Read Southern Kisi Hi̍būlūi̍ya̍ 9 Bible Online

Hi̍būlūi̍ya̍ 9 - Southern Kisi bible

Hi̍būlūi̍ya̍ 9

¹Bōōndi̍i̍ Mɛ̄lɛ̄ka̍ yīi̍ kpe̍ma̍ tāso̍o̍ ndā wānāā ndūāā sīndɛ̄ ve̍, mbo̍ dūāū sāwālāŋ ā mɛ̄ɛ̍ ndā āā pi̍ɛ̍ī ndu̍ yɛ̍. O̍ ko̍ŋ kɔ̍ɔ̍lī, mi̍ wāŋndā chīe̍e̍ya̍ ā tōōsīāā fo̍ndāa̍ o̍ chi̍e̍ēŋndo̍ ho̍ō chōo̍ nāā ndā āā pi̍ɛ̍ī Mɛ̍lɛ̄kā wā māā tɛ̍ndīi̍.

²Tɛ̍ndīi̍ ndā tōōsi̍āā ko̍ŋ ndo̍, ō wā ō kīālāā tɛ̄ɛ̄ŋ sālā tīɔ̍ɔ̍ŋ. Ndā āā ve̍e̍lū fo̍nda᷄ŋ tāse̍ wānā āā lu̍ɛ̍ī yo̍ āā, Fo̍ndāŋ Kāsīo̍o̍. Lo̍ŋ ndā āā kɛ̍sī nyɔ̍ɔ̍ŋ ŋ̄ pūm ni̍, nyɛ̄ kɛ̄sīāā lālāmbūi̍yo̍ ni̍, ā ti̍bīi̍yo̍, ā bēe̍dīi̍ ndā yɔ̄ŋgū nāā Mɛ̄lɛ̄ka̍ chūā wo̍ ō kɛ̄sīāā lēchōo̍.

³Wānā āā chɛ̍ŋ pɛ̍ o̍ fo̍ndāŋ kōŋ, ā hīŋ o̍ kōlā bɛ̍ndu̍ ke̍lū fo̍ndāŋndā tīɔ̍ɔ̍ŋnda̍ŋ tɛ̄ɛ̄ŋ ndo̍. Wānā āā hi̍o̍ū kōlā ko̍ŋ pɛ̍ ā lūɛ̄ī o̍ chīɛ̄ī dīi̍ŋ ndɔ̄ɔ̍. Ndā āā ve̍e̍lū ndu̍ āā, fo̍ndāŋ Kāsi̍ hi̍o̍ū kpo̍u̍ wo̍.

⁴O̍ chīɛ̄ī kōŋ ni᷄ŋ māāŋndo̍ wā ni̍, ō tōōsīāā ā ko̍o̍līi̍yo̍ŋ. Lēchōo̍ ndā āā lu̍ām nyɛ᷅m chūŋ kɛ̄ndɔ᷄ŋ ni̍. Lo̍ŋ ko̍ni̍ ndā āā kɛ̍sī vɛ̍lɛ̄ Kɔ̍fu̍ ni̍. Kɔ̍fū kālāā bɛ̍ɛ̍ lēni᷄ŋ ā o̍ kɔ̄ɔ̍, ā ko̍o̍līi̍ye̍ o̍ wā ō tōōsīāā ni̍. Lēni᷄ŋ ndā āā kɛ̍sī vɛ̍lɛ̄ kpɛ̍ɛ̍nɛ̍i̍ pu̍m ni̍. A̍ ko̍o̍līi̍ye̍ ndā āā chɔ̄ū ndi̍ ni̍. Nyɛ̄ dīāā Mɛ̄lɛ̄ka̍ ndu̍ o̍o̍ ke᷅ wānāā ndūāā sīndɛ̄ wo̍ dīōla̍ŋ āā mānā, ō ti᷄ŋ wā o̍ kpɛ̍ɛ̍nɛ̍i̍ ke̍ŋ ni᷄ŋ ni̍. Tīnda̍ E̍lɔ̄ŋndo̍ sīndɛ̄, ō ndu̍ o̍o̍ nɔ̍ pūīyo̍ wo̍ ni̍, ā pōūtā yɛ̍ndɛ̍la̍ ti̍ɔ̍ɔ̍ŋndā sāwālā Mɛ̄lɛ̄ka̍la̍ŋ lā wā lā pōōnyīāā lēchōo̍ lāŋ, o̍ kɔ̍fū kōŋ ni᷄ŋ lā wā ni̍.

