Read Southern Kisi Hi̍būlūi̍ya̍ 8 Bible Online

Hi̍būlūi̍ya̍ 8 - Southern Kisi bible

Hi̍būlūi̍ya̍ 8

¹Sūɛ̍i̍ le̍bo̍lle̍ o̍ sūɛ̍i̍ he̍ī ni᷄ŋ ndi̍ cho̍ he̍ī ni̍. Māsā wānāā sōlīāā lāsa̍lāa̍ ō wāā nu̍āā, nāā ŋ̄ nɔ̄ ni̍. Ō chō īchāli̍ o̍ fo̍ndāŋ lēbīɔ̍ɔ̍ o̍ bā kɛ̄ndɛ̍ Mɛ̄lɛ̄ka̍a̍ chōo̍ ɛ̄chɛ̍nɛ̄.

²Ndu̍ cho̍ māsā wānāā sōlīāā lāsa̍lāa̍ cho̍ wa̍llo̍ nāā Mɛ̄lɛ̄ka̍ chō wā wo̍ ni̍. Ndā yɔ̍nūŋ ni̍ māā o̍ Tɛ̍ndīi̍ Mɛ̄lɛ̄ka̍a̍ ni᷄ŋ, ō ndu̍ Māsānɔ̄ɔ̍ Mɛ̄lɛ̄ka̍ pi̍lā si̍mi̍ wo̍. Ō cho̍ wa᷅nā chi̍e̍e̍ le̍ si̍mi̍ ndu̍ le̍.

³Māsāā wānāā sōlīāā lāsa̍lāa̍ o̍ Mɛ̄lɛ̄ka̍ lo̍ wā ki̍nɛ̍i̍, Mɛ̄lɛ̄ka̍ hɛ̍lī ndā ni̍ le̍ mā hīŋ ā nyɔ̄ɔ̍ŋ o̍ Mɛ̄lɛ̄ka̍ lo̍ ndu̍yɛ̍, mā sōli̍ sālālāŋ nāā ndu̍ chu̍ā le̍ wāŋndā. Le̍lāŋ, māsā wānāā sōlīāā lāsa̍lāa̍ ho̍ō, ndu̍ bɛ̍ɛ̍ mɛ̄ɛ̍ mī ndu̍ o̍o̍ hi᷅ŋ ā nyɛ̄ nāā Mɛ̄lɛ̄ka̍ chūā.

⁴Tē Chi̍i̍sū ndu̍ o̍o̍ wā chi̍e̍ēŋ nānu᷄ŋ pɛ̍, ndu̍ o̍o̍ ve᷅ wa᷅nā so̍līāā lāsa̍lā le̍. Kāni̍ fo̍ndōle̍, wānāā sōlīāā lāsa̍lāa̍ chi̍e̍ēŋ nānu᷄ŋ ā yɔ̄ŋgū Mɛ̍lɛ̄kā nyɔ̄ɔ̍ŋ mɛ̄ɛ̍ sāwālā Mɛ̄lɛ̄ka̍la̍ŋ lā dīmi̍ yɛ̍ wā ndā chō ni̍.

⁵Wa̍lta̍ wānāā sōlīāā lāsa̍lāa̍ ha̍ā ā wā lāŋ tōsāā lāŋ, tāāmāsi̍o̍o̍ ko̍ni̍ lā wā ni̍, kɛ̄lɛ̄ŋgāā wūndu̍le̍ sɔ̄ɔ̍ŋ cho̍ tōsa᷄ŋndo̍ ɛ̄chɛ̍nɛ̄ wo̍ŋ. Le̍nde̍ i̍ wā ā Mūu̍sē ni̍. Bōōndi̍i̍ o̍ bɛ̍ɛ̍ndi̍a̍ŋ le̍ Tɛ̍ndīi̍ Mɛ̄lɛ̄ka̍a̍ sīmīo̍o̍ ve̍, mi̍ Mɛ̄lɛ̄ka̍ dīmūl ndu̍ āā, “Māndāŋ ā mɛ̄ɛ̍ ŋ̄ sīmī ndu̍ yɛ̍. To̍sā nyɛ᷅ o̍ nyɛ̄ mɛ̄ɛ̍ yā I̍ tu̍u̍li̍a̍a̍ mi̍ chɔ᷅m nu̍m bōōndi̍i̍ ŋ̄ wā o̍ pēmbēi̍ chōo̍ ve̍ yɛ̍.”

⁶Mɛ̄ɛ̍ o̍ he̍ī ni᷄ŋ, ŋ̄ nɔ̄lā mī ŋ̄ chē wa̍la̍ŋ māā wāli̍ Mɛ̄lɛ̄ka̍ ke̍ Chi̍i̍sū le̍ tōsāā wo̍, ndu̍ hi̍o̍ū wā wāli̍ kpe̍e̍kpe̍i̍ ā wāli̍ wānāā sōlīāā lāsa̍lāa̍ ā pīli̍āā ā tōsā wo̍. Le̍nde̍ ko̍ni̍ vɛ̍lɛ̄, kpe̍ma̍ o̍ to̍sā mbo̍ lūɛ̄ī Mɛ̄lɛ̄ka̍ tɛ̄ɛ̄ŋ ndā ŋ̄wāŋndā chīe̍e̍ wo̍, ndu̍ hi̍o̍ū wā kpe̍ma̍ kpe̍e̍kpe̍i̍. Kāni̍ fu̍u̍le̍, būŋgāŋ Mɛ̄lɛ̄ka̍ chu̍ā o̍ kpe̍ma̍a̍ ho̍ō ni᷄ŋ ndo̍ŋ, mu̍ŋ hi̍o̍ū wā būŋgāŋ kpe̍e̍kpe̍i̍.

