Read Southern Kisi Hi̍būlūi̍ya̍ 10 Bible Online

Hi̍būlūi̍ya̍ 10 - Southern Kisi bible

Hi̍būlūi̍ya̍ 10

¹Sāwālā Mɛ̄lɛ̄ka̍ ke̍ Mūu̍sē lāŋ lā chō māchūāā ti᷄ŋ vēla᷅ŋ sɔ̄ɔ̍ŋ kɛ̍ndɛ᷄ŋ cho̍ hūnɔ̄ɔ̄ wā wo̍ŋ. Sāwālā lāŋ lā nɔ̍lā mī lā chɔ᷄m nyɛ̄ kɛ̄ndɛ̄ wa̍la̍ŋ mɛ̄ɛ̍ sɔ̄ɔ̍ŋ kpe̍e̍kpe̍i̍ mu̍ŋ ŋ̄ nɔ̄ le̍ hūnɔ̄ɔ̄ wāā yɛ̍ le̍. Le̍ te̍le̍ŋ o̍ te̍le̍ŋ, wānāā sōlīāā lāsa̍lāa̍ ā chō hīōūwɔ̄ɔ̍ lāchī ā sālālā pīlɛ̍la̍ŋ sōlīo̍o̍ le̍ wɔ̄sī o̍ wɔ̄sī. Sāwālāŋ nda᷅ŋ, lā nɔ̍lā mī lā tōsā mī wānāā hu᷅ŋ nāā Mɛ̄lɛ̄ka̍ chūā wā ā sīmnu᷄ŋ mɛ̄ɛ̍ Mɛ̄lɛ̄ka̍ kɛ̄ɛ̄si̍a̍a̍ le̍ mā wā yɛ̍ le̍.

²Tē lā āā nɔ̍lā he̍ī tōsā pɛ̍, mɛ̄ɛ̍ wāŋndā ndā āā hi̍ū lɛ̍ lāchī ā lāsa̍lā sōlī le̍. Kāni̍ fu̍u̍le̍, māā sālālā lāŋ, lā āā si̍i̍ŋgu̍u̍ ni᷅ŋ wānāā so̍o̍lūū Mɛ̍lɛ̄kā wā wānāā dīāndāā Mɛ̄lɛ̄ka̍ o̍ hɔ̄l. Ndā āā nɔ᷅ lɛ̍ būūla᷄ŋ māā yɔ̄ŋndā wɔ̄ɔ̍ŋndā ndā tōsā lāŋ lā chō wɔ̄ ndā kɔ̄ɔ̄lī kɛ᷅ le̍.

³Kɛ̍, sālālāŋ nda᷅ŋ, lā tōsā māto̍sāā wɔ̄sī o̍ wɔ̄sī mī wāŋndā lōōnūŋ ā yɔ̄ŋndā wɔ̄ɔ̍ŋndā ndā tōsā lāŋ o̍kɔ̄ɔ̄.

⁴Kāni̍ fo̍ndōle̍, ŋ̄ sīnā māā nāūwāā ndā sōlī kāŋ sālāā wā, ā chūīŋāā kāŋ kōo̍ma̍ nda᷄ŋ, mā nɔ̍lā wa᷅ŋndā chīe̍e̍ya̍ yɔ̄ŋndā wɔ̄ɔ̍ŋndāŋ fāŋā chōo̍ kpo̍so̍ŋ te̍.

⁵Le̍ sābū kōŋ, mɛ̄ɛ̍ Ki̍li̍tī bɛ̍ɛ̍ndi̍a̍ŋ le̍ hūnɔ̄ɔ̍ o̍ chi̍e̍ēŋndo̍ chōo̍, dīōmndā o̍ di̍mi̍ lāŋ lā cho̍ la᷅ŋ ni̍. Mbo̍ dīmī āā, “Nūm Mɛ̄lɛ̄ka̍, sālālā lāchɔ̄lūlā wāŋndā sōlī lāŋ, ā nyɛ̄m ndā kē nu̍m ndo̍ŋ, ā ye̍e̍mā mu̍ŋ te̍. Kɛ̍ ndu̍yɛ̍, ā bīī mā bɛ̄ɛ̄ndīāā dīāllo̍ŋ le̍ yā.