⁵Mā tūūlīāā nyāā kūmba᷅ŋāā pūm o̍ kɔ̍fōo̍ ho̍ō chōo̍. Nyāā ndā tūūli̍a̍a̍ kāŋ ndā ā wā māwāā tāāmāsi̍o̍o̍ le̍ chɔ̄mndo̍ māā Mɛ̄lɛ̄ka̍ chō o̍ fo̍ndāŋ kōŋ. Kūmba᷅ŋndā ndālāŋ lā wā lā pɛ̄ɛ̄ŋgāā o̍ fo̍ndāŋ Mɛ̄lɛ̄ka̍ māl ko̍ŋ wa᷅ŋndā le̍ yɔ̄ŋndā ndālā wɔ̍ɔ̍ŋndāŋ ndo̍. Kɛ̍ ndu̍yɛ̍, ō cho̍ wɔ̍ bo̍o̍nde̍i̍ he̍ī le̍ nāā ŋ̄ chīī yɔ̍ ni̍ŋ i̍sɔ̍ɔ̍ ā sɔ̄ɔ̍ŋ kāla᷄ŋ fa̍ū o̍kɔ̄ɔ̄ le̍.

⁶Mɛ̄ɛ̍ nu̍āā ndā āā bɛ̍ɛ̍ndi̍āā fo̍ndāŋ kōŋ ni̍. O̍ chīɛ̄ī tāso̍o̍, wānāā sōlīāā lāsa̍lāa̍ ndā āā lu̍ɛ̍ī te̍le̍ŋ o̍ te̍le̍ŋ le̍ wāli̍ ndāā tōsāā ni̍.

⁷Kɛ̍, chīɛ̄ī dīi̍ŋ ndɔ̄ kōŋ ndu̍ ndu̍, mɛ̄ɛ̍ māsā wānāā sōlīāā lāsa̍lāa̍ ndu̍ pīlɛ̍ kpe̍ mī ndu̍ o̍o̍ lūɛ̄ī lo̍ŋ. Lē pīlɛ̍ kpe̍ ndu̍ o̍o̍ lu̍ɛ̍ī lo̍ŋ o̍ wɔ̄sīo̍o̍ ni᷄ŋ ni̍. Ō wā lūɛ̄īyɔ̄ɔ̍ lo̍ŋ pɛ̍, mɛ̄ɛ̍ mbō chu̍ā kōo̍ma̍ chɔ̄lūa̍ŋ mbō kūɛ̄ ā māŋ le̍ yɔ̄ŋgōo̍ o̍ Mɛ̄lɛ̄ka̍ lo̍ māā sālā. Ō sōlī fɛ̍lɛ̍ŋ sālā kōŋ le̍ ndu̍ pi̍lā yɔ̄ŋndā ndɔ̄lā wɔ̍ɔ̍ŋndāŋ, o̍ ko̍ŋ kɔ̍ɔ̍lī, mbō sōli̍ le̍ yɔ̄ŋndā wɔ̄ɔ̍ŋndā wāŋndā chīe̍e̍ya̍ ā tōsā, kɛ̍ ā si̍nā māā yɔ̄ŋndā wɔ̄ɔ̍ŋ te̍ lāŋ.

⁸Nyi̍nā Kāsīo̍o̍ chō nāā chɔ̄mndo̍ wa̍la̍ŋ o̍ sɔ̄ɔ̍ŋ mu᷅ŋ ni᷄ŋ māā, tē Tɛ̍ndīi̍ tāse̍ wānā chi̍o̍o̍ tōsā wo̍ chō wɔ̄ pɛ̍, mɛ̄ɛ̍ nɛ̄īyo̍ chō wɔ̄ ō kīndāā le̍ lūɛ̄īyɔ̄ɔ̍ o̍ Fo̍ndāŋ Kāsi̍ hi̍o̍ū kpo̍u̍ wo̍ ni᷄ŋ.

