Read Southern Kisi Hi̍būlūi̍ya̍ 6 Bible Online

Hi̍būlūi̍ya̍ 6 - Southern Kisi bible

Hi̍būlūi̍ya̍ 6

¹Le̍lāŋ, lā ŋ̄ hīōūnu᷅ŋ ni᷅ŋ lāchī ā sɔ̄ɔ̍ŋ ŋ̄ka̍a̍so̍ŋndo̍ŋ pīɛ̄īyo̍ ā Ki̍li̍tī o̍kɔ̄ɔ̄. Ŋ̄ lo᷅ sɔ̄ɔ̍ŋ tāse̍ŋ ndā pɛ̄ɛ̄kū wānāā sɛ̄nɛ̄īya̍ wo̍ŋ pīɛ̄īyo̍ wɔ̄ kɛ᷅ le̍. Ō cho̍ lɛ̍ kūēē mī ŋ̄ tōl pɛ̄ɛ̄kū sɛ̄nɛ̄ī ā kāālā fo̍ndōlā chu̍ū nāā mālā le̍ lāŋ mālɔ̄ɔ̍ o̍kɔ̄ɔ̄ le̍, kɛ̄lɛ̄ŋgāā ā Mɛ̄lɛ̄ka̍ tīīnda᷄ŋndo̍ o̍kɔ̄ɔ̄ le̍,

²kɛ̄lɛ̄ŋgāā ā pūlɔ̄ɔ̄lā wāŋndā sɔ̄lā le̍ sīmnɔ᷄ŋndo̍ wānāā sākpō Mɛ̄lɛ̄ka̍ o̍ hɔ̄l lāŋ te̍, kɛ̄lɛ̄ŋgāā ā wāŋndā bālāŋ hāndɔ̄ɔ̍ chōo̍ le̍ ndā sālāā dɔ̄wɔ̄ɔ̍ le̍, kɛ̄lɛ̄ŋgāā ā mɛ̄ɛ̍ Mɛ̄lɛ̄ka̍ chō wāŋndā mīŋgī yōōmū yɛ̍ le̍, kɛ̄lɛ̄ŋgāā ā mɛ̄ɛ̍ Mɛ̄lɛ̄ka̍ kīlūl ni̍ŋ wa᷅ŋndā yāmɛ̍i̍ fɛ̍ɛ̍ŋ fɛ̍ɛ̍ŋ nde̍ yɛ̍ le̍.

³Le̍lāŋ, lā ŋ̄ hīōūnu᷅ŋ lāchī ā sɔ̄ɔ̍ŋ ŋ̄ka̍a̍so̍ŋndo̍ŋ tōsāā. Ŋ̄ nɔ̄lā mī ŋ̄ tōsā tē Mɛ̄lɛ̄ka̍ chɛ᷄l pɛ̍.

⁴Kāni̍ fu̍u̍le̍, tē ō wā pɛ̍ mī wānāā cho̍ o̍ nyɛ̄ wāwo̍ŋ Mɛ̄lɛ̄ka̍a̍ ni᷄ŋ ndā ā fāŋāŋ o̍ nyɛ̄ wāwo̍ŋ ko̍ŋ ni᷄ŋ, mɛ̄ɛ̍ o̍ mɛ̄ɛ̍ che᷅le̍ŋ ve᷅ lɛ̍ mī wānā lo̍o̍ku̍ tōsā mī wānāā wāā le̍nde̍ ā māl yɔ̄ŋndā ndālā wɔ̍ɔ̍ŋndāŋ, mā mīīŋgu̍ o̍ nyɛ̄ wāwo̍ŋ Mɛ̄lɛ̄ka̍a̍ ni᷄ŋ te̍. Kāni̍ fo̍ndōle̍, ā sɔ̄lā nyɛ̄ wāwo̍ŋ Mɛ̄lɛ̄ka̍a̍. Ndu̍yɛ̍, tē ō wā māā yɔ̄ŋɔ̄ɔ̄ pɛ̍, ā tūūlā nyɛ̄ Mɛ̄lɛ̄ka̍ kē wa᷅ŋndā wo̍. Ndā bɛ̍ɛ̍ mi̍ Nyi̍nā Kāsīo̍o̍ tūāl ndā kɔ̄ɔ̄lī.

