Read Southern Kisi Hi̍būlūi̍ya̍ 12 Bible Online

Hi̍būlūi̍ya̍ 12 - Southern Kisi bible

Hi̍būlūi̍ya̍ 12

¹Tē ō wā māā yɔ̄ŋɔ̄ɔ̄ pɛ̍, fāŋgā bɛ̍ndōo̍ ho̍ō ki̍nɛ̍i̍ ā chō nāā ā bālāā. Ndu̍yɛ̍, ā chɔ᷄m nāā ā mɛ̄ɛ̍ kpɛ̍ ndā āā nɔ̍ tīīnda᷄ŋndo̍ o̍ Mɛ̄lɛ̄ka̍ ni᷄ŋ yɛ̍. Le̍lāŋ, nyɛ̄ o̍ nyɛ̍ nɔ̍lā mbō kūūnā nāā le̍ kɔ̄la̍ŋ o̍ nɛ̄i̍ tōnyāā ho̍ō chōo̍, ā yɔ̄ŋ o̍ yɔ̄ŋ wɔ̄ɔ̍ŋ yi̍u̍ yi̍u̍ŋ nāā, lā ŋ̄ fāŋa᷅ŋ mu̍ŋ kpo̍u̍. Ndu̍yɛ̍, lā ŋ̄ sīmnu᷅ŋ kɔ̄l nyɛ̄ kɛ̄ndɛ̄ yi̍ le̍ kɔ̄lā cho̍ nāā lāchī lāŋ, mɛ̄ɛ̍ wāŋndā kūā nu̍āā le̍ kīlta̍ lābɛ̄ɛ̄la̍la̍ŋ yɛ̍.

²Ndu̍ cho̍ nāā īsīsi̍ lāchi̍ mbo̍ wā nāā nɛ̄īyo̍ chɔ̄mndo̍ ā tīīnda᷄ŋ nāā ŋ̄ dūāū o̍ Mɛ̄lɛ̄ka̍ ni᷄ŋ ndo̍ o̍kɔ̄ɔ̄ ni̍. Ndu̍yɛ̍, ndu̍ to̍sā ni̍ mī tīīnda᷄ŋ nāā kālāā ō wā mɛ̄ɛ̍ o̍ nɔ̍ le̍ wāā yɛ̍. Mbo̍ bīī kɔ̄llo̍ mbo̍ sɔ̄lā pīɔ̍mndo̍ o̍ yɔ̄m sīŋgāfīlāā chōo̍, kāni̍ fu̍u̍le̍, le̍ kɔ̄l kɛ̄ndɛ̍ wā ndu̍ chūmndo̍ lāchī wo̍. Le̍ he̍ī, ō chu̍e̍ bɛ̍ɛ̍ bɛ̍ɛ̄la̍ tāmbɛ̍i̍la̍ o̍ sɔ̍lā lāŋ ndāŋ māā lā chō nyɛ̄ o̍ nyɛ̄ le̍. Ō chō ni᷅ŋ hāū i̍cha̍li̍ o̍ fo̍ndāŋ lēbīɔ̍ɔ̍ o̍ bā kɛ̄ndɛ̍ Mɛ̄lɛ̄ka̍a̍ chōo̍.

³Lā yīyāŋ ndɔ̍ ā Chi̍i̍sū o̍kɔ̄ɔ̄, ā mɛ̄ɛ̍ o̍ bi̍u̍nu̍ŋ o̍ nyɛ̄ nɛ̄īyāā ni᷄ŋ yɛ̍. Mbo̍ bīūnu̍ŋ nyɛ̍ nɛ̄īyāā wānāā yɔ̄ŋndā wɔ̄ɔ̍ŋndā o̍ bā, ā tu̍l ndu̍ lēyɛ̄ wā. Lā yīyāŋ ā ndu̍ o̍kɔ̄ɔ̄ yɔ̄ŋi̍ nyā wu̍ ŋ̍di̍āl, mī lā ma᷄l tīīnda᷄ŋ nyā nɔ̄ o̍ Mɛ̄lɛ̄ka̍ ni᷄ŋ ndo̍.

