Read Southern Kisi Hi̍būlūi̍ya̍ 1 Bible Online

Hi̍būlūi̍ya̍ 1 - Southern Kisi bible

Hi̍būlūi̍ya̍ 1

¹O̍ sīndɔ̄ɔ̍ ni᷄ŋ, mi̍ Mɛ̄lɛ̄ka̍ sūāā nāā fi̍nyāā nāā māmāā chūā te̍le̍ŋndā fāŋgā o̍ nɛ̄īla̍ yɛ̍ yɛ̍ ni̍ŋ. A̍ bōōndi̍i̍ ke̍ŋ, wānāā ndūāā ndā āā su̍āā le̍ Mɛ̄lɛ̄ka̍ wā, o̍ ndā ni᷄ŋ sānāā ndu̍ o̍o̍ su̍āā nāā fi̍nyāā nāā māmāā chūā ni̍.

²Kɛ̍ ā bōōnde̍i̍ he̍ī ni᷅ŋ, ndi̍ yɔ̍nūŋ māā bōōndi̍i̍ mɛ̍ɛ̍lɛ̄i̍ le̍ chi̍e̍ēŋndo̍ ho̍ō ni̍, o̍ Po̍ ndɔ̄ɔ̍ ni᷄ŋ sānāā o̍ so̍ō nāa̍ na̍a̍ chūā ni̍. Po̍ ndɔ̄ ko̍ŋ, ndu̍ Mɛ̄lɛ̄ka̍ tōsā ni̍ mbo̍ tōōsīāā chi̍e̍ēŋndo̍. Ndu̍ ko̍ni̍ Mɛ̄lɛ̄ka̍ yūlū ni̍, le̍ mī nyɛ̄ o̍ nyɛ̄ fe̍e̍ wā mīāl ndɔ̄.

³Ndu̍yɛ̍, o̍ Po̍ ndɔ̄ ko̍ŋ ni᷄ŋ yēlēŋ ye̍le̍ŋ nāŋɔ̄ɔ̍ Mɛ̄lɛ̄ka̍a̍ chō dīōndɔ̄ɔ̍ ni̍. Wānā che᷅ ndu̍ pɛ̍, ā chē Mɛ̄lɛ̄ka̍ yɛ̍ŋgɛ̍sɛ̍ɛ̍. Ndu̍yɛ̍, dīōm kpāāyā fu̍lā ndu̍ o̍ sōndō wo̍, ndu̍ cho̍ tōsāā ni̍ mi̍ chi̍e̍ēŋndo̍ wā hīōūwɔ̄ɔ̍ lāchī ā wāā. Po̍ ndɔ̄ɔ̍ ho̍ō, ndu̍ fāŋā yɔ̄ŋ wɔ̄ɔ̍ŋndo̍ ŋ̄wāŋndā chīe̍e̍ cho̍o̍ mbo̍ dīndī ndā pa̍ku̍ ni̍. O̍ ko̍ŋ kɔ̍ɔ̍lī, mbo̍ hēl ɛ̄chɛ̍nɛ̄ mbo̍ kɔ̍ cha᷅l o̍ fo̍ndāŋ lēbīɔ̍ɔ̍ o̍ bā kɛ̄ndɛ̍ Mɛ̄lɛ̄ka̍ cho̍ māsāā nyɛ̄ o̍ nyɛ̄ fe̍e̍ cho̍o̍ wo̍ chōo̍.

⁴Le̍ he̍ī, mi̍ Mɛ̄lɛ̄ka̍ tōsā mi̍ po̍ ndɔ̄ɔ̍ wā ō bɛ̄ndū, mbo̍ hīāū ā ki̍i̍la̍a̍ Mɛ̄lɛ̄ka̍a̍. Ndu̍yɛ̍, dīōlā Mɛ̄lɛ̄ka̍ vēēlū ndu̍ lāŋ lā hīōū ā dīōlā o̍ vēēlū ki̍i̍la̍a̍ ndūāā lāŋ.

⁵Ki̍i̍la̍nɔ̍ o̍ ki̍i̍la̍nɔ̍ Mɛ̄lɛ̄ka̍ ō cho̍ mī Mɛ̄lɛ̄ka̍ dīmu̍l ndu̍ āā, “Nu᷄m cho̍ Po̍ nūu̍ ni̍, chɔ̍ŋ ā hāū I̍ si̍mnu᷄ŋ fi̍nyā nūm,” te̍. Ndu̍yɛ̍, lē pīlɛ̍ bɛ̍ɛ̍ Mɛ̄lɛ̄ka̍ dīmi̍ wɔ̍ ā ki̍i̍la̍nɔ̍ ndɔ̄ɔ̍ o̍kɔ̄ɔ̄ āā, “I̍ cho̍ wā fi̍nyā ndɔ̄, ndu̍ bɛ̍ɛ̍ mbō wā Po̍ nī,” le̍.

⁶Sūɛ̍i̍ pi᷅lɛ̍ ī chō vɛ̄lɛ̄, bōōndi̍i̍ Mɛ̄lɛ̄ka̍ ndu̍ o̍o̍ wā le̍ hūnɔ̄ɔ̄ Po̍ ndɔ̍ tāso̍o̍ yɔ̄ŋ o̍ chi̍e̍ēŋndo̍ chōo̍ ve̍, mbo̍ dīmī ndi̍ āā, “Nyā ki̍i̍la̍a̍ Mɛ̄lɛ̄ka̍a̍ kpo̍u̍, lā sōōlu̍u̍ ndu̍.”

