Read Southern Kisi Chēmi̍si̍ 2 Bible Online

Chēmi̍si̍ 2 - Southern Kisi bible

Chēmi̍si̍ 2

¹Chāāŋāā nīāā, nyā dɔ̍ū ha̍ā tīīnda᷄ŋndo̍ o̍ Māsānɔ̍ nāā Chi̍i̍sū Ki̍li̍tī ni̍ŋ ndā, ndu̍ yɔ̍nūŋ ni̍ māā Māsānɔ̄ɔ̍ Mɛ̄lɛ̄ka̍ cho̍ o̍ nāŋɔ̄ɔ̄ bɛ̄ndōo̍ ni᷄ŋ ndo̍, lā wa᷅ wānāā chɔ̍m yɛ̍ yɛ̍ ŋ̍wāŋ tɛ̄ɛ̄ŋ te̍.

²Tē ō wā yɛ̄ mī wānāā ŋīɔ̍ɔ̍ŋ ā hīŋ nyā tɛ̄ɛ̄ŋ o̍ bɔ̄ŋa᷅ŋ nyāā ni᷄ŋ. Mī ō pīlɔ̍ɔ̄ wā ō dōvīa̍ŋ o̍ nyɛ̄lā kɛ̄ndɛ̄ kɛ̍ndɛ̄la̍ŋ ni᷄ŋ, ā kēlɛ̄i̍ īko̍o̍līi̍ye̍ ndu̍ o̍ īsū. Ō pīlɔ̍ɔ̄ yɛ̍ wānā tāmbɛ̍i̍yo̍, ō chō le̍nde̍ ā nyɛ̄lā yūūlu̍la̍ŋ lēkɔ̄ɔ̍,

³Mbō lo̍ o̍ ko̍ŋ mī lā ke̍ wānā cho̍ ā nyɛ̄lā kɛ̄ndɛ̄la̍ŋ ndo̍ bɛ̄ɛ̄le̍ŋ tāu̍. Mī lā dīmu̍l ndu̍ āā, “Hu̍ŋ cha᷅l nāā kɛ̍ndīāā ha̍ā.” Kɛ̍, wānā tāmbɛ̍i̍yo̍ ndu̍ ndu̍ mī lā dīmu̍l ndu̍ āā, “Kɔ̍ mā kɔ̍ si᷅m ndā.” Tē ko̍ŋ te̍, wānā pi᷅lɛ̍ dīmu̍l ndu̍ āā, “Hu̍ŋ mā hu̍ŋ cha᷅l lɛ̄ŋ yā o̍ lābɛ̄ŋgu̍ ni̍ŋ nānu᷄ŋ.”

⁴Tē lā tōsā le̍nde̍ pɛ̍, mɛ̄ɛ̍ lā chɔ᷄m o̍ kāā nyāā ni᷄ŋ māā, wāŋndo̍ ō pīlɔ̍ɔ̄ hɔ̍ɔ̍ya̍lē ndɔ̄le̍ŋ lē hīōū ō pīlɔ̍ɔ̄. Wānā bi̍ī wāŋndā o̍ nɛ̄ī wāā le̍ndo̍o̍ chōo̍ pɛ̍, mɛ̄ɛ̍ ko̍ŋ cho̍ yi̍ya᷄ŋ kɛ̍ndɛ̄ le̍.

⁵Lā ya᷄ŋ yā nīlāŋ chāāŋāā nīāā kāālāā, wānāā cho̍ ā tāmbɛ̍i̍ wa᷅ŋndā o̍ hɔ̄l chi̍e̍ēŋ nānu᷄ŋ ndā, ndā Mɛ̄lɛ̄ka̍ hɛ̄li̍ le̍ mā wā wānāā nɔ̍ tīīnda᷄ŋndo̍ o̍ Māsānɔ̄ɔ̍ Chi̍i̍sū Ki̍li̍tī ni̍ŋ ta̍u̍ ta̍u̍ wā ni̍. Ndu̍yɛ̍ māsāle̍ ndɔ̄le̍ o̍ chu̍e̍l wānāā kāālā ndu̍ wā būŋgɛ̄i̍ le̍ŋ, ndā wa᷅ ni̍ŋ o̍ māsāle̍ le̍ŋ bɛ̄ŋgu̍ ni̍.

