Read Southern Kisi Chēmi̍si̍ 1 Bible Online

Chēmi̍si̍ 1 - Southern Kisi bible

Chēmi̍si̍ 1

¹Yā Chēmi̍si̍ yā cho̍ yāu̍wo̍ ho̍ō pōōnyīāā ni̍, yā bu̍ɛ̍īyo̍ le̍ Mɛ̄lɛ̄ka̍ ā Māsānɔ̄ɔ̍ Chi̍i̍sū Ki̍li̍tī. I̍ cho̍ ndu̍ pōōnyīāā nāā nyā wānāā Mɛ̄lɛ̄ka̍a̍ chūā, nyā cho̍ o̍ ka̍āla̍ŋ ni᷄ŋ bā o̍ bā fe̍e̍ o̍ chi̍e̍ēŋndo̍ chōo̍ wā. I̍ yi̍l nyā, I̍ yi̍l nyā lāpi̍.

²Chāāŋāā nīāā wānāā lāāla᷄ŋndā. Tē dɛ̍nɛ̍la̍ pālāālā yɛ̍ yɛ̍la̍ŋ lā hīŋ nyā chōo̍ pɛ̍, lā wā ā kɔ̄ltā kɛ̄ndɛ̄ bu̍tē.

³Kāni̍ fu̍u̍le̍, nyā pi̍lā lā sīnā māā tē mu᷅ŋ ŋ̄ yɔ̄nu̍ŋ nyā pɛ̍, mɛ̄ɛ̍ tɔ̄ɔ̄nda᷄ŋndo̍ nyā cho̍ ko̍ŋ ni̍ le̍ sīnāā mɛ̄ɛ̍ kpɛ̍ nyā tīīndāŋ o̍ Mɛ̄lɛ̄ka̍ ni᷄ŋ yɛ̍ ni̍. Tē mu᷅ŋ ŋ̄ kēēku̍ nyā chōo̍ pɛ̍, lā nɔ̄lā mī lā hīōū lāchī ā sīsi̍lāŋ nyɛ̄ kɛ̄ndɛ̄ yi̍.

⁴Lā hīo̍u̍ lāchi̍ ā sīsi̍lāŋ nyɛ̄ kɛ̄ndɛ̄ yi̍, mbō lo̍ o̍ ko̍ŋ hāāā, mī lā fūūlu̍u̍ o̍ mɛ̄ɛ̄lu̍lāŋ, le̍ mī lā sīmnu᷄ŋ mɛ̄ɛ̍ Mɛ̄lɛ̄ka̍ hɛ̄nāŋ nyā mī lā wā o̍ nyɛ̄ o̍ nyɛ̄ fe̍e̍ ni̍ŋ yɛ̍. Kāā o̍ kāā kɛ̄ndɛ̄ wa᷅ mī lā kɛ̄ɛ̍ ndu̍ nɔ̄ le̍.

⁵Le̍lāŋ, tē wānā o̍ wānā wā nyā tɛ̄ɛ̄ŋ pɛ̍ mbō nɔ̍ tāāsi̍ le̍, mɛ̄ɛ̍ wānā ko̍ŋ ō nyūnā Mɛ̍lɛ̄kā dīōm, le̍ mbō ke̍ ndu̍ tāāsi̍o̍o̍. Wānā īkɛ̄ndɔ̄ɔ̍ Mɛ̄lɛ̄ka̍ chō nāā wānā o̍ wānā chu̍ā ni̍. Ō ke᷅ wānā nyɛ̍ ā ŋɔ̄ɔ̄chīāŋ te̍. Wānā o̍ wānā nyu̍nā ndu̍ le̍ tāāsi̍o̍o̍ pɛ̍, kīo̍o̍ o̍ ke᷅ ndu̍ ni̍.

