Read Southern Kisi Fi̍lɛ̍mɔ̄ŋ 1 Bible Online

Fi̍lɛ̍mɔ̄ŋ 1 - Southern Kisi bible

Fi̍lɛ̍mɔ̄ŋ 1

¹Yā Pɔ̍ɔ̄, yā cho̍ ho̍ō o̍ chīɛ̄ī mānyūmndo̍ ni᷄ŋ le̍ sābu̍ Chi̍i̍sū Ki̍li̍tīo̍o̍ wo̍, yā cho̍ yāu̍wo̍ ho̍ō pōōnyīāā ni̍, nāā chāāŋ nāā wānā lāāla᷄ŋndo̍ Ti̍mo̍tī. Ŋ̄ chō ndu̍ pōōnyīāā nāā nūm chāāŋ nāā kāālāā Fi̍lɛ̍mɔ̄ŋ chu̍ā, nūm nāā ŋ̄ chō ho̍ō wa̍llo̍ nāā nyāā wo̍, ā

²ku̍ndā wānāā lāāla᷄ŋndā ā bi̍ī bɔ᷅ŋa᷅ŋndāŋ o̍ nūmndo̍ chi̍ɛ̍ī ni̍ŋ ndā, ā A̍fīāā, yēmā nāā lāāla᷄ŋndo̍, ā A̍ki̍pɔ̄ɔ̄, o̍ cho̍ wa̍llo̍ ā nāā lātu̍lu̍ māā so̍vɛ̄i̍nɔ̍ le̍ Chi̍i̍sū wo̍.

³I̍ cho̍ pīɛ̄īle̍ŋ māā Mɛ̄lɛ̄ka̍ fi̍nyā nāā ā Māsānɔ̄ɔ̍ Chi̍i̍sū Ki̍li̍tī, māā ā yīyāŋ nyā chōo̍, ndu̍yɛ̍, mā ke̍ nyā kɔ̄l nyūlōo̍ fɔ̍.

⁴Chāāŋ nūu̍ Fi̍lɛ̍mɔ̄ŋ, I̍ cho̍ Mɛ̄lɛ̄ka̍ pīɛ̄īyo̍ le̍ nūm. Ndu̍yɛ̍ tē I̍ wā pīɛ̄īle̍ŋ le̍ nūm pɛ̍, ba̍li̍kāā yā I̍ me᷅l Mɛ̍lɛ̄kā te̍le̍ŋ o̍ te̍le̍ŋ ni̍.

⁵Kāni̍, I̍ tu̍e̍ī mi̍ wāŋndā ā wā dīmīo̍o̍ ā mɛ̄ɛ̍ ŋ̄ kāālā wānāā Mɛ̄lɛ̄ka̍a̍ yɛ̍, ndu̍yɛ̍ ā mɛ̄ɛ̍ kpɛ̍ ŋ̄ dɔ̄ū tīīnda᷄ŋndo̍ o̍ Māsānɔ̄ɔ̍ Chi̍i̍sū ni̍ŋ yɛ̍.

⁶I̍ cho̍ Mɛ̄lɛ̄ka̍ pīɛ̄īyo̍ māā īsɔ̄ɔ̍ o̍ īsɔ̄ɔ̍ dɛ̍nɛ̍ kɛ̍ndɛ̍ cho̍ ā nāā o̍kɔ̄ɔ̄, le̍ chō nāā ŋ̄ chō dīōm pīlɛ̍ ā Ki̍li̍tī wo̍, māā mī nāŋāŋ cho̍ nāā tɛ̄ɛ̄ŋ māā wānāā lāāla᷄ŋ ndo̍ ō tōsā, mī ŋ̄ hīōū lāchī ā sīnāā ā sɔ̄ɔ̍ŋ mu̍ŋ o̍kɔ̄ɔ̄.

⁷Chāāŋ nūu̍, kāālā ŋ̄ nɔ̄ ho̍ō wo̍ tōsā, mi̍ I̍ na᷅ŋ kɔ̄l tāu̍, ndu̍yɛ̍, mi̍ I̍ sɔ̍lā kɔ̄l nyɔ̄ɔ̄lāā. A̍ to̍sā mi̍ wānāā Mɛ̄lɛ̄ka̍a̍ kpo̍u̍ ā na᷅ŋ kɔ̄l.

⁸Le̍ he̍ī, hāāā mi̍ I̍ wa᷅ bu̍ɛ̍i̍ Ki̍li̍tī, yā i̍i̍ nɔ̍lā mi̍ yā i̍i̍ ki̍ndi̍lā nu̍m chōo̍ le̍ mā to̍sā nyɛ̄ yā I̍ hɛ̍nāŋ ho̍ō le̍ nu̍m dīmūllo̍ wo̍. Kɛ̍ ndu̍yɛ̍, I̍ cho̍ to̍sā le̍nde̍ le̍.

