Read Southern Kisi Hi̍būlūi̍ya̍ 7 Bible Online

Hi̍būlūi̍ya̍ 7 - Southern Kisi bible

Hi̍būlūi̍ya̍ 7

¹Mɛ̄kīsɛ̍dɛ̍kī wo̍ ho̍ō, ndu̍ wā sīndɛ̄ māsā bɛ̍ndōo̍ Sālɛ̄m chi̍e̍e̍ ni̍. Mɛ̄lɛ̄ka̍ Kpu̍lu̍ŋgūma̍ Bɛ̄ndōo̍ o̍ hi̍o̍ū nyɛ̄ o̍ nyɛ̄ fe̍e̍ wo̍, wāna̍ so̍lī sa̍lāa̍ o̍ ndu̍ lo̍ wo̍ o̍ wā ni̍. Mi̍ ī yɔ̄nu᷄ŋ bo̍o̍ndi̍i̍ pi᷅lɛ̍, E̍bīlāha᷅m wā chɔ̄nɔ᷄ŋndo̍ nāā ndā wā o̍ chɔ̄ūwo̍ mā dīū māsāā bɛ̍ndūāā tāu̍ wā. O̍ mīīŋgū ndā wā wo̍, mi̍ Mɛ̄kīsɛ̍dɛ̍kī ko̍māl E̍bīlāha᷅m mbo̍ dūāū ndu̍ sālā.

²Nyɛ̄ o̍ nyɛ̄ E̍bīlāha᷅m bi̍ī o̍ chɔ̄ūwo̍, mbo̍ kē Mɛ̄kīsɛ̍dɛ̍kī lā pīlɛ̍ŋnda̍ŋ o̍ tɔ̍ o̍ tɔ̍ cho̍o̍. Mɛ̄kīsɛ̍dɛ̍kīla̍ŋ tɛ̄ɛ̄sīāā ndɔ̄ɔ̍ ō tāso̍o̍ cho̍ ni̍, māsā cho̍ sākpō Mɛ̄lɛ̄ka̍ o̍ hɔ̄l lo̍. Ndu̍yɛ̍, dīōlā ndā vēēlū vɛ̍lɛ̄ ndu̍ lāŋ āā Māsāā le̍ Sālɛ̄m, ko̍ŋ cho̍ ni̍, māsā ke᷅ wa᷅ŋndā kɔ̄l nyūlōo̍ wo̍.

³Wānā o̍ wānā si̍nā Mɛ̍līki̍sādɛ̄ɛ̄ fi̍nyā ndɔ̍ kɛ̄lɛ̄ŋgāā kālā ndɔ̄ le̍, kɛ̄lɛ̄ŋgāā mī wānā si̍nā ā fi̍nyāā ndūāā māmā o̍kɔ̄ɔ̄. Wānā si̍nā bo̍o̍ndi̍i̍ ndā vēlū ndu̍ le̍, wānā si̍nā bo̍o̍ndi̍i̍ o̍ vi᷅ le̍. Ō chō māchūāā mɛ̄ɛ̍ Po̍ Mɛ̄lɛ̄ka̍a̍ chō yɛ̍. Kāni̍ fu̍u̍le̍, wānā so̍līāā lāsa̍lāa̍ o̍ cho̍ le̍ fɛ̍ɛ̍ŋ ā fɛ̍ɛ̍ŋ ni̍.

⁴Lā yīyāŋ ndɔ̍ ā mɛ̄ɛ̍ Mɛ̄kīsɛ̍dɛ̍kī wā wānā bɛ̍ndū yɛ̍. Mi̍ E̍bīlāha᷅m o̍ wā fi̍nyā māmā bɛ̄ndōo̍ le̍ wāŋndā I̍sɔ̄lūɛ̄ī yo̍, ō sōlī kē lēbo̍llo̍ o̍ nyɛ̄m o̍ bi̍u̍ o̍ chɔ̄ūwo̍ wo̍ŋ chōo̍ mbo̍ kē ndu̍.