⁶Chɔ̄lūāā wāŋndā lūām māā sālā wā ā sālālā chēle̍ŋndā ndā sōlī le̍ yɔ̄ŋndā wɔ̄ɔ̍ŋndāŋ fāŋāā lāŋ, ā hi̍ni̍ kɔ̍l ā lāŋ te̍.”

⁷O̍ ko̍ŋ kɔ̍ɔ̍lī, mi̍ Ki̍li̍tī di̍mī āā, “Mɛ̄lɛ̄ka̍, ā chē yā. I̍ hi᷅ŋ le̍ mī I̍ to̍sā nyɛ̄ ŋ̄ hɛ̄nāŋ yā mī I̍ to̍sā wo̍. Le̍nde̍ i̍ cho̍ ī pōōnyīāā o̍ yāu̍ nu̍m lāsāwā ŋ̄ ke̍ Mūu̍sē wo̍ ni᷄ŋ ā yā o̍kɔ̄ɔ̄ ni̍.”

⁸O̍ tāse̍lā ndɔ̄ɔ̍ mi̍ Ki̍li̍tī di̍mī āā, “Sālālā wāŋndā sōlī lāŋ, ā nyɛ̄m ndā kē nu̍m ndo̍ŋ, ā chɔ̄lūāā ndā lūām māā sālā wā, ā sālālā ndā sōlī le̍ yɔ̄ŋndā ndālā wɔ̍ɔ̍ŋndāŋ fāŋāā lāŋ, ō cho̍ nyɛ̍m mu᷅ŋ te̍ ŋ̄ hɛ̄nāŋ te̍, ndu̍yɛ̍, ō cho̍ mu̍ŋ te̍ ŋ̍ nɛ̍ŋī nu̍m kɔ̄l te̍.” Mɛ̄ɛ̍ sāwāla̍ŋ lā dīmi̍ māā wāŋndā tōsā yɛ̍, le̍nde̍ ndā wā sālālāŋ nda᷅ŋ sōlīo̍o̍ ni̍. Kɛ̍ o̍ ko̍ŋ ni̍ŋ fa̍ū, mbo̍ dīmī māā ō cho̍ lāŋ te̍ lā nɛ̍ŋī Mɛ̍lɛ̄kā kɔ̄l te̍.

⁹O̍ ko̍ŋ kɔ̍ɔ̍lī, mbo̍ dīmī āā, “Mɛ̄lɛ̄ka̍ ā chē yā. I̍ hi᷅ŋ le̍ mī I̍ to̍sā nyɛ̄ ŋ̄ hɛ̄nāŋ yā mī I̍ to̍sā wo̍.” O̍ he̍ī ni᷄ŋ, mbo̍ kpēēŋā sālālā pāāndūlā lāŋ. Mbo̍ lō o̍ ko̍ŋ mbo̍ mīŋgī sālā sɛ̄nɛ̄ī sɔ̍ŋgɔ̍ ko̍ŋ.

¹⁰Le̍ mɛ̄ɛ̍ Chi̍i̍sū Ki̍li̍tī to̍sā nyɛ̄ Mɛ̄lɛ̄ka̍ hɛ̄nāŋ ndo̍ yɛ̍, ko̍ŋ to̍sā ni̍ nāā kpo̍u̍, mi̍ ŋ̄ sɔ̄lā dīndīo̍o̍ Mɛ̄lɛ̄ka̍ o̍ hɔ̄l. He̍ī yɔ̄nu̍ŋ sānāā ā sōlī Chi̍i̍sū so̍li̍ dīāllūŋ ndɔ᷄ŋ ndu̍ pi̍lāŋ māā sālā wo̍ŋ. Lē pīlɛ̍ kpe̍ o̍ so̍li̍ŋ sālā ni̍, kɛ̍, sālā kōŋ chō lētūu̍ le̍ fɛ̍ɛ̍ŋ ā fɛ̍ɛ̍ŋ.