⁹I̍ cho̍ ndi̍ dīmī o̍ nɛ̄ī nyɔ̍ɔ̍lāā ni᷄ŋ, kāni̍ fu̍u̍le̍, le̍ kāāli̍āŋ nāā ŋ̄ kāāli̍āŋ ve̍llāā vēllē wo̍. Mi̍ chē bɛ̍ɛ̍ yā Pɔ̍ɔ̄ mi̍ I̍ wa᷅ wānā Chi̍i̍sū Ki̍li̍tī ve᷅m māā sɔ̍ŋgɔ̍ ndɔ̄, ndu̍yɛ̍ mɛ̄ɛ̍ nāā ŋ̄ sūāā nu̍āā yɛ̍ bɛ̍ɛ̍, mi̍ wa᷅ o̍ chīɛ̄ī mānyūmndo̍ ni᷄ŋ le̍ sābū ndɔ̄ɔ̍, kɛ̍ o̍ ko̍ŋ ni̍ŋ kpo̍u̍, I̍ cho̍ ndi̍ kēī ā nu̍m nyɔ̄ɔ̄lū.

¹⁰Ndu̍ yɔ̍nūŋ ni̍, I̍ cho̍ nu̍m nyɔ̄ɔ̄lōo̍ le̍ O̍ni̍si̍mɔ̄ɔ̄,[1] o̍ si̍mnu᷄ŋ ho̍ō māā po̍ nī wo̍. Kāni̍ fu̍u̍le̍, o̍ bīyɔ̄ɔ̄ ndā bīī yā ho̍ō wo̍ ni᷄ŋ yā I̍ si̍mnu᷄ŋ fi̍nyā ndɔ̄ ni̍.

¹¹O̍ pāāndōo̍ ni᷄ŋ, ō ve̍ wa᷅nā chu̍u̍ nu̍m tɔ̄nɔ̄ le̍. Kɛ̍ ndu̍yɛ̍, ā pɛ̄ŋgo̍o̍ ho̍ō ō sīmnu᷄ŋ ni᷅ŋ wānā ŋ̄ sɔ̄lā tɔ̄nɔ̄ ā ndu̍. Yā bɛ̍ɛ̍ I̍ sɔ̍lā tɔ̍nɔ̄ɔ̍ ā ndu̍.

¹²I̍ cho̍ ndu̍ mīŋgīo̍o̍ nāā nūm chu̍ā. Ndu̍yɛ̍, I̍ kāālā ndu̍ tāu̍.

¹³Bōōndi̍i̍ yā I̍ cho̍ he̍ī o̍ bīyɔ̄ɔ̍ ni᷄ŋ le̍ Yōōŋgū Kɛ̄ndɛ̍ Mɛ̄lɛ̄ka̍a̍ ve̍, yā i̍i̍ ye̍e̍mā mī yā i̍i̍ kɛ̍su̍lu̍ŋ ndu̍ le̍ mī ndu̍ o̍o̍ mālā yā mālā nūm o̍o̍ mālā yā ni̍ŋ ndo̍, tē nūm o̍o̍ wā nānu᷄ŋ pɛ̍ wo̍.

¹⁴Kɛ̍ ndu̍yɛ̍, I̍ hɛ̍nāŋ mī I̍ to̍sā īsɔ̄ɔ̍ o̍ īsɔ̄ɔ̍ o̍ sūɛ̍i̍ he̍ī ni᷄ŋ te̍, mɛ̄ɛ̍ mā chɛ̍l fɛ̍lɛ̍ŋ. Kāni̍ fu̍u̍le̍, ō ni᷅ŋ mī wānā to̍sā kɛ̄ndɛ̄i̍ ā kɔ̄l kīīsa᷄ŋ, mɛ̄ɛ̍ wānā yɔ̄ŋ ko̍ āā ō kīndīlāā ŋ̄ chō sɔ̄lāa̍ le̍ ndi̍ tōsāā ni̍ le̍. Ō bɛ̄ndā mā to̍sā ndi̍ ā kɔ̄l nūmndo̍ kpo̍u̍.

¹⁵Kɛ̄lɛ̄ŋgāā dɔ̍ɔ̍, Ōni̍si̍mɔ̄ɔ̄ fāŋāŋ ma̍fa̍ŋa᷄ŋ nu̍m i̍kɛ̍i̍ le̍ te̍le̍ŋ bi̍ŋgī, le̍ hāli̍ kpe̍ŋ mbō hu᷄ŋ wa᷅ ni᷅ŋ ā nūm lātu̍lu̍ le̍ te̍le̍ŋ o̍ te̍le̍ŋ.