⁴Sɔ̍ŋgɔ̄ nyā chō ho̍ō ā wānāā dɛ̍nɛ̍ wɔ̍ɔ̍ŋndā wo̍, ō tūūlu̍ wɔ̍ tu̍u̍lu̍ nyā sɔ̄lā pīɔ̍m le̍ni̍ŋ te̍.

⁵Dīōmndā dɛ̄ɛ̄nīāālā Mɛ̄lɛ̄ka̍ sōō la᷅ŋ nāā nyā chūā le̍ nyā kpi̍i̍li̍a̍a̍ kīo̍o̍ lāŋ, ndu̍ yɔ̍nūŋ ni̍ māā vēēlū o̍ ve̍e̍lu̍ nyā āā, chūāūwāā ndūāā wo̍, bāā mī lā pūɛ̄ɛ̄nu̍ŋ māpu̍ɛ̍ya᷄ŋ di̍ōmndā la᷄ŋ? Mbo̍ dīmī āā, “Po̍ nūu̍, tē Māsānɔ̄ɔ̍ Mɛ̄lɛ̄ka̍ mīŋgi̍ nu̍m o̍ nɛ̄ī pɛ̍, kɛ̍si̍ŋ ndi̍ o̍ kɔ̄l nyɛ̄ kɛ̄ndɛ̍ī. Tē ō hāndu̍ nu̍m nyɛ̄ pālāā chōo̍ pɛ̍, tāmbū kɔ̄l te̍.

⁶Si̍nā pɛ̍ŋgu̍ māā Māsānɔ̄ɔ̍ Mɛ̄lɛ̄ka̍ ndu̍ ndu̍, wānā o̍ kāālā wo̍ nūm o̍ mi̍ŋgī o̍ nɛ̄ī ni̍. Nūm o̍ chu̍ā māā chūā ndɔ̄ɔ̍ ŋ̄ chō ni̍ wo̍, nūm o̍ hāndū nyɛ̍ pālāā chōo̍ le̍ sūɛ̍i̍ wɔ̍ɔ̍ŋīī ŋ̄ tōsā ve̍ ni̍.”

⁷Le̍lāŋ, lā bīūnu̍ŋ nyɛ̍ pālāā hu᷅ŋ nyā chōo̍ wo̍, māā sīlā fi̍nyāā o̍ cho̍ ni̍. Ke̍ŋ chɔ᷅m ni̍ māā Mɛ̄lɛ̄ka̍ chu̍ā nyā māchūāā māā chūāūwāā ndɔ̄. Ɔ̍ɔ̄ chu̍ā cho̍ tē ō tōsā sūɛ̍i̍ wɔ̍ɔ̍ŋnde̍ pɛ̍, fi̍nyā ndɔ̄ he̍ndū ndu̍ nyɛ̄ pālāā chōo̍ le̍ ndu̍ sīlāā le̍ wo̍?

⁸Tē ō ve̍ mbō ke̍ nyā sīlā wāā le̍nde̍ mɛ̄ɛ̍ o̍ si̍lā chu̍a̍u̍wāā ndūāā ā pīli̍āā kpo̍u̍ yɛ̍ le̍, mɛ̄ɛ̍ ko̍ŋ chɔ̍m māchɔ̄māā māā lā cho̍ chu̍a̍u̍wāā ndɔ̄ kpe̍e̍kpe̍i̍ le̍, mɛ̄ɛ̍ vīōlɔ̄ɔ̄ sa̍ma̍a̍ nyā chō ni̍.

⁹Tē ō wā pɛ̍ mī ŋ̄ tōsā sūɛ̍i̍ wɔ̍ɔ̍ŋnde̍, mī fi̍nyāā nāā chi̍e̍ēŋ nānu᷄ŋ ā hāndu̍ nāā nyɛ̄ pālāā chōo̍ le̍ nāā sīlāā pɛ̍, bɛ̄ɛ̄le̍ŋ nāā ŋ̄ kē ndā ni̍. Tē ī wā yɛ̄ le̍nde̍ pɛ̍, mɛ̄ɛ̍ ŋ̄ nɔ̄ mī ŋ̄ tūēī Mɛ̄lɛ̄ka̍ fi̍nyā nāā dīōm, mbō hīōū bɛ̍ɛ̍ mɛ̄ɛ̍ nāā ŋ̄ tūɛ̄ī fi̍nyāā nāā chi̍e̍ēŋ nānu᷄ŋ di̍ōm yɛ̍, le̍ hāli̍ kpe̍ŋ mī ŋ̄ wā yōōmū kpe̍e̍kpe̍i̍.