⁹Tɛ̍ndɛ̄i̍yo̍ ho̍ō chō māchūāā māā tāāmāsi̍ le̍ nāā chɔ̄mndo̍ ā sɔ̄ɔ̍ŋ cho̍ mu᷅ŋ pɛ̄ŋgo̍o̍ ho̍ō wo̍ŋ, le̍ mī ŋ̄ sīnā mu̍ŋ pɛ̄ŋgu̍. Ō chɔ᷄m nāā māā wānā pi̍ɛ̍ī Mɛ̍lɛ̄kā wo̍, nyɛ̄m o̍ yɔ̍ŋgū o̍ Mɛ̄lɛ̄ka̍ lo̍ wo̍ŋ, ā sālālā o̍ so̍o̍lūū o̍ ndu̍ lo̍ lāŋ, māā nyɔ̄ɔ̍ŋ mu᷅ŋ ki̍nɛ̍i̍ ŋ̄ nɔ̍lā mī ŋ̄ sīīŋgu̍u̍ kɔ̄l ndɔ̄ɔ̍ mbō wā mɛ̄ɛ̍ Mɛ̄lɛ̄ka̍ hɛ̄nāŋ yɛ̍ le̍.

¹⁰Sābū ko᷄ŋ cho̍ ni̍ māā, sɔ̄ɔ̍ŋ mu᷅ŋ mu̍ŋ ŋ̄ nɔ̍lā wa̍nā kɔ᷅llo̍ māŋgālā le̍. Kāni̍ fu̍u̍le̍, ā sāwālā yɔ̍ŋāāla̍ŋ nda᷅ŋ o̍kɔ̄ɔ̄ ko̍ni̍ ŋ̍ cho̍ ni̍, sāwālāŋ ā nyɛ̄m wāŋndo̍ nɔ̄ mbō dē wo̍ŋ, ā nyɛ̄m o̍ nɔ̍ mbō ko᷄l lo̍ŋ, ā sāwālāŋ ā pūlɔ̄ɔ̄lā yɛ̍ yɛ̍la̍ŋ o̍kɔ̄ɔ̄ le̍ sīmnɔ᷄ŋndo̍ wānā di̍a̍ndāā. Sāwālāŋ nda᷅ŋ ki̍nɛ̍i̍, lā chō māchūāā le̍ mbō lo̍ o̍ ko̍ŋ ko̍ni̍ mī bōōndi̍i̍ Mɛ̄lɛ̄ka̍ chō nyɛ̄ o̍ nyɛ̄ fe̍e̍ si̍i̍ŋgūū ō sɛ̄nɛ̄ī ndu̍yɛ̍, mī nyɛ̄ o̍ nyɛ̄ wā yɛ̍ ve̍, mī ī fūūlu̍u̍.

¹¹Kɛ̍ ndu̍yɛ̍, Ki̍li̍tī chi̍i̍ ni᷅ŋ hūnɔ̄ɔ̄ māā māsā wānāā sōlīāā lāsa̍lāa̍. Ndu̍ hi᷅ŋ ā sɔ̄ɔ̍ŋ dɛ̍nɛ̍ kɛ̍ndɛ᷄ŋ chi̍i̍ ni᷅ŋ mu᷅ŋ yɔ̄nɔ᷄ŋ nāa̍ na̍a̍ chūā wo̍ŋ ni̍. Ndu̍yɛ̍, wāli̍ o̍ to̍sā māā māsā wānāā sōlīāā lāsa̍lāa̍ wo̍, ō tōsā ndu̍ mātōsāā o̍ tɛ̍ndīi̍yo̍ o̍ hi̍o̍ū ho̍ō chi̍e̍ēŋ nānu᷄ŋ ndo̍. Ndu̍yɛ̍, ndu̍ hi̍o̍ū bɛ̄ndā. Tɛ̍ndīi̍ ko̍ŋ ndu̍, ō cho̍ to̍sā wānā chīe̍e̍ le̍. Ko̍ŋ cho̍ ni̍, ō cho̍ nyɛ᷅ wāā chi̍e̍ēŋ nānu᷄ŋ te̍.