⁶Kɛ̍ ndu̍yɛ̍ wānā o̍ wānā tē ā nyu̍nā Mɛ̄lɛ̄ka̍ dīōm pɛ̍, mɛ̄ɛ̍ nɔ̍ lāāla᷄ŋndo̍ māā ō chō nu̍m kē. Tē ā nyu̍nā ndu̍ pɛ̍, nɔ᷅ kīīsa᷄ŋ o̍ kɔ̄l nūmndo̍ ni᷄ŋ te̍. Kāni̍ fu̍u̍le̍, wānā nyu̍nā ho̍ō Mɛ̄lɛ̄ka̍ ā kīīsa᷄ŋndo̍ wo̍, ō cho̍ wa᷅nā si̍m o̍ nɛ̄īyo̍ ō pīlɛ̍ chōo̍ sākpō le̍. Wānā wāā le̍nde̍ ō chō māchūāā mɛ̄ɛ̍ pēe̍ mɛ̄ŋmā īhɛ᷄llo̍ chō yɛ̍, hūēīye̍ ī hɔ᷄ŋ lēchōo̍ pɛ̍, mā si᷅m yi̍ le̍. Yɔ̄nɔ᷄ŋndo̍ yo̍kpa᷄ŋ yo̍kpa᷄ŋ, mā hēl mā tūāl.

⁷Wānā mu̍lū mu̍lūa̍ŋndo̍ wānā wāā le̍ndōo̍ chō ni̍. Ō si᷅m o̍ nɛ̄ī pi᷅lɛ̍ chōo̍ le̍. Wānā wāā le̍nde̍ ō nɔ᷅ o̍ kɔ̄l kpo̍so̍ŋ māā ō chō nyɛ̄ o̍ nyɛ̄ sɔ̄lā Māsānɔ̄ɔ̍ Mɛ̄lɛ̄ka̍ o̍ bā le̍.

⁹Wānā lāāla᷄ŋ cho̍ ho̍ō ō tāmbɛ̍i̍ yo̍, ō na᷄ŋ kɔ̍l le̍ mɛ̄ɛ̍ Mɛ̄lɛ̄ka̍ ke̍ ndu̍ nāā si̍māā bɛ̄ndūāā yɛ̍.

¹⁰Ndu̍yɛ̍ wānā lāāla᷄ŋ cho̍ ō sūlāā wo̍, ō na᷄ŋ kɔ̍l le̍ mɛ̄ɛ̍ Mɛ̄lɛ̄ka̍ tūsi̍ ndu̍ tōōlō yɛ̍. Kāni̍ fu̍u̍le̍, wānā su̍lāā chō māchūāā mɛ̄ɛ̍ bīl lāpe̍e̍ŋgo̍o̍ chō yɛ̍, ō vi̍ū yo̍o̍mū le̍.

¹¹Tē pāāle̍ŋ lē fūlā mī lē lɔ̄ɔ̄ bīl lāpe̍e̍ŋgo̍o̍ pɛ̍, pe̍e̍ŋge̍lā kɛ̍ndɛ̄lā lāŋ lā kēēndu̍ŋ, nāŋɔ̄ɔ̄ kōŋ mɛ̄ɛ̄lu̍. Le̍nde̍ i̍ yɔ̍nūŋ ā wānā su̍lāā ni̍. Ō chō wu̍ mbō mɛ̄i̍ kāwa᷅ltā ndɔ̄lāŋ ā mākɔ̄ɔ̄.

¹²Wānā dɛ̍nɛ̍la̍ pa̍lāāla̍ŋ lā kōmāl ho̍ō kɛ̍ ndu̍yɛ̍ mbō bīūnu̍ŋ ndo̍, ō pɛ̄l tɔ̄nɔ̄ɔ̍. Kāni̍ fo̍ndōle̍, tē ō hīōū lāchī ā sīsi̍lāŋ ā dīāllūŋ kālā, ā tīīnda᷄ŋndo̍ o̍ Mɛ̄lɛ̄ka̍ ni᷄ŋ pɛ̍, mbō lo̍ o̍ ko̍ŋ mī sɔ̄ɔ̍ŋ pālāŋ mu᷅ŋ ŋ̄ kēēku̍ ndu̍ chōo̍, ō hu᷄ŋ sɔ̍lā fāndāa̍, ndu̍ yɔ̍nūŋ ni̍ māā yōōmū Mɛ̄lɛ̄ka̍ chūe̍l wānāā kāālā ndu̍ wā būŋgɛ̄i̍ yo̍.