¹⁰Fi̍nyāā ve̍lū nāā chi̍e̍ēŋ nānu᷄ŋ ndā mā hāndu̍ nāā nyɛ̄ pālāā chōo̍ le̍ te̍le̍ŋ bi̍ŋgī, le̍ nāā sīlāā mɛ̄ɛ̍ ndā nɔ̄ o̍ kɔ̄l māā ō bɛ̄ndā yɛ̍. Kɛ̄, Mɛ̄lɛ̄ka̍ ndu̍ ndu̍, nyɛ̄ pālāā o̍ hāndū nāā chōo̍ wo̍, ō chō māchūāā le̍ nāā mālāā mī ŋ̄ sīmnu᷄ŋ wānāā kāsī mɛ̄ɛ̍ ndu̍ pi̍lā cho̍ yɛ̍.

¹¹Bōōndi̍i̍ nāā ŋ̄ wā nyɛ̍ pālāā sɔ̄lāā le̍ yɔ̄ŋ wɔ̄ɔ̍ŋ nāā ŋ̄ tōsā wo̍ ve̍, bōōndi̍i̍ ke̍ŋ mī ŋ̄ tāmbu̍ kɔ̄l. Ō ve᷅ su̍ɛ̍i̍ kɔ̄l kɛ̄ndɛ̄ le̍. Kɛ̍, tē te̍le̍ŋ ti̍ŋ hīōū pɛ̍, wānāā chu̍ā si̍lā kōŋ ndā ki̍nɛ̍i̍, ō tōsā mā sīmnu᷄ŋ wānāā kɔ̄l nyūlū. Ndu̍ yɔ̍nūŋ ni̍ māā, kɔ̄l nyūlōo̍ ō wānā sɔ̍lā sānāā ā wāā Mɛ̍lɛ̄kā o̍ hɔ̄l sākpō wo̍.

¹²Le̍lāŋ, lā mīīŋgu̍ di̍āllūŋ kālāŋ sɛ̄nɛ̄īyo̍ŋ sɔ̄lā o̍ ti̍i̍nda᷄ŋ nyāā ni᷄ŋ ndu̍yɛ̍, mī lā dɛ̄ɛ̄ni̍a̍a̍ kɔ̄ltā nyālāŋ.

¹³Lā tōsā mī kāālā nyālāŋ lā wā sākpō. Ko̍ŋ to̍sā ni̍, wānāā nɔ̍ di̍āllūŋ kālā o̍ tīīnda᷄ŋ ndā nɔ̄ o̍ Mɛ̄lɛ̄ka̍ ni᷄ŋ ndo̍ le̍ wā, ā mi̍i̍ŋgūŋ kɔ̍ɔ̍lī le̍, kɛ̍, mā sɔ̄lā dīāllūŋ kāla᷄ŋ.

¹⁴Lā kīndi̍ mī lā wā o̍ kɔ̄ltā nyūlū ni᷄ŋ ā wāŋndā kpo̍u̍. Ndu̍yɛ̍ o̍ ko̍ŋ kɔ̍ɔ̍lī, lā kīndi̍ mī lā wā wānāā cho̍ ā yɔ̄ŋga᷄ŋ o̍ Mɛ̄lɛ̄ka̍ lo̍. Kāni̍ fo̍ndōle̍, wānā o̍ wānā le̍ mā chē Māsānɔ̄ɔ̍ Mɛ̄lɛ̄ka̍, mɛ̄ɛ̍ mā wā wānā cho̍ ō yɔ̄ŋga᷄ŋ o̍ ndu̍ lo̍.

