɛ̄ka̍ ni᷄ŋ, ō chɛ᷄ŋ tu̍m o̍ nyɛ̄ nāā ŋ̄ chō ho̍ō lēhɔ̄l o̍ nɛ̄ī le̍ ndu̍ wo̍, ndu̍ yɔ̍nūŋ ni̍ māā yōōmu̍ nɔ̍ la̍mɛ̍ɛ̍lu̍ le̍ wo̍. Mɛ̄lɛ̄ka̍ o̍ di̍mī ho̍ō lāchōōwā le̍ wo̍, ō chūe̍l nāā būŋgɛ̄i̍ lɔ̍ɔ̍ pā bɛ̍ɛ̍ o̍ to̍o̍sīāā chi̍e̍ēŋndo̍, māā ō chō nāā yōōmōo̍ ho̍ō kē.

³Ndu̍yɛ̍, mɛ̄ɛ̍ te̍le̍ŋ kpe̍e̍kpe̍i̍yo̍ fūūlu̍u̍ mbo̍ chɔ̄ɔ̄mūū ndi̍ nāā wāŋndā chūā sānāā o̍ yōōŋgū ndɔ̄ɔ̍ ni᷄ŋ. Ndu̍yɛ̍, ō chu̍ā yōōŋgū ndɔ̄ɔ̍ ho̍ō mbo̍ kē yā ndu̍. Ndu̍yɛ̍, I̍ cho̍ wāŋndā ndu̍ dīmūllo̍, kāni̍ fu̍u̍le̍, Mɛ̄lɛ̄ka̍ o̍ pi̍ŋī nāā wo̍ ndu̍ ve᷅m yā ndu̍ dīmīo̍o̍ ni̍.

⁴I̍ cho̍ yāu̍wo̍ ho̍ō pōōnyīāā nāā nūm Ta̍tɔ̄ɔ̄ chu̍ā, nu᷄m si̍mnu᷄ŋ ho̍ō po̍ nī kpe̍e̍kpe̍i̍ o̍ tīīnda᷄ŋ pi᷅lɛ̍ nāā ŋ̄ nɔ̄ o̍ Mɛ̄lɛ̄ka̍ ni᷄ŋ ndo̍ wo̍. I̍ cho̍ Mɛ̄lɛ̄ka̍ fi̍nyā nāā pīɛ̄īyo̍ ā Chi̍i̍sū Ki̍li̍tī o̍ pi̍ŋī nāā wo̍, māā ā yīyāŋ nu̍m chōo̍ mā ke̍ nu̍m kɔ̄l nyūlōo̍ fɔ̍.

⁵Nūm Ta̍tɔ̄ɔ̄, sābū yā I̍ mɛ̍i̍ nu̍m o̍ lɛ̄ŋndē ībūŋgāle̍ŋ Ki̍le̍tī wo̍ cho̍ ni̍ māā le̍ mā bɛ̍ɛ̍ndi̍āā sɔ̄ɔ̍ŋ lo̍ le̍ bɛ̄ɛ̄ndīāā lo̍ŋ ndo̍ŋ. O̍ ko̍ŋ kɔ̍ɔ̍lī, mā hɛ̍li̍ lāŋgba̍ā kālla̍ ā wa᷅ ku̍ndālā wānāā lāāla᷄ŋndā lāchī o̍ chi̍e̍e̍ o̍ chi̍e̍e̍ wā mɛ̄ɛ̍ yā I̍ di̍mu̍l nu̍m yɛ̍.

⁶Wānā o̍ wānā cho̍ lāŋu̍nɔ̄ kālā o̍ ku̍ndālā wānāā lāāla᷄ŋndā chōo̍, mɛ̄ɛ̍ o̍ nɔ̍ le̍ wāā yɛ̍ cho̍ ho̍ō ni̍. Ō ve᷅ wa᷅nā tɔ̍ɔ̍ wɔ̍ɔ̍ŋ chō chōo̍ le̍. La̍nɔ̍ɔ̍ ō pīlɛ̍ kpe̍ o̍ nɔ̍ ni̍ mbō nɔ̄. Ndu̍yɛ̍, mɛ̄ɛ̍ mī chūāūwāā ndūāā bɛ̍ɛ̍ mā wā wānāā lāāla᷄ŋ. Chūāūwāā ndūāā ā ve᷅ wānāā kāā wɔ̄ɔ̍ŋ te̍. Ā ve᷅ wānāā kɛ̍ɛ̍ wānāā ve̍lū ndā wā dīōm tūēīyɔ̄ɔ̄ le̍.