⁷Nyɛ̍ kpe̍ma̍ tāso̍o̍ ndu̍ o̍o̍ nɔ̍ le̍ tōsāā wo̍, ō nɔ̄lā ndu̍ tōsā le̍. Tē ndu̍ o̍o̍ nɔ̍lā ndu̍ tōsā pɛ̍, mɛ̄ɛ̍ sābū chēle̍ŋ ndu̍ o̍o̍ ve᷅ lɛ̍ le̍ kpe̍ma̍ sɛ̍nɛ̄ī yīī le̍.

⁸Kɛ̍ dīōmndā Mɛ̄lɛ̄ka̍ dīmi̍ la᷅ŋ ndāŋ lā chɔ᷄m māā mi̍ Mɛ̄lɛ̄ka̍ būlī tīɔ̍ɔ̍ ā wānāā ndūāā. Mi̍ Māsānɔ̄ɔ̍ Mɛ̄lɛ̄ka̍ dīmī āā, “Bōōndi̍i̍ cho̍ hūnɔ̄ɔ̄ fūūlūū mī yi̍i̍ kpe̍ma̍ sɛ̄nɛ̄īyo̍ ā wāŋndā o̍ lɛ̄ŋndē I̍sɔ̄lūɛ̄īle̍ŋ ni᷄ŋ ā wāŋndā o̍ būŋgɛ̄ī Chu̍dāve̍ ni᷄ŋ.

⁹Kpe̍ma̍ ko̍ŋ ndu̍ cho̍ wā yɛ̍, ā ō yā I̍ yi̍i̍ nāā fi̍nyāā ndāā māmāā bōōndi̍i̍ yā pi̍lā lo̍ ndā māndā mi̍ so̍lī ndā o̍ lɛ̄ŋndē I̍chi̍pīle̍ŋ ni᷄ŋ nde̍. Kpe̍ma̍ nāā ŋ̄ yīi̍ ko̍ŋ nāā ndāā wo̍, ā lo̍ le̍cho̍o̍ le̍. Le̍ he̍ī, mi̍ ma᷅l ndā.

¹⁰Tē bōōndi̍i̍ fu̍u̍lu̍u̍ pɛ̍, kpe̍ma̍ yā I̍ cho̍ yīī lātūlu̍ ā wāŋndā I̍sɔ̄lūɛ̄ī yo̍, ndu̍ cho̍ ho̍ō ni̍. I̍ cho̍ tōsā mā sīnā sāwālā nīlāŋ, ndu̍yɛ̍, mī to̍sā mā kɛ̄si̍ŋ ndāŋ o̍ lākɔ̄l. I̍ cho̍ wā Mɛ̄lɛ̄ka̍ ndā, ndā bɛ̍ɛ̍ mā wā wānāā nī.

¹¹Wānā pɛ̍ɛ̍kū lɛ̍ ni̍ŋ wānā o̍ wānā māā ō to᷄l nɛ̍i̍ Māsānɔ̄ɔ̍ Mɛ̄lɛ̄ka̍a̍ kɔ̄ɔ̄lī le̍, ō wā wa᷅nā ndā fūlā lɛ̄ŋndē pīlɛ̍ le̍ŋ kɛ̄lɛ̄ŋgāā kāa̍le̍ pi᷅lɛ̍ le̍ŋ ndo̍ ni̍. Wāŋndā kpo̍u̍ ā tūāl ni̍ŋ nɛ̍i̍ nūu̍ kɔ̄ɔ̄lī, wānā pɔ̍mbɔ̄ ni̍, wānā bɛ̍ndū ni̍.

¹²I̍ cho̍ ndā mālɔ̄ɔ̄ le̍ yɔ̄ŋndā ndālā wɔ̄ɔ̍ŋndāŋ, ndu̍yɛ̍, mī pu̍ɛ̍ɛ̍nu᷄ŋ ā nyɛ̄ o̍ nyɛ̄ wɔ̄ɔ̍ŋ ndā tōsā.”

¹³Tē Mɛ̄lɛ̄ka̍ sōō yɛ̄ pɛ̍ ā kpe̍ma̍ sɛ̍nɛ̄ī yīīyo̍ o̍kɔ̄ɔ̍, mɛ̄ɛ̍ ō tāso̍o̍ ndu̍ ō sīīŋgu̍u̍ ni᷅ŋ ko̍ŋ nyɛ̍ pāāndū. Ndu̍yɛ̍, nāā pi̍lā ŋ̄ sīnā māā tē nyɔ̄ɔ̍ sīmnu᷄ŋ o̍ pāāndū ndu̍yɛ̍, mbō sīɔ̍ŋ pɛ̍, mɛ̄ɛ̍ ō chūū bɛ̄ɛ̄.