¹⁵Lā wā ā mānda᷄ŋ yɔ̄ŋi̍ wānā o̍ wānā nyā tɛ̄ɛ̄ŋ o̍ fu̍lā o̍ kɛ̄ndɛ̄i̍ Mɛ̄lɛ̄kɛ̍i̍ bɛ̄ŋgu̍. Ndu̍yɛ̍ vɛ̍lɛ̄, lā wā ā mānda᷄ŋ yɔ̄ŋi̍ wānā o̍ wānā nyā tɛ̄ɛ̄ŋ o̍ nɔ̍ kāā lōlɛ̍i̍yo̍, mɛ̄ɛ̍ lo̍lōo̍ ō lo᷄l nu̍āā, tē ō de᷄l o̍ nyɛ̄ o̍ nyɛ̄ pɛ̍, lo᷄l ndɔ̄ɔ̍ ta᷄ŋ ō tīu̍ lēni᷄ŋ si̍lɔ̍ yɛ̍ le̍. Wānāā nɔ᷅ kāā lōlɛ̍i̍ wāā nu̍āā wā, ndā ma᷅l sɔ̍ɔ̍ŋ ni̍, ndu̍yɛ̍ mā tɛ̄ɛ̄mbu̍u̍ yōōmūlā wānāā fāŋgā fa̍ŋgā.

¹⁶Ndu̍yɛ̍ vɛ̍lɛ̄, lā māndāŋ yɔ̄ŋi̍ wānā wā nyā tɛ̄ɛ̄ŋ mbō wā o̍ nīīlū sūūndɛ̍i̍ ni̍ŋ, kɛ̄lɛ̄ŋgāā mbō pɛ̄ɛ̄sā sɔ̄ɔ̍ŋ cho̍ ā Mɛ̄lɛ̄ka̍ o̍kɔ̄ɔ̄ wo̍ŋ, mɛ̄ɛ̍ I̍īsɔ̄ to̍sā yɛ̍. Kāni̍ fo̍ndōle̍, I̍īsɔ̄ ndu̍ ndu̍, le̍ nyɛ̄ dīāā pāāle̍ pi᷅lɔ̍ɔ̍, di̍ o̍ nɔ̍ o̍ yu̍ŋgu̍ ndāā chōo̍ māā po̍ tāse̍ wo̍, mbo̍ pīsī ndu̍ pɔ̄mbɔ̄ ndɔ̍ o̍ bā.

¹⁷Nyā pi̍lā lā sīnā māā o̍ mɛ̄ɛ̄lu̍lāŋ ni᷅ŋ, I̍īsɔ̄ ndu̍ o̍o̍ hɛ̍nāŋ māā fi̍nyā ndɔ̄ dɔ̍u̍ ndu̍ sālā māā po̍ ndɔ̍ tāse̍, kɛ̍, mi̍ fi̍nyā ndɔ̄ kɛ̍ɛ̄. Ō he᷄l ni᷅ŋ cha᷄ŋndo̍ fe̍e̍, le̍ hāli̍ kpe̍ŋ mī ndu̍ o̍o̍ sɔ̍lā sālā kōŋ, kɛ̍, nɛ̄i̍ o̍ nɛ̄ī ve̍ lɛ̍ mī ndu̍ o̍o̍ nɔ̍lā nyɛ̄ o̍ to̍sā wo̍ māŋgālā le̍.

¹⁸Nyā pi̍lā lā sīnā nāā nyā si᷄m ndā. Nya̍ nya̍ cho̍ māā wāŋndā I̍sɔ̄lūɛ̄ī le̍. Kāni̍ fo̍ndōle̍, nda̍ nda̍, mā hūŋ o̍ Pēmbīī Sa̍a̍nāīve̍ bɛ̄ŋgu̍, mā chā yīŋndē wūle̍ wu᷅le̍ bɛ̍ndūle̍ŋ lēchōo̍ ā nyūmmā kpīŋgbi̍ma̍ bɛ̍ndūa̍ŋ ā hūēīyīī fūkū fūkūī bɛ̄ndūe̍i̍.