¹¹Wānāā sōlīāā lāsa̍lāa̍ kpo̍u̍, lēpāla̍ o̍ lēpāla̍ ā chō wa̍llo̍ tōsāā le̍ Mɛ̄lɛ̄ka̍, chɔ̄lūāā sālāā sōlīo̍o̍. Sālālā pīlɛ̍lā lāŋ, te̍le̍ŋ o̍ te̍le̍ŋ ā chō lāŋ sōlīo̍o̍. Kɛ̍ ndu̍yɛ̍, sālālā wāā le̍nde̍ lāŋ, lā fe̍ŋā wa᷅ŋndā yɔ̄ŋndā wɔ̄ɔ̍ŋndā ndā tōsā lāŋ chōo̍ le̍.

¹²Kɛ̍, Ki̍li̍tī ndu̍ ndu̍, lēpīlɛ̍ kpe̍ o̍ so̍li̍ sālāā le̍ yɔ̄ŋndā wɔ̄ɔ̍ŋndā wāŋndā fāŋāā ni̍. Ndu̍yɛ̍, sālā lē pīlɛ̍ kōŋ chō lētūu̍ le̍ fɛ̍ɛ̍ŋ ā fɛ̍ɛ̍ŋ. O̍ ko̍ŋ kɔ̍ɔ̍lī, mbo̍ kɔ̍ cha᷅l o̍ fo̍ndāŋ lēbīɔ̍ɔ̍ o̍ bā kɛ̄ndɛ̍ Mɛ̄lɛ̄ka̍a̍ chōo̍.

¹³Lo̍ŋ o̍ cho̍ ni᷅ŋ chūmndo̍ hāāā ni̍, mī Mɛ̄lɛ̄ka̍ lo̍ o̍ ko̍ŋ mbō tōsā mbō nɛ̄i̍ ya̍a̍mɔ̍ɔ̍wa̍a̍ ndūāā ā bɛ̄ŋgu̍.

¹⁴Le̍lāŋ, o̍ sālā pīlɛ̍ o̍ so̍li̍ ho̍ō wo̍ ni᷄ŋ o̍ to̍sa̍ ni̍, mi̍ wāŋndā sīmnu᷄ŋ mɛ̄ɛ̍ Mɛ̄lɛ̄ka̍ hɛ̄nāŋ ndā mā wā le̍ fɛ̍ɛ̍ŋ ā fɛ̍ɛ̍ŋ yɛ̍. Ndā yɔ̍nūŋ ni̍ māā wānāā o̍ cho̍ dīndīo̍o̍ wā.

¹⁵O̍ ko̍ŋ kɔ̍ɔ̍lī, mi̍ Nyi̍nā Kāsīo̍o̍ chɔ̄m nāā vɛ̄lɛ̄ wa̍la̍ŋ, māā tōnyā sɔ̄ɔ̍ŋ mu᷅ŋ ŋ̄ chō ni̍. O̍ tāse̍lā ndɔ̄ɔ̍ mbo̍ dīmī āā,

¹⁶“Māsānɔ̄ɔ̍ Mɛ̄lɛ̄ka̍ dīmi̍ āā, ‘Tē bōōndi̍i̍ fu̍u̍lu̍u̍ pɛ̍, kpe̍ma̍ yā I̍ cho̍ yīī ā ndā lātu̍lu̍ wo̍, ndu̍ cho̍ ho̍ō ni̍. I̍ cho̍ tōsā mā sīnā sāwālā nīlāŋ, ndu̍yɛ̍, mī to̍sā mā kɛ̄si̍ŋ ndāŋ o̍ lākɔ̄l.’ ”

¹⁷O̍ ko̍ŋ kɔ̍ɔ̍lī, mi̍ Nyi̍nā Mɛ̄lɛ̄ka̍a̍ dīmī āā, “I̍ cho̍ pu̍ɛ̍ɛ̍nɔ᷄ŋ ā yɔ̄ŋ o̍ yɔ̄ŋ wɔ̄ɔ̍ŋ ndā tōsā ā sāwālā nīlā ndā tɛ̄ɛ̄mbu̍u̍ lāŋ.”

