Read Southern Kisi Chēmi̍si̍ 5 Bible Online

Chēmi̍si̍ 5 - Southern Kisi bible

Chēmi̍si̍ 5

¹Nyā wānāā sūlāā lā ya᷄ŋ yā nīlāŋ. Ō chō lētūu̍ bɛ̍ɛ̍ mī lā cha᷄ŋ, mī lā kōŋu̍l chōo̍ cho̍o̍ kpe̍le̍ŋ, kāni̍ fu̍u̍le̍, ā nyɛ̄ pālāā bɛ̄ndu̍ cho̍ nyā kōmāl lo̍.

²Sūl nyāā chō tāmbu̍. Kāāŋgūāā chō chīī nyɛ̄lā nyālāŋ di̍o̍.

³Nyɛ̄m nyāa̍ŋ sɔ̍la᷄ŋ ŋ̄ chō sɔ̄wā. Ndu̍yɛ̍ sɔ̄wā ko᷄ŋ wa᷅ ni̍ŋ se̍īle̍ŋ ā nyā o̍kɔ̄ɔ̄ ni̍. Nyā pi̍lā bɛ̍ɛ̍ sɔ̄wā kōŋ chō dīāllūŋ nyāa̍ŋ tɛ̄ɛ̄mbūū pa̍ku̍, mɛ̄ɛ̍ yīŋnde̍ŋ lē tɛ̄ɛ̄mbūū nu̍āā nyɔ̄ɔ̍ yɛ̍. Chi̍e̍e̍ŋ cho̍ ho̍ō su̍ŋ mɛ̍ɛ̍lū wo̍, lēni᷄ŋ nyā bīī ni̍ mi̍ lā chūūŋgīāā nyɛ̄m nyāa̍ŋ su̍la᷄ŋ.

⁴Lā chɛ᷅l le̍ wānāā cho̍ wa̍llo̍ o̍ chīɔ̄ɔ̄ŋ nyāa̍ŋ ni᷄ŋ ndā pāāwā ndāā kīo̍o̍ le̍. Ndu̍yɛ̍ wānāā cho̍ nyā chīɔ̄ɔ̄ŋ nyāa̍ŋ kūūlūl lo̍ wā bɛ̍ɛ̍, cha᷄ŋndā ndā chō ā nyā lāŋ lā fūūlu̍u̍ o̍ Māsānɔ̄ɔ̍ Mɛ̄lɛ̄ka̍ lo̍, o̍ cho̍ māsāā nyɛ̄ o̍ nyɛ̄ fe̍e̍ cho̍o̍ wo̍.

⁵Lā chōnu᷄ŋ o̍ dɛ̍nɛ̍ kɛ̍ndɛ̄ bɛ̄ndōo̍ ni᷄ŋ o̍ chi̍e̍ēŋndo̍ ho̍ō ni᷄ŋ. Nyɛ̍ nɛ̍ŋī nyā kɔ̄lta̍ŋ ndo̍ ko̍ni̍ nyā chō tōsāā ni̍. Mɛ̄ɛ̍ ndā māndā nu̍āā nāūwo̍ mbō chēlu̍l le̍ ndu̍ hūnɔ̄ɔ̄ dīyɔ̄ɔ̍ yɛ̍, le̍nde̍ nyā chō ni̍. Lā chō di̍o̍la̍ŋ mi̍ lā wā chēlu̍llo̍ pɔ̍ŋ pɔ̍ŋ le̍ pāāle̍ ndā chō nyā hūnɔ̄ɔ̄ dīū le̍ŋ.

⁶Wānāā tɛ̍ɛ̍mbūū i̍sɔ̍ɔ̍ o̍ īsɔ̄ɔ̍ le̍ wā, lā chō ndā yāma̍ŋ kīlūllo̍ mī lā dīū ndā, lɛ̄ɛ̍ŋ bɛ̍ɛ̍ ā lɛ̍ɛ̄ŋ nyā o̍ bā le̍.

⁷Le̍lāŋ chāāŋāā nīāā, lā hīo̍u̍ lāchi̍ ā bīūwɔ᷄ŋndo̍ hāāā, mbō lo̍ o̍ ko̍ŋ mī bōōndi̍i̍ Māsānɔ̄ɔ̍ Mɛ̄lɛ̄ka̍ chō mīīŋgū nānu᷄ŋ nde̍ ī fūūlu̍u̍. Lā tōfā wɔ̍ wānāā to̍sā wāli̍ īchīɔ̍ɔ̍ wā mɛ̄ɛ̍ ndā bīūnūŋ yɛ̍. Wānā wāli̍ īchīɔ̍ɔ̍ ō lō bi̍u̍wɔ᷄ŋndo̍, mbō lo̍ tɔ̄lɔ̄ɔ̄lā ndɔ̄lā kɛ̍ndɛ̄la̍ŋ chūmndo̍, mbō lo̍ o̍ ko̍ŋ hāāā mī sīālte̍ŋ lē chūū.

