Read Southern Kisi Chēmi̍si̍ 3 Bible Online

Chēmi̍si̍ 3 - Southern Kisi bible

Chēmi̍si̍ 3

¹Chāāŋāā nīāā, ō bɛ̍ndā mī wānāā fāŋgā nyā tɛ̄ɛ̄ŋ ā sīmnu᷄ŋ wānāā pɛ̍ɛ̍kū wa᷅ŋndā sūɛ̍i̍ Mɛ̄lɛ̄kɛ̍i̍ yā le̍. Kāni̍ fu̍u̍le̍, nyā pi̍lā lā sīnā māā nāā ŋ̍ pɛ̍ɛ̍kū wa᷅ŋndā sūɛ̍i̍ Mɛ̄lɛ̄kɛ̍i̍ yā, ā nāā Mɛ̄lɛ̄ka̍ hīāū ni̍ŋ kɔ̍ɔ̍sɔ̍ o̍ kālā kālā ā wāŋndā ā tūāā.

²Nāā kpo̍u̍ mī ŋ̄ tōsā bīōndɔ᷄ŋnda̍ŋ tāu̍. Tē wānā o̍ wānā wā pɛ̍ o̍ to̍sā lābi̍o̍ndɔ᷄ŋ ā mɛ̄ɛ̍ o̍ su̍āā yɛ̍ le̍ pɛ̍, mɛ̄ɛ̍ wānā ko̍ŋ sīmnu᷄ŋ o̍ nyɛ̄ o̍ nyɛ̄ ni᷄ŋ mɛ̄ɛ̍ Mɛ̄lɛ̄ka̍ hɛ̄nāŋ ndu̍ mbō wā yɛ̍. Ndu̍yɛ̍ ō nɔ̄lā mbō māndā ndu̍ pi̍lā o̍ dɛ̍nɛ̍ o̍ dɛ̍nɛ̍ ni̍ŋ.

³Lā yīyāŋ ndɔ̍ ā so̍ō o̍kɔ̄ɔ̄. Tē wāŋndo̍ hɛ̄nāŋ pɛ̍ mī so̍o̍ tōsā nyɛ̄ o̍ hɛ̍nāŋ ndo̍ pɛ̍, chīli̍ŋi̍i̍ pɔ̍mbu̍ɛ̍i̍ ī pūm o̍ wo̍ū ndu̍ o̍ sōndō ni̍ ā yōōle̍ŋ ndo̍ŋ. O̍ ko̍ŋ, chīli̍ŋi̍i̍ ke̍ŋ nɔ̄lā mī ī mālā ndu̍ mbō mūli̍ so᷅ kōŋ bā o̍ bā o̍ hɛ̍nāŋ le̍ kɔ̄la̍ŋ.

⁴Lā yīyāŋ ndɔ̍ vɛ̍lɛ̄ ā dɛ̄ndɛ̄la̍ bɛ̍ndūlā ku̍ā o̍ mɛ̄ŋndāŋ chōo̍ lāŋ. Mɛ̄ɛ̍ hūēīyīī bɛ̄ndūe̍i̍ mī ī nɔ̄lā kɔ̄la̍ŋ ā dɛ̄ndɛ̄la̍ŋ nda᷅ŋ. Mi̍ chē bɛ̍ɛ̍ mi̍ lā wā lā bɛ̄ndū bɛ̍ndū ni̍, kɛ̍ nyɛ̍ nyu̍mbū lāŋ le̍ kɔ̄la̍ŋ bā wānā ku̍ā ā dɛ̄ndɔ̄ɔ̍ wo̍ hɛ̄nāŋ ndo̍, ō cho̍ bɛ̍ɛ̍ nyɛ᷅ bɔ̄ɔ̍ le̍.

⁵Le̍nde̍ dīɔ̄ɔ̄mūle̍ŋ lē chō wānā chi̍o̍o̍ o̍ sōndō ni̍. Dīālīī pɔ̄mbu̍ɛ̍i̍ nāā le̍ cho̍ ni̍, kɛ̍ yōŋgālā bɛ̍ndūla̍ŋ le̍ ki̍ālū ni̍. Nyā pi̍lā lā sīnā māā yīŋndē pɔ̄mbɔ̄le̍ŋ, le̍ŋ le̍ si̍mnūŋ yi̍ŋndē bɛ̄ndūle̍ŋ ni̍, mī lē kūɛ̄ ā yōndōo̍ lōmɔ̄ɔ̍ kɛ᷅ kɛ᷅.