⁷Wānā wa᷅ ku̍ndā wānāā lāāla᷄ŋndā lāchī wo̍, ō ve᷅ wa᷅nā tɔ̍ɔ̍ wɔ̍ɔ̍ŋ chō chōo̍ le̍. Kāni̍ fu̍u̍le̍, bu̍ɛ̍i̍ Mɛ̄lɛ̄ka̍a̍ o̍ cho̍ ni̍. O̍ ko̍ŋ kɔ̍ɔ̍lī, ō ve᷅ wa᷅nā ki̍ndi̍lā chāāŋ ndɔ̄ wa᷅nā chi̍e̍e̍ le̍. Ō ve᷅ wa᷅nā dɔ̍u̍nu᷄ŋ tu̍mbe̍ chɔ̍ chɔ̍ le̍. Ō ve᷅ wa᷅nā ko̍l māmūɛ̄ī mī mā bīī ndu̍ le̍. Ō ve᷅ wa᷅nā lāsɔ̍ŋgɔ̄ le̍. Ō ve᷅ wa᷅nā hɔ̄ltē nyɛ̄ sɔ̄lāā le̍.

⁸Ō nɔ̄ mbō wā wānā chāā lāmīāl bīyɔ̄ɔ̄ o̍ ndu̍ lo̍ chi̍ɛ̍ī ni̍ŋ. Ō nɔ̄ mbō wā wānā kāālā le̍ ŋ̄wāŋndā chīe̍e̍ dɛ̍nɛ̍ kɛ̍ndɛ̄ tōsāl. Ō nɔ̄ mbō wā wānā ti̍u̍ kɔ̄l ndɔ̄ɔ̍ bā. Ō nɔ̄ mbō wā wānā to̍sā sūɛ̍i̍ cho̍ o̍ nɛ̄ī sānāā. Ndu̍yɛ̍, ō nɔ̄ mbō wā wānā cho̍ ō yɔ̄ŋga᷄ŋ o̍ Mɛ̄lɛ̄ka̍ lo̍. Ō nɔ̄ mbō wā wānā nɔ̍ māndā kɛ̄ndɛ̄.

⁹Ō nɔ̄ mbō si᷄m ō kālā kpo᷅ke̍ o̍ yōōŋgu̍ cho̍ ho̍ō lētūu̍ mī wānā ti̍i̍ndāŋ ndo̍ chōo̍, mɛ̄ɛ̍ ndā pɛ̄ɛ̄ku̍ ndu̍ yɛ̍. Ō he̍ī ni᷄ŋ, wānā wāā le̍nde̍, ō nɔ̄lā mbō dɛ̄ɛ̄ni̍a̍a̍ chāāŋāā ndūāā kɔ̄lta̍ŋ ā pɛ̄ɛ̄kū sākpōo̍ ho̍ō. Ndu̍yɛ̍ vɛ̍lɛ̄, ō nɔ̄lā mbō chɔ᷄m wānāā sɛ̍ɛ̍ŋgīāā pɛ̍ɛ̍kū sākpōo̍ ho̍ō wā māā ā cho̍ o̍ nɛ̄ī le̍.

¹⁰Kāni̍ fo̍ndōle̍, wānāā tu̍i̍ī wānā di̍o̍m te̍ wā ā wānāā hu̍ī wa᷅ŋndā ā sɔ̄ɔ̍ŋ ŋ̄dīɔ̄mndo̍ŋ ndā, ā chō cha᷅po̍, tāāmā ku̍ndā wānāā lāāla᷄ŋndā tɛ̄ɛ̄ŋ ā cho̍ Chu̍ūwa̍ wā.