¹⁸Le̍lāŋ, mɛ̄ɛ̍ Mɛ̄lɛ̄ka̍ ma᷄l ni᷅ŋ wāŋndā le̍ yɔ̄ŋndā wɔ̄ɔ̍ŋndā ndā tōsā lāŋ yɛ̍, sābū o̍ sābū chēle̍ŋ cho̍ lɛ̍ mā hīōū lāchī ā lāsa̍lā sōlī le̍ yɔ̄ŋndā ndālā wɔ̍ɔ̍ŋndāŋ fāŋā le̍.

¹⁹Chāāŋāā nīāā, mɛ̄ɛ̍ pīɔ̍m Ki̍li̍tī sɔ̍lā wo̍ tōsā mi̍ nɛ̄īyo̍ kūmbi᷄ŋ le̍ nāā, le̍ mī ŋ̄ kɔ̍ lu̍ɛ̍ī o̍ Fo̍ndāŋ Kāsi̍ hi̍o̍ū kpo̍u̍ wo̍ yɛ̍, lā ŋ̄ lūɛ̄īnu᷅ŋ ā kɔ̄ltā kūmbīa̍ŋ.

²⁰Ki̍li̍tī ku̍mbu̍l nāā nɛ̄ī sɛ̍nɛ̄īyo̍, ndu̍ yɔ̍nūŋ ni̍ māā nɛ̄ī yo̍o̍māa̍. A̍ ndu̍ nāā ŋ̄ kēī ni̍ mī ŋ̄ hīōū kōlā bɛ̍ndu̍ cho̍ ō lāndāā o̍ chīɛ̍i̍ Mɛ̄lɛ̄ka̍a̍ ni᷄ŋ ndo̍, mī ŋ̄ lūɛ̄ī o̍ fo̍ndāŋ Mɛ̄lɛ̄ka̍ cho̍ wo̍. Ō tōsā he̍ī sānāā ā dīāllūŋ ndɔ̄ɔ̍ŋ o̍ yɔ̍ŋgu̍ māā sālā wo̍ŋ.

²¹Nāā bɛ̍ɛ̍ ŋ̄ nɔ̄ māsā wānāā sōlīāā lāsa̍lāa̍. Ndu̍ māndā chi̍ɛ̍i̍ Mɛ̄lɛ̄ka̍a̍ ni̍.

²²Le̍lāŋ, lā ŋ̄ kɔ̄nu᷅ŋ nāā Mɛ̄lɛ̄ka̍ chūā ā kɔ̄l kpo̍u̍, ndu̍yɛ̍, tīīnda᷄ŋ nāā ŋ̄ nɔ̄ o̍ ndu̍ ni̍ŋ ndo̍ mī ŋ̄ wānu᷅ŋ lēchōo̍ nyɛ̍ kɛ̄ndɛ̄ yi̍. Lā ŋ̄ kɔ̄nu᷅ŋ ā kɔ̄lta̍ŋ lā sɔ̍lā tɔ̄ɔ̍ ndu̍yɛ̍, mi̍ lā sɔ̄lā dīndīo̍o̍ lāŋ, lā sɔ̍lā dīndīo̍o̍ o̍ sɔ̄ɔ̍ŋ kɔ̄lta̍ŋ lā kɔ̄ɔ̄sā ā nāā wo̍ŋ ndāŋ. Lā ŋ̄ kɔ̄nu᷅ŋ nāā Mɛ̄lɛ̄ka̍ chūā ā yīŋāā pa̍ku̍, ā yīŋɔ̄ɔ̄ nāā ŋ̄ sɔ̄lā ho̍ō ā mɛ̄ŋmā kpe̍e̍kpe̍i̍yāŋ ndo̍.

