Read Southern Kisi Hi̍būlūi̍ya̍ 2 Bible Online

Hi̍būlūi̍ya̍ 2 - Southern Kisi bible

Hi̍būlūi̍ya̍ 2

¹Le̍ he̍ī, ŋ̄ nɔ̄ mī ŋ̄ ya᷄ŋ nīlāŋ nyɛ̄ kɛ̄ndɛ̄ kɛ̍ndɛ̍ī o̍ dīōmndā nāā ŋ̄ tūēī la᷅ŋ ndāŋ, yɔ̄ŋi̍ nāā ŋ̄ ma᷄l nɛ̍i̍ tōnyāā.

²Ŋ̄ sīnā māā yōōŋgū ki̍i̍la̍a̍ Mɛ̄lɛ̄ka̍a̍ hīŋ ndo̍ chō tōnyā. Wānā o̍ wānā tɛ̍ɛ̍mbu̍u̍ yōōŋgū kōŋ pɛ̍, o̍ ko̍ŋ kɔ̍ɔ̍lī mbō kɛ̄ɛ̍ le̍ nyɛ̄ o̍ di̍mi̍ wo̍ tōsāā pɛ̍, Mɛ̄lɛ̄ka̍ tūsi̍ ndu̍ nyɛ̄ nɛ̄īyāā chōo̍ mɛ̄ɛ̍ i̍ wa᷅ le̍tu̍u̍ le̍ ndu̍ yɛ̍.

³Mɛ̄ɛ̍ i̍ cho̍ yɛ̄ le̍nde̍ yɛ̍, nāā wānāā tu̍e̍ī yōōŋgōo̍ ā pīŋī bɛ̄ndū Mɛ̄lɛ̄ka̍ pīŋī wa᷅ŋndā wo̍ wā, tē ŋ̄ sāāla̍ŋ ndu̍ le̍, ŋ̄ nɔ̍lā mī ŋ̄ hɛ̄lu᷄ŋ o̍ nyɛ̄ nɛ̄īyāā kōŋ ni᷄ŋ kpo̍so̍ŋ te̍. Māsānɔ̄ɔ̍ Mɛ̄lɛ̄ka̍ pi̍lā fɛ̍lɛ̍ŋ di̍mu̍l wāŋndā yōōŋgōo̍ ho̍ō. Wānāā tu̍e̍ī dīōmndā o̍ di̍mi̍ lāŋ ndāŋ, ndā chɔ̍m nāā wa̍la̍ŋ ni̍ māā tōnyā dīōmndā lāŋ lā chō ni̍.

⁴Mɛ̄lɛ̄ka̍ bɛ̍ɛ̍ mbo̍ chɔ̄m māā yōōŋgōo̍ ho̍ō chō tōnyā. Ō tōsā he̍ī sānāā ā sɔ̄ɔ̍ŋ lākpālūŋ o̍ to̍sā wo̍ŋ, ā sɔ̄ɔ̍ŋ kɔ̄ndɔ̄fi̍llo̍ŋ, ā ka̍a̍ma̍ālā yɛ̍ yɛ̍la̍ŋ, vɛ̄lɛ̄ ā pi̍ɔ̍u̍ o̍ pīɔ̄ū wāŋndā nyɛ̄m Nyi̍nā Kāsīo̍o̍ kē wa᷅ŋndā wo̍ŋ ndo̍ŋ. Mbo̍ pīɔ̄ū ndā mu̍ŋ kpɛ̍ kpɛ̍ mɛ̄ɛ̍ ndu̍ pi̍lā hɛ̍nāŋ yɛ̍.

⁵Chi̍e̍ēŋ nāā ŋ̄ chō ho̍ō īsɔ̄ɔ̍ di̍mī ā ndu̍ o̍kɔ̄ɔ̄ nānu᷄ŋ māā ō chō hūnɔ̄ɔ̄ wā wo̍, ō cho̍ ki̍i̍la̍a̍ Mɛ̄lɛ̄ka̍a̍ le̍ Mɛ̄lɛ̄ka̍ hāndū ni̍ŋ lāmāsā lēchōo̍ le̍.

⁶Ī chō ī dīmīa̍ŋ o̍ fo̍ndāŋ pūm o̍ Yāu̍ Mɛ̄lɛ̄ka̍a̍ ni᷄ŋ āā, “Vɛ̄ɛ̄ kɛ̍i̍ wānā chi̍o̍o̍ chō yɛ̄ le̍ nūm Mɛ̄lɛ̄ka̍ mā dɔ̄ū kɔ̄llo̍ o̍ ndu̍ lo̍ nu̍āā kpɛ̍? Vɛ̄ɛ̄ wa᷅nā chi̍o̍o̍ chō yɛ̄ mā bu̍u̍lāŋ ā ndu̍?