¹²Ndu̍yɛ̍, Fo̍ndāŋ Kāsi̍ hi̍o̍ū kpo̍u̍ wo̍, lē pīlɛ̍ kpe̍e̍le̍ Ki̍li̍tī lu̍ɛ̍ī lēni᷄ŋ ni̍. Ndu̍yɛ̍, kɔ̄lā o̍ ku̍ɛ̄ lāŋ, ō cho̍ ā kōo̍ma̍ lāchūīŋ, kɛ̄lɛ̄ŋgāā kōo̍ma̍ nāūwāā fɔ̍ŋndɔ̍ le̍ o̍ ku̍ɛ̄ le̍ sālāā sōlīo̍o̍ le̍. A̍ kōo̍ma̍ ndɔ̄ma̍ ndu̍ pi̍lāŋ o̍ ku̍ɛ̄ ni̍ mbo̍ bāŋā nāā le̍ fɛ̍ɛ̍ŋ ā fɛ̍ɛ̍ŋ o̍ yɔ̄ŋndā wɔ̄ɔ̍ŋndā nāā ŋ̄ tōsā lāŋ ni᷄ŋ.

¹³O̍ pāāndōo̍ ni᷄ŋ, kōo̍ma̍ chūīŋnda̍ŋ, ā kōo̍ma̍ nāūwa̍ŋ, ā pūltā nāūwāā fɔ̍ŋndu̍a̍a̍ ndā lūām māā sālā o̍ Mɛ̄lɛ̄ka̍ lo̍ wā, mu̍ŋ wānāā sōlīāā lāsa̍lāa̍ ndā āā fāsāŋīāā wa᷅ŋndā chōo̍ ā cho̍ ā nɔ̄ɔ̄lɛ̍i̍ Mɛ̍lɛ̄kā o̍ hɔ̄l lā ni̍, le̍ mā sīmnu᷄ŋ ā di̍a̍ndāā.

¹⁴Nāā kōo̍ma̍ chɔ̄lūa̍ŋ mā āā nɔ̍ wɔ̄ kpāāyāā le̍ wāŋndā sīīŋgūūwo̍ wānāā dīāndāā Mɛ̄lɛ̄ka̍ o̍ hɔ̄l, kōo̍ma̍ Ki̍li̍tīa̍ŋ yɛ̄? Māŋ mā hi̍o̍ū bɛ̍ɛ̍ kpāāyā po̍lo̍ŋ le̍ nāā dīndīo̍o̍. Mi̍ Ki̍li̍tī chu̍ā dīāllūŋ ndɔ̄ɔ̍ŋ ndu̍ pi̍lāŋ, ŋ̍ nɔ̍ yɔ᷅ŋ o̍ yɔ̄ŋ wɔ̄ɔ̍ŋ te̍ wo̍ŋ, mbo̍ sōli᷄ŋ sālā o̍ Mɛ̄lɛ̄ka̍ lo̍ le̍ nāā. Ō tōsā he̍ī sānāā ā kpāāyā Nyi̍nā Mɛ̄lɛ̄ka̍a̍, o̍ cho̍ le̍ fɛ̍ɛ̍ŋ ā fɛ̍ɛ̍ŋ ndo̍. Mɛ̄ɛ̍ kōo̍ma̍ ndɔ̄ma̍ māŋ, mā di̍ndī kɔ᷅ltā nāālāŋ ni̍ ŋ̄ to̍sā lɛ̍ yɔ̄ŋ wɔ̄ɔ̍ŋ mī ŋ̄ sɔ̄lā pīɔ̍mndo̍ le̍, kɛ̍ mī ŋ̄ sāāŋgi̍a̍l ni᷅ŋ Mɛ̄lɛ̄ka̍ cho̍ yōōmū wo̍.