⁵Ī chō ī dīmīa̍ŋ o̍ sāwālā Mɛ̄lɛ̄ka̍ ke̍ Mūu̍sē lāŋ ni᷄ŋ māā, wānāā fu̍lā o̍ pūlāle̍ Li̍vāīle̍ŋ chōo̍ ki̍nɛ̍i̍ mā wā wānāā sōlīāā lāsa̍lāa̍ wā, māā ā nɔ̄ mā bīī kē lēbōllo̍ wāŋndā I̍sɔ̄lūɛ̄ī o̍ bā, o̍ nyɛ̄ o̍ nyɛ̄ ni᷄ŋ ndā sɔ̄lā. Ke̍ŋ chɔ̍m māchɔ̄māā ni̍ māā, wānāā sōlīāā lāsa̍lāa̍ ha̍ā, māā wānāā ndāā ndā fūlā o̍ pūlāle̍ E̍bīlāha᷅mnde̍ŋ chōo̍ wā, ndā chō kē lēbōllo̍ bīyɔ̄ɔ̍ o̍ bā ni̍.

⁶Kɛ̍, Mɛ̄kīsɛ̍dɛ̍kī ndu̍ ndu̍, mi̍ chē bɛ̍ɛ̍ ō fūlā o̍ pūlāle̍ Li̍vāīle̍ŋ chōo̍ le̍ ni̍, kɛ̍ mbo̍ bīī E̍bīlāha᷅m kē lēbōllo̍ o̍ bā. Ndu̍yɛ̍, mi̍ Mɛ̄kīsɛ̍dɛ̍kī du̍a̍ū E̍bīlāha᷅m sālā, E̍bīlāha᷅m ō Mɛ̄lɛ̄ka̍ chūe̍l būŋga᷄ŋ ndo̍.

⁷Wānā o̍ wānā si̍nā māā wānā du̍a̍ū ho̍ō wāŋndo̍ sālā wo̍, ndu̍ hi̍o̍ū ā wānā o̍ du̍a̍ū ko̍ŋ sālā wo̍.

⁸Wānāā so̍li̍ kāŋ sālāā, mā fu̍lā o̍ pūlāle̍ Li̍vāīle̍ŋ chōo̍ mā bīī kē lēbōllo̍ wāŋndā o̍ bā wā, ndā kpo̍u̍, wāŋndā chīe̍e̍ya̍ ā nɔ̍ mā vī wā ndā chō ni̍. Kɛ̍, Mɛ̄kīsɛ̍dɛ̍kī o̍ bi̍ī ke᷅ lēbōllo̍ E̍bīlāha᷅m o̍ bā wo̍ ndu̍ ndu̍, mɛ̄ɛ̍ Yāu̍ Mɛ̄lɛ̄ka̍a̍ dīmu̍l nāā yɛ̍, ō vi̍ le̍.

⁹Tē ō wā māā yɔ̄ŋɔ̄ɔ̄ pɛ̍, mɛ̄ɛ̍ ŋ̄ nɔ̄lā mī ŋ̄ dīmi̍ māā bōōndi̍i̍ E̍bīlāha᷅m ke̍ Mɛ̄kīsɛ̍dɛ̍kī kē lēbōllo̍ ve̍, māā Li̍vāī, ō chūāūwāā ndūāā māmāā ā chō ha̍ā kē lēbōllo̍ bīyɔ̄ɔ̍ wāŋndā o̍ lābā wo̍, mɛ̄ɛ̍ ndu̍ bɛ̍ɛ̍ ō yɔ̄ŋgu̍ ke᷅ lēbōl ko̍ŋ.

¹⁰Mi̍ chē bɛ̍ɛ̍ māā bōōndi̍i̍ Mɛ̄kīsɛ̍dɛ̍kī ko̍māl ke̍ŋ E̍bīlāha᷅m nde̍, Li̍vāī ndu̍ o̍o̍ vi̍lu̍ŋ ndɔ̍ le̍ ni̍, kɛ̍, ŋ̄ nɔ̄lā mī ŋ̄ dīmi̍ māā ō wā ni᷅ŋ E̍bīlāha᷅m o̍ īpūlu̍.