⁵Mā sɔ̄lā sīna᷄ŋndo̍ mɛ̄ɛ̍ dīo̍m Mɛ̄lɛ̄ka̍a̍ na᷄ŋ yɛ̍. Ndu̍yɛ̍, mā sɔ̄lā sīna᷄ŋndo̍ ā kpāāyā wa᷅ ni̍ŋ bo̍o̍ndi̍i̍ Mɛ̄lɛ̄ka̍ kāndū ni̍ŋ wāā māsāā ŋ̄wāŋndā chīe̍e̍ cho̍o̍ ve̍.

⁶Tē ō wā pɛ̍ mī wāŋndā chē ŋ̄ wāā nu̍āā kpo̍u̍, kɛ̍ o̍ ko̍ŋ ni̍ŋ fa̍ū mā ma᷄l nɛ̄i̍ Mɛ̄lɛ̄ka̍a̍ pɛ̍, mɛ̄ɛ̍ wānā o̍ wānā nɔ̍lā lɛ̍ ndā mūlī mā ma᷄l yɔ̄ŋndā ndālā wɔ̍ɔ̍ŋndāŋ te̍. Tē ō wā māā yɔ̄ŋɔ̄ɔ̄ pɛ̍, mɛ̄ɛ̍ wānāā wāā le̍ndi̍a̍a̍ ā chō māchūāā vɛ̄lɛ̄ Po̍ Mɛ̄lɛ̄ka̍a̍ mīŋgī bāŋɔ̄ɔ̍ o̍ yɔ̄m sīŋgāfīlāā chōo̍ sɛ̍nɛ̄ī, ndu̍yɛ̍, mā wā ndu̍ Si̍ɔ̍mbu̍la̍ŋ kīo̍o̍ wāŋndā o̍ hɔ̄l.

⁷Ŋ̄ chūānu᷅ŋ ndɔ̄ he̍ī māā tāāmāsi̍. Tē ō wā pɛ̍ mī Mɛ̄lɛ̄ka̍ wā pīɔ̍ɔ̍ yɔ̄ŋgōo̍ o̍ lɛ̄ŋnde̍ŋ chōo̍ pɛ̍ŋgu̍ o̍ pɛ̄ŋgu̍, o̍ ko̍ŋ kɔ̍ɔ̍lī, mī tɔ̄lɔ̄ɔ̄la̍ŋ lā na᷄ŋ lēchōo̍, mbō lo̍ o̍ ko̍ŋ wānāā ndā to᷄l tɔ̄lɔ̄ɔ̄lā lāŋ ndā mā sɔ̄lā kɔ̄mndē kɛ̄ndɛ̄le̍ŋ o̍ lāŋ ni̍ŋ pɛ̍, sālāā Mɛ̄lɛ̄ka̍ dūāū lɛ᷅ŋndē wāā le̍nde̍ le̍ŋ ni̍.

⁸Kɛ̍, tē lɛ̄ŋndē lēŋ lē lo̍ o̍ ko̍ŋ pɛ̍ mī yɔ̄ɔ̍ŋ vīl lēchōo̍ ā bīl fo̍ndōo̍ pɛ̍, mɛ̄ɛ̍ lē cho̍ lɛ᷅ŋnde̍ nɔ̍ tɔ̄nɔ̄ le̍. Lɛ̄ŋndē wāā le̍nde̍ le̍ŋ, Mɛ̄lɛ̄ka̍ kɔ̄ŋgɔ̍la̍ŋ le̍ le̍ŋ tɛ̄ɛ̄mbūūwo̍. Ō chō le̍ŋ lōmɔ̄ɔ̄ o̍ mɛ̄ɛ̄lu̍lāŋ.

⁹Kɛ̍ ndu̍yɛ̍ chāāŋāā nīāā, mi̍ chē bɛ̍ɛ̍ mi̍ ŋ̄ po̍o̍nyīāā dīōmnda̍ŋ nda᷅ŋ nu̍a̍ā ni̍, kɛ̍, nya̍ nya̍ ŋ̄ nɔ̍ ki̍i̍sa᷄ŋ o̍ kīīsa᷄ŋ ā nyā le̍. Kāni̍ fo̍ndōle̍, ŋ̄ sīnā māā lā sīm ni̍ŋ o̍ nɛ̄ī kɛ̍ndɔ̄ɔ̍ chōo̍, ō nyā sɔ̄lā ni̍ŋ pi̍o̍ŋɔ̄ɔ̍ lēchōo̍ wo̍.