²³Sɔ̄ɔ̍ŋ nāā ŋ̄ dīmi̍ mu᷅ŋ māā ŋ̄ chō lēhɔ̄l o̍ nɛ̄ī le̍ mu̍ŋ ndo̍ŋ, lā ŋ̄ hīōūnu᷅ŋ lāchī ā hɔ̄lte̍ŋ wāā o̍ nɛ̄ī le̍ mu̍ŋ kpe̍e̍kpe̍i̍. Lā ŋ̄ ki̍i̍sa᷄ŋ te̍, kāni̍ fu̍u̍le̍, Mɛ̄lɛ̄ka̍ chu̍ā būŋgɛ̄i̍ māā ō chō hūnɔ̄ɔ̄ mu̍ŋ tōsā. Ndu̍yɛ̍, ŋ̄ sīnā māā nyɛ̄ o̍ nyɛ̄ Mɛ̄lɛ̄ka̍ dīmi̍ pɛ̍ le̍ tōsāā, tōsāā o̍ to̍sā ni̍.

²⁴Lā ŋ̄ nūūvi̍āŋ nɛ̄īla̍ nāā ŋ̄ nɔ̄lā mī ŋ̄ kpēēŋi̍a̍a̍ chāāŋāā nāā vēllāā vēllē le̍ wāŋndā kāālāā ā sɔ̄ɔ̍ŋ kɛ̍ndɔ᷄ŋ tōsāā lāŋ.

²⁵Lā ŋ̄ ma̍lnūŋ chūūŋgi̍āŋndo̍ dīōm pīlɛ̍, mɛ̄ɛ̍ wāŋndā ā pūm ā nɔ̄ kāā ā chɛ᷅l le̍ hūnɔ̄ɔ̍ o̍ bɔ̄ŋa᷅ŋ ni᷄ŋ te̍ yɛ̍ le̍. Kɛ̍, lā ŋ̄ dɛ̄ɛ̄ni̍āŋ ve̍llāā vēllē ā tīīnda᷄ŋ nāā ŋ̄ nɔ̄ o̍ Mɛ̄lɛ̄ka̍ ni᷄ŋ ndo̍ o̍kɔ̄ɔ̄. Tāāmā nyā pi̍lā lā chō ni᷅ŋ chɔ̄ɔ̍ māā pāāle̍ Māsānɔ̄ɔ̍ nɔ̄ le̍ mīīŋgōo̍ nānu᷄ŋ nde̍ŋ lē chō ni᷅ŋ kpɛ̍ɛ̍lūŋ.

²⁶Mɛ̄ɛ̍ nāā ŋ̄ sīnā ni᷅ŋ tōnyā kpe̍e̍kpe̍i̍yo̍ yɛ̍, wānā o̍ wānā hi̍o̍ū ni᷅ŋ lāchī ā yɔ̄ŋndā wɔ̄ɔ̍ŋndāŋ tōsāā ā sīɛ̄lɛ̍i̍ fu̍u̍ pɛ̍, mɛ̄ɛ̍ sālā chēle̍ŋ cho̍ lɛ̍ le̍ yɔ̄ŋndā ndɔ̄lā wɔ̍ɔ̍ŋndā lāŋ fāŋā le̍.

²⁷Wānā wāā le̍nde̍ sīōōŋnde̍ ī bīi̍ ndu̍ ni̍ko̍ le̍ yāmɛ̍ī Mɛ̄lɛ̄ka̍ kīlūl ndu̍ ni̍ŋ nde̍ ā yīŋndē bɛ̄ndūle̍ lu̍ām ni̍ŋ ndā wānāā si̍mu̍l Mɛ̄lɛ̄ka̍ wā le̍ŋ.

²⁸Ŋ̄ tōfa᷅ŋ ndɔ̄ ā sāwālā Mūu̍sēlāŋ o̍kɔ̄ɔ̄. Tē wānā o̍ wānā tɛ̍ɛ̍mbu̍u̍ lāŋ pɛ̍, ndu̍yɛ̍, mī wānāā ŋīɔ̍ɔ̍ŋ kɛ̄lɛ̄ŋgāā ā yāā ā fu̍lā kɔ̄ɔ̄lī pɛ̍, dīyɔ̄ɔ̍ ndā dīī wānā ko̍ŋ ni̍. Ī īnyīɛ̍ɛ̍ bɛ̍ɛ̍ ā tu̍i̍i̍nūŋ ndu̍ le̍.