¹⁹Mā tūɛ̄ī mi̍ bu̍lo̍o̍ sūāā, ndu̍yɛ̍, mā tūɛ̄ī mi̍ dīōmndo̍ sūāā. Mi̍ dīo̍m so̍o̍nu᷄ŋ ndo̍ lūēī ndā sīōōŋnde̍ ta̍u̍ ta̍u̍. Mā nyɔ̄ɔ̄lū māā dīōm kōŋ su̍āā lɛ̄ nāā ndā chūā le̍.

²⁰Mā dīmī māā nyɛ̄ dīōm kōŋ sōō wo̍, ō hīōū ndā māyōōmū. Kāni̍ fo̍ndōle̍, mbo̍ dīmī āā, “Wānā o̍ wānā pi̍lāŋ pe̍mbēi̍ he̍ī pɛ̍, lā lo̍ ndu̍ vīīyo̍ ā pōūta̍ŋ mbō vī, ō wā bɛ̍ɛ̍ chɔ̍lū.”

²¹Mi̍ sɔ̄ɔ̍ŋ ndā chē lo̍ŋ ndo̍ŋ ŋ̄ dūāū ndā sīōōŋnde̍ tāu̍. Mi̍ Mūu̍sē pi̍lā di̍mī āā, “Mi̍ nyi̍i̍yā kpa᷅ kpā ā sīōōŋnde̍.”

²²Kɛ̍ nya̍ nya̍, fo̍ndāŋ nyā hīŋ ndo̍ ō chō yɛ̍, o̍ Pēmbīī Sa̍a̍yɔ̄ŋnde̍ nyā hīŋ ni̍. Mɛ̄lɛ̄ka̍ yɔ̍ŋgū yo̍o̍mōo̍ wo̍ o̍ ndu̍ lo̍ chi̍e̍e̍ nyā hīŋ ni̍, ndu̍ yɔ̍nūŋ ni̍ māā Chūlu̍sɛ̄lɛ̄m o̍ cho̍ chōo̍ cho̍o̍ wo̍, nāā Ki̍i̍la̍a̍ Mɛ̄lɛ̄ka̍a̍, wa̍a̍la̍ŋ o̍ wa̍a̍la̍ŋ ni᷄ŋ, ā chō wā.

²³O̍ ku̍ndā kɔ̄l kɛ̄ndɔ̄ɔ̍ chōo̍ nyā hīŋ ni̍, ndu̍ yɔ̍nūŋ ni̍ māā Mɛ̄lɛ̄ka̍ chūāūwāā ndūāā tāsi̍a̍a̍, ā o̍ po̍o̍nyi̍āā dīōlā ndālāŋ o̍ yāu̍ ndɔ̄ɔ̍ ni᷄ŋ ɛ̄chɛ̍nɛ̄. Mɛ̄lɛ̄ka̍ o̍ cho̍ wānā ki̍ālāā īyāmāā le̍ ŋ̄wāŋndā chīe̍e̍ kpo̍u̍ wo̍, nāā ndu̍ chu̍ā nyā hīŋ ni̍. Wānāā vi᷅ wā, ā cho̍ sākpō Mɛ̄lɛ̄ka̍ o̍ hɔ̄l ndu̍yɛ̍, mbo̍ tōsā mā sīmnu᷄ŋ mɛ̄ɛ̍ o̍ hɛ̍nāŋ ndā mā wā yɛ̍ wā, nāā ndā chūā nyā hīŋ ni̍.

²⁴Chi̍i̍sū o̍ to̍sā mi̍ kpe̍ma̍ sɛ̍nɛ̄ī lūɛ̄ī Mɛ̄lɛ̄ka̍ tɛ̄ɛ̄ŋ ndā ŋ̄wāŋndā chīe̍e̍ wo̍, nāā ndu̍ chu̍ā nyā hīŋ ni̍. Kōo̍ma̍ ndūa̍ŋ mā fu̍lā le̍ nāā ni̍. Ndu̍yɛ̍, o̍ kōo̍ma̍ māŋ ni᷄ŋ Mɛ̄lɛ̄ka̍ chūe̍l nāā būŋgɛ̄i̍, le̍ nāā nyɛ̍ bɛ̍ndā mbo̍ hīāū ā kōo̍ma̍ E̍bɛ̄ɛ̄l wāŋ ndo̍ kīo̍o̍ ni̍.