⁷Tōōsīāā ŋ̄ tōōsi̍āā ndu̍ wo̍, ki̍i̍la̍a̍ Mɛ̄lɛ̄ka̍a̍ ā hīōū ndu̍ ko̍ ti̍ŋ cho̍be̍, ko̍ŋ bɛ̍ɛ̍ le̍ te̍le̍ŋ bi̍ŋgī ko̍ni̍. Ndu̍yɛ̍ mā kē ndu̍ nāŋɔ̄ɔ̍ ā bɛ̄ɛ̄le̍ŋ tāu̍.

⁸A̍ to̍sā mi̍ nyɛ̄ o̍ nyɛ̄ fe̍e̍ wa᷅ wānā chi̍o̍o̍ o̍ bā bɛ̄ŋgu̍.” Dīōmndā po̍o̍nyi̍āŋ la᷅ŋ māā Mɛ̄lɛ̄ka̍ tōsā mi̍ nyɛ̄ o̍ nyɛ̄ fe̍e̍ wa᷅ wānā chi̍o̍o̍ o̍ bā bɛ̄ŋgu̍ lāŋ, lā chɔ᷄m māā nyɛ̄ o̍ nyɛ̄ cho̍ lo᷅ mbō kɛ̄ɛ̍ wā wānā chi̍o̍o̍ o̍ bā bɛ̄ŋgu̍ le̍. Kɛ̍, ŋ̄ chi̍ wɔ̍ bo̍o̍nde̍i̍ he̍ī mī nyɛ̄ o̍ nyɛ̄ fe̍e̍ wā wɔ̄ wānā chi̍o̍o̍ o̍ bā bɛ̄ŋgu̍ le̍.

⁹Kɛ̍ ndu̍yɛ̍, Chi̍i̍su̍ nāā ŋ̄ chō chɔ̄ɔ̍ ni̍, mi̍ nyɛ̄ o̍ nyɛ̄ fe̍e̍ wa᷅ ndu̍ o̍ bā bɛ̄ŋgu̍. Mɛ̄lɛ̄ka̍ tōsā mi̍ ki̍i̍la̍a̍ Mɛ̄lɛ̄ka̍a̍ ā hīāū ndu̍ ko̍ ti̍ŋ cho̍be̍, ko̍ŋ bɛ̍ɛ̍ le̍ te̍le̍ŋ bi̍ŋgī ko̍ni̍. He̍ī yɔ̄nu̍ŋ le̍ mī Mɛ̄lɛ̄ka̍ tōsāl nāā kɛ̄ndɛ̄i̍ ndūɛ̍i̍ mī Chi̍i̍sū vi᷅ le̍ ŋ̄wāŋndā chīe̍e̍ kpo̍u̍. Le̍ nyɛ̄ nɛ̄īyāā Chi̍i̍sū ke̍e̍ku̍ lēni᷄ŋ ndo̍ ā pīɔ̍m o̍ sɔ̍lā wo̍, mi̍ Mɛ̄lɛ̄ka̍ kē ndu̍ nāŋɔ̄ɔ̍ ā bɛ̄ɛ̄le̍ŋ tāu̍

¹⁰Mɛ̄lɛ̄ka̍ to̍o̍si̍āā nyɛ̄ o̍ nyɛ̄ fe̍e̍ ni̍. Ndu̍yɛ̍, ndu̍ cho̍ tōsāā ni̍ mi̍ nyɛ̄ o̍ nyɛ̄ fe̍e̍ wa᷅ kɔ̄la̍ŋ mɛ̄ɛ̍ o̍ nɔ̍ le̍ wāā yɛ̍. Le̍lāŋ, ō bɛ̄ndā mi̍ Mɛ̄lɛ̄ka̍ tōsā mi̍ Chi̍i̍sū ke̍e̍kū o̍ nyɛ̄ pālāā ni᷄ŋ, le̍ mbō sōli̍ wāli̍ ndɔ̄ɔ̍ lēbōl. He̍ī yɔ̄nu̍ŋ le̍ mī wānāā fāŋgā fa̍ŋgā ā sīmnu᷄ŋ chu̍a̍u̍wāā ndɔ̄, ndu̍yɛ̍, ndā bɛ̍ɛ̍ mā sɔ̄lā nāŋɔ̄ɔ̄ ndɔ̄ɔ̍. Kāni̍ fu̍u̍le̍, Chi̍i̍su̍ cho̍ ndā lāsīsi̍ lāchi̍ ni̍ le̍ mā sɔ̄lā pīōŋɔ̄ɔ̍.

