Read Southern Kisi Chēmi̍si̍ 4 Bible Online

Chēmi̍si̍ 4 - Southern Kisi bible

Chēmi̍si̍ 4

¹Ō yɛ̄ɛ̍nɛ̍ hu᷅ŋ yɛ̍ ā sɔ̍ŋgɔ̄la̍ŋ ā sɛ̄ɛ̄ŋgi̍āŋndā yɔ̍nūŋ la᷅ŋ nyā tɛ̄ɛ̄ŋ ndāŋ? Yēēmāŋ ŋ̄wāna̍ chi̍e̍e̍ya̍ cho̍ nyā ni᷄ŋ mi̍ mu̍ŋ pi̍lā wa᷅ sɔ̍ŋgɔ̄ɔ̍ vēllāā vēllē nyā ni᷄ŋ ndo̍ŋ, mu̍ŋ hu᷅ŋ ā lāŋ ni̍.

²Mī lā yēēmā nyɔ̄ɔ̍ŋ, kɛ̍ lā sɔ̍lā mu̍ŋ te̍. Mī lā dīī wānā chi̍o̍o̍ kpa̍li̍, ndu̍yɛ̍ mī lā lūɛ̄ī hɔ̄lte̍ŋ o̍ nyɛ̄m pi̍lāŋ, kɛ̍ lā nɔ̍lā mī lā sɔ̄lā nyɛ̄m kāla᷄ŋ te̍. Mī lā sɛ̄ɛ̄ŋgi̍āŋ, mī lā sɔ̄ŋgā ve᷅llāā vēllē. Kɛ̍ lā sɔ̍lā mu̍ŋ te̍, kāni̍ fu̍u̍le̍, lā cho̍ Mɛ̍lɛ̄kā dīōm nyūnā le̍ mu̍ŋ te̍.

³Te̍le̍ŋnda̍ŋ lā pūm, mī lā nyūnā Mɛ̄lɛ̄ka̍ le̍ mu̍ŋ, kɛ̍ ō ke᷅ nyā le̍. Kāni̍ fu̍u̍le̍, sābū nyā yēēmā mu̍ŋ ndo̍ ō cho̍ sābū kɛ̄ndɛ̄ le̍. Le̍ nyɛ̄ yēēmāŋ ŋ̄wāna̍ chi̍e̍e̍ya̍ nyāa̍ŋ ŋ̄ hɛ̄nāŋ ndo̍ŋ tōsāā ko̍ni̍ nyā yēēmā mu̍ŋ ni̍.

⁴Mɛ̄ɛ̍ la̍nɔ̍ɔ̍ wā nu̍āā wa᷅ŋndo̍ o̍ bā mbō lūɛ̄ī sūūndāa̍ yɛ̍, le̍nde̍ nyā sēndu̍ ā Mɛ̄lɛ̄ka̍ le̍ ni̍. Lā sīnā pɛ̍ŋgu̍ māā tē wāŋndo̍ kāālā nyɛ̄m chi̍e̍ēŋndo̍ŋ mu᷅ŋ pɛ̍, mɛ̄ɛ̍ ō sīīŋgu̍u̍ ndu̍ pi̍lā ya̍a̍mɔ̍ɔ̍ Mɛ̄lɛ̄ka̍. Wānā o̍ wānā lāndu̍ŋ kɔ̍l o̍ nyɔ̄ɔ̍ŋ chi̍e̍ēŋ nānu᷄ŋ pɛ̍, mɛ̄ɛ̍ ō sīmnu᷄ŋ ya̍a̍mɔ̍ɔ̍ Mɛ̄lɛ̄ka̍.

⁵Lā sīnā pɛ̍ŋgu̍ māā dīōmndā so̍o̍nu᷄ŋ la᷅ŋ o̍ Yāu̍ Mɛ̄lɛ̄ka̍a̍ ni᷄ŋ ndāŋ, lā sūūnu̍ŋ fo̍ndō fu̍u̍ le̍. Ī chō ī pōōnyīāā āā, “Nyi̍nā Mɛ̄lɛ̄ka̍ dɔ̄ū nāā ŋ̄wāŋndā chīe̍e̍ ni̍ŋ ndo̍, ō chō ō pīāā tāu̍ ā yēēmāŋ bɛ̍ndū bɛ̄ndo᷄ŋ.”