²⁹Tē ī yɔ̄nu̍ŋ le̍nde̍ le̍ sāwālā lāŋ tɛ̄ɛ̄mbūūwo̍ pɛ̍, mɛ̄ɛ̍ vɛ̄ɛ̄ i̍ wa᷅ yɛ̍ ni̍ŋ ā wānā chi̍ ho̍ō Po̍ Mɛ̄lɛ̄ka̍a̍ nyɛ̄ o̍ nyɛ̄ kpo̍so̍ŋ te̍ wo̍? Wānā wāā le̍nde̍ ndu̍ hi̍a̍ū ni̍ŋ bɛ̍ɛ̍ nyɛ̍ pālāā sɔ̄lā. Kāni̍ fu̍u̍le̍, kōo̍ma̍ Ki̍li̍tī so̍li̍ŋ le̍ kpe̍ma̍ Mɛ̄lɛ̄ka̍ yīi̍ ā ŋ̄wāŋndā chīe̍e̍ wāŋ, mɛ̄ɛ̍ māŋ o̍ chu̍ā nyɛ̄ fo̍ndō fu̍u̍ ni̍, kōo̍ma̍ nɔ̍ kpāāyāā le̍ wāŋndā dīndīo̍o̍ Mɛ̄lɛ̄ka̍ o̍ hɔ̄l lāŋ. Wānā ko̍ŋ mɛ̄ɛ̍ ō ye̍i̍ māyēīyāā Nyi̍nā Mɛ̄lɛ̄ka̍a̍ o̍ chu̍ū ŋ̍wa᷅ŋndā chīe̍e̍ dɛ̍nɛ̍ kɛ̍ndɛ̍ Mɛ̄lɛ̄ka̍a̍ wo̍.

³⁰Kāni̍ fo̍ndōle̍, dīōmndā so̍o̍nu᷄ŋ la᷅ŋ ndāŋ, ŋ̄ sīnā wa᷅nā so̍ō lāŋ ndo̍. Mbo̍ dīmī āā, “Yā Māsānɔ̄ɔ̍ Mɛ̍lɛ̄kā, yā cho̍ wānā mi̍ŋgīāā māā ni̍. I̍ cho̍ wānāā to̍sā sɔ̍ɔ̍ŋ wɔ̍ɔ̍ŋndo̍ŋ ndā māā mīŋgūl.” Mbo̍ dīmī āā, “Yā Māsānɔ̄ɔ̍ Mɛ̄lɛ̄ka̍, I̍ cho̍ wānāā nīāā yāmɛ̍i̍ kīlūl.”

³¹Ō chō sūɛ̍i̍ dɔ̍ū wānā i̍si̍o̍o̍ŋ tāu̍, le̍ nūm wānā chi̍o̍o̍ mā de̍l Mɛ̄lɛ̄ka̍ cho̍ yōōmū wo̍ o̍ bā.

³²Lā lōōnu̍ŋ ndɔ̍ ā mɛ̄ɛ̍ nyā wā ā bōōndi̍i̍ nyā sɔ̄lā sīnā pɛ̄ŋgo̍o̍ ā Yōōŋgū Kɛ̄ndɛ̍ Mɛ̄lɛ̄ka̍a̍ sɛ̄nɛ̄ī ye̍. Mi̍ chē bɛ̍ɛ̍ ā bōōndi̍i̍ ke̍ŋ mi̍ lā sɔ̄lā dɛ̍nɛ̍ pālāā tāu̍ ni̍, kɛ̍, mi̍ lā bīūnu̍ŋ, mi̍ lā hīāū lāchī ā sīsi̍lāŋ o̍ tīīnda᷄ŋ nyā nɔ̄ o̍ Mɛ̄lɛ̄ka̍ ni᷄ŋ ndo̍ chōo̍ nyɛ̍ kɛ̄ndɛ̄ yi̍.

