Read Southern Kisi Hi̍būlūi̍ya̍ 13 Bible Online

Hi̍būlūi̍ya̍ 13 - Southern Kisi bible

Hi̍būlūi̍ya̍ 13

¹Lā hīo̍u̍ lāchi̍ ā kāāli̍āŋndo̍ vēllāā vēllē, māā wānāā lāāla᷄ŋ o̍ Ki̍li̍tī ni̍ŋ.

²Lā ma᷅l mīāllā yīyāā o̍ chīɛ̄īlā nyālāŋ ni᷄ŋ te̍. Wāŋndā ā pūm ā lo̍ ni᷅ŋ o̍ mīāllā yīyāā, mā yīyā ki̍i̍la̍a̍ Mɛ̄lɛ̄ka̍a̍ ā sīnā pɛ̍ŋgu̍ le̍.

³Lā pu̍ɛ̍ɛ̍nu᷄ŋ ā wānāā cho̍ o̍ bīyɔ̄ɔ̍ ni᷄ŋ ndā le̍. Lā chu̍ā nyā pi̍lā māā nyā ndā cho̍ o̍ bīyɔ̄ɔ̍ ni᷄ŋ ni̍. Lā pu̍ɛ̍ɛ̍nu᷄ŋ vɛ̍lɛ̄ ā wānāā cho̍ o̍ nyɛ̄ pālāā ni᷄ŋ ndā le̍. Lā chu̍ā nyā pi̍lā māā nyā ndā cho̍ o̍ nyɛ̄ pālāā kōŋ ni᷄ŋ ni̍.

⁴Wānā o̍ wānā lā kɛ̄si̍ nɔ̄ɔ̍ lēbɛ̄ɛ̄. Chɛ᷅l mī dɛ̍nɛ̍ o̍ dɛ̍nɛ̍ ke̍e̍ku̍ nyā tɛ̄ɛ̄ŋ nyā wānā che᷅le̍ŋ te̍, mɛ̄ɛ̍ nyā la̍a̍ nu̍m kɛ̄lɛ̄ŋgāā mɛ̄ɛ̍ nyā pɔ̍nɔ̍ nu̍m. Lā kɛ̄si̍ŋ o̍ kɔ̄l māā wānā o̍ wānā su̍u̍ndā ndā wānā ndā cho̍ o̍ nɔ̄ ni̍ŋ te̍ wo̍ pɛ̍, wānā ko̍ŋ Mɛ̄lɛ̄ka̍ chō ndu̍ hūnɔ̄ɔ̄ yāmɛ̍i̍ kīlūl.

⁵Lā du̍a̍ū kɔ̄ltā nyālāŋ o̍ kāālā ŋ̄ka̍ni̍o̍o̍ le̍. Ndu̍yɛ̍, lā hīni̍ kɔ̍l ā nyɛ̄ nyā nɔ̄ wo̍. Kāni̍ fu̍u̍le̍, Mɛ̄lɛ̄ka̍ dīmi̍ āā, “I̍ fe̍ŋāŋ nyā īkɛ̄i̍ le̍, ndu̍yɛ̍, o̍ nyɛ̄ pālāā ni᷄ŋ bɛ̍ɛ̍ I̍ me᷅l nya̍ nya̍ kpe̍e̍le̍ le̍.”

⁶Le̍lāŋ lā ŋ̄ nɔ̄nu᷅ŋ kɔ̄ltā sīmūlāāla̍ŋ, mī wānā o̍ wānā o̍ dīmi̍ āā, “Māsānɔ̄ɔ̍ Mɛ̄lɛ̄ka̍ ndu̍ mālā yā ni̍. Sīōōŋīī bi̍ī yā le̍. Ndu̍yɛ̍, wānā nɔ̍lā yā nyɛ̄ o̍ nyɛ̄ yɔ̄ŋ te̍.”

⁷Lā lōōnu̍ŋ ndɔ̍ ā wānāā tāsi̍a̍a̍ wā nyā chīla̍ŋ mā dīmūl nyā sūɛ̍i̍ Mɛ̄lɛ̄kɛ̍i̍ yā. Lā lōōnu̍ŋ ndɔ̍ ā mɛ̄ɛ̍ kūɛ̍i̍la̍ ndālāŋ lā wā yɛ̍, o̍ ko̍ŋ kɔ̍ɔ̍lī, ā mɛ̄ɛ̍ ndā vī yɛ̍. Lā to᷄l ndā kɔ̄ɔ̄lī ā mɛ̄ɛ̍ ndā āā dɔ̍ū tīīnda᷄ŋ ndāā o̍ Mɛ̄lɛ̄ka̍ ni᷄ŋ yɛ̍.