¹¹Ku̍u̍nā ndā ā ti̍ū pɛ̄ɛ̄kūlā ndālā lāŋ wāŋndā tɛ̄ɛ̄ŋ te̍. Kāni̍ fu̍u̍le̍, wāŋndā ha̍ā chō yu̍ŋgu̍la̍ŋ lāāsīāā, ō pūm yu̍ŋgo̍o̍ kpu̍lu̍ku̍u̍ mā chi̍i̍ lāāsīāā ā pɛ̄ɛ̄kūlā ndālāŋ nda᷅ŋ. Ā nɔ̍ mā pɛ̄ɛ̄ku̍ wāŋndā pɛ̄ɛ̄kūlā lāŋ te̍. Le̍ nyɛ̄ sɔ̄lāā ko̍ni̍ ndā chō ke̍ŋ to̍sāā ni̍, ī chō sūɛ̍i̍ lāsi̍ɔ̍mbu̍i̍ bɛ̍ndū.

¹²Wānā wāā lɛ̄ŋndē Ki̍le̍tīle̍ŋ, ō wāŋndā lo̍ŋ ā chu̍ā māā wānā su̍āā le̍ Mɛ̄lɛ̄ka̍ wo̍ o̍ cho̍ ni̍ wo̍, ndu̍ kpe̍e̍kpe̍i̍ di̍mi̍ dīōmnda̍ŋ nda᷅ŋ ni̍ āā, “Le̍ lɔ̍ɔ̍ lɔ̍ɔ̍ wānāā lāchōōwāā wāŋndā Ki̍le̍tī ā cho̍ ni̍. Wānāā pi̍la̍a̍ dɛ̍nɛ̍ wɔ̍ɔ̍ŋ, wānāā lēpūlu̍a̍a̍, kɛ̍ ndu̍yɛ̍, ā cho̍ yɛ̍ wānāā tōsāā nyɛ̄ le̍.”

¹³Nyɛ̄ o̍ di̍mi̍ ā ndā o̍kɔ̄ɔ̄ wo̍, tōnyāā o̍ cho̍ ni̍. Le̍ he̍ī, si̍lā ndā ō kālā kālā, le̍ mā mīīŋgu̍ tīīnda᷄ŋ kpe̍e̍kpe̍i̍yo̍ dɔ̄wɔ̄ɔ̄ o̍ Mɛ̄lɛ̄ka̍ ni᷄ŋ.

¹⁴Bu̍ndɔ᷄ŋ Chu̍ūwa̍ kɛ̄ɛ̄si̍a̍a̍ wo̍ŋ, ā wānāā kɛ̍ɛ̍ tōnyā Mɛ̄lɛ̄ka̍a̍ wā sāwālā ndā pi̍lā kɛ̄ɛ̄si̍a̍a̍ mā dūāū lāŋ, si̍lā ndā ā tu̍āl lɛ̄ sɔ̄ɔ̍ŋ mu̍ŋ kɔ̄ɔ̄lī le̍.

¹⁵Wānāā cho̍ ā dīāndāā Mɛ̄lɛ̄ka̍ o̍ hɔ̄l lā nda̍ nda̍, nyɛ̄ o̍ nyɛ̄ chō ō dīāndāā le̍ ndā. Kɛ̍, wānāā cho̍ ā nɔ̄ɔ̄lɛ̍i̍ Mɛ̍lɛ̄kā o̍ hɔ̄l ndu̍yɛ̍, ā lāāla̍ŋ ā Mɛ̄lɛ̄ka̍ le̍ wā nda̍ nda̍, nyɛ̄ o̍ nyɛ̄ cho̍ mbō wā ō dīāndāā le̍ ndā le̍. Wāŋndā ha̍ā yīya᷄ŋnda̍ ndālāŋ, ā kɔ̄ltā ndālāŋ, lā sīmnu᷄ŋ lā nɔ̍ɔ̍lɛ̍i̍ ā yɔ̄ŋ wɔ̄ɔ̍ŋndo̍.

¹⁶Wāŋndā ha̍ā dīmi̍ māā Mɛ̄lɛ̄ka̍ ndā chō pīɛ̄īyo̍ ni̍. Kɛ̍, sɔ̄ɔ̍ŋ ndā tōsā wo̍ŋ, ŋ̄ chɔ᷄m māā ā cho̍ Mɛ̍lɛ̄kā pīɛ̄ī le̍. Ā kūīsi̍ŋ Mɛ̍lɛ̄kā o̍ kɔ̄l kpu̍. Nyɛ̄ Mɛ̄lɛ̄ka̍ dīmūl ndā wo̍ ā to̍sā ndu̍ le̍. Ā bɛ̄ndā ā wāli̍ kɛ̍ndɛ̄ le̍.