¹³Tē wāŋndo̍ sɔ̄lā dɛ̄ɛ̄nīāā le̍ mbō tōsā yɔ̄ŋ wɔ̄ɔ̍ŋndo̍ pɛ̍, ō di̍mī nu̍āā māā Mɛ̄lɛ̄ka̍ le̍ cho̍ ndu̍ dɛ̄ɛ̄nīāā le̍ mbo̍ tōsā yɔ̄ŋ wɔ̄ɔ̍ŋndo̍ le̍. Mɛ̄lɛ̄ka̍ ndu̍ wānā dɛ̍ɛ̍nīāā ndu̍ le̍ ī wɔ̄ɔ̍ŋ to̍sā le̍. Ndu̍yɛ̍, ndu̍ Mɛ̍lɛ̄kā ō dɛ̍ɛ̍nīāā wānā le̍ mā to̍sā yɔ̄ŋ wɔ̄ɔ̍ŋ te̍.

¹⁴Nyɛ̍ dɛ̍ɛ̍nīāā wa᷅ŋndo̍ le̍ yɔ̄ŋ wɔ̄ɔ̍ŋndo̍ tōsāā wo̍, ndu̍ cho̍ yēēmāŋ wɔ̍ɔ̍ŋ wa᷅ ndu̍ o̍ kɔ̄l lo̍ŋ ni̍. Mu̍ŋ lo᷅ ndu̍ vɛ̄ɛ̄lōo̍ hāāā ni̍, mbō wōu̍ bāā o̍ yɔ̄ŋ wɔ̄ɔ̍ŋndo̍ ni᷄ŋ.

¹⁵Tē yēēmɛ̍i̍ wɔ̍ɔ̍ŋnde̍ ī lūɛ̄ī o̍ kɔ̄l wāŋndo̍ ni᷄ŋ pɛ̍, o̍ ko̍ŋ kɔ̍ɔ̍lī, mī ndu̍ pi̍lā yɔ̍ŋgu̍ŋ o̍ yēēmɛ̍i̍ ke̍ŋ ni᷄ŋ pɛ̍, o̍ ko̍ŋ, ō wōu̍ bāā o̍ yɔ̄ŋ wɔ̄ɔ̍ŋndo̍ ni᷄ŋ. Tē wāŋndo̍ tōsā yɛ̄ yɔ̄ŋ wɔ̄ɔ̍ŋndo̍ pɛ̍, o̍ mɛ̄ɛ̄lu̍lāŋ ō sɔ̄lā pīɔ̍mndo̍.

¹⁶Chāāŋāā nīāā kāālāā, lā chɛ᷅l mī wānā o̍ wānā hu̍i̍ nyā le̍.

¹⁷Nyɛ̄m kɛ̄ndɛ̄ kɛ̍ndɛ̄ŋ nāā ŋ̄ sɔ̄lā wo̍ŋ ki̍nɛ̍i̍, Mɛ̄lɛ̄ka̍ ke᷅ nāā mu̍ŋ ni̍. Mɛ̄lɛ̄ka̍ o̍ to̍o̍si̍āā nyɛ̍ ke᷅ nāā nyɛ̄ wāwo̍ŋndo̍ o̍ ha̍la̍a̍ ni᷄ŋ ndo̍ŋ ndo̍, ndu̍ ke᷅ nāā nyɛ̄m kɛ̄ndɔ᷄ŋ ni̍. Mɛ̄lɛ̄ka̍ ndu̍ ndu̍ lɔ̍ɔ̍ lɔ̍ɔ̍ ō chō lēchōo̍, ndu̍yɛ̍ ō mu̍lūl nāā kɔ̄ɔ̍, o̍ ko̍ŋ mbō mɛ̄i̍ nāā o̍ mānyūm ni᷄ŋ te̍.

