Read Southern Kisi Ta̍i̍tɔ̄ɔ̄ 2 Bible Online

Ta̍i̍tɔ̄ɔ̄ 2 - Southern Kisi bible

Ta̍i̍tɔ̄ɔ̄ 2

¹Nūm nūm Ta̍tɔ̄ɔ̄, nyɛ̄ o̍ nyɛ̍ cho̍ ō chɛ̄la᷅ŋ ā pɛ̄ɛ̄kū sākpōo̍ o̍kɔ̄ɔ̍, pɛ̍ɛ̍ku̍ wa᷅ŋndā ndu̍.

²Di̍mu̍l bɛ̍ndūāā wāŋ pīāāndūāā mā wā wānāā ti̍u̍ kɔ̄ltā ndālāŋ bā, ndu̍yɛ̍, mā wā wānāā kɛ̍si̍ŋ le̍bɛ̍ɛ̍. Di̍mu̍l ndā ā wā wānāā tāāsi̍ ndu̍yɛ̍, mā wā wānāā nɔ̍ tīīnda᷄ŋ sākpōo̍ o̍ Mɛ̄lɛ̄ka̍ ni᷄ŋ. Ā nɔ̄ mā nɔ̄ kāālā sākpōo̍. Ā nɔ̄ mā si᷄m o̍ dɛ̍nɛ̍ o̍ dɛ̍nɛ̍ ni̍ŋ sākpō.

³Ndu̍yɛ̍, mā di̍mu̍l bɛ̍ndūāā wāŋ lāāndūāā, māā ā tōsā kāālā chɔ᷅m māā wānāā Mɛ̄lɛ̄ka̍a̍ ndā chō ni̍ lāŋ. Di̍mu̍l ndā ā wa᷅ wānāā bālu̍ ā wānā o̍ sōndō le̍, ndu̍yɛ̍, ā wa᷅ wānāā hi̍u̍ māmūɛ̄ī kōlɔ̄ɔ̄ le̍. Ā nɔ̄ mā pɛ̄ɛ̄ku̍ chūāā lāāndūāā nyɛ̍ bɛ̍ndā le̍ tōsāā wo̍.

⁴O̍ he̍ī ni᷄ŋ, mā pɛ̄ɛ̄ku̍ chūāā lāāndūāā mɛ̄ɛ̍ ndā nɔ̄ mā kāālā pīāāndāā ndāā ā chūāūwāā ndāā yɛ̍.

⁵Mā pɛ̄ɛ̄ku̍ ndā mā wā wānāā tāāsi̍, ndu̍yɛ̍, mā wā wānāā dīāndāā Mɛ̄lɛ̄ka̍ o̍ hɔ̄l. Ndu̍yɛ̍, mā pɛ̄ɛ̄ku̍ ndā mā wā lāāndūāā kɛ̄ndɛ̄ ā to̍sā wa̍llo̍ ō kālā kpo᷅ke̍ o̍ yu̍ŋgu̍lā ndālāŋ chōo̍ wā. Ndu̍yɛ̍, mā pɛ̄ɛ̄ku̍ ndā ā wāā wānāā kɛ̄ndɛ̄ nāā wāŋndā chūā, mā wā wānāā tūsīa̍ŋ pi̍a̍a̍ndāā ndāā o̍ bā bɛ̄ŋgu̍. O̍ he̍ī ni᷄ŋ, wānā o̍ wānā nɔ̍lā lɛ̍ mbō dīmi̍ dīōm wɔ̄ɔ̍ŋ ā sūɛ̍i̍ Mɛ̄lɛ̄kɛ̍i̍ o̍kɔ̄ɔ̄ le̍.

⁶O̍ ko̍ŋ kɔ̍ɔ̍lī, si̍lā chūāā pīāāndūāā mā wā wānāā ti̍u̍ kɔ̄ltā ndālāŋ bā.

⁷Ta̍tɔ̄ɔ̄, chɔ̍m nu᷅m pi̍lā o̍ nyɛ̄ o̍ nyɛ̄ ni᷄ŋ ŋ̄ tōsā lē wāā māā tāāmāsi̍ ā sɔ̄ɔ̍ŋ kɛ̍ndɛ̄ŋ wāŋndo̍ nɔ̄ mbō tōsā wo̍ŋ o̍kɔ̄ɔ̄. Tē ā wā wāŋndā pɛ̄ɛ̄kōo̍ pɛ̍, chɔ̍m ā wāā sākpō ā bɛ̄ɛ̄le̍ŋ kɛ̄si᷄ŋndo̍ le̍ wāā māā tāāmāsi̍ le̍ ndā.

⁸So̍o̍ di̍ōmndā bɛ̍ndā lāŋ, lā wāŋndo̍ ō nɔ̍lā mbō pɛ̄ɛ̄sā nu̍m le̍ lāŋ te̍ lāŋ, le̍ yɔ̄ŋi̍ wānāā si̍mu̍l nu̍m ndā ā sāālu̍ŋ nyɛ᷅ o̍ nyɛ̄ wɔ̄ɔ̍ŋ ō ndā nɔ̄lā mā chɔ᷄m nu̍m chōo̍ wo̍. O̍ he̍ī ni᷄ŋ mī si̍ɔ̍mbu̍la̍ŋ lā bīī ndā.