⁶Mɛ̄ɛ̍ yīŋnde̍ŋ lē chō yɛ̍, le̍nde̍ dīɔ̄ɔ̄mūle̍ŋ lē chō ni̍. Tē ō wā māā yɔ̄ŋɔ̄ɔ̄ pɛ̍, o̍ dīāllūŋ wānā chi̍o̍o̍ ni᷄ŋ ki̍nɛ̍i̍, ŋ̄ nɔ̄lā mī ŋ̄ tūu̍ chō dīɔ̄ɔ̄mūle̍ŋ lē chō wo̍ ā chi̍e̍ēŋ yɔ̄ŋ wɔ̄ɔ̍ŋndo̍. Mī lē tōsā mī dɛ̍nɛ̍ wɔ̍ɔ̍ŋndo̍ tīu̍ wānā chi̍o̍o̍ ni᷄ŋ kpo̍u̍. Dīɔ̄ɔ̄mūle̍ŋ lē māl yi᷅ŋnde̍ŋ, mī yīŋndē lēŋ lē tɛ̄ɛ̄mbu̍u̍ yōōmū wānā chi̍o̍o̍ pa̍ku̍. Ndu̍yɛ̍ nyɛ̍ ke᷅ yi᷅ŋndē dīɔ̄ɔ̄mūle̍ŋ lē māl le̍ŋ kpāāyāā le̍ hīōūwɔ̄ɔ̍ lāchī ā sānde̍i̍ yo̍, ō chɛ᷄ŋ tu̍m o̍ fo̍ndāŋ nyɛ̄ pālāā nāā Mɛ̄lɛ̄ka̍ dūāū wānāā wɔ̄ɔ̍ŋndā wā.

⁷Wāŋndā nɔ̄lā mā māndā vīsī o̍ vīsī, kɔ̍ bi̍ī ā vīsīāā yōndūa̍a̍, ā yōūwa̍, ā vīsīāā lākɛ̄kɛ̍u̍wa̍, ā sūūwa̍. Vīsīāā su̍u̍la̍ yɛ̍ yi̍a̍a̍ kpo̍u̍ wānā chi̍o̍o̍ nɔ̄lā mbo̍ māndā ndā.

⁸Kɛ̍ dīɔ̄ɔ̄mūle̍ŋ nde̍ŋ, wānā o̍ wānā nɔ̍lā mbō māndā le̍ŋ te̍. Dīɔ̄ɔ̄mūle̍ŋ lē chō nyɛ̄ dɛ̍nɛ̍ wɔ̍ɔ̍ŋ bɛ̄ndū. Lē chɛ᷅l le̍ wāā do̍ŋ do̍ŋ te̍. Ndu̍yɛ̍ yɛ̍īmā fu̍lā o̍ dīɔ̄ɔ̄mūle̍ŋ ndāŋ, mā dīī wa᷅nā chi̍o̍o̍ kpa̍li̍.

⁹A̍ dīɔ̄ɔ̄mūle̍ŋ nāā ŋ̄ sāŋgālā Māsānɔ̄ɔ̍ Mɛ̄lɛ̄ka̍ o̍ cho̍ fi̍nyā nāā wo̍ ni̍. O̍ ko̍ŋ kɔ̍ɔ̍lī, ā dīɔ̄ɔ̄mūlē lēŋ ko̍ni̍ nāā ŋ̄ yīōū vɛ̍lɛ̄ chāāŋāā nāā wa᷅ŋndā chīe̍e̍ya̍ ā Mɛ̄lɛ̄ka̍ tōōsi̍āā ha̍ā māā vēla᷅ŋ ndɔ̄ wā ni̍.

¹⁰Sōndō pīlɛ̍ nāā ŋ̄ sāŋgālā ko̍ŋ Mɛ̍lɛ̄kā wo̍, ā ndu̍ ko̍ni̍ nāā ŋ̄ yīōū vɛ̍lɛ̄ wāŋndā ni̍. He̍ī ndo̍ō ī nɔ̍ mī ī yɔ̄nu̍ŋ nyā tɛ̄ɛ̄ŋ te̍ chāāŋāā nīāā.

¹¹Mɛ̄ŋmā nāŋ le̍ kōlɔ̄ɔ̍ wāŋ ā mɛ̄ŋmā ni̍ŋ le̍ kōlɔ̄ɔ̄ le̍ wāŋ mā fu̍lā o̍ pēē ko̍lāā pīlɔ̍ɔ̍ le̍.

¹²Chāāŋāā nīāā, yɔ̄m ndā vēēlū āā, fi̍kīi̍yo̍, ō ku᷅m ɔ̄li̍fīi̍yāŋ te̍. Ndu̍yɛ̍ yɔ̄m ndā vēēlū āā, kīle̍pīi̍yo̍ wo̍, ō ku᷅m fi̍kīi̍ya̍ŋ te̍. Le̍nde̍ ko̍ni̍, nāā mɛ̄ŋmā wɔ̄ɔ̍ŋndāŋ mā fūlā wā, mɛ̄ŋmā kɛ̄ndɛ̄mā fu̍lā lo̍ŋ te̍.

¹³Tē wānā wā nyā tɛ̄ɛ̄ŋ mbō nɔ̄ kɔ̄l kālo̍o̍ ā sīnā pɛ̄ŋgo̍o̍ pɛ̍, mɛ̄ɛ̍ wānā wāā le̍nde̍ ō chɔ᷄m ndɔ̍ ā kāālā kɛ̄ndɛ̄la̍ŋ tōsāā māā ō nɔ̄ kɔ̄l kālo̍o̍. Wānā ko̍ŋ ō chɔ᷄m ndɔ̍ kɔ̍l kālu̍ ndɔ̄ɔ̍ ā tūsi᷄ŋndo̍ o̍ nyɛ̄ o̍ nyɛ̄ ni᷄ŋ o̍ to̍sā.