¹⁸Mɛ̄lɛ̄ka̍ ndu̍ pi̍lā kɛ̍ɛ̍si̍a̍a̍ ni̍ le̍ mbō sīīŋgu̍u̍ nāā chūāūwāā ndɔ̄, sānāā ā yōōŋgū tōnyāā ho̍ō. Ō tōsā he̍ī le̍ mī ŋ̄ sīmnu᷄ŋ wānāā tāse̍ nyɛ᷅m o̍ to̍o̍si̍āā wo̍ŋ ki̍nɛ̍i̍ tɛ̍ɛ̄ŋ.

¹⁹Lā sīnā he̍ī pɛ̄ŋgu̍ chāāŋāā nīāā kāālāā, māā wānā o̍ wānā, wā wa᷅nā ke̍le̍ŋa̍ īsɔ̄ɔ̍ la̍ni̍ yāŋɔ̄ɔ̄. Kɛ̍ wa᷅ wānā so̍ō chɔ̍ chɔ̍ le̍. Ndu̍yɛ̍ wa᷅ wānā dɔ̍u̍nu᷄ŋ tu̍mbe̍ chɔ̍ chɔ̍ le̍.

²⁰Kāni̍ fo̍ndōle̍, tu̍mbo̍o̍ ō to̍sā mī wāŋndo̍ wā yōōmū o̍ nɛ̄ī sākpō mɛ̄ɛ̍ Mɛ̄lɛ̄ka̍ hɛ̄nāŋ ndu̍ le̍ wāā yɛ̍ le̍.

²¹Le̍lāŋ, lā ma᷄l dɛ̍nɛ̍ o̍ dɛ̍nɛ̍ wɔ̍ɔ̍ŋ ā yɔ̄ŋndā wɔ̄ɔ̍ŋndā fāŋgālā wāŋndā chō tōsāā lāŋ wa̍ŋ wa̍ŋ. Ndu̍yɛ̍ yōōŋgū Mɛ̄lɛ̄ka̍ dɔ̄ū ho̍ō nyā o̍ lākɔ̄l lo̍, lā bīi̍ nyɛ᷅ o̍ di̍mi̍ wo̍ ndu̍yɛ̍ mī lā yɔ̄ŋgu̍ŋ o̍ ndu̍ bɛ̍ŋgu̍. Kāni̍ fu̍u̍le̍, yōōŋgū kōŋ nɔ̄ kpāāyāā mbō pīŋi̍ nyā.

²²Lā mɛ̍ɛ̍lū o̍ yōōŋgōo̍ ho̍ō tūēīyɔ̄ɔ̍ su̍e̍e̍ le̍. Lā tōsā nyɛ᷅ o̍ di̍mi̍ wo̍. Kāni̍ fu̍u̍le̍, wānā o̍ wānā mɛ̍ɛ̍lu̍ o̍ tūēīyɔ̄ɔ̍ su̍e̍e̍ pɛ̍, mbō tōsā nyɛ᷅ o̍ di̍mi̍ wo̍ le̍, mɛ̄ɛ̍ ndu̍ pi̍lā ko̍ni̍ cho̍ hūīnɔ᷄ŋndo̍ ni̍.

²³Wānā o̍ wānā yāŋ yōōŋgu̍ Mɛ̄lɛ̄ka̍a̍ nīlāŋ pɛ̍, kɛ̍ mbō ve̍ nyɛ᷅ o̍ di̍mi̍ wo̍ tōsā le̍, mɛ̄ɛ̍ ō chō māchūāā mɛ̄ɛ̍ wāŋndo̍ tōfāŋ nu̍āā o̍ tōfa᷅ŋndo̍ ni᷄ŋ yɛ̍.