⁹Ndu̍yɛ̍, di̍mu̍l wānāā cho̍ o̍ chɛ̄le̍ŋ ni᷄ŋ ndā māā, ā tūsi̍ŋ wānāā ndā chō o̍ bā wā o̍ bā bɛ̄ŋgu̍. Nyɛ̄ o̍ nyɛ̍ cho̍ mbo̍ wā ō kɛ̄ndɛ̄, o̍ nɛ̍ŋī wānāā ndā chō o̍ bā wā kɔ̄l lo̍ ā tōsā ndu̍. Si̍lā ndā māā ā mu̍lī ndā bāli̍ o̍ sōndō ō wɔ̄ɔ̍ŋ te̍.

¹⁰Ndu̍yɛ̍, ā yɔ᷅ŋ ndā lēvīī le̍. Ā wā nyɛ᷅ kɛ̄ndɛ̄ sākpō o̍ nyɛ̄ o̍ nyɛ̄ ni᷄ŋ ndā tōsā. Mɛ̄ɛ̍ o̍ he̍ī ni᷄ŋ, nyɛ̄ o̍ nyɛ̄ ndā tōsā ō nɔ̄lā mbō hīŋ ā tɔ̍ɔ̍ kɛ̍ndɔ̄ɔ̍ o̍ pɛ̄ɛ̄kū nāā ŋ̄ chō ho̍ō wāŋndā wo̍ chōo̍ o̍ cho̍ ho̍ō ā Mɛ̄lɛ̄ka̍ pi̍ŋī nāā wo̍ o̍kɔ̄ɔ̄ wo̍.

¹¹O̍ nɛ̄ī wāā nu̍āā ni᷄ŋ kāālā wānāā lāāla᷄ŋndā lā nɔ̄ le̍ wāā ni̍. Kāni̍ fo̍ndōle̍, Mɛ̄lɛ̄ka̍ tōsāl wāŋndā kɛ̄ndɛ̄i̍ ndūɛ̄ī bɛ̍ndūe̍i̍. Ko̍ŋ cho̍ ni̍, ō chɔ᷄m nɛ̄īyo̍ mɛ̄ɛ̍ wāŋndā kpo̍u̍ ā sɔ̍lā pi̍o̍ŋɔ̄ɔ̍ yɛ̍.

¹²Kɛ̄ndɛ̄i̍ Mɛ̄lɛ̄ka̍ tōsāl nāā he̍ī ye̍ ī chō māchūāā le̍ nāā pɛ̄ɛ̄kōo̍ le̍ mī ŋ̄ ma᷄l ka̍āla̍ŋ lā si̍mu̍l sūɛ̍i̍ Mɛ̄lɛ̄kɛ̍i̍ lāŋ, ndu̍yɛ̍, mī ŋ̄ ma᷄l kɔ̄l lānda᷄ŋndo̍ o̍ nyɔ̄ɔ̍ŋ chi̍e̍ēŋ nānu᷄ŋ. Ndu̍yɛ̍, ī chō nāā pɛ̄ɛ̄kōo̍ le̍ mī ŋ̄ wā wānāā kɛ̍si̍ŋ le̍bɛ̍ɛ̍, mī ŋ̄ wā sākpō ndu̍yɛ̍, mī ŋ̄ nɔ̄ kāālā Mɛ̄lɛ̄ka̍ hɛ̄nāŋ māā ŋ̄ tōsā o̍ chi̍e̍ēŋndo̍ ho̍ō chōo̍ lāŋ.

¹³Kɛ̄ndɛ̄i̍ Mɛ̄lɛ̄kɛ̍i̍ he̍ī ī chō nāā sɔ̄ɔ̍ŋ mu᷅ŋ pɛ̄ɛ̄kōo̍ bōōndi̍i̍ nāā ŋ̄ chō he̍ī lēhɔ̄l o̍ nɛ̄ī le̍ pāāle̍ kɔ̄l kɛ̄ndɛ̄le̍ŋ nde̍ŋ. Mɛ̄lɛ̄ka̍ bɛ̄ndōo̍ o̍ cho̍ wānā nāā pīŋīa̍a̍ wo̍, ndu̍ yɔ̍nūŋ ni̍ māā Chi̍i̍sū Ki̍li̍tī, ō chō nāŋɔ̄ɔ̄ ndɔ̄ bɛ̍ndōo̍ chɔ̄m o̍ ŋ̄wāŋndā chīe̍e̍ lo̍ o̍ pāāle̍ le̍ŋ chōo̍.

¹⁴Ndu̍ Chi̍i̍sū Ki̍li̍tī, mbo̍ yɔ̄ŋgū ndu̍ pi̍lā le̍ nāā le̍ mbō bāŋā nāā mī ŋ̄ fūlā o̍ dɛ̍nɛ̍ wɔ̍ɔ̍ŋndo̍ ni᷄ŋ, ndu̍yɛ̍, mbō sīīŋgu̍u̍ nāā wānāā dīāndāā, mī ŋ̄ wā wānāā ndɔ̄ ndu̍ pīlɛ̍ kpe̍, ndu̍yɛ̍, mī ŋ̄ wā wānāā lāndu̍ŋ kɔ̍l o̍ sɔ̄ɔ̍ŋ kɛ̍ndɔ᷄ŋ tōsāā.

¹⁵Pɛ̍ɛ̍ku̍ wa᷅ŋndā sɔ̄ɔ̍ŋ mu᷅ŋ. Ndu̍yɛ̍, kpāāyā o̍ kpāāyā cho̍ nu̍m ō yɔ̄ŋga᷄ŋ to̍sā wa̍llo̍ ā ndu̍ le̍ wāŋndā kɔ̄lta̍ŋ dɛ̄ɛ̄nīāā ā ndā bīōndɔ᷄ŋndā ndālāŋ chɔ̄mndo̍. Chɛ᷅l mī wānā o̍ wānā che᷅ nu̍m chɔ̍dɔ̄ le̍.