Read Southern Kisi Ta̍i̍tɔ̄ɔ̄ 3 Bible Online

Ta̍i̍tɔ̄ɔ̄ 3 - Southern Kisi bible

Ta̍i̍tɔ̄ɔ̄ 3

¹Di̍mu̍l chāāŋāā nūm ā lāāla᷄ŋndā māā ā tūe̍i̍ wānāā cho̍ lɛ̄ŋnde̍ŋ bōlle̍ŋ ndā dīōm nyɛ̄ kɛ̄ndɛ̄ kɛ̍ndɛ̄. Di̍mu̍l ndā vɛ̄lɛ̄ māā ā wā ā bɛ̍ɛ̍ndīāŋ le̍ mā tōsā o̍ cho̍ sākpō le̍ tōsāā wo̍ o̍ nɛ̄ī o̍ nɛ̄ī ni̍ŋ.

²Di̍mu̍l ndā māā ā su̍āā dīōm wɔ̄ɔ̍ŋ ā wānā le̍. Ā wa᷅ wānāā sɛ̍ɛ̍ŋgi̍āŋ ā wānā le̍. Wānāā nɔ̍ i̍sɔ̍ɔ̍ ā wānā le̍ wā ndā nɔ̄ ni̍ mā wā. Ā nɔ̍ bɛ̍ɛ̄le̍ŋ le̍ wānā o̍ wānā.

³Kāni̍ fu̍u̍le̍, nāā pi̍lā bɛ̍ɛ̍ dīɔ̄mndā nāā ŋ̄ wā ni̍. Ŋ̄ ve̍ wānāā tu̍e̍ī Mɛ̄lɛ̄ka̍ dīōm te̍. Ndu̍yɛ̍, ndā āā fāŋā nāā o̍ nɛ̄i̍ tōnyāā chōo̍ bāū. Yēēmāŋ le̍ kɔ̄l kɛ̄ndɛ̄ chi̍e̍ēŋndo̍, ā yēēmāŋ fāŋgāŋ chēle̍ŋ, ŋ̄ wā nāā ŋ̄ hīāūwāā o̍ kɔ̄l kɔ̄ɔ̄lī pu᷅ŋ. Le̍ lɔ̍ɔ̍ lɔ̍ɔ̍, ŋ̄ wā sɔ̄ɔ̍ŋ dɛ̍nɛ̍ wɔ̍ɔ̍ŋndo̍ŋ tōsāā. Ŋ̄ wā pāŋa̍li̍āŋnda̍ŋ o̍ nyɔ̄ɔ̍ŋ chōo̍. Ndu̍yɛ̍, wāŋndā wā nāā yɛ̄le̍ŋ tūllo̍, nāā bɛ̍ɛ̍ mī ŋ̄ tūl ndā yɛ̄le̍ŋ.

⁴Kɛ̍ ndu̍yɛ̍, mɛ̄ɛ̍ Mɛ̄lɛ̄ka̍ o̍ cho̍ wānā nāā pīŋīa̍a̍ wo̍ ō chɔ᷄m nāā kɛ̄ndɛ̄i̍ ndūɛ̍i̍, ndu̍yɛ̍ mbo̍ chɔ̄m nāā kāālā ndɔ̄ɔ̍,

⁵mbo̍ pīŋī nāā. Mɛ̄lɛ̄ka̍ ō pīŋi̍ nāā le̍ nāā pi̍lā wāli̍ nāā kɛ̍ndɛ̄ le̍. Ō pīŋi̍ māpīŋīāā nāā le̍ mɛ̄ɛ̍ o̍ nɔ̍ nyīɛ̍ɛ̍ye̍ le̍ nāā yɛ̍. Ō tōsā he̍ī sānāā ā yīŋɔ̄ɔ̄ Nyi̍nā Kāsīo̍o̍ tōsā mi̍ ŋ̄ sɔ̄lā wo̍, yīŋɔ̄ɔ̍ chu̍u̍ nāā vīōlɔ᷄ŋ sɛ̍nɛ̄īyo̍ ā yōōmū sɛ̄nɛ̄īyo̍ wo̍.

⁶Mɛ̄lɛ̄ka̍ tōsā mi̍ Nyi̍nā ndɔ̍ Kāsīo̍o̍ tūāl nāā kɔ̄ɔ̄lī ta̍u̍ ta̍u̍. Ndu̍yɛ̍, ō tōsā he̍ī sānāā o̍ Chi̍i̍sū Ki̍li̍tī ni̍ŋ, o̍ pi̍ŋi̍ nāā wo̍.

⁷Mɛ̄lɛ̄ka̍ yɔ̄ŋgu̍ Nyi̍nā ndɔ̄ɔ̍ nāā kɔ̄ɔ̄lī le̍ mbō sīīŋgu̍u̍ nāā wānāā sākpō ndu̍ pi̍lā o̍ hɔ̄l sānāā o̍ kɛ̄ndɛ̄i̍ ndūɛ̍i̍ ni᷄ŋ. Le̍ mbō lo̍ o̍ ko̍ŋ mī ŋ̄ sīmnu᷄ŋ chu̍a̍u̍wāā ndɔ̄, ndu̍yɛ̍, mī ŋ̄ wā hɔ̄lte̍ŋ o̍ nɛ̄ī le̍ yōōmu̍ nɔ̍ la̍mɛ̍ɛ̍lu̍ le̍ wo̍.