²⁴Tē wāŋndo̍ tōfāŋ o̍ tōfa᷅ŋndo̍ ni᷄ŋ pɛ̍, dīmīo̍o̍ nu̍a̍ā āā, ō kɛ̄si̍ tōfa᷅ŋndo̍, mbō pu̍ɛ̍ɛ̍nu̍ŋ bɛ̍ɛ̍ mɛ̄ɛ̍ o̍ che᷅ ndu̍ pi̍lā yɛ̍.

²⁵Kɛ̍ wānā pɛ̍ɛ̍kū yo̍o̍ŋgōo̍ ho̍ō nyɛ̄ kɛ̄ndɛ̍ī yo̍, ndu̍yɛ̍ mbō hīōū lāchī ā nyɛ̄ o̍ di̍mī wo̍ tōsāā wo̍, wānā wāā le̍nde̍ sālāā Mɛ̄lɛ̄ka̍ dūāū ndu̍ ni̍. Yōōŋgū ko᷄ŋ yɔ̍nūŋ ni̍ māā, sāwā sa̍kpō bāŋā ho̍ō wāŋndā wo̍. Wānā mɛ̍ɛ̍lu̍ o̍ ndu̍ tūēīyɔ̄ɔ̍ su̍e̍e̍ le̍, ndu̍yɛ̍ mbō pu̍ɛ̍ɛ̍nu̍ŋ te̍ wo̍, o̍ ko̍ŋ, mbō tōsā nyɛ̄ o̍ di̍mi̍ māā wāŋndā nɔ̄ mā tōsā wo̍, sālāā Mɛ̄lɛ̄ka̍ dūāū ndu̍ le̍ ndu̍ tōsāā ni̍.

²⁶Wānā chu̍ā ho̍ō ndu̍ pi̍lā māā wānā pi̍ɛ̍i̍yāā Mɛ̄lɛ̄ka̍a̍ o̍ cho̍ ni̍, kɛ̍ mbō būmbā sōndō ndɔ̄ɔ̍ māndāā wo̍, mɛ̄ɛ̍ ndu̍ pi̍lā cho̍ hūīnɔ᷄ŋndo̍ ni̍. Mɛ̄ɛ̍ Mɛ̄lɛ̄ka̍ ndɔ̄ pi̍ɛ̍i̍yāā sīmnu᷄ŋ su̍ɛ̍i̍ fo̍ndō fu̍u̍.

²⁷Mɛ̄lɛ̄ka̍ o̍ cho̍ Fi̍nyā nāā wo̍, ndu̍ ndu̍ wānā o̍ chu̍ā māā ō chō wānā pi̍ɛ̍i̍yāā Mɛ̄lɛ̄ka̍ o̍ nɛ̄ī sākpō, ō nɔ᷅ sɔ᷅ŋ o̍ sɔ̄ŋ te̍ wo̍, sɔ̄ɔ̍ŋ o̍ to̍sā wo̍ŋ mu̍ŋ cho̍ mu᷅ŋ ni̍. Wānāā nɔ̍ ŋ̍ka̍lā le̍ wā, ā wānāā nɔ̍ ŋ̍fi̍nyā le̍ wā, ā wānāā pīāāndāā ndāā wū wā, vi̍i̍ya̍a̍ bā hāvɛ̍i̍ ā wāā le̍nde̍, ndā o̍ mālā ni̍. Ndu̍yɛ̍, māndāā ndu̍ pi̍lā, ō wo̍ū bā o̍ sɔ̄ɔ̍ŋ wɔ̍ɔ̍ŋ wāŋndā chō tōsāā o̍ chi̍e̍ēŋndo̍ ni᷄ŋ ndo̍ŋ ni᷄ŋ te̍.