¹¹Ndu̍ Chi̍i̍sū o̍ to̍sā ho̍ō mī wāŋndā sīmnu᷄ŋ wānāā sākpō Mɛ̄lɛ̄ka̍ o̍ hɔ̄l lo̍ ni̍, ā wānāā o̍ to̍sā mā wā wānāā sākpō Mɛ̄lɛ̄ka̍ o̍ hɔ̄l lā, nda̍ nda̍ fi̍nyā pīlɔ̍ɔ̍ ndā chō ni̍. Le̍ sābū kōŋ, si̍ɔ̍mbu̍lā cho̍ Chi̍i̍su̍ le̍ ndā vēēlu̍ āā pɔ̄mbūāā ndūāā le̍.

¹²Mbo̍ dīmūl Mɛ̄lɛ̄ka̍ āā, “I̍ cho̍ pɔ̄mbūāā nīāā dīmūl ā nūm o̍kɔ̄ɔ̄. Tē wānāā nūmndā chūūŋgi̍āŋ pɛ̍, I̍ cho̍ lāsīsi̍ ndā tɛ̄ɛ̄ŋ mī I̍ li̍sā nu̍m.”

¹³Mbo̍ dīmī vɛ̄lɛ̄ āā, “I̍ cho̍ tīīnda᷄ŋ nūu̍ dɔ̄wɔ̄ɔ̄ o̍ Mɛ̄lɛ̄ka̍ ni᷄ŋ.” Mbo̍ dīmī vɛ̄lɛ̄ āā, “Mi̍ che᷄ŋ yā nāā chūāūwāā Mɛ̄lɛ̄ka̍ ke̍ yā wā.”

¹⁴Chūāūwāā ndūāā kāŋ ndā yɔ̍nūŋ ni̍ māā ŋ̄wāŋndā chīe̍e̍. Le̍lāŋ, Chi̍i̍sū bɛ̍ɛ̍ mbo̍ sīmnu᷄ŋ wa᷅nā chi̍e̍e̍ mɛ̄ɛ̍ ndā chō yɛ̍. He̍ī yɔ̄nu̍ŋ māā wānā to̍sā mī wāŋndā sɔ̄lā pi̍ɔ̍mndo̍ wo̍, ndu̍ yɔ̍nūŋ ni̍ māā Māsā Nyi̍nāā Wɔ̄ɔ̍ŋndā, māā mī Chi̍i̍sū tɛ̍ɛ̍mbu̍u̍ ndu̍ sānāā ā ndu̍ Chi̍i̍sū pīɔ̍m ndɔ̄ɔ̍.

¹⁵O̍ ko̍ŋ, wānāā wā o̍ chɛ̄le̍ŋ ni᷄ŋ si̍o̍o̍ŋīī pīɔ̍mnde̍ o̍ bā bɛ̄ŋgu̍, chɔ̍ŋ ā wɔ̄sīlā ndālāŋ chi̍e̍ēŋ nānu᷄ŋ fa̍ū wā, mi̍ Chi̍i̍sū bāŋā ndā.

¹⁶Ī chō ī chɔ̄mna᷄ŋ kpe̍nde̍ke̍le̍, māā ō cho̍ ki̍i̍la̍a̍ Mɛ̄lɛ̄ka̍a̍ le̍ Chi̍i̍sū hi᷅ŋ le̍ mālā le̍. Chūāūwāā māmāā E̍bīlāha᷅mnda̍ o̍ hi᷅ŋ mālā ni̍.

¹⁷Le̍ sābōo̍ ho̍ō, mɛ̄ɛ̍ mī ndu̍ o̍o̍ si̍mnu᷄ŋ o̍ nɛ̄ī o̍ nɛ̄ī ni̍ŋ, mɛ̄ɛ̍ pɔ̄mbūāā ndūāā chō yɛ̍. He̍ī yɔ̄nu̍ŋ le̍ mbō wā māsā wānāā sōlīāā lāsa̍lāa̍, o̍ nɔ᷅ nyi̍ɛ̍ɛ̍ye̍, ndu̍yɛ̍ mbō tōsā wa̍llo̍ le̍ Mɛ̄lɛ̄ka̍ sākpō wo̍. Ndu̍yɛ̍, ī yɔ̄nu̍ŋ vɛ̍lɛ̄ le̍ mī wāŋndā sɔ̄lā mālɔ̄ɔ̍ le̍ yɔ̄ŋndā ndālā wɔ̍ɔ̍ŋndāŋ.

¹⁸Ndu̍ pi̍lā bɛ̍ɛ̍ mɛ̄ɛ̍ o̍ ke̍e̍ku̍ yɛ̄ o̍ nyɛ̄ nɛ̄īyāā ni᷄ŋ, ndu̍yɛ̍ mi̍ Māsā Nyi̍nāā Wɔ̄ɔ̍ŋndā tɔ̄ɔ̄nda᷄ŋ ndu̍, le̍ he̍ī ō nɔ̄lā mbō mālā wānāā Māsā Nyi̍nāā Wɔ̄ɔ̍ŋndā ō tɔ̄ɔ̄ndāŋ ndā.