⁸Nyā bɛ̍ɛ̍ lā bīūnu̍ŋ le̍nde̍. Lā ma᷅l te̍. Kāni̍ fo̍ndōle̍, bōōndi̍i̍ Māsānɔ̄ɔ̍ Mɛ̄lɛ̄ka̍ chō hūnɔ̄ɔ̄ ve̍ chō ni᷅ŋ le̍ fūūlūū.

⁹Chāāŋāā nīāā, ŋɔ̄ɔ̄chīa̍ŋnda̍ wa᷅ nyā tɛ̄ɛ̄ŋ vēllāā vēllē ā chāāŋāā nyāā o̍kɔ̄ɔ̄ le̍, yɔ̄ŋi̍ Mɛ̄lɛ̄ka̍ kīlu̍l nyā yāmɛ̍i̍. Lā ya᷄ŋ yā nīlāŋ. Wānā cho̍ hūnɔ̄ɔ̄ kɔ̍ɔ̍sɔ̍ ā ŋ̄wāŋndā chīe̍e̍ wo̍ chō ni᷅ŋ nānu᷄ŋ kpɛ̍ɛ̍lūŋ.

¹⁰Chāāŋāā nīāā, lā yīya̍ŋ ndɔ̍ ā wānāā su̍āā le̍ Mɛ̄lɛ̄ka̍ wā, ā ndā āā di̍mūl wa᷅ŋndā yōōŋgu̍ Māsānɔ̄ɔ̍ Mɛ̄lɛ̄ka̍a̍ wā. Bōōndi̍i̍ ndā āā tu̍sī ndā nyɛ̄ pālāā chōo̍ si̍ndɛ̄ ve̍, bīūwɔ᷄ŋndo̍ pi̍lā ndā āā bi̍u̍nu̍ŋ ni̍. Ō chō lētūu̍ nyā bɛ̍ɛ̍ mī lā bi̍u̍ŋ le̍nde̍.

¹¹Wānāā māsīndīāā kāŋ ŋ̄ nɔ̄lā mī ŋ̄ dīmi̍ ā ndā o̍kɔ̄ɔ̄ māā ā pɛ̄l tɔ̄nɔ̄ɔ̍, kāni̍ fu̍u̍le̍, le̍ mɛ̄ɛ̍ ndā lo̍ bīūwɔ᷄ŋndo̍ hāāā yɛ̍. Lā sīnā ā Cho̍o̍bū o̍kɔ̄ɔ̄, ā mɛ̄ɛ̍ o̍ bi̍u̍nu̍ŋ o̍ nyɛ̄ pālāā ni᷄ŋ yɛ̍. Lā lōōnūŋ nyɛ᷅ Māsānɔ̄ɔ̍ Mɛ̄lɛ̄ka̍ tōsāl ndu̍ o̍ mɛ̄ɛ̄lu̍lāŋ kpɔ̍ŋ ndo̍. Lēkɛ̍ndɛ̍ī, Māsānɔ̄ɔ̍ Mɛ̄lɛ̄ka̍ chō wānā īnyīɛ̍ɛ̍ bɛ̄ndū. Ndu̍yɛ̍ ō chō wānā īkɛ̄ndɛ̄.

¹²Chāāŋāā nīāā, nyɛ̄ yā I̍ cho̍ ho̍ō nyā hūnɔ̄ɔ̄ dīmūl lo̍ lā kɛ̄si̍ŋ ndu̍ o̍ lākɔ̄l nyɛ̄ kɛ̄ndɛ̍ī. Ndu̍ yɔ̍nūŋ ni̍ māā, tē ō wā pɛ̍ mā di̍mi̍ māā ā chō sūɛ̍i̍ tōsā, ti̍āŋnu᷄ŋ te̍. Ti̍āŋnu᷄ŋ ɛ̄chɛ̍nɛ̄ le̍. Ti̍āŋnu᷄ŋ o̍ chi̍e̍ēŋndo̍ le̍. Ti̍āŋnu᷄ŋ o̍ nyɛ̄ o̍ nyɛ̄ kpo̍so̍ŋ te̍. Tē ā chɛ̍l le̍ sūɛ̍i̍ tōsāā pɛ̍, dīmīo̍o̍ ko̍ni̍ ŋ̄ dīmī ni̍ āā, “E̍ī, I̍ cho̍ tōsā.” Ndu̍yɛ̍ chɛ̄lɔ̄ɔ̄ ŋ̄ chɛ᷄l lo̍ ō wā chɛ̍lɔ̄ɔ̍. Tē ā kɛ̍ɛ̍ sūɛ̍i̍ pɛ̍, dīmīo̍o̍ ko̍ni̍ ŋ̄ dīmī ni̍ āā, “Ɛ̄ ɛ̍, I̍ cho̍ to̍sā le̍.” Mɛ̄ɛ̍ kɛ̄ɛ̄ ŋ̄ kɛ̄ɛ̍ wo̍, ō wā ni̍ko̍ ki̍ɔ̍ɔ̍. Ko̍ŋ to̍sā ni̍ Mɛ̄lɛ̄ka̍ ki̍lūl nu̍m yāmɛ̍i̍ mbō tūsi̍ nu̍m nyɛ̄ pālāā chōo̍ le̍.