³³Te̍le̍ŋnda̍ŋ lā pūm, mī wāŋndā ndā āā yi̍o̍u̍ nyā wāŋndā o̍ hɔ̄l. Mā tōsā mi̍ lā sɔ̄lā nyɛ̄ pālāā. Te̍le̍ŋnda̍ŋ lā pūm, mī nyā āā sɔ̍ɔ̍ŋgu̍u̍ le̍ mɔ̍nɛ̍i̍ bīyɔ̄ɔ̍ lātūlu̍ ā wānāā ndā chō bīyɔ̄ɔ̄ wɔ̄ɔ̍ŋ wāā le̍ndo̍o̍ le̍ sūɛ̍i̍ Mɛ̄lɛ̄kɛ̍i̍ yā.

³⁴Mi̍ lā sɔ̄ɔ̄ŋgūū mi̍ lā bīī mɔ̍nɛ̍i̍ nyā wānāā ndā dūāū o̍ chīɛ̄īlā mānyūmndāŋ ni᷄ŋ ndā. Mi̍ wāŋndā pōōndīāā nyɛ̄m nyāa̍ŋ nyā o̍ lābā. Kɛ̍ o̍ ko̍ŋ ni̍ŋ fa̍ū, mi̍ lā hīāū lāchī ā bīūwɔ᷄ŋndo̍, ndu̍yɛ̍, mi̍ lā hīāū lāchī ā wāā ā kɔ̄l kɛ̄ndɛ̄. Kāni̍ fu̍u̍le̍, nyā pi̍lā lā sīnā māā lā nɔ̄ nyɛ̄m kɛ̄ndɔ᷄ŋ ŋ̍ hi̍o̍ū mu̍ŋ ndo̍ŋ, mu̍ŋ yɔ̍nūŋ ni̍ māā nyɛ᷄m cho̍ le̍ fɛ̍ɛ̍ŋ ā fɛ̍ɛ̍ŋ ndo̍ŋ.

³⁵Le̍lāŋ, lā ma᷅l te̍, kāni̍ fu̍u̍le̍, dɛ̍nɛ̍ kɛ̍ndɛ̄ bɛ̄ndū chō hūnɔ̄ɔ̄ fūlā lēkɔ̍ɔ̍lī.

³⁶Lā nɔ̄ mī lā hīōū lāchī ā bīūwɔ᷄ŋndo̍. Tē lā tōsā ke̍ŋ pɛ̍, mɛ̄ɛ̍ lā tōsā nyɛ̄ Mɛ̄lɛ̄ka̍ hɛ̄nāŋ ndo̍, o̍ ko̍ŋ, nyā bɛ̍ɛ̍ mī lā hu᷄ŋ sɔ̍lā fɛ̍ɛ̍ŋ nyɛ᷅ o̍ chu̍e̍l nyā būŋgɛ̄i̍ yo̍.

³⁷Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, “Te̍le̍ŋ bi̍ŋgī ko̍ni̍ lo̍ ni̍, le̍ mī wānā nɔ̍ le̍ hūnɔ̄ɔ̍ wo̍ mbō hīŋ. Ō cho̍ ta̍ma̍la̍ yɔ̄ŋ le̍ hūnɔ̄ɔ̍ le̍.

³⁸Wānāā nīāā ā cho̍ sākpō yā o̍ hɔ̄l lā, ā dūāū ni̍ŋ ti̍i̍nda᷄ŋndo̍ o̍ yā ni̍ŋ, o̍ ko̍ŋ mā wā yōōmū kpe̍e̍kpe̍i̍. Kɛ̍, wānā o̍ wānā māl pɛ̍, mbō mīīŋgu̍ŋ kɔ̍ɔ̍lī, I̍ ni᷅ŋ kɔ̍l ā ndu̍ le̍.”

³⁹Kɛ̍ na̍a̍ na̍a̍ ŋ̄ cho̍ wānāā māl mā mīīŋgu̍ŋ kɔ̍ɔ̍lī, mā hu᷄ŋ wa᷅ ā tɛ̄ɛ̄mbāā le̍. Wānāā nɔ̍ tīīnda᷄ŋndo̍ o̍ Mɛ̄lɛ̄ka̍ ni᷄ŋ mbo̍ pīŋī ndā wā nāā ŋ̄ chō ni̍.