⁶Kɛ̍ mī nya̍ nya̍ tɛ̄ɛ̄mbūū wānāā tāmbɛ̍i̍ya̍ lābɛ̄ɛ̄. Mɛ̍i̍ yɔ̍, ō cho̍ wānāā sūlāā le̍ ā nɔ̍ nyā kīndīlāā le̍? Ō cho̍ ndā le̍ nɔ̍ nyā yɔ̄ɔ̍ o̍ ko̍tīi̍la̍ŋ ni᷄ŋ te̍?

⁷Wānāā sūlāā ko̍ni̍ nɔ̍ dīōmndā wɔ̄ɔ̍ŋndāŋ dīmīo̍o̍ ā dīōlā Chi̍i̍sū Ki̍li̍tīla̍ŋ o̍kɔ̄ɔ̄ ni̍, ndu̍ yɔ̍nūŋ ni̍ māā dīōlā lēbɛ̄ɛ̄lā nyā chō lēbɛ̄ŋgu̍ lāŋ.

⁸Nyɛ̄ sāwā Mɛ̄lɛ̄ka̍a̍ dīmi̍ wo̍, tē lā tōsā ndu̍ nyɛ̄ kɛ̄ndɛ̍ī pɛ̍, mɛ̄ɛ̍ lā tōsā nyɛ̍ bɛ̍ndā wo̍. Mi̍ sāwāa̍ dīmī o̍ Yāu̍ Mɛ̄lɛ̄ka̍a̍ ni᷄ŋ āā, “Kāālā chāāŋ nūm wa᷅nā chi̍o̍o̍ mɛ̄ɛ̍ ŋ̄ kāālā nūm pi̍lā yɛ̍.”

⁹Kɛ̍ tē lā mɛ̄i̍ ke̍ŋ to̍sāā pɛ̍ mī lā tōl yɛ̍ yi̍ɔ̍ɔ̍ chɔ̄mndo̍ wāŋndā tɛ̄ɛ̄ŋ, mɛ̄ɛ̍ lā tōsā sūɛ̍i̍ wɔ̍ɔ̍ŋ. Ndu̍yɛ̍ o̍ ko̍ŋ kɔ̍ɔ̍lī, tē lā tōsā le̍nde̍ pɛ̍, mɛ̄ɛ̍ sāwāa̍ chīi̍ nyā yāmɛ̍i̍ kīlūl māā lā tɛ̄ɛ̄mbu̍u̍ sāwāa̍.

¹⁰Tē ō wā pɛ̍ mī wāŋndo̍ chu̍ā sāwālā Mɛ̄lɛ̄ka̍ dɔ̄ū lāŋ kpo̍u̍, kɛ̍ ndu̍yɛ̍ mbō tɛ̄ɛ̄mbu̍u̍ ō pīlɛ̍ bɛ̍ɛ̍ kpe̍ pɛ̍, mɛ̄ɛ̍ ō chīi̍ la᷅ŋ kpo̍u̍ tɛ̍ɛ̍mbūū.

¹¹Wānā dɔ̍ū sāwāa̍ āā, “Su̍u̍ndā ā wānā nyā cho̍ o̍ nɔ̄ ni̍ŋ nyā ndu̍ le̍ wo̍,” ndu̍ ko̍ni̍ di̍mi̍ vɛ̄lɛ̄ ni̍ āā, “Wānā di̍ī chāāŋ nūm wa᷅nā chi̍o̍o̍ le̍.” Kɛ̍ ndu̍yɛ̍ mā su̍u̍ndā bɛ̍ɛ̍ ā wānā nyā cho̍ o̍ nɔ̄ ni̍ŋ te̍ wo̍ le̍, kɛ̍ tē ā dīī wānā chi̍o̍o̍ pɛ̍, mɛ̄ɛ̍ ā tɛ̍ɛ̍mbu̍u̍ sāwālāŋ lā tɔ̄la̍ŋ fa̍ū.