⁸Chi̍i̍sū Ki̍li̍tī ō fe̍ŋāŋ le̍cho̍o̍ le̍. Mɛ̄ɛ̍ o̍ wā sīndɛ̄ yɛ̍, pɛ̄ŋgo̍o̍ ho̍ō bɛ̍ɛ̍, le̍nde̍ ko̍ni̍ o̍ cho̍ ni̍. Ndu̍yɛ̍, o̍ sīɔ̄dīi̍ lāchīo̍o̍ ni᷄ŋ bɛ̍ɛ̍ le̍nde̍ ko̍ni̍ o̍ cho̍ wā ni̍.

⁹Lā chɛ᷅l mī pɛ̄ɛ̄kūlā yɛ̍ yɛ̍la̍ wāŋndā chō hūnɔ̄ɔ̍ lāŋ mī lā fāŋā nyā o̍ nɛ̄i̍ tōnyāā chōo̍ le̍. Ō bɛ̄ndā mī lā tīīndāŋ kɛ̍ndɛ̄i̍ Mɛ̄lɛ̄kɛ̍i̍ le̍ kpāāyāā sɔ̄lāā o̍ nyi̍nāā nyāā ni᷄ŋ, mbo̍ hīāū ā sāwālā ku̍u̍nā nyɛ̄m dīāŋ ŋ̄ pūm dīo̍o̍ lāŋ tīīnda᷄ŋndo̍. Wānāā ti̍i̍ndāŋ sāwālāŋ nda᷅ŋ chūāā wā ā sɔ̍lā mālā o̍ mālā o̍ lāŋ chūāā ni᷄ŋ te̍.

¹⁰Wānāa̍ so̍lī sa̍lāla̍ŋ o̍ chīɛ̄ī pīɛ̄īyāā Mɛ̄lɛ̄ka̍a̍ ni᷄ŋ ndā, ā nɔ̄ di̍ mā dē nyɛ̄m ndā sōlī sa̍lāa̍ o̍ māāŋndo̍ chōo̍ wo̍ŋ. Kɛ̍ ma̍āŋ na̍a̍ na̍a̍ ŋ̄ nɔ̄ ho̍ō wo̍, ā nɔ̍ di̍ mā dē sālā wāā lēchōo̍ le̍.

¹¹Tē māsā wānāā sōlīāā lāsa̍lāa̍ ō sōli̍ sālāā le̍ wāŋndā pɛ̍, ō chu̍ā kōo̍ma̍ chɔ̄lūāā kāŋ ō lūɛ̄ī ā māŋ o̍ chīɛ̄ī ndā sōlī sālāā wo̍, o̍ Fo̍ndāŋ Kāsi̍ hi̍o̍ū kpo̍u̍ wo̍ ni̍ŋ. Tē ō lūɛ̄ī ā māŋ pɛ̍, ō yɔ̄ŋgu̍ māŋ māā sālā o̍ Mɛ̄lɛ̄ka̍ lo̍, le̍ yɔ̄ŋndā wɔ̄ɔ̍ŋndā wāŋndā chīe̍e̍ya̍. Kɛ̍ vīsīāā vīlɛ̍i̍ya̍a̍ kāŋ ki̍nɛ̍i̍, ā fāŋāŋ ā ndā chi̍e̍e̍ ā kɔ̍ lo᷅m ndā.

¹²Le̍ sābū kōŋ ndā fāŋāŋ ā Chi̍i̍sū chi̍e̍e̍ ni̍ mā kɔ̍ di̍ī ndu̍. Ō sɔ̄lā pi̍ɔ̍mndo̍ chi̍e̍e̍ le̍, le̍ hāli̍ kpe̍ŋ mbō chu̍ā kōo̍ma̍ ndɔ̄ma̍ ndu̍ pi̍lāŋ, mbō fāŋā yɔ̄ŋndā wɔ̄ɔ̍ŋndā wāŋndā chīe̍e̍ya̍ tōsā lāŋ, ndu̍yɛ̍, mā sīmnu᷄ŋ ā di̍a̍ndāā Mɛ̄lɛ̄ka̍ o̍ hɔ̄l.