¹¹Wānāā sōlīāā lāsa̍lāa̍ ha̍ā, ā fu̍lā ha̍ā o̍ pūlāle̍ Li̍vāīle̍ŋ chōo̍ wā, ā wā māwāā wa̍llo̍ o̍ nɛ̄ī pi᷅lɔ̍ɔ̍ chōo̍ ā sāwālā Mɛ̄lɛ̄ka̍ ke̍ Mūu̍sē lāŋ. Kɛ̍, wāli̍ ndā tōsā wo̍ ō nɔ̄lā mbō chīi̍ wāli̍ Mɛ̄lɛ̄ka̍ kɛ̄ɛ̄si̍a̍a̍ wo̍ le̍. Kāni̍ fo̍ndōle̍, tē ndu̍ o̍o̍ nɔ̍lā ndu̍ chīī pɛ̍, mɛ̄ɛ̍ sābū chēle̍ŋ ndu̍ o̍o̍ ve᷅ lɛ̍ le̍ wānā so̍līāā lāsa̍lāa̍ ō chēle̍ŋ hūnɔ̄ɔ̍ o̍ nɛ̄i̍ Mɛ̄kīsɛ̍dɛ̍kī wo̍ chōo̍ te̍ŋge̍ŋ, o̍ nɛ̄i̍ E̍lɔ̄ŋndo̍ kɔ̄ɔ̄lī le̍.

¹²Wānāā sōlīāā lāsa̍lāa̍, tē Mɛ̄lɛ̄ka̍ lo̍ o̍ ko̍ŋ mbō māŋgālā nɛ̄i̍ ndā tōsā wa̍llo̍ chōo̍ wo̍ pɛ̍, mɛ̄ɛ̍ sāwālā lāŋ bɛ̍ɛ̍ mɛ̄ɛ̍ mī lā māŋgālāŋ.

¹³Wānā nāā ŋ̄ chō sɔ̄ɔ̍ŋ mu᷅ŋ dīmīo̍o̍ ā ndu̍ o̍kɔ̄ɔ̄ wo̍, ndu̍ ndu̍ kāa̍le̍ o̍ fu̍la̍ chōo̍ le̍ŋ lē chō yɛ̍ ā Li̍vāī. Kāa̍le̍ o̍ fu̍lā chōo̍ le̍ŋ, ō pīlɛ̍ bɛ̍ɛ̍ ve̍ wānā so̍līāā lāsa̍lā le̍.

¹⁴Ŋ̄ sīnā wa̍la̍ŋ māā o̍ kāa̍le̍ Chu̍dāle̍ŋ chōo̍ Māsānɔ̄ɔ̍ Mɛ̄lɛ̄ka̍ nāā fūlā ni̍. Ndu̍yɛ̍, bōōndi̍i̍ Mūu̍sē wā sūɛ̍i̍ ā wānāā sōlīāā lāsa̍lāa̍ ve̍, ō pe᷄l kāa̍le̍ Chu̍dāle̍ŋ lādīō le̍.

¹⁵Nyɛ̍ chɔ̍m sūɛ̍i̍ kālɛ̄i̍ wa̍la̍ŋ ndo̍ cho̍ ni̍ māā, wānā so̍līāā lāsa̍lāa̍ ō chēle̍ŋ, o̍ cho̍ māā Mɛ̄kīsɛ̍dɛ̍kī wo̍ ō hīŋ ŋ̄wāŋndā chīe̍e̍ tɛ̍ɛ̄ŋ.

¹⁶Ndu̍ ndu̍ sīmnɔ᷄ŋ ndɔ̄ɔ̍ wānā so̍līāā lāsa̍lāa̍ ō ve̍ su̍ɛ̍i̍ yɔ̍nu̍ŋ ā sāwā māā mɛ̄ɛ̍ o̍ kāa̍le̍ wāā nu̍āā chōo̍ mbō fūlā le̍. Ō sīmnu᷄ŋ māsi̍mna᷄ŋ wānā so̍līāā lāsa̍lāa̍ sānāā o̍ kpāāyā cho̍ o̍ yōōmū fɛ̍ɛ̍ŋ ā fɛ̍ɛ̍ŋ o̍ nɔ̍ wo̍ ni᷄ŋ ndo̍.

¹⁷Dīōmnda̍ŋ lā chō lā pōōnyīāā o̍ Yāu̍ Mɛ̄lɛ̄ka̍a̍ ni᷄ŋ ā ndu̍ o̍kɔ̄ɔ̄ āā, “Ā chō wā wānā so̍līāā lāsa̍lāa̍ le̍ fɛ̍ɛ̍ŋ ā fɛ̍ɛ̍ŋ, o̍ nɛ̄i̍ Mɛ̄kīsɛ̍dɛ̍kī wo̍ chōo̍.”