¹²Mɛ̄ɛ̍ nāā ŋ̄ bīī sāwālā ndɔ̄lāŋ yɛ̍, le̍nde̍ Mɛ̄lɛ̄ka̍ chō hūnɔ̄ɔ̄ kɔ̍ɔ̍sɔ̍ ā nāā ni̍, tē ŋ̄ tōsā nyɛ̄ sāwālāŋ lā dīmi̍ wo̍ pɛ̍, ɔ̄ɔ̄ tē ŋ̄ tōsā le̍. Lāŋ lā yɔ̍nūŋ ni̍ māā, sāwālā nɔ̍lā la᷅ŋ mī lā bāŋā wāŋndā lāŋ. Le̍lāŋ, lā māndāŋ ā mɛ̄ɛ̍ nyā sūāā yɛ̍, ndu̍yɛ̍ mī lā māndāŋ ā kāā nyā tōsā wo̍.

¹³Ndu̍yɛ̍ wānā o̍ wānā tūīīnu̍ŋ chāāŋ ndɔ̄ wa᷅nā chi̍o̍o̍ īnyīɛ̍ɛ̍ le̍, wānā ko̍ŋ, bōōndi̍i̍ Mɛ̄lɛ̄ka̍ wā ni̍ŋ fɛ̍ɛ̍ŋ kɔ̍ɔ̍sɔ̍ɔ̍ ā ndu̍ ve̍ ō tu̍i̍i̍nūŋ ndu̍ ni̍ŋ i̍nyi̍ɛ̍ɛ̍ le̍. Kɛ̍ wānā tu̍i̍i̍nūŋ ho̍ō chāāŋāā ndūāā wa᷅ŋndā chīe̍e̍ya̍ nyi̍ɛ̍ɛ̍ye̍ wo̍, ndu̍ ndu̍ ō chō hūnɔ̄ɔ̄ hīɔ̄lɔ᷄ŋ o̍ kɔ̍ɔ̍sɔ̍ɔ̍ ni᷄ŋ.

¹⁴Chāāŋāā nīāā, tē wāŋndo̍ dīmi̍ pɛ̍ māā wānā dɔ̍ū tīīnda᷄ŋndo̍ o̍ Chi̍i̍sū Ki̍li̍tī ni̍ŋ ndo̍ o̍ cho̍ ni̍, kɛ̍ ndu̍yɛ̍ mbō tōsā sɔ̍ɔ̍ŋ chɔ᷅m māā ō chō wānā dɔ̍ū tīīnda᷄ŋ o̍ Ki̍li̍tī ni̍ŋ te̍, mɛ̄ɛ̍ tīīnda᷄ŋ ndɔ̄ ko̍ŋ ō mālā ndu̍ le̍. Tīīnda᷄ŋ wāā le̍nde̍ nɔ̍lā pā mbō pīŋi̍ ndu̍? Sāko̍.

¹⁵Tē ō wā yɛ̄ mī lā nɔ̄ wānāā lāāla᷄ŋndā nyā tɛ̄ɛ̄ŋ, mī fɛ̍li̍o̍o̍ wā ō pīlɛ̍, kɛ̄lɛ̄ŋgāā mbō nɔ̍ nyɛ̍ dīāā le̍.

¹⁶Tē wānā pi᷅lɛ̍ nyā tɛ̄ɛ̄ŋ o̍ lo̍ o̍ ko̍ŋ pɛ̍ mbō dīmu̍l wānā wāā le̍nde̍ āā, “Kɔ̍ lɔ᷅l kɛ̄ndɛ̄. Mɛ̄lɛ̄ka̍ wā lātu̍lu̍ ā nūm. Sɔ̍lā nyɛ̍ chūɛ̄ɛ̄na᷄ŋndo̍ le̍ hūēīye̍, ndu̍yɛ̍ mā sɔ̍lā nyɛ̄ dīāā tāu̍ fɔ̍.” Lā dīmi̍ bɛ̍ɛ̍ le̍nde̍, tē lā ke̍ ndu̍ nyɛ̄ o̍ hāu̍ bā wo̍ le̍, ko̍ŋ mālā ndu̍ kpo̍so̍ŋ te̍.