¹⁵Le̍ sābōo̍ ho̍ō, Ki̍li̍ti̍ cho̍ wānā to̍sā mi̍ kpe̍ma̍ sɛ̍nɛ̄īyo̍ lūɛ̄ī Mɛ̄lɛ̄ka̍ tɛ̄ɛ̄ŋ ndā ŋ̄wāŋndā chīe̍e̍ wo̍ ni̍. Ō tōsā he̍ī le̍ mī wānāā Mɛ̄lɛ̄ka̍ vēēlu̍ le̍ wāā wānāā ndɔ̄ wā māā mī Mɛ̄lɛ̄ka̍ dɔ̄ū ndā sālā le̍ fɛ̍ɛ̍ŋ ā fɛ̍ɛ̍ŋ, mɛ̄ɛ̍ o̍ chu̍ā būŋgɛ̄i̍ yɛ̍. Pīɔ̍m Chi̍i̍sū sɔ̍lā wo̍, ndu̍ to̍sā ā sābū ni̍ mi̍ ke̍ŋ i̍ yɔ̄nu᷄ŋ. Pīɔ̍m ndɔ̄ɔ̍ cho̍ wāŋndā bāŋā o̍ yɔ̄ŋndā wɔ̄ɔ̍ŋndā ndā tōsā ā bōōndi̍i̍ ndā wā o̍ kpe̍ma̍ tāso̍o̍ bɛ̄ŋgu̍ ve̍.

¹⁶Kpe̍ma̍ Mɛ̄lɛ̄ka̍ yīi̍ ndā ŋ̄wāŋndā chīe̍e̍ wo̍ chō māchūāā, mɛ̄ɛ̍ wāŋndo̍ tōsā nu̍āā chɛ̄la᷅ŋndo̍ ndā wāŋndo̍ māā tē ō vī pɛ̍, wānā ko̍ŋ hu᷄ŋ lo̍ō nyɛ̄m ndɔ᷄ŋ yɛ̍. O̍ chɛ̄la᷅ŋ wāā nu̍āā ni᷄ŋ, lɔ̍ɔ̍ pā mī wānā o̍ chu̍e̍l ko̍ŋ bu̍ŋgɛ̄i̍ yo̍ ō sɔ̄lā nyɛ̄m mu᷅ŋ, mɛ̄ɛ̍ mī ī bīī tōnyā māā wānā ko̍ŋ vī.

¹⁷Kɛ̍, tē ō chō wɔ̄ yōōmū pɛ̍, būŋgɛ̄ī o̍ chu̍ā ke̍ŋ nde̍, ī to̍sāŋ ndɔ̍ le̍. Kɛ̍, tē ō fūūlu̍u̍ ā ībōōndu̍ pɛ̍ mbō vī, mɛ̄ɛ̍ būŋgɛ̄ī o̍ chu̍ā ve̍ ī tōsa̍ŋ.

¹⁸Le̍lāŋ i̍ wā ni̍ māā, mɛ̄ɛ̍ mī wāŋndā ndā āā di̍ī chɔ̄lūāā māā sālā mālāŋ kpe̍ma̍ tāse̍ ko̍ŋ sīmnūŋ su̍ɛ̍i̍ kpe̍e̍kpe̍i̍.