¹⁸O̍ he̍ī ni᷄ŋ mi̍ Mɛ̄lɛ̄ka̍ kpēēŋā sāwālā tāse̍la̍ŋ īkɛ̄i̍. Kāni̍ fo̍ndōle̍, sāwālā lāŋ lā āā nɔ̍ kpāāyā le̍, ndu̍yɛ̍, lā āā nɔ̍lā mī lā āā mālā ŋ̄wāŋndā chīe̍e̍ le̍.

¹⁹Sāwālā Mɛ̄lɛ̄ka̍ ke̍ lāŋ, Mūu̍sē lāŋ lā nɔ̄lā mī lā sīīŋgu̍u̍ wāŋndā mɛ̄ɛ̍ Mɛ̄lɛ̄ka̍ ndu̍ o̍o̍ hɛ̍nāŋ ndā mā wā yɛ̍ le̍. Kɛ̍ ndu̍yɛ̍, Mɛ̄lɛ̄ka̍ chūu̍ nāā nyɛ̄ o̍ hi̍o̍ū nāŋɔ̄ɔ̄ wo̍, ō nāā ŋ̄ nɔ̄lā mī ŋ̄ tīīndāŋ ndo̍. Kāni̍ fu̍u̍le̍, o̍ ndu̍ ni̍ŋ sānāā nāā ŋ̄ hūŋ nāā Mɛ̄lɛ̄ka̍ chūā ni̍.

²⁰Ndu̍yɛ̍ vɛ̍lɛ̄, Mɛ̄lɛ̄ka̍ mēnāŋ māā Chi̍i̍su̍ cho̍ wā wānā so̍līāā lāsa̍lāa̍ le̍ fɛ̍ɛ̍ŋ ā fɛ̍ɛ̍ŋ ni̍. Sīmnɔ᷄ŋ kāa̍le̍ Li̍vāīle̍ŋ lē sīmnu᷄ŋ wānāā sōlīāā lāsa̍lā wo̍, Mɛ̄lɛ̄ka̍ mēnāŋ te̍.

²¹Kɛ̍ Chi̍i̍sū ndu̍ ndu̍, sīmnɔ᷄ŋ o̍ si̍mnu᷄ŋ wa᷅nā so̍līāā lāsa̍lā wo̍ mi̍ Mɛ̄lɛ̄ka̍ mēna᷄ŋ. Mbo̍ dīmī āā, “Yā Māsānɔ̄ɔ̍ Mɛ̍lɛ̄kā I̍ me̍nāŋ. Ndu̍yɛ̍, I̍ fe̍ŋā di̍ōm nūu̍ lēchōo̍ le̍. Nu᷄m cho̍ wānā so̍lī sālāā nāā yā chu̍ā le̍ fɛ̍ɛ̍ŋ ā fɛ̍ɛ̍ŋ ndo̍ ni̍.”

²²He̍ī chɔ̍m ni̍ māā kpe̍ma̍ Mɛ̄lɛ̄ka̍ yīi̍ ā nāā wo̍ māā Chi̍i̍su̍ cho̍ sūŋgbu̍le̍ŋ le̍ kpe̍ma̍ ko̍ŋ ni̍. Ndu̍yɛ̍ kpe̍ma̍ ko̍ŋ hi̍o̍ū nāŋɔ̄ɔ̄ ā kpe̍ma̍ tāso̍o̍.

²³Nyɛ̍ cho̍ vɛ̄lɛ̄ yɛ̍ o̍ sūɛ̍i̍ he̍ī ni᷄ŋ ndo̍ ndu̍ cho̍ ni̍ māā wānāā sōlīāā lāsa̍lāa̍ ā pīli̍āā nda̍ nda̍, ā wā tāu̍, kāni̍ fu̍u̍le̍, nda̍ nda̍ mā vī. O̍ wu᷅ yɛ̍ ko̍ ndu̍ hi̍ū lɛ̍ lāchī ā wa̍llo̍ le̍.

²⁴Kɛ̍, Chi̍i̍sū ndu̍ ndu̍ cho̍ yōōmū le̍ fɛ̍ɛ̍ŋ ā fɛ̍ɛ̍ŋ. Le̍ he̍ī, nāā si̍māā o̍ nɔ̍ māā wānā so̍līāā lāsa̍lā wo̍, wānā che᷅le̍ŋ chu̍ē fo̍ndāŋ ndɔ̄ɔ̍ le̍.