¹⁷Mɛ̄ɛ̍ le̍nde̍ ko̍ tīīnda᷄ŋndo̍ nɔ̄ɔ̍ chō ni̍. Wānā di̍mī ho̍ō māā ō dɔ̄ū tīīnda᷄ŋndo̍ o̍ Ki̍li̍tī ni̍ŋ ndo̍, kɛ̍ ndu̍yɛ̍ ō to̍sā sɔ̍ɔ̍ŋ chɔ᷅m māā ō chō wānā wāā le̍nde̍ le̍ wo̍, tīīnda᷄ŋ wāā le̍nde̍ ndu̍ nyɛ̄ fo̍ndōo̍ fu̍u̍ o̍ cho̍ ni̍.

¹⁸Mī wānā pu̍m dīmi̍ dɔ̍ɔ̍ āā, “Kɛ̍ wāŋndā chō yɛ̍ yɛ̍. Ā pūm ā chō mā nɔ̄ tīīnda᷄ŋndo̍ o̍ Mɛ̄lɛ̄ka̍ ni᷄ŋ, ā pūm sɔ̄ɔ̍ŋ kɛ̍ndɔ᷄ŋ ndā tōsā ni̍.” Kɛ̍ ndu̍yɛ̍ dīōm mūlīāā yā I̍ nɔ̍ le̍ wānāā wāā nu̍āā wo̍, ndu̍ cho̍ ho̍ō ni̍. Wānā nɔ̍lā pɛ̍, mɛ̄ɛ̍ chɔ̍m ndɔ̍ yā mɛ̄ɛ̍ wāŋndo̍ lōōkū mbō wā wānā nɔ̍ tīīnda᷄ŋndo̍ o̍ Ki̍li̍tī ni̍ŋ, kɛ̍ ō to̍sā sɔ̍ɔ̍ŋ kɛ̍ndɛ̄ le̍ wo̍ŋ yɛ̍. Kɛ̍ ya̍ ya̍, I̍ cho̍ tīīnda᷄ŋ yā I̍ nɔ̍ wo̍ chɔ̄m sānāā ā sɔ̄ɔ̍ŋ kɛ̍ndɛ̄ŋ yā I̍ cho̍ tōsāā wo̍ŋ.

¹⁹I̍ si̍nā māā lā lāāla̍ŋ māā Mɛ̄lɛ̄ka̍ ō pīlɛ̍ kpe̍ o̍ cho̍ ni̍. Ō na᷄ŋ mī lā lāāla̍ŋ le̍nde̍. Kɛ̍ ndu̍yɛ̍ nyi̍nāā wɔ̄ɔ̍ŋndā bɛ̍ɛ̍ ā lāāla̍ŋ māā Mɛ̄lɛ̄ka̍ ō pīlɛ̍ kpe̍ o̍ cho̍ ni̍. Ndu̍yɛ̍ nyīīyā ndā nyīīyā ā sīōōŋnde̍ le̍ Mɛ̄lɛ̄ka̍ ni̍.

²⁰Lā nɔ̍ kɔ̍l kālu̍ bɔ̍ɔ̍ le̍. I̍ cho̍ ni̍ko̍ nyā chɔ̄m mī lā sīnā māā tē wāŋndo̍ dīmi̍ pɛ̍ māā ō tīīndāŋ Chi̍i̍sū, kɛ̍ ō chɔ᷅m ti̍i̍nda᷄ŋ ko̍ŋ ā sɔ̄ɔ̍ŋ kɛ̍ndɔ᷄ŋ tōsāā le̍, mɛ̄ɛ̍ tīīnda᷄ŋ o̍ nɔ̍ wo̍ chōnu᷄ŋ fo̍ndō fu̍u̍.

²¹Lā lōōnu̍ŋ ndɔ̍ ā E̍bīlāha᷅m fi̍nyā nāā māmā. Yɛ̄ɛ̍nɛ̍ yɔ̍nu̍ŋ yɛ̍ mi̍ Mɛ̄lɛ̄ka̍ sīīŋgūū ndu̍ wānā sākpō Mɛ̄lɛ̄ka̍ o̍ hɔ̄l? Nyɛ̄ E̍bīlāha᷅m to̍sā wo̍ ndu̍ to̍sā ni̍ mi̍ Mɛ̄lɛ̄ka̍ sīīŋgūū ndu̍ wānā sākpō. Ndu̍ yɔ̍nūŋ ni̍ māā chūā o̍ chu̍ā po̍ ndɔ̄ɔ̍ Āa̍se̍ le̍ mbō sōli̍ ndu̍ māā sālā o̍ māāŋndo̍ chōo̍ wo̍.