¹⁰Mɛ̄lɛ̄ka̍ ndu̍ nɔ̍ la̍ka̍fā le̍. Ō pūɛ̄ɛ̄nu̍ŋ ā wāli̍ nyā tōsā wo̍ le̍. Ndu̍yɛ̍, ō pūɛ̄ɛ̄nu̍ŋ ā mɛ̄ɛ̍ nyā chɔ᷄m kāālā nyā nɔ̄ le̍ ndu̍ wo̍ yɛ̍ le̍. Kāni̍ fo̍ndōle̍, lā chɔ᷄m kāālāā ho̍ō sānāā ā mālā nyā mālā wānāā Mɛ̄lɛ̄ka̍a̍ wo̍. Ndu̍yɛ̍, lā chō wɔ̄ bɛ̍ɛ̍ ndā mālāā.

¹¹Nyɛ̄ nāā ŋ̄ lāndu̍ŋ kɔ̍l tāu̍ o̍ ndu̍ wo̍ cho̍ ni̍, māā nyā pi̍lɛ̍ŋ pi̍lɛ̍ŋ ndā ki̍nɛ̍i̍, māā lā lɛ̄ɛ̍ŋ kpe̍e̍kpe̍i̍ le̍ hīōūwɔ̄ɔ̍ lāchī hāāā mbō lo̍ o̍ ko̍ŋ, mī mɛ̄ɛ̄lu̍lāŋ lā fūūlu̍u̍. O̍ ko̍ŋ, nyɛ̄ nyā chō ho̍ō hɔ̄lte̍ŋ o̍ nɛ̄ī le̍ ndu̍ wo̍, mī lā sɔ̄lā ndu̍.

¹²Ŋ̄ hɛ̄nāŋ mī lā sīmnu᷄ŋ wānāā sīɛ̄lɛ̍i̍ le̍. Nyɛ̄ nāā ŋ̄ hɛ̄nāŋ ndo̍ cho̍ ni̍, māā wānāā dɔ̍ū tīīnda᷄ŋ ndāā o̍ Mɛ̄lɛ̄ka̍ ni᷄ŋ, mā bīūnu᷄ŋ, ndu̍yɛ̍ o̍ he̍ī ni᷄ŋ mā sɔ̄lā nyɛ̄ Mɛ̄lɛ̄ka̍ chūe̍l ndā būŋgɛ̄i̍ yo̍ wā, lā chu̍ā ndā māā tāāmāsi̍ nyā.

¹³Bōōndi̍i̍ Mɛ̄lɛ̄ka̍ wā būŋgɛ̄i̍ chūāā nāā E̍bīlāha᷅m chu̍ā ve̍, mbo̍ mēna᷄ŋ o̍ ndu̍ pi̍lā po̍, le̍ chɔ̄mndo̍ māā ō chō nyɛ̄ o̍ chu̍e̍l ndu̍ ko̍ŋ bu̍ŋgɛ̄i̍ yo̍ tōsā. Mɛ̄ɛ̍ mī Mɛ̄lɛ̄ka̍ ndu̍ o̍o̍ me̍nāŋ o̍ ndu̍ pi̍lā, kāni̍ fo̍ndōle̍, wānā o̍ wānā che᷅le̍ŋ cho̍ mbō hīōū ndu̍ kpāāyā le̍ mbō mēnāŋ o̍ ndu̍ le̍.

¹⁴Mbo̍ dīmī āā, “I̍ chu̍ā būŋgɛ̄i̍ le̍ nu̍m sālāā dɔ̄wɔ̄ɔ̍. Ndu̍yɛ̍, mɛ̄ɛ̍ mī I̍ to̍sā mī wānāā fāŋgā ā fūlā o̍ yɛ̄yi̍i̍ nu̍mnde̍ ni᷄ŋ.”

¹⁵Le̍ he̍ī, mi̍ E̍bīlāha᷅m hi̍a̍ū lāchī ā bīūwɔ᷄ŋndo̍ le̍ te̍le̍ŋ vi̍lɛ̄ī. O̍ ko̍ŋ mi̍ E̍bīlāha᷅m sɔ̍lā nyɛ̄ Mɛ̄lɛ̄ka̍ chūe̍l ndu̍ būŋgɛ̄i̍ yo̍.