⁷Nyɛ̄ Mɛ̄lɛ̄ka̍ dīmi̍ ā ki̍i̍la̍a̍ ndūāā nda̍ nda̍ o̍kɔ̄ɔ̄ wo̍, ndu̍ cho̍ ho̍ō ni̍ āā, “Mɛ̄lɛ̄ka̍ tōōsi̍a̍a̍ mātōōsīāā Ki̍i̍la̍a̍ ndūāā mɛ̄ɛ̍ hūēīye̍ chō nu̍āā yɛ̍. Ndu̍yɛ̍, ō tōōsi̍āā mātōōsīāā vɛ̄lɛ̄ ndā mɛ̄ɛ̍ yīŋndē wūle̍ wūle̍le̍ŋ lē chō nu̍āā yɛ̍.”

⁸Kɛ̍, ā Po̍ ndɔ̄ɔ̍ o̍kɔ̄ɔ̄ ndu̍ ndu̍, mbo̍ dīmī āā, “Nūm Mɛ̄lɛ̄ka̍, ā chō wā māsāā le̍ fɛ̍ɛ̍ŋ ā fɛ̍ɛ̍ŋ. O̍ nɛ̄ī sākpōo̍ chōo̍ nūm kūā ā māsāle̍ nu̍mnde̍ŋ ni̍.

⁹Sɔ̄ɔ̍ŋ cho̍ sākpō wo̍ŋ, mu̍ŋ ŋ̄ hɛ̄nāŋ mī wāŋndā tōsā ni̍. A̍ hɛ̍nāŋ ndā mā tōsā sɔ̄ɔ̍ŋ wɔ̍ɔ̍ŋndo̍ŋ te̍. Le̍lāŋ bɛ̍ɛ̍ Mɛ̄lɛ̄ka̍ o̍ cho̍ Mɛ̄lɛ̄ka̍ nūmndo̍ wo̍ ō yūlū nu̍m le̍ mā wā ō bɛ̄ndū mā hīōū chāāŋāā nūmndā kpo̍u̍, ndu̍yɛ̍ mā wā ā kɔ̄l kɛ̄ndɛ̄ ni̍.”

¹⁰Mbo̍ dīmī vɛ̄lɛ̄ āā, “Māsānɔ̄ɔ̍ Mɛ̄lɛ̄ka̍, nu᷄m to̍o̍si̍āā sīndɛ̄ chi̍e̍ēŋndo̍ o̍ kāndɔ᷄ŋndo̍ pe̍kēkē ni̍. Nūm ko̍ni̍ to̍o̍si̍āā ha̍la̍a̍ ā bālā nūmnda̍ŋ ni̍.

¹¹Nyɛ̄m ŋ̄ tōōsi̍āā mu̍ŋ ndo̍ŋ fa̍ū ŋ̄ chō fāŋa᷄ŋ. Kɛ̍ nūm nūm, ā chō wā le̍ fɛ̍ɛ̍ŋ ā fɛ̍ɛ̍ŋ. Nyɛ̄m mu᷅ŋ fa̍ū, ŋ̄ chō sīmnɔ᷄ŋ ŋ̍ pāāndū mɛ̄ɛ̍ kōlāā sīmnūŋ nu̍āā ō pāāndū yɛ̍.

¹²Ā chō mu̍ŋ hūnɔ̄ɔ̄ tūī tūī mɛ̄ɛ̍ wānā tu̍i̍i̍ tūī do᷅māa̍ yɛ̍. Nyɛ̄m mu᷅ŋ ŋ̄ nɔ̄lā mī ŋ̄ yɔ̄nu̍ŋ mɛ̄ɛ̍ kōlāā fūlā le̍ni̍ŋ mbō hūli̍ yɛ̍. Kɛ̍ nūm nu̍m, le̍ pɛ̄ŋgu̍ o̍ pɛ̄ŋgu̍ ā chō lēchōo̍. Yōōmū nūmndo̍ ō mɛ̍ɛ̍lū le̍.”

¹³Mɛ̄lɛ̄ka̍ dīmu̍l lɔ̍ ki̍i̍la̍nɔ̍ ndɔ̄ɔ̍ ō pīlɛ̍ bɛ̍ɛ̍ āā, “Chāl nānu᷄ŋ o̍ fo̍ndāŋ lēbīɔ̍ɔ̍ o̍ bā nī kɛ̍ndɔ̄ɔ̍ chōo̍ mbō lo̍ o̍ ko̍ŋ mī to̍sā mā nɛ̍i̍ ya̍a̍mɔ̍ɔ̍wa̍a̍ nu̍mndā ā bɛ̄ŋgu̍,” le̍.

¹⁴Ki̍i̍la̍a̍ Mɛ̄lɛ̄ka̍a̍ nda̍ nda̍ chō māchūāā nyi̍nāā ā to̍sā wa̍llo̍ le̍ Mɛ̄lɛ̄ka̍ wā. Ndā Mɛ̄lɛ̄ka̍ vīām ni̍ le̍ wānāā sɔ̍lā pi̍o̍ŋɔ̄ɔ̍ wā mālāā.