¹³Le̍lāŋ, nāā bɛ̍ɛ̍, lā ŋ̄ chɔ̄nu᷅ŋ mī ŋ̄ ma᷄l chi̍o̍o̍, mī ŋ̄ kūɛ̄ nāā Chi̍i̍sū chu̍ā, nāā bɛ̍ɛ̍ mī ŋ̄ kɔ̍ sɔ̍lāŋ bɛ̄ɛ̄la̍ tāmbɛ̍i̍la̍ o̍ sɔ̍lā lāŋ.

¹⁴Ŋ̄ nɔ̍ chi̍e̍e̍ o̍ chi̍e̍ēŋndo̍ ho̍ō chōo̍ nānu᷄ŋ mbō wā le̍ fɛ̍ɛ̍ŋ ā fɛ̍ɛ̍ŋ te̍. Kɛ̍, ŋ̄ chō lēhɔ̄l o̍ nɛ̄ī le̍ chi̍e̍e̍ nāā ŋ̄ nɔ̄ le̍ hūnɔ̄ɔ̄ wāā wo̍.

¹⁵Le̍lāŋ, lā ŋ̄ hīōūnu᷅ŋ lāchī ā Mɛ̄lɛ̄ka̍ sāŋgālāā te̍le̍ŋ o̍ te̍le̍ŋ. O̍ Chi̍i̍sū ni̍ŋ sānāā nāā ŋ̄ yɔ̄ŋgū sāŋgālāā ho̍ō ni̍, o̍ cho̍ māā sālā o̍ Mɛ̄lɛ̄ka̍ lo̍ wo̍. Wānāā di̍mūl wa᷅ŋndā māā Chi̍i̍su̍ cho̍ māsānɔ̄ ndāā ni̍ wā, sāŋgālā ko᷄ŋ cho̍ sālā ndā yɔ̄ŋgū Mɛ̍lɛ̄kā wo̍ ni̍.

¹⁶Lā pu̍ɛ̍ɛ̍nu᷄ŋ le̍ wāŋndā kɛ̄ndɛ̄i̍ tōsāllo̍ le̍. Ndu̍yɛ̍ lā pīɔ̄ūvi̍āŋ nyɛ᷅m nyā nɔ̄ wo̍ŋ nyā wānāā cho̍ o̍ bālā hāvɛ̍i̍la̍ŋ ni᷄ŋ ndā. Sālālā Mɛ̄lɛ̄ka̍ hīnī kɔ̍l lāŋ lā cho̍ lāŋ ni̍.

¹⁷Lā tūe̍i̍ wānāā cho̍ nyā chīla̍ŋ ndā dīōm. Lā tōsā nyɛ᷅ ndā dīmūl nyā wo̍. Ndā cho̍ nyi̍nāā nyāā māndāā ni̍. Kāni̍ fu̍u̍le̍, ā sīm ni̍ŋ fɛ̍ɛ̍ŋ Mɛ̍lɛ̄kā o̍ hɔ̄l, mā dɔ̄ūnu᷄ŋ ko̍na̍ ā wāli̍ nda̍ nda̍ chō tōsāā wo̍ o̍kɔ̄ɔ̄. Le̍lāŋ, lā tūe̍i̍ ndā dīōm le̍ mā wā ā kɔ̄l kɛ̄ndɛ̄ o̍ wāli̍ ndāā to̍sāā ni᷄ŋ. Tē lā tūi̍i̍ ndā dīōm te̍, ā wā ni̍ŋ wa̍llo̍ kɛ̄ ā kɔ̄l tāmbɛ̍i̍yo̍, ndu̍yɛ̍ ke̍ŋ i̍ mālā nyā le̍.

¹⁸Lā hīo̍u̍ lāchi̍ ā Mɛ̄lɛ̄ka̍ pīɛ̄īyo̍ le̍ nāā. Nāā pi̍lā ŋ̄ sīnā māā kɔ̄ltā nāālāŋ lā chō wa̍la̍ŋ nāā Mɛ̄lɛ̄ka̍ wāā tɛ̄ɛ̄ŋ, kāni̍ fu̍u̍le̍, ŋ̄ hɛ̄nāŋ mī ŋ̄ tōsā nyɛ̍ bɛ̍ndā le̍ tōsāā wo̍ o̍ nɛ̄ī o̍ nɛ̄ī ni̍ŋ.