¹⁶Tē wāŋndo̍ wā mēna᷄ŋndo̍ pɛ̍, o̍ wānā hi̍o̍ū ndu̍ kpāāyā wo̍ o̍ me̍nāŋ ni̍. Le̍lāŋ, tē wāŋndo̍ mēnāŋ le̍nde̍ pɛ̍, mɛ̄ɛ̍ kɔ̍ɔ̍sɔ̍ che᷅le̍ŋ ve᷅ lɛ̍ le̍.

¹⁷Mɛ̄lɛ̄ka̍ ndu̍ o̍o̍ hɛ̍nāŋ mī ndu̍ o̍o̍ chɔ̍m wānāā wā hūnɔ̄ɔ̄ nyɛ̄ o̍ chu̍ā būŋgɛ̄i̍ yo̍ sɔ̄lā wā wa̍la̍ŋ, māā nyɛ̄ o̍ kɛ̍ɛ̍si̍a̍a̍ le̍ tōsāā wo̍, ō fe̍ŋā ndu̍ lēchōo̍ le̍. Le̍ he̍ī, mi̍ Mɛ̄lɛ̄ka̍ mēna᷄ŋ māā ō chō ndu̍ tōsā kpe̍e̍kpe̍i̍.

¹⁸Sɔ̄ɔ̍ŋ sālā tīɔ̍ɔ̍ŋndo̍ŋ mu᷅ŋ, būŋgɛ̄ī Mɛ̄lɛ̄ka̍ chūā ve̍, ā mēna᷄ŋ o̍ me̍nāŋ ndo̍, ŋ̄ fe̍ŋāŋ le̍cho̍o̍ le̍, ndu̍yɛ̍, ō tɛ̍ɛ̍mbūū di̍ōm ndɔ̄ɔ̍ ā mu̍ŋ o̍kɔ̄ɔ̄ kpo̍so̍ŋ te̍. O̍ he̍ī ni᷄ŋ, nāā ŋ̍ ku̍ɛ̄ nāā Mɛ̄lɛ̄ka̍ chūā le̍ mbō māndā nāā wā, sɔ̄ɔ̍ŋ sālā tīɔ̍ɔ̍ŋndo̍ŋ mu᷅ŋ ŋ̄ nɔ̄ mī ŋ̄ dɛ̄ɛ̄ni̍a̍a̍ nāā kɔ̄lta̍ŋ le̍ sīsi̍lāŋ yi̍ ā hɔ̄lte̍ŋ wāā o̍ nɛ̄ī le̍ nyɛ̄ Mɛ̄lɛ̄ka̍ kɛ̄si̍ nāā lāchī wo̍.

¹⁹Ndu̍yɛ̍, nyɛ̄ nāā ŋ̄ chō ko̍ŋ hɔ᷅lte̍ŋ o̍ nɛ̄ī le̍ ndu̍ wo̍, ndu̍ bi̍ī nāā nyɛ̄ kɛ̄ndɛ̄ kpi̍ŋ ni̍, mī ŋ̄ hīōū lāchī ā wāā ā dīāllūŋ kālā. Ndu̍ ku̍ā ā nāā o̍ chīɛ̍i̍ Mɛ̄lɛ̄ka̍a̍ ni᷄ŋ ni̍, mbō hīōū ā nāā o̍ kōlā bɛ̍ndū kōŋ lēkɔ̍ɔ̍lī nāā Mɛ̄lɛ̄ka̍ chūā.

²⁰Chi̍i̍sū pi̍lā lu̍ɛ̍ī ni᷅ŋ ndo̍ŋ nāā lāchī le̍ mbō si᷄m sɔ̍ŋgɔ̍ nāā. Kāni̍ fo̍ndōle̍, ndu̍ si̍mnu᷄ŋ ma᷅sā wānāā sōlīāā lāsa̍lāa̍ le̍ fɛ̍ɛ̍ŋ ā fɛ̍ɛ̍ŋ o̍ nɛ̄i̍ Mɛ̄kīsɛ̍dɛ̍kī wā māsā wānāā sōlīāā lāsa̍lāa̍ wo̍ chōo̍ ni̍.