⁶Kɛ̍ ndu̍yɛ̍ kɛ̄ndɛ̄i̍ Mɛ̄lɛ̄ka̍ tōsāl nāā ve̍ ī hīōū ā yēēmāŋ bɛ̍ndūŋ mu᷅ŋ. Mɛ̄ɛ̍ i̍ cho̍ ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ yɛ̍ āā, “Mɛ̄lɛ̄ka̍ kɛ̄ɛ̍ wānā yōŋgāā. Kɛ̍, wānāā tu̍sī ndā pi̍lā tōōlō wā, kɛ̄ndɛ̄i̍ o̍ to̍sāl ndā ni̍.”

⁷Le̍lāŋ, lā yɔ̄ŋgu̍ŋ nyā pi̍lā Mɛ̍lɛ̄kā o̍ bā bɛ̄ŋgu̍. Lā sīmu̍l Ma᷅sā Nyi̍nāā Wɔ̄ɔ̍ŋndā. Tē lā sīmu̍l ndu̍ pɛ̍, ō nyāānu̍ŋ nyā.

⁸Lā sɔ̄ɔ̄ŋgu̍u̍ Mɛ̍lɛ̄kā īkɛ̄i̍. Ndu̍ bɛ̍ɛ̍ ō chō nyā sɔ̄ɔ̄ŋgūū īkɛ̄i̍. Nyā wānāā yɔ̄ŋ wɔ̄ɔ̍ŋndā ha̍ā, lā sōli̍ ba᷅la̍ŋ o̍ sɔ̄ɔ̍ŋ wɔ̍ɔ̍ŋndo̍ŋ tōsāā ni᷄ŋ. Nyā wānāā mūlū mūlūa̍ŋnda̍, lā dīndi̍ kɔ᷅ltā nyālāŋ, mī yīya᷄ŋnda̍ wɔ̍ɔ̍ŋndāŋ lā fūlā nyā o̍ lākɔ̄l po̍.

⁹Mɔ̍nɛ̍i̍ ī bīi̍ nyā le̍ yɔ̄ŋndā wɔ̄ɔ̍ŋndā nyā tōsā lāŋ, mī lā cha᷄ŋ cha᷄ŋndo̍ pi̍lā. Lā pɛ̄ŋgi̍ māmɔ̄ɔ̍, mī lā kāndu̍ cha᷄ŋnda̍ŋ. Lā pɛ̄ŋgi̍ kɔ᷅l kɛ̄ndɔ̄ɔ̍, mī lā kāndu̍ sūūmāa̍.

¹⁰Lā tūsi̍ nyā pi̍lā tōōlō Māsānɔ̄ɔ̍ Mɛ̄lɛ̄ka̍ o̍ hɔ̄l, o̍ ko̍ŋ, ō nɔ̄lā mbō hēēlu̍ nyā te̍mā.

¹¹Chāāŋāā nīāā, lā di̍mī di̍ōmndā wɔ̄ɔ̍ŋ ā chāāŋāā nyāā o̍kɔ̄ɔ̍ le̍. Wānā o̍ wānā di̍mi̍ dīōm wɔ̄ɔ̍ŋndo̍ ā chāāŋ ndɔ̄ pɛ̍, kɛ̄lɛ̄ŋgāā mbō pɛ̄ɛ̄sā ndu̍ māā wānā wɔ̍ɔ̍ŋndo̍ o̍ cho̍ ni̍ pɛ̍, wānā ko̍ŋ mɛ̄ɛ̍ ā sāwālā Mɛ̄lɛ̄ka̍la̍ŋ o̍ di̍mi̍ dīōm wɔ̄ɔ̍ŋndo̍ ni̍. Mɛ̄ɛ̍ lāŋ o̍ pɛ̍ɛ̍sā ni̍. Ndu̍yɛ̍ tē wāŋndo̍ pɛ̄ɛ̄sā sāwālā Mɛ̄lɛ̄ka̍la̍ŋ pɛ̍, mɛ̄ɛ̍ ō cho̍ lɛ̍ wānā lu̍ɛ̍ī o̍ lāŋ bɛ̍ŋgu̍ le̍. Mɛ̄ɛ̍ ō sīīŋgu̍u̍ ndu̍ pi̍lā māā ndu̍ cho̍ lāŋ bōlle̍ŋ ni̍.