²⁵Le̍lāŋ, lā māndāŋ yɔ̄ŋi̍ nyā kɛ̄ɛ̍ wa᷅nā su̍āā nāā nyā chūā wo̍ dīōm. Wānāā kɛ̍ɛ̍ wānā di̍mu̍l wāŋndā yōōŋgu̍ Mɛ̄lɛ̄ka̍a̍ o̍ chi̍e̍ēŋndo̍ ni᷄ŋ ndo̍ dīōm ndā, ā chīndā le̍. Le̍lāŋ, nāā i̍ yɔ̍nu̍ŋ ndɔ̍ ā ndā le̍nde̍, nāā ŋ̄ tu̍e̍ī ha̍ā mi̍ wānā chɛ̍ŋ ɛ̄chɛ̍nɛ̄ wo̍ ō sūāā nāa̍ na̍a̍ chūā wā, tē ō wā pɛ̍ mī ŋ̄ kɛ̄ɛ̍ ndu̍ dīōm, ŋ̄ nɔ᷅ mɛ̍ɛ̍ o̍ mɛ̄ɛ̍ chi̍ndāā le̍.

²⁶A̍ bōōndi̍i̍ ke̍ŋ sīndɛ̄, mi̍ dīōm ndɔ̄ɔ̍ hīīlūū chi̍e̍ēŋndo̍. Kɛ̍, ā bōōnde̍i̍ he̍ī ndi̍ ndi̍, ō mēnāŋ po̍, mbo̍ dīmī āā, “I̍ cho̍ vɛ̄lɛ̄ chɔ̄ɔ̄lū chi̍e̍ēŋndo̍ hīīlūū, ndu̍yɛ̍, ha̍la̍a̍ chōo̍ cho̍o̍ bɛ̍ɛ̍, I̍ cho̍ ndu̍ hīīlūū.”

²⁷Dīōmndā o̍ di̍mi̍ lāŋ āā, “I̍ cho̍ vɛ̄lɛ̄ chɔ̄ɔ̄lū chi̍e̍ēŋndo̍ hīīlūū,” lāŋ lā chɔ᷄m nāā māā nyɛ̄ o̍ nyɛ̍ hi̍i̍lu̍ŋ, mu̍ŋ yɔ̍nūŋ ni̍ māā nyɛ̄m Mɛ̄lɛ̄ka̍ tōōsi̍āā wo̍ŋ, ō chō mu̍ŋ fāŋā kpo̍u̍, o̍ ko̍ŋ mī nyɛ᷄m hi̍i̍lūŋ te̍ wo̍ŋ mu̍ŋ lo̍.

²⁸Le̍lāŋ, lā ŋ̄ mēlnu᷅ŋ Mɛ̄lɛ̄ka̍ bāli̍ka̍, kāni̍ fu̍u̍le̍ ō ke̍ nāā māsāle̍ hi̍i̍lūŋ te̍ le̍ŋ. Lā ŋ̄ yīlnu᷅ŋ ndu̍ bāli̍ka̍, ndu̍yɛ̍, mī ŋ̄ sōōlu̍u̍ ndu̍ mɛ̄ɛ̍ o̍ hi̍nī kɔ̍l lɛ̍, kīo̍o̍ ndu̍ bɛ̄ɛ̄le̍ŋ, mī ŋ̄ nɔ̄ sīōōŋīī ndūɛ̍i̍.

²⁹Kāni̍ fo̍ndōle̍, Mɛ̄lɛ̄ka̍ nāā ŋ̄ chō ho̍ō pīɛ̄īyo̍ wo̍, mɛ̄ɛ̍ yīŋndē bɛ̄ndūle̍ŋ lē chō nu̍āā yɛ̍, le̍nde̍ o̍ cho̍ ni̍, nyɛ̄ o̍ nyɛ̄ kpo̍u̍ lōmɔ̄ɔ̍.