¹⁹Bōōndi̍i̍ Mūu̍sē to̍mbo̍la̍l sīndɛ̄ wāŋndā sāwālā Mɛ̄lɛ̄ka̍ dīmi̍ māā ā chu̍ā lāŋ kpo̍u̍ ve̍, nyɛ̄ o̍ to̍sā wo̍ cho̍ ho̍ō ni̍. Mɛ̄ɛ̍ o̍ chi̍i̍, mbo̍ chūā kōo̍ma̍ nāū fɔ̍ŋndɔ̍ɔ̍, ā kōo̍ma̍ chūīŋnda̍ŋ mbo̍ mūūli̍āŋ ā mɛ̄ŋndāŋ. Mbo̍ chūā pēi̍ yɔ̄m pūm dīōla̍ŋ āā, ha̍sɔ̍pī ve̍, ā yīīŋīī sāā si̍a̍ŋɛ̄i̍, mbo̍ yīŋ o̍ kōo̍wa̍ŋ ni᷄ŋ. Mɛ̄ɛ̍ o̍ yi᷅ŋ, mbo̍ fāsāŋīāā o̍ yāu̍lā sāwālāŋ lā chō lā pōōnyīāā lāŋ chōo̍. O̍ ko̍ŋ kɔ̍ɔ̍lī, mbo̍ fāsāŋīāā vɛ̄lɛ̄ wāŋndā chīe̍e̍ya̍ fa̍ū.

²⁰Mɛ̄ɛ̍ o̍ wā māŋ fāsāŋīāā mbo̍ dīmī āā, “A̍ kōo̍wa̍ŋ ma᷅ŋ Mɛ̄lɛ̄ka̍ chō kpe̍ma̍ o̍ di̍mi̍ ho̍ō māā lā wā le̍bɛ̍ŋgu̍ wo̍ yīīyo̍ ni̍.”

²¹Le̍nde̍ ko̍ni̍, mi̍ Mūu̍sē fāsāŋīāā vɛ̍lɛ̄ kōo̍wa̍ŋ o̍ Tɛ̍ndīi̍ Mɛ̄lɛ̄ka̍a̍. Mbo̍ fāsāŋīāā vɛ̄lɛ̄ o̍ wōlɔ̄ɔ̄lā ndā tōsā wa̍llo̍ ā lāŋ o̍ Mɛ̄lɛ̄ka̍ sōōlūūwo̍ ni᷄ŋ ndāŋ fa̍ū.

²²Ndu̍yɛ̍ māā lēkɛ̍ndɛ̄ī, mɛ̄ɛ̍ sāwālā Mɛ̄lɛ̄ka̍ ke̍ Mūu̍sē lāŋ lā dīmi̍ yɛ̍, nyɔ̄ɔ̍ŋ ŋ̄ fāŋgā fa̍ŋgā mɛ̄ɛ̍ ā kōo̍wa̍ŋ mālāŋ ŋ̍ di̍a̍ndū Mɛ̍lɛ̄kā o̍ hɔ̄l. Ndu̍yɛ̍, le̍ mī wāŋndo̍ sɔ̄lā mālɔ̄ɔ̍ le̍ yɔ̄ŋ wɔ̄ɔ̍ŋ o̍ to̍sā wo̍, mɛ̄ɛ̍ mī kōo̍wa̍ŋ mā tālā māā sālā

²³Mɛ̄ɛ̍ mī kōo̍wa̍ŋ mā āā tālā māā sālā le̍ mī nyɔ̄ɔ̍ŋ mu᷅ŋ mu̍ŋ si̍mnu᷄ŋ ŋ̍ di̍a̍ndāā Mɛ̄lɛ̄ka̍ o̍ hɔ̄l, mu̍ŋ yɔ̍nūŋ ni̍ māā nyɛ᷄m cho̍ mu᷅ŋ vēla᷅ŋ nyɔ̄ɔ̍ŋ ɛ̄chɛ̍nɛ̄ wo̍ŋ. Nyɛ᷄m cho̍ mu᷅ŋ ɛ̄chɛ̍nɛ̄ wo̍ŋ, mɛ̄ɛ̍ sālā bɛ̍ndā mbo̍ hīāū ā sālā lāchɔ̄lōo̍ ho̍ō wo̍ mī ndu̍ o̍o̍ so̍li̍ŋ le̍ mu̍ŋ.

