Read Southern Kisi Hi̍būlūi̍ya̍ 5 Bible Online

Hi̍būlūi̍ya̍ 5 - Southern Kisi bible

Hi̍būlūi̍ya̍ 5

¹Wānā o̍ wānā cho̍ māsā wānāā sōlīāā lāsa̍lāa̍, ŋ̄wāŋndā chīe̍e̍ tɛ̍ɛ̄ŋ Mɛ̄lɛ̄ka̍ hɛ̄lī ndu̍ ni̍. Mɛ̄lɛ̄ka̍ chūā ndu̍ māchūāā le̍ mbō si᷄m Mɛ̄lɛ̄ka̍ lāchī sɔ̍ŋgɔ̍ wāŋndā le̍ mbō hīŋ ā nyɔ̄ɔ̍ŋ o̍ Mɛ̄lɛ̄ka̍ lo̍ ndu̍yɛ̍, mbō sōli̍ sālālāŋ nāā ndu̍ chu̍ā le̍ yɔ̄ŋndā ndālā wɔ̍ɔ̍ŋndāŋ.

²Ndu̍yɛ̍, mɛ̄ɛ̍ ndu̍ ma᷅sā wānāā sōlīāā lāsa̍lāa̍ bɛ̍ɛ̍ ndu̍ nɔ̍ di̍āllūŋ kālā o̍ nyi̍nā ndɔ̄ɔ̍ ni᷄ŋ, o̍ sɔ̄ɔ̍ŋ ka̍ ka̍ ni̍ŋ te̍ yɛ̍, ō nɔ̄lā mbō nɔ̄ nyīɛ̍ɛ̍ye̍ le̍ wānāā si̍nā ha̍ā nyɛ̍ bɛ̍ndā le̍ tōsāā wo̍ le̍ wā, ndu̍yɛ̍ mā lō o̍ ko̍ŋ mā tōsā bīōndɔ᷄ŋnda̍ŋ ndā.

³Mɛ̄ɛ̍ ndu̍ bɛ̍ɛ̍ ndu̍ nɔ̍ di̍āllūŋ kālā o̍ nyi̍nā ndɔ̄ɔ̍ ni᷄ŋ te̍ yɛ̍, ndu̍ pi̍lā bɛ̍ɛ̍ mɛ̄ɛ̍ mbō sōli̍ sālāā le̍ yɔ̄ŋndā ndɔ̄lā wɔ̍ɔ̍ŋndāŋ, mɛ̄ɛ̍ o̍ so̍lī sālāā le̍ wāŋndā yɛ̍.

⁴Ō cho̍ wa᷅ŋndo̍ ndu̍ pi̍lā le̍ cha᷅l mbō kɛ̄ɛ̄si̍a̍a̍ le̍ mbō sīīŋgu̍u̍ ndu̍ pi̍lā māsā wānāā sōlīāā lāsa̍lāa̍ le̍. Mɛ̄lɛ̄ka̍ pi̍lā ndu̍ chu̍ā wa᷅ŋndo̍ le̍ sīmnɔ᷄ŋndo̍ māsā wānāā sōlīāā lāsa̍lāa̍ wo̍ ni̍, mɛ̄ɛ̍ o̍ chu̍ā E̍lɔ̄ŋ yɛ̍.

⁵Le̍nde̍ ko̍ni̍ i̍ yɔ̍nu̍ŋ ā Ki̍li̍tī o̍kɔ̄ɔ̄ ni̍. Ō cho̍ ndu̍ pi̍lā le̍ kɛ̍ɛ̍si̍a̍a̍ le̍ mbō sīīŋgu̍u̍ ndu̍ pi̍lā māsā wānāā sōlīāā lāsa̍lāa̍ wo̍ le̍. Mɛ̄lɛ̄ka̍ pi̍lā chu̍ā ndu̍ ni̍. Mɛ̄lɛ̄ka̍ pi̍lā di̍mu̍l ndu̍ ni̍ āā, “Nu᷄m cho̍ Po̍ nūu̍ ni̍. Chɔ̍ŋ ā hāū, I̍ si̍mnu᷄ŋ fi̍nyā nūm.”

⁶Mi̍ Mɛ̄lɛ̄ka̍ dīmī vɛ̄lɛ̄ o̍ fo̍ndāŋ chēle̍ŋ o̍ Yāu̍ Mɛ̄lɛ̄ka̍a̍ ni᷄ŋ āā, “Wānā so̍līāā lāsa̍lāa̍ ŋ̄ chō le̍ fɛ̍ɛ̍ŋ ā fɛ̍ɛ̍ŋ ni̍, o̍ nɛ̄i̍ Mɛ̄kīsɛ̍dɛ̍kī wā wānā so̍līāā lāsa̍lāa̍ chōo̍.”

⁷Bōōndi̍i̍ Chi̍i̍sū wā o̍ chi̍e̍ēŋndo̍ chōo̍ ve̍, mbo̍ pīɛ̄ī Mɛ̄lɛ̄ka̍ mbo̍ nyɔ̄ɔ̄lū ndu̍ chōo̍ cho̍o̍, ndu̍yɛ̍ mbo̍ chāŋ o̍ Mɛ̄lɛ̄ka̍ lo̍, o̍ nɔ̍lā mbō sōli̍ ndu̍ o̍ pīɔ̍mndo̍ ni᷄ŋ ndo̍. O̍ ko̍ŋ, mi̍ Mɛ̄lɛ̄ka̍ tūɛ̄ī pīɛ̄īlē ndɔ̄le̍ŋ, kāni̍ fu̍u̍le̍, le̍ mɛ̄ɛ̍ o̍ tu̍si̍ŋ Mɛ̍lɛ̄kā o̍ bā bɛ̄ŋgu̍ yɛ̍.