¹⁶Ō cho̍ lɛ̍ chɛ̄ ko̍ni̍ le̍. Chāāŋ nāā kāālāā o̍ cho̍ ni᷅ŋ ni̍. Ō chō wānā kpe̍e̍kpe̍i̍ nāā yā chu̍ā. Kɛ̍ ndu̍yɛ̍, nāā nūm chu̍ā bɛ̍ɛ̍ o̍ hi̍o̍ū ni᷅ŋ wā wānā kpe̍e̍kpe̍i̍. Chɛ̄ nūm ndo̍ o̍ cho̍ ni̍. Kɛ̍ ndu̍yɛ̍, chāāŋ nūm wānā lāāla᷄ŋndo̍ o̍ cho̍ ni᷅ŋ vɛ̄lɛ̄ ni̍.

¹⁷Le̍lāŋ tē ā si̍nā pɛ̍ māā chāāŋ nu᷄m nyā chō wa̍llo̍ hɔ̄lāā tūlu̍ le̍ Māsānɔ̄ɔ̍ Mɛ̄lɛ̄ka̍ wo̍ yā I̍ cho̍ ni̍, mɛ̄ɛ̍ bi̍i̍ ndu̍ ō kɛ̄ndɛ̄ mɛ̄ɛ̍ ŋ̄ bīī yā pi̍lā yɛ̍.

¹⁸Nyɛ̄ o̍ nyɛ̄ wɔ̄ɔ̍ŋ o̍ to̍sā ā nūm, ā nyɛ̄ o̍ nyɛ̄ o̍ nɔ̍ mbō pāāwā nu̍m, po̍o̍nyi̍āā ā dīōlā nīlāŋ māā yā nyɛ̄ o̍ nyɛ̄ chō kūēē le̍ pāāwāā ni̍.

¹⁹Dīōmnda̍ŋ nda᷅ŋ yā pi̍lā cho̍ ni᷅ŋ lāŋ pōōnyīāā ni̍, māā yā Pɔ̍ɔ̄ pi̍lā, I̍ cho̍ kūēē ko̍ŋ pāāwā. Kɛ̍ ndu̍yɛ̍, nūm pi̍lā ā sīnā māā nūm bɛ̍ɛ̍ kūe̍e̍ nūu̍ chō nu̍m, ā mɛ̄ɛ̍ yā I̍ to̍sā ā yōōmū nu᷄m īnyi̍nāyāā o̍kɔ̄ɔ̄ yɛ̍.

²⁰Chāāŋ nūu̍, I̍ hɛ̍nāŋ kpe̍e̍kpe̍i̍ mā mālā yā o̍ nɛ̄īyo̍ ho̍ō ni᷄ŋ, le̍ Māsānɔ̄ɔ̍ Mɛ̄lɛ̄ka̍. To̍sā māā chāāŋ nī wānā lāāla᷄ŋ, mī I̍ sɔ̍lā kɔ̄l nyɔ̄ɔ̄lāā.

²¹I̍ si̍nā māā nyɛ̄ yā I̍ cho̍ ho̍ō nu̍m yāu̍wo̍ yɔ̄ŋ le̍ mā to̍sāl lā ndu̍ wo̍, māā ā chō chɛ̄lɔ̄ɔ̄ mā to̍sā ndu̍. Ndu̍yɛ̍, I̍ si̍nā māā ā chō tōsā mbō hīōū bɛ̍ɛ̍ mɛ̄ɛ̍ yā I̍ nyu̍nā nu̍m dīōm le̍ tōsāā yɛ̍.

²²O̍ ko̍ŋ kɔ̍ɔ̍lī, I̍ ye̍e̍mā mā to̍sāl lā vɛ̄lɛ̄ he̍ī. Bɛ̍ɛ̍ndi̍āā yi᷅yāā le̍ yā. Kāni̍ fo̍ndōle̍, I̍ nɔ̍ tīīnda᷄ŋndo̍ māā nyā kpo̍u̍ nyɛ̄ nyā nyūnā Mɛ̄lɛ̄ka̍ dīōm, le̍ mbō tōsāl nyā ndu̍ wo̍, ō chō ndu̍ tōsā, ndu̍ yɔ̍nūŋ ni̍ māā le̍ mbō mīŋgi̍ yā vɛ̄lɛ̄ nyā o̍ bā.

²³Ɛ̄pāfu̍lɔ̄ɔ̄, ō nāā ŋ̄ chō o̍ bīyɔ̄ɔ̍ ni᷄ŋ nāā ndu̍ le̍ Chi̍i̍sū Ki̍li̍tī wo̍, ō yi᷄l nyā lāpi̍.

²⁴Wānāā cho̍ wa̍llo̍ ā yā lātu̍lu̍ wā bɛ̍ɛ̍ ā yi᷄l nyā lāpi̍, ndā yɔ̍nūŋ ni̍ māā, Ma̍kī, ā Ālu̍i̍ta̍kɔ̄ɔ̄, ā De̍ma̍sī, ā Lu̍kū.

²⁵Mbɔ̄ Māsānɔ̄ɔ̍ Chi̍i̍sū Ki̍li̍tī ō yīyāŋ nyā kpo̍u̍ cho̍o̍ fɔ̍. Āmi̍i̍nā.