¹⁴Kɛ̍ tē pāŋa̍li̍āŋnda̍ŋ ā nɛ̄īyɔ᷄ŋnda̍ŋ lā wā nyā o̍ lākɔ̄l pɛ̍, ndu̍yɛ̍ mī lā hɛ̄nāŋ ā dɛ̍nɛ̍ kɛ̍ndɛ̄ chāāŋnda̍ le̍ mɛ̄ɛ̍ nyā pi̍lā, mɛ̄ɛ̍ ō bɛ̍ndā mī lā kēlū yōŋgā māā lā kēndū kɔ̄l te̍. Kāni̍ fu̍u̍le̍, tē lā kēlū yōŋgā wāā le̍nde̍ pɛ̍, mɛ̄ɛ̍ yɔ̄ŋ wɔ̄ɔ̍ŋndo̍ nyā wā ko̍ŋ to̍sāā ni̍, tōnyāā bālāŋ mūlīo̍o̍ ā mākɔ̄ɔ̄.

¹⁵Kɔ̄l kālu̍ wāā le̍nde̍ cho̍ kɔ̍l kālu̍ wāā o̍ Mɛ̄lɛ̄ka̍ le̍. Kɔ̄l kālu̍ wāā chi̍e̍ēŋ nānu᷄ŋ cho̍ ko̍ŋ ni̍. Kɔ̄l kālu̍ īwāna̍ chi̍e̍e̍ya̍a̍ cho̍ ko̍ŋ ni̍. Ndu̍yɛ̍ o̍ nyi̍nāā wɔ̄ɔ̍ŋndā lo̍ o̍ cha᷅ŋ ni̍.

¹⁶Bā o̍ bā pāŋa̍li̍āŋndo̍ wā pɛ̍, ā kīɔ̍ɔ̍ hɛ̄na᷄ŋndo̍ ā dɛ̍nɛ̍ kɛ̍ndɛ̄ chāāŋnda̍, a̍ sɛ̄ɛ̄ŋgi̍āŋnda̍ŋ, sɔ̄ɔ̍ŋ wɔ̍ɔ̍ŋndo̍ŋ su̍u̍ o̍ su̍u̍, mu̍ŋ wa᷅ lo̍ŋ ni̍.

¹⁷Kɛ̍, kɔ̄l kālu̍ cha᷅ŋ ho̍ō o̍ Mɛ̄lɛ̄ka̍ lo̍ wo̍, ndu̍ ndu̍ cho̍ te̍ŋge̍ŋ. Ndu̍ ndu̍ tē wāŋndo̍ nɔ̄ ndu̍ pɛ̍, ī tāse̍i̍ pe̍ŋ kāā ndɔ̄ɔ̍ wā māwāā ō dīāndāā wa̍la̍ŋ Mɛ̍lɛ̄kā o̍ hɔ̄l. Ndu̍yɛ̍ kɔ̄l nyūlōo̍ o̍ nɔ᷅ ni̍. Wānā nɔ̍ i̍sɔ̍ɔ̍ ā wānā le̍ wo̍ o̍ wa᷅ ni̍. Wānā ya᷅ŋ wānā la̍ni̍ wo̍ o̍ wā ni̍. Ndu̍yɛ̍ nyi̍ɛ̍ɛ̍yīī wāŋndā chīe̍e̍ya̍ o̍ nɔ᷅ tāu̍ ni̍. Pɛ̄ŋgu̍ o̍ pɛ̄ŋgu̍ sɔ̄ɔ̍ŋ kɛ̍ndɔ᷄ŋ o̍ to̍sā ni̍. Ō ve᷅ wa᷅nā chɔ̍m yɛ̍ yɛ̍ ŋ̍wāŋ tɛ̄ɛ̄ŋ te̍. Ndu̍yɛ̍ wāna̍ wānā nɔ̍lā mā ti̍i̍ndāŋ o̍ wa᷅ ni̍.

¹⁸Ndu̍yɛ̍ wānāā lu̍e̍ī ha̍ā kɔ᷅ltā nyūlūla̍ŋ wāŋndā tɛ̄ɛ̄ŋ ndā, ō wā māā yɔ̄ŋɔ̄ɔ̄ pɛ̍, kɔ̄l nyūlōo̍ ndā wā ko̍ŋ sāŋɔ̄ɔ̍ ni̍, mɛ̄ɛ̍ wāŋndo̍ sāŋ nu̍āā yɛ̍i̍ye̍ yɛ̍. Ndu̍yɛ̍ dɛ̍nɛ̍ kɛ̍ndɔ̄ɔ̍ chō hūnɔ̄ɔ̄ fūlā o̍ wāli̍ ndā tōsā wo̍ ni᷄ŋ, mɛ̄ɛ̍ wāŋndā kūāū nu̍āā yɛ̄īyi̍i̍ ndā sa᷄ŋ nde̍ yɛ̍.