²²Lā nɔ̄lā mī lā sīnā ā sɔ̄ɔ̍ŋ E̍bīlāha᷅m to̍sā wo̍ŋ māā tīīnda᷄ŋ ndu̍ o̍o̍ nɔ̍ o̍ Mɛ̄lɛ̄ka̍ ni᷄ŋ ndo̍ ā sɔ̄ɔ̍ŋ ndu̍ o̍o̍ to̍sā wo̍ŋ māā dīōm pīlɛ̍ ŋ̍ ku̍ɛ̄ ni̍. Nyɛ̄ E̍bīlāha᷅m to̍sā wo̍, ndu̍ si̍o̍u̍ tīīnda᷄ŋ ndɔ̄ɔ̍ sīɛ̄ndī sānāā ni̍.

²³Le̍nde̍ ko̍ni̍ i̍ cho̍ ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ ni̍ āā, “Mi̍ E̍bīlāha᷅m du̍a̍ū tīīnda᷄ŋndo̍ o̍ Mɛ̄lɛ̄ka̍ ni᷄ŋ, le̍ he̍ī mi̍ Mɛ̄lɛ̄ka̍ chūā ndu̍ māā ō chō wānā sākpō Mɛ̄lɛ̄ka̍ o̍ hɔ̄l.” O̍ ko̍ŋ, mi̍ Mɛ̄lɛ̄ka̍ vēēlū ndu̍ māā, Ndi̍a̍a̍mɔ̍ɔ̍ ndɔ̄ɔ̍.

²⁴Le̍lāŋ, ŋ̄ nɔ̄lā mī ŋ̄ chē māā nyɛ̄ wāŋndo̍ tōsā wo̍, ndu̍ to̍sā ni̍ mī Mɛ̄lɛ̄ka̍ chu̍ā ndu̍ māā ō chō wānā sākpō Mɛ̄lɛ̄ka̍ o̍ hɔ̄l. Ō cho̍ ko̍ ti̍i̍nda᷄ŋndo̍ nɔ̄ɔ̍ le̍.

²⁵Le̍nde̍ ko̍ni̍ i̍ wā ā chūā sūūndɛ̍i̍ pi᷅lɛ̍ ni̍ dīōla̍ŋ āā Lu̍e̍ha̍bī. Bōōndi̍i̍ Chu̍ūwa̍ ā vēm sīndɛ̄ su̍āŋ su̍a̍ŋnda̍ ve̍, mɛ̄ɛ̍ ndā hīŋ o̍ chīɛ̄ī chūāā ho̍ō, mbo̍ chɛ̄l mbo̍ yīyā ndā. O̍ ko̍ŋ kɔ̍ɔ̍lī, mbo̍ chɔ̄m ndā nɛ̄ī che᷅le̍ŋ māā yɔ̄ŋi̍ ya̍a̍mɔ̍ɔ̍wa̍ bīi̍ ndā. Le̍ nyɛ̄ Lu̍e̍ha̍bī to̍sā ko̍ŋ ndo̍, mi̍ Mɛ̄lɛ̄ka̍ chūā ndu̍ māā ō chō wānā sākpō Mɛ̄lɛ̄ka̍ o̍ hɔ̄l.

²⁶Tē nyi̍nā wānā chi̍o̍o̍ ō ve̍ o̍ dīāllūŋ wāŋndo̍ ni᷄ŋ te̍, wānā ko̍ŋ sīmnu᷄ŋ wānā vi̍lɛ̍i̍. Le̍nde̍ ko̍ni̍ tīīnda᷄ŋndo̍ chō ni̍. Ā yɔ᷄ŋ bɛ̍ɛ̍ mī wāŋndo̍ nɔ̄ tīīnda᷄ŋndo̍ kɛ̍, tē ō chɔ᷄m ndu̍ ā nyɛ̄ o̍ to̍sā wo̍ le̍, mɛ̄ɛ̍ nyɛ̄ fo̍ndōo̍ fu̍u̍ tīīnda᷄ŋ ndɔ̄ɔ̍ chō ni̍.