¹²Mɛ̄lɛ̄ka̍ ndu̍ pīlɛ̍ kpe̍ cho̍ wānā hāndū sāwālāŋ ndo̍ ni̍. Ndu̍yɛ̍ ndu̍ pīlɛ̍ kpe̍ nɔ̍ kpāāyāā mbō kīlu̍l wānā ya᷅mɛ̍i̍ ni̍. Ndu̍ pīlɛ̍ kpe̍ nɔ̍ kpāāyāā le̍ mbō pīŋi̍ wāŋndā ni̍. Ndu̍yɛ̍ ndu̍ ko̍ni̍ nɔ̍ vɛ̄lɛ̄ kpāāyāā mbō yɔ᷄ŋ wāŋndā o̍ fo̍ndāŋ nyɛ̄ pālāā ni̍. Wānā māā vɛ̄ɛ̍nɛ̍ nu̍m chō yɛ̄, mā tōl chāāŋ nūm wa᷅nā chi̍o̍o̍ pɛ̄ɛ̄sāā?

¹³Nyā nɔ̍ dīmīo̍o̍ āā, “Hāū, kɛ̄lɛ̄ŋgāā sīɔ̄dīi̍ ŋ̄ chō lākɔ̄ o̍ chi̍o̍o̍ ho̍ō ndā mī ŋ̄ kūɛ̄ o̍ ho̍ō ndā mī ŋ̄ cha᷄l lo̍ŋ le̍ wɔ̄sīo̍o̍ ō pīlɛ̍, mī ŋ̄ tōsā yākōle̍ŋ, mī ŋ̄ sɔ̄lā nyɛ̄ sɔ̄lāā tāu̍,” wā, lā ya᷄ŋ yā nīlāŋ.

¹⁴Lā si̍nā nyɛ̍ cho̍ yɔ̄nɔ᷄ŋ si̍ɔ̍dīi̍ yo̍ le̍. Vɛ̄ɛ̍nɛ̍ yo̍o̍mūlā nyālāŋ lā chō yɛ̄? Yōōmūlā nyālāŋ lā chō māchūāā mɛ̄ɛ̍ yu̍mbu̍ yu̍mbo̍o̍ chō yɛ̍. Le̍ te̍le̍ŋ bi̍ŋgī ko̍ni̍ o̍ tu̍āl ni̍, o̍ ko̍ŋ kɔ̍ɔ̍lī, mbō lo̍ bɛ̍ɛ̍ pɛ̍.

¹⁵Nyɛ̄ nyā nɔ̄ mī lā dīmi̍ wo̍ cho̍ ni̍ āā, “Tē Māsānɔ̄ɔ̍ Mɛ̄lɛ̄ka̍ chɛ᷄l pɛ̍, ŋ̄ wā ni̍ŋ yo̍o̍mū, mī ŋ̄ tōsā he̍ī, mī ŋ̄ tōsā he̍ī,”

¹⁶Kɛ̍, mi̍ lā wā yōŋgāā kīōlɔ̄ɔ̍ o̍ nyā pi̍lā ni᷄ŋ. Yōŋgālā wāā le̍nde̍ lāŋ ki̍nɛ̍i̍, lā ni᷄ŋ kpo̍so̍ŋ te̍.

¹⁷Le̍lāŋ, wānā o̍ wānā si̍nā sūɛ̍i̍ cho̍ sūɛ̍i̍ kɛ̍ndɛ̄i̍ le̍ tōsāā ve̍ pɛ̍, kɛ̍ mbō tōsā le̍, mɛ̄ɛ̍ yɔ̄ŋ wɔ̄ɔ̍ŋndo̍ o̍ to̍sā ko̍ŋ ni̍.