²⁴Mi̍ Ki̍li̍tī pi̍lā lu̍ɛ̍ī ɛ̄chɛ̍nɛ̄ di̍, le̍ mbō si᷄m Mɛ̄lɛ̄ka̍ o̍ hɔ̄l, le̍ mbō sōō le̍ nāā. Ō cho̍ tɛ̍ndīi̍ ŋ̄wāŋndā chīe̍e̍ ā tāŋgu̍l te̍ o̍ lu̍ɛ̍ī le̍. Tɛ̍ndīi̍ ko̍ŋ ndu̍ ndu̍ cho̍ māchūāā vēla᷅ŋ tɛ̍ndīi̍ kpe̍e̍kpe̍i̍yo̍.

²⁵Māsā wānāā sōlīāā lāsa̍lāa̍ o̍ Mɛ̄lɛ̄ka̍ lo̍ wo̍ ndu̍ ndu̍, wɔ̄sī o̍ wɔ̄sī mɛ̄ɛ̍ mī ndu̍ o̍o̍ lu̍ɛ̍ī o̍ Fo̍ndāŋ Kāsi̍ hi̍o̍ū kpo̍u̍ wo̍. Tē ō wā lūɛ̄īyɔ̄ɔ̍ pɛ̍, ō kūɛ̄ ā kōo̍ma̍ chɔ̄lūa̍ŋ o̍ bā. Kɛ̍, Ki̍li̍tī ndu̍ ndu̍, lūɛ̄īyɔ̄ɔ̄ o̍ lu̍ɛ̍ī ɛ̄chɛ̍nɛ̄ mbo̍ sōli᷄ŋ sālā wo̍, ō cho̍ su̍ɛ̍i̍ o̍ to̍sā lē dīi̍ŋ di̍i̍ŋ te̍.

²⁶Tē ndi̍ i̍i̍ yɔ̍nu̍ŋ le̍nde̍ le̍, mɛ̄ɛ̍ ndu̍ o̍o̍ sɔ̍lā ni̍ŋ nyɛ̍ nɛ̄īyāā te̍le̍ŋndā fāŋgā fa̍ŋgā, chɔ̍ŋ hāāā bɛ̍ɛ̍ ā bōōndi̍i̍ Mɛ̄lɛ̄ka̍ tōōsi̍āā chi̍e̍ēŋndo̍ ve̍. Kɛ̍ ndu̍yɛ̍, lē pīlɛ̍ kpe̍e̍le̍ o̍ hi᷅ŋ chi̍e̍ēŋ nānu᷄ŋ ni̍, bōōndi̍i̍ chi̍e̍ēŋndo̍ chō he̍ī le̍ fūūlūūwo̍ o̍ mɛ̄ɛ̄lu̍lāŋ nde̍. Ō tōsā he̍ī, le̍ mbō fāŋā yɔ̄ŋndā wɔ̄ɔ̍ŋndā nāā ŋ̄wāŋndā chīe̍e̍ to̍sā lāŋ le̍ fɛ̍ɛ̍ŋ ā fɛ̍ɛ̍ŋ, sānāā ā sālā o̍ so̍li̍ŋ ndo̍.

²⁷Wānā o̍ wānā ā nɔ̄ mā vī lē pīlɛ̍. Tē ā vī yɛ̄ pɛ̍, Mɛ̄lɛ̄ka̍ kɔ̍ kɔ̍ɔ̍sā ā nūm.

²⁸Ki̍li̍tī bɛ̍ɛ̍, lē pīlɛ̍ o̍ so̍li̍ŋ sālā ni̍, le̍ mbō fāŋā yɔ̄ŋndā wɔ̄ɔ̍ŋndā wāŋnda̍ ta̍u̍ ta̍u̍. Ō chō vɛ̄lɛ̄ mīīŋgū chi̍e̍ēŋ nānu᷄ŋ di̍i̍ŋ ndɔ̄ɔ̍. Bōōndi̍i̍ ke̍ŋ ndi̍ ndi̍, ō ve᷅ lɛ̍ ni̍ŋ le̍ yɔ̄ŋ wɔ̄ɔ̍ŋ fāŋā le̍. Ō hūŋ ni̍ŋ māhu̍nāā le̍ mbō hu᷄ŋ pi̍ŋī wānāā cho̍ ndu̍ chūmndo̍ wā.