Read Southern Kisi Hi̍būlūi̍ya̍ 3 Bible Online

Hi̍būlūi̍ya̍ 3 - Southern Kisi bible

Hi̍būlūi̍ya̍ 3

¹Le̍lāŋ chāāŋāā nīāā wānāā lāāla᷄ŋndā, nyā cho̍ le̍ Mɛ̄lɛ̄ka̍ wā, nyā Mɛ̄lɛ̄ka̍ vēēlu̍ ha̍ā le̍ nyā bɛ̍ɛ̍ mī lā wā wānāā ndɔ̄ wā, lā tōfā ni̍ko̍ o̍ Chi̍i̍sū lo̍ sākpō. Ndu̍ Māsānɔ̄ɔ̍ Mɛ̄lɛ̄ka̍ vēm ni̍ māā hɔ̄ltē ndɔ̄, ndu̍yɛ̍ mbo̍ wā māsā wānāā sōlīāā lāsa̍lāa̍ wo̍, o̍ mālā nāā o̍ tīīnda᷄ŋ nāā ŋ̄ dīmi̍ ho̍ō māā ŋ̄ nɔ̄ o̍ Mɛ̄lɛ̄ka̍ ni᷄ŋ ndo̍ ni̍.

²Mi̍ Chi̍i̍sū to̍sā wa̍llo̍ sākpō le̍ Mɛ̄lɛ̄ka̍, o̍ hɛ̍li̍ ndu̍ le̍ wāli̍ ndɔ̄ɔ̍ tōsāā wo̍, mɛ̄ɛ̍ Mūu̍sē to̍sā wa̍llo̍ sākpō o̍ chīɛ̍i̍ Mɛ̄lɛ̄ka̍a̍ ni᷄ŋ yɛ̍.

³Kɛ̍ ndu̍yɛ̍, ō bɛ̄ndā mī wāŋndā ā ke̍ Chi̍i̍sū bɛ̄ɛ̄le̍ŋ mbō hīōū ā Mūu̍sē. Kāni̍ fo̍ndōle̍, wānā tāŋgūl chi̍ɛ̍īyo̍ wo̍, ndu̍ wāŋndā hīāū bɛ̍ɛ̄le̍ŋ kē ā chīɛ̄ī ndɔ̄ kālāā.

⁴Chīɛ̄ī o̍ chīɛ̍i̍ cho̍ ō tāŋgūlāā, wānā tāŋgu̍l ndu̍ ni̍. Kɛ̍ ndu̍yɛ̍, Mɛ̄lɛ̄ka̍ yɛ̄, ndu̍ to̍o̍si̍āā nyɛ̄ o̍ nyɛ̄ fe̍e̍ ni̍.

⁵Mūu̍sē ndu̍ wā māwāā bu̍ɛ̍īyo̍, o̍ to̍sā wa̍llo̍ o̍ chīɛ̍i̍ Mɛ̄lɛ̄ka̍a̍ ni᷄ŋ sākpō wo̍. Ndu̍yɛ̍, ndu̍ ndu̍ o̍o̍ chɔ᷅m wa᷅ŋndā sɔ̄ɔ̍ŋ Mɛ̄lɛ̄ka̍ ndu̍ o̍o̍ wa᷅ hu̍nɔ̄ɔ̄ ndā dīmūllo̍ o̍ lāchīo̍o̍ ni᷄ŋ ndo̍ŋ ni̍.

⁶Kɛ̍ Ki̍li̍tī ndu̍, ndu̍ cho̍ māchūāā Po̍ Mɛ̄lɛ̄ka̍a̍, o̍ cho̍ chīɛ̍i̍ Mɛ̄lɛ̄ka̍a̍ māndāā sākpō wo̍. Ndu̍yɛ̍, nāā ŋ̍ cho̍ chīɛ̄ī ndɔ̄ɔ̍ ho̍ō ni̍. Kɛ̍ ndu̍yɛ̍, le̍ mī ŋ̄ wā chīɛ̄ī ndɔ̄ɔ̍ ho̍ō mɛ̄ɛ̍ mī ŋ̄ hīōū lāchī ā kɔ̄ltā sīmūlāāla̍ŋ nɔ̄ɔ̍ ndu̍yɛ̍, mī ŋ̄ wā lēhɔ̄l o̍ nɛ̄ī le̍ nyɛ̄ o̍ di̍mu̍l nāā wo̍.

⁷Le̍lāŋ, mɛ̄ɛ̍ mī ŋ̄ tūēī nyɛ̄ Nyi̍nā Kāsīo̍o̍ dīmūl nāā wo̍. Mbo̍ dīmī āā, “Tē lā tūēī Mɛ̄lɛ̄ka̍ sūɛ̍i̍ nāā nyā chūā pāāle̍ hāūle᷅ŋ nde᷅ŋ pɛ̍,

⁸lā tōsā nyɛ᷅ o̍ di̍mūl nyā wo̍. Lā to̍sā nīlā kālu̍la̍ŋ mɛ̄ɛ̍ fi̍nyāā nyāā māmāā ā tōsā sīndɛ̄ o̍ po̍llo̍ ni᷄ŋ, mā kɛ̄ɛ̄ le̍ lūɛ̄īyɔ̄ɔ̍ Mɛ̄lɛ̄ka̍ o̍ bā bɛ̄ŋgu̍ yɛ̍ le̍. Mā tɔ̄ɔ̄nda᷄ŋ ndu̍.”

⁹Mi̍ Mɛ̄lɛ̄ka̍ dīmī āā, “Mi̍ fi̍nyāā nyāā māmāā ā tɔ̄ɔ̄nda᷄ŋ yā sīndɛ̄ o̍ po̍llo̍ ni᷄ŋ. Mā tɔ̄ɔ̄nda᷄ŋ vɛ̍lɛ̄ wāli̍ yā I̍ to̍sā wo̍. Ndu̍yɛ̍, mā sāālu᷄ŋ sɔ̍ɔ̍ŋ yā I̍ to̍sā o̍ wɔ̄sīlā be̍le̍-hi̍ɔ̍ɔ̍lu̍lāŋ ni᷄ŋ ndo̍ŋ. Kɛ̍ o̍ ko̍ŋ ni̍ŋ fa̍ū, ā wā hīōūwɔ̄ɔ̍ lāchī ā nīlā kālu̍la̍ŋ kɛ᷅.

¹⁰Le̍lāŋ yā Mɛ̍lɛ̄kā yā I̍ dɔ̍ɔ̍nu᷄ŋ tu̍mbe̍ ā wānāā kāŋ ni̍. O̍ ko̍ŋ, mi̍ di̍mī āā, ‘Kɔ̄ltā ndālāŋ lā fāŋāŋ o̍ nɛ̄ī sākpōo̍ chōo̍. Ndu̍yɛ̍, mā kɛ̄ɛ̄ sɔ̄ɔ̍ŋ yā hɛ̍nāŋ le̍ mā tōsā wo̍ŋ.

¹¹Ndu̍yɛ̍, I̍ dɔ̍ɔ̍nu᷄ŋ tu̍mbe̍ ā ndā, mi̍ I̍ ti̍āŋnu᷄ŋ māā ā lu̍e̍ī lɛ̍ o̍ lɛ̄ŋndē yā I̍ wā lākɔ̄ ndā pɛ̄ŋgīo̍o̍ kē le̍ŋ ni᷄ŋ kpo̍so̍ŋ te̍.’ ”

¹²Le̍lāŋ chāāŋāā nīāā, lā māndāŋ māā wānā o̍ wānā wa᷅ nyā tɛ̄ɛ̄ŋ mbō nɔ̄ kɔ̄l dɛ̍nɛ̍ wɔ̍ɔ̍ŋ, mbō kɛ̄ɛ̍ Mɛ̄lɛ̄ka̍ lāāla᷄ŋndo̍, ndu̍yɛ̍ mbō kɛ̄ɛ̍ Mɛ̄lɛ̄ka̍ cho̍ yōōmū wo̍ le̍.

¹³Nyɛ̄ nyā nɔ̄ le̍ tōsāā wo̍, ndu̍ cho̍ ni̍ māā hāāā, mi̍ ŋ̄ wā yōōmū pāāle̍ hāūle̍ŋ, lā sīīli̍āŋ ve᷅llāā vēllē lēpāa̍ o̍ lēpāa̍, yɔ̄ŋi̍ Māsā Nyi̍nāā Wɔ̄ɔ̍ŋndā hūi̍ nyā mī lā tōsā yɔ̄ŋ wɔ̄ɔ̍ŋndo̍, ndu̍yɛ̍ mī lā sīmnu᷄ŋ wānāā nīlā kālu̍.

¹⁴Le̍lāŋ, tē ŋ̄ hīōū lāchī ā sīsi̍lāŋ ā dīāllūŋ kālā o̍ tīīnda᷄ŋ nāā ŋ̍ nɔ̍ o̍ tāse̍lā ndɔ̄ɔ̍ wo̍ chōo̍ pɛ̍, mbō lo̍ o̍ ko̍ŋ hāāā mī ŋ̄ fūūlu̍u̍ o̍ mɛ̄ɛ̄lu̍lāŋ, mɛ̄ɛ̍ nāā bɛ̍ɛ̍ ŋ̄ chō hīōūwɔ̄ɔ̄ lāchī ā wāā dīōm pīlɛ̍ ā Ki̍li̍tī.

¹⁵Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, “Tē lā tūēī Mɛ̄lɛ̄ka̍ sūɛ̍i̍ nāā nyā chu̍ā pāāle̍ hāūle̍ŋ nde᷅ŋ pɛ̍, lā tōsā nyɛ᷅ o̍ di̍mūl nyā wo̍. Lā to̍sā nīlā kālu̍la̍ŋ mɛ̄ɛ̍ fi̍nyāā nyāā māmāā ā tōsā sīndɛ̄ o̍ po̍llo̍ ni᷄ŋ mā kɛ̄ɛ̄ le̍ lūɛ̄īyɔ̄ɔ̍ Mɛ̄lɛ̄ka̍ o̍ bā bɛ̄ŋgu̍ yɛ̍ le̍”.

¹⁶Ō nɛ̄ɛ̍ni̍a̍ā ndā āā tu̍e̍ī yɛ̄ mi̍ Mɛ̄lɛ̄ka̍ sūāā nāā ndā chūā, kɛ̍ mā kɛ̄ɛ̄ le̍ ndu̍ lūɛ̄īyɔ̄ɔ̍ o̍ bā bɛ̄ŋgu̍ nɛ̍? Wānāā Mūu̍sē so̍li̍ lɔ̍ɔ̍ ko̍ŋ o̍ lɛ̄ŋndē I̍chi̍pīle̍ŋ ni᷄ŋ, mbō sīm ndā lāchī le̍ kɔ̄la̍ŋ ā ndā wā, ndā kpo̍u̍ kɛ̍ɛ̍ le̍ lūɛ̄īyɔ̄ɔ̍ Mɛ̄lɛ̄ka̍ o̍ bā bɛ̄ŋgu̍ ni̍.

¹⁷A̍ nɛ̄ɛ̍ni̍a̍ā Mɛ̄lɛ̄ka̍ ndu̍ o̍o̍ dɔ̍ɔ̍nu᷄ŋ yɛ̍ sīndɛ̄ tu̍mbe̍ le̍ wɔ̄sīla̍ŋ be̍le̍-hi̍ɔ̍ɔ̍lu̍? A̍ wānāā to̍sā lɔ̍ɔ̍ ko̍ŋ yɔ̄ŋ wɔ̄ɔ̍ŋndo̍ o̍ po̍llo̍ ni᷄ŋ, mā wū wā.

¹⁸O̍ bōōndi̍i̍ ke̍ŋ ni᷄ŋ si̍ndɛ̄, mi̍ Mɛ̄lɛ̄ka̍ tīāŋnu᷄ŋ māā ā lu̍e̍ī lɛ̍ o̍ lɛ̄ŋndē o̍ wā lākɔ̄ ndā pɛ̄ŋgīo̍o̍ kē le̍ŋ ni᷄ŋ kpo̍so̍ŋ te̍. A̍ nɛ̄ɛ̍ni̍a̍ā o̍kɔ̄ɔ̄ Mɛ̄lɛ̄ka̍ wā yɛ̄ sūɛ̍i̍? Wānāā kɛ̍ɛ̍ le̍ nyɛ̄ o̍ di̍mi̍ wo̍ tōsāā wā.

¹⁹Le̍ he̍ī, ŋ̄ nɔ̄lā mī ŋ̄ chē māā le̍ mɛ̄ɛ̍ ndā āā kɛ̍ɛ̍ Mɛ̄lɛ̄ka̍ lāāla᷄ŋndo̍ yɛ̍, ndā būmbā fūūlūū o̍ lɛ̄ŋndē o̍ wā lākɔ̄ ndā pɛ̄ŋgīo̍o̍ kē le̍ŋ ni᷄ŋ ni̍.