⁸Dīōmndā di̍mi̍ŋ lāŋ ndāŋ lā chō tōnyā. I̍ hɛ̍nāŋ mā chɔ̍ɔ̍lu̍ sɔ̄ɔ̍ŋ mu᷅ŋ kīndīlā kpe̍e̍kpe̍i̍, le̍ mī wānāā du̍a̍ū tīīnda᷄ŋndo̍ o̍ Mɛ̄lɛ̄ka̍ ni᷄ŋ ndā ā lāndu̍ŋ kɔ̍l le̍ te̍le̍ŋndā ndālāŋ chūāā o̍ sɔ̄ɔ̍ŋ kɛ̍ndɔ᷄ŋ tōsāā ni᷄ŋ. Sɔ̄ɔ̍ŋ mu᷅ŋ ŋ̄ na᷄ŋ tāu̍, ndu̍yɛ̍ ŋ̄ chō sɔ̄ɔ̍ŋ tɔ̄nɔ̄ le̍ wānā o̍ wānā fe̍e̍.

⁹Wo̍ū sōndō o̍ dīɔ̄mūŋ fo̍ndōŋ mu᷅ŋ ni᷄ŋ te̍, ndu̍ yɔ̍nūŋ ni̍ māā dīōmnda̍ŋ hīŋa᷅ŋ kōŋ ā pɛ̄ɛ̄kōo̍ ā dīōlā wānāā māsīndīāā fāŋgā fa̍ŋgāa̍ tōmbōlā kōŋ kɛ᷅ kɛ᷅. Ndu̍yɛ̍, wo̍ū sōndō o̍ sɛ̄ɛ̄ŋgi̍āŋnda̍ŋ ni᷄ŋ ā dīōmnda̍ŋ hīŋa᷅ŋndo̍ ā sāwālā Mūu̍sēlāŋ o̍kɔ̄ɔ̄ le̍. Fo̍ndō fu̍u̍ sɔ̄ɔ̍ŋ mu̍ŋ chō ni̍, ndu̍yɛ̍, tɔ̄nɔ̄ bɛ̍ɛ̍ cho̍ le̍ni̍ŋ te̍.

¹⁰Wānā hu᷅ŋ ā pīɔ̄ūwa᷅ŋndo̍ wāŋndā tɛ̄ɛ̄ŋ ndo̍ ndu̍ ndu̍, tē lā sīlā ndu̍ lē pīlɛ̍ kɛ̄lɛ̄ŋgāā lē dīi̍ŋ pɛ̍ mbō māŋgālā le̍, lā sēī ndu̍.

¹¹Nūm sīnā māā wānā wāā le̍nde̍ māā ō ma᷄l nɛ̄i̍ tōnyāā mbo̍ wōū bāā o̍ yɔ̄ŋ wɔ̄ɔ̍ŋndo̍ tōsāā ni᷄ŋ. Ko̍ŋ kpe̍e̍kpe̍i̍ chɔ̍m ni̍ māā wānā wāā le̍nde̍ ō cho̍ o̍ nɛ̄ī kpo̍so̍ŋ te̍.

¹²I̍ cho̍ Āātāmāā vīōmɔ̄ɔ̄, kɛ̄lɛ̄ŋgāā mī ve᷅m Ti̍chi̍kɔ̄ɔ̄ nāā nūm chu̍ā. Tē ā chē ō pīlɛ̍ pɛ̍, mɛ̄ɛ̍ ki̍ndi̍ ki̍ndi̍ mā ko̍māl lā Nīka̍po̍līī chi̍e̍e̍. Kāni̍ fu̍u̍le̍, lo̍ŋ yā I̍ kɛ̍ɛ̍si̍a̍a̍ le̍ wɔ̄ɔ̄lē pɔ̄mbɔ̄le̍ŋ hīvīo̍o̍ ni̍.

¹³Ki̍ndi̍ mā to̍sā mi̍ Si̍nāā o̍ cho̍ lɔ̍yɛ̄i̍nɔ̍ɔ̍ wo̍ ni̍ ndā A̍ A̍pɔ̍lɔ̄ɔ̄, mā sɔ̄lā mālāā o̍ kɔ̄lā ndālāŋ ni᷄ŋ. Nyɛ̄ o̍ nyɛ̄ bā hāvɛ̍i̍ ndā nɔ̄ le̍ sɔ̄lāā o̍ kēlā ndāā ni᷄ŋ, to̍sā mā sɔ̄lā ndu̍.

¹⁴Chāāŋāā nāā wānāā lāāla᷄ŋndā nɔ̄ mā wā sɔ̄ɔ̍ŋ kɛ̍ndɔ᷄ŋ tōsāā lɔ̍ɔ̍ lɔ̍ɔ̍, le̍ mā nɔ̄lā mā mālā wānāā cho̍ o̍ bā hāvɛ̍i̍yo̍ ni᷄ŋ tāu̍ wā. Ndu̍yɛ̍, ā nɔ̍ mā wā wānāā bāābāā fo̍ndō le̍.

¹⁵Chāāŋāā nāa̍ na̍a̍ ŋ̄ cho̍ nāŋ ndā fa̍ū ā yi᷄l nu̍m. Yi̍l nāā chāāŋāā nāā wānāā lāāla᷄ŋndā lo̍ŋ. Mbɔ̄ Mɛ̄lɛ̄ka̍ yīyāŋ nyā kpo̍u̍ cho̍o̍ fɔ̍.