¹⁹Tāāma̍, I̍ cho̍ wɔ̄ nyā kpo̍u̍ nyɔ̍ɔ̍lōo̍ māā, lā pīɛ̍i̍ Mɛ̍lɛ̄kā le̍ yā, le̍ mī I̍ ke̍le̍ŋa̍ fo̍ndāa̍ sɔ̄lā le̍ mīīŋgōo̍ nāā nyā chūā.

²⁰Mɛ̄lɛ̄ka̍ ō mīŋgi̍ Māsānɔ̍ nāā Chi̍i̍su̍ yōōmū mbo̍ sīīŋgūū ndu̍ wānā māndāā lāsāā bɛ̄ndōo̍, o̍ māndā nāā ŋ̍ cho̍ wānāā ndūāā wā wo̍. He̍ī yɔ̄nu̍ŋ sānāā ā pīɔ̍m o̍ sɔ̍lā wo̍. Ndu̍yɛ̍, pīɔ̍m ndɔ̄ ko̍ŋ, ndu̍ yi̍i̍ kpe̍ma̍ fɛ̍ɛ̍ŋ fɛ̍ɛ̍ŋndo̍ Mɛ̄lɛ̄ka̍ tɛ̄ɛ̄ŋ ndā ŋ̄wāŋndā chīe̍e̍ ni̍. Le̍lāŋ, I̍ cho̍ pīɛ̄īle̍ŋ māā Mɛ̄lɛ̄ka̍ o̍ ke᷅ wa᷅ŋndā kɔ̄l nyūlōo̍ wo̍,

²¹ō ke̍ nyā nyɛ̄ o̍ nyɛ̄ kɛ̄ndɛ̄ le̍ mī lā nɔ̄lā mī lā tōsā nyɛ̄ o̍ hɛ̍nāŋ māā lā tōsā fɔ̍. Ndu̍yɛ̍, I̍ cho̍ pīɛ̄īle̍ŋ māā Mɛ̄lɛ̄ka̍ tōsā sānāā o̍ Chi̍i̍sū Ki̍li̍tī ni̍ŋ mī ŋ̄ sīmnu᷄ŋ mɛ̄ɛ̍ o̍ ye̍e̍mā nāā mī ŋ̄ wā yɛ̄ fɔ̍. Mbɔ̄ wāŋndā ā ke̍ Chi̍i̍sū Ki̍li̍ti̍ bɛ̄ɛ̄le̍ŋ le̍ fɛ̍ɛ̍ŋ ā fɛ̍ɛ̍ŋ fɔ̍. Āmi̍i̍nā.

²²I̍ cho̍ nyā nyɔ̄ɔ̄lōo̍ chāāŋāā nīāā wānāā lāāla᷄ŋndā, māā lā bīūnu̍ŋ, mī lā ya᷄ŋ nīlāŋ nyɛ̄ kɛ̄ndɛ̍ī o̍ dīōmndā nyɔ̄ɔ̄lāālā yā I̍ po̍o̍nyi̍āā la᷅ŋ nāā nyā chūā lāŋ. Kāni̍, yāu̍ kālāā ō bēndu̍ bɛ̍ɛ̍ le̍.

²³Lā sīnā pɛ̍ŋgu̍ māā ā ma᷄l chāāŋ nāā Ti̍mo̍tī, nāā o̍ wā o̍ chīɛ̄ī mānyūmndo̍ ni᷄ŋ ndā. Tē ō kēle̍ŋā yā kōmāl pɛ̍, mɛ̄ɛ̍ nāā ndu̍ ŋ̄ chō hūnɔ̄ɔ̄ nyā yīlɔ̄ɔ̄.

²⁴Lā yi᷄l lā wānāā nyāā bānāā kpo̍u̍, ā wānāā Mɛ̄lɛ̄ka̍a̍ ā pīli̍āā kpo̍u̍. Wānāā lāāla᷄ŋāā chɛ̍ŋ lɛ᷅ŋndē I̍ta̍līle̍ŋ ndā bɛ̍ɛ̍, ā yi᷄l nyā lāpi̍.

²⁵Mbɔ̄ Mɛ̄lɛ̄ka̍ yīyāŋ nyā chōo̍ kpo̍u̍. Āmi̍i̍nā.