²⁵Le̍ sābū kōŋ, pɛ̄ŋgu̍ o̍ pɛ̄ŋgu̍ ō nɔ̄lā mbō pīŋi̍ wānāā hu᷅ŋ nāā Mɛ̄lɛ̄ka̍ chūā sānāā o̍ ndu̍ ni̍ŋ ndā. Kāni̍ fu̍u̍le̍, hāāā mbo̍ wā yōōmū le̍ fɛ̍ɛ̍ŋ ā fɛ̍ɛ̍ŋ, ō chō sūɛ̍i̍ le̍ nāā o̍ Mɛ̄lɛ̄ka̍ lo̍.

²⁶Le̍lāŋ, Chi̍i̍su̍ cho̍ māsā wānāā sōlīāā lāsa̍lāa̍ o̍ mālā nāā o̍ nɛ̄ī o̍ nɛ̄ī ni̍ŋ ndo̍ ni̍. Ndu̍ cho̍ wānā cho̍ le̍ Mɛ̄lɛ̄ka̍ wo̍ ni̍. Tɔ̍ɔ̍ya̍ŋ bɛ̍ɛ̍ cho̍ ndu̍ chōo̍ le̍, ndu̍yɛ̍, yɔ̄ŋ o̍ yɔ̄ŋ wɔ̄ɔ̍ŋ ō tōsā le̍. Mi̍ Mɛ̄lɛ̄ka̍ sōlī ndu̍ wānāā yɔ̄ŋ wɔ̄ɔ̍ŋndā tɛ̄ɛ̄ŋ po̍. Ndu̍yɛ̍, mi̍ Mɛ̄lɛ̄ka̍ hēl ā ndu̍ ɛ̄chɛ̍nɛ̄.

²⁷Māsāā wānāā sōlīāā lāsa̍lāa̍ wā ā pīli̍āā, nda̍ nda̍, le̍ lēpāla̍ o̍ lēpāla̍ sālālāŋ sōlīo̍o̍. Ndu̍yɛ̍, mɛ̄ɛ̍ mī ndā āā so̍li̍ sa̍lāa̍ le̍ ndā pi̍lā yɔ̄ŋndā ndālā wɔ̍ɔ̍ŋndāŋ, mālāŋ ndā āā so̍lī ni᷅ŋ le̍ yɔ̄ŋndā wɔ̄ɔ̍ŋndā wāŋndā ā tūāā. Kɛ̍, Chi̍i̍sū ndu̍ so̍li̍ sālālā wāā le̍nde̍ le̍. Le̍ pīlɛ̍ kpe̍ o̍ so̍li̍ sālāā ni̍. Ndu̍yɛ̍, mi̍ sālā kōŋ wā tūu̍le̍ŋ le̍ fɛ̍ɛ̍ŋ ā fɛ̍ɛ̍ŋ, ndu̍ yɔ̍nūŋ ni̍ māā sālā ndu̍ pi̍lā so̍li̍ŋ ndo̍.

²⁸Wāŋndā chīe̍e̍ya̍ ā nɔ̍ kpāāyā le̍ wā, ndu̍yɛ̍, mā tōsā bīōndɔ᷄ŋnda̍ŋ ndā, ndā sāwālā Mɛ̄lɛ̄ka̍ ke̍ Mūu̍sē lāŋ lā sīīŋgu̍u̍ māsāā wānāā sōlīāā lāsa̍lāa̍ wā ni̍. Kɛ̍, mēna᷄ŋ Mɛ̄lɛ̄ka̍a̍ o̍ mɛ̍ɛ̍lu̍ yɔ̄nɔ᷄ŋ o̍ sāwālā Mūu̍sēlāŋ kɔ̄ɔ̄lī wo̍, ndu̍ si̍i̍ŋgu̍u̍ Po̍ Mɛ̄lɛ̄ka̍a̍ māsā wānāā sōlīāā lāsa̍lāa̍ ni̍. Ndu̍ yɔ̍nūŋ ni̍ māā Po̍ ndɔ̄ɔ̍, o̍ chi̍i̍ wāli̍ Mɛ̄lɛ̄ka̍ kɛ̄ɛ̄si̍a̍a̍ wo̍ tōsā fa̍ū wo̍.