¹³Tē wānā o̍ wānā wā nyā tɛ̄ɛ̄ŋ pɛ̍, mī nyɛ̄ pālāā wā ndu̍ chōo̍, mɛ̄ɛ̍ ō pīɛ̍i̍ Mɛ̍lɛ̄kā. Tē wānā o̍ wānā wā nyā tɛ̄ɛ̄ŋ pɛ̍, mbō wā ā kɔ̄l kɛ̄ndɔ̄ɔ̍, mɛ̄ɛ̍ ō sāŋgālā Mɛ̍lɛ̄kā ā chōndo̍ŋ.

¹⁴Tē wānā o̍ wānā wā nyā tɛ̄ɛ̄ŋ pɛ̍ mbō wā ā nāā, mɛ̄ɛ̍ ō vēēlu̍ lāŋgba̍ā kālla̍ wānāā lāāla᷄ŋndā tɛ̄ɛ̄ŋ. Ndu̍yɛ̍ mā pīɛ̍i̍ Mɛ̍lɛ̄kā le̍ ndu̍, mā sūu̍ ndu̍ chūɛ̄īya̍ŋ, mā pɛ̄l dīōlā Māsānɔ̄ɔ̍ Mɛ̄lɛ̄ka̍la̍ŋ.

¹⁵Pīɛ̄īle̍ yɔ̍ŋgūŋ le̍ŋ o̍ lāāla᷄ŋndo̍ ni᷄ŋ nde̍ŋ, lē nɔ̄lā mī lē sīŋgi̍ wānā nāā kōŋ, mī Mɛ̄lɛ̄ka̍ chu̍ā ndu̍ vɛ̄lɛ̄ o̍ pēlūŋ ndɔ̄ɔ̍ŋ chōo̍. O̍ ko̍ŋ kɔ̍ɔ̍lī, ā yɔ᷄ŋ bɛ̍ɛ̍ mī ndu̍ o̍o̍ to̍sā yɔ̄ŋ wɔ̄ɔ̍ŋndo̍ mālɔ̄ɔ̍ Māsānɔ̄ɔ̍ Mɛ̄lɛ̄ka̍ māl ndu̍ le̍ ndu̍ ni̍.

¹⁶Le̍lāŋ, lā chɔ̄ɔ̄mu̍u̍ yɔ᷅ŋndā nyāla̍ wɔ̍ɔ̍ŋndāŋ vēllāā vēllē nāā chāāŋāā nyāā chūā, ndu̍yɛ̍ mī lā pīɛ̍i̍ Mɛ̄lɛ̄ka̍ vēllāā vēllē le̍ chāāŋāā nyāā, le̍ mī Mɛ̄lɛ̄ka̍ sīŋgi̍ nyā. Wānāā cho̍ sākpō Mɛ̄lɛ̄ka̍ o̍ hɔ̄l lā, pīɛ̄īlē ndā pīɛ̄ī le̍ŋ lē nɔ̄ kpāāyāā, ndu̍yɛ̍ lē tōsā sɔ̍ɔ̍ŋ bɛ̍ndūŋ fāŋgā.

¹⁷Lā yīyāŋ ndɔ̍ ā Īla̍a̍chā o̍kɔ̄ɔ̄. Ndu̍ bɛ̍ɛ̍ wānā chi̍o̍o̍ ko̍ni̍ o̍ wā ni̍, mɛ̄ɛ̍ nāā ŋ̄ chō nu̍āā yɛ̍. Kɛ̍ mɛ̄ɛ̍ o̍ pi̍ɛ̍i̍ Mɛ̄lɛ̄ka̍ ō kālā kālā māā pīɔ̍ɔ̍ si̍ā le̍, mbo̍ kūā wɔ̄sīla̍ŋ lā yāā ā pāŋgo̍ŋ ŋ̄ ŋɔ᷄mpu᷅m, pīɔ̄ɔ̄ o̍ pīɔ̄ɔ̄ bɛ̍ɛ̍ se᷅ le̍.

¹⁸O̍ ko̍ŋ kɔ̍ɔ̍lī, mbo̍ pīɛ̄ī vɛ̄lɛ̄ Mɛ̄lɛ̄ka̍ māā pīɔ̍ɔ̍ ō si̍ā. Mi̍ pīɔ̍ɔ̍ sīā. Mi̍ tɔ̄lɔ̄ɔ̄la̍ŋ lā kāndū vɛ̄lɛ̄ nāŋɔ̄ɔ̍.

¹⁹Chāāŋāā nīāā, tē wāŋndo̍ wā nyā tɛ̄ɛ̄ŋ mbō ma᷄l nɛ̄i̍ tōnyāā pɛ̍, kɛ̍ mī wāŋndo̍ ō pīlɔ̍ɔ̄ mīŋgi̍ ndu̍ sīmī o̍ nɛ̄i̍ tōnyāā ho̍ō chōo̍ pɛ̍,

²⁰