⁸Mi̍ chē bɛ̍ɛ̍ mi̍ Chi̍i̍sū wa᷅ Po̍ Mɛ̄lɛ̄ka̍a̍ ni̍, kɛ̍ mbo̍ pɛ̄ɛ̄kū nyɛ̄ Mɛ̄lɛ̄ka̍ hɛ̄nāŋ ndo̍ tōsāā, sānāā ā nyɛ̄ nɛ̄īyāā o̍ ke̍e̍ku̍ lēni᷄ŋ ndo̍.

⁹Mɛ̄ɛ̍ Chi̍i̍sū si̍ɛ̍ndi̍ wāli̍ ndɔ̄ɔ̍ lēbōl mbo̍ sīmnu᷄ŋ wa᷅nā pi̍ŋī wa᷅ŋndā le̍ fɛ̍ɛ̍ŋ ā fɛ̍ɛ̍ŋ ndo̍, ndā yɔ̍nūŋ ni̍ māā wāŋndā kpo̍u̍ ā to̍sā nyɛ᷅ o̍ di̍mūl ndā wo̍ wā.

¹⁰Ndu̍yɛ̍, mi̍ Mɛ̄lɛ̄ka̍ sīīŋgūū ndu̍ māsā wānāā sōlīāā lāsa̍lāa̍ o̍ nɛ̄i̍ Mɛ̄kīsɛ̍dɛ̍kī wā māsā wānāā sōlīāā lāsa̍lāa̍ wo̍ chōo̍.

¹¹Sɔ̄ɔ̍ŋ chō tāu̍ ŋ̄ yā I̍ yi̍yāŋ le̍ nyā dīmūllo̍ ā sūɛ̍i̍ he̍ī o̍kɔ̄ɔ̄ wo̍ŋ. Kɛ̍ ndu̍yɛ̍, ō kēndū le̍ nyā mu̍ŋ tɛ̄ɛ̄sīāllo̍ mī lā sīnā mu̍ŋ lāpɛ̄ŋgu̍, kāni̍ fu̍u̍le̍, lā kēndū īsɔ̄ɔ̍ pɛ̍ɛ̍kū bɔ̄ɔ̍.

¹²Lā fūūlu̍u̍ ni᷅ŋ bōōndi̍i̍ nyā bɛ̍ɛ̍ nyā nɔ̄ mī lā pɛ̄ɛ̄ku̍ ŋ̄wāŋ nde̍. Kɛ̍, yɔ̍ŋi̍ nyā āā si̍mnu̍ŋ wānāā pɛ̄ɛ̄kāā ŋ̄wāŋ yɛ̍, hāū ā hāū bɛ̍ɛ̍ sɔ̄ɔ̍ŋ tāse̍ŋ ndā pɛ̄ɛ̄kū wānāā sɛ̄nɛ̄īya̍ ā sūɛ̍i̍ Mɛ̄lɛ̄kɛ̍i̍ o̍kɔ̄ɔ̄ wo̍ŋ, mɛ̄ɛ̍ mā pɛ̄ɛ̄ku̍ wɔ̄ nyā mu̍ŋ kɛ᷅. Mɛ̄ɛ̍ chɛ̄lɛ̄kpi̍a̍a̍ le̍ndīa̍a̍ wā nu̍āā ā di᷅ nyɛ̍ dīāā yɔ̄ŋāā le̍ mɛ̄ɛ̍ mɛ̄ɛ̄yāŋ yɛ̍, le̍nde̍ ko̍ni̍ nyā chō wɔ̄ kɛ᷅ ni̍.

¹³Wānā o̍ wānā wā wɔ̄ wɛ̄īyo̍ pɛ̍, mɛ̄ɛ̍ chɛ̄lɛ̄kpɛ̍ le̍ndōo̍ o̍ cho̍ wɔ̄ ni̍. Wānā wāā le̍nde̍ mɛ̄ɛ̍ ō nɔ̍ wɔ̍ tāāsi̍ o̍ si̍nā sūɛ̍i̍ cho̍ sākpō Mɛ̄lɛ̄ka̍ o̍ hɔ̄l le̍ tōsāā ve̍ le̍.

¹⁴Kɛ̍ ndu̍yɛ̍, wānā cho̍ ni᷅ŋ ka̍a̍so̍ŋnɔ̍ wo̍, ndu̍ di̍ā nyɛ̍ dīāā yɔ̄ŋāā ho̍ō ni̍. Wānā wāā nu̍āā ndu̍, ndu̍ lo̍ mālūāā pīɛ̄īyo̍ hāāā mbo̍ sīnā yɛ̍ yi̍ɔ̍ɔ̍ sūɛ̍i̍ nāŋ le̍ tōsāā ve̍ tɛ̍ɛ̄ŋ, ā sūɛ̍i̍ ni̍ŋ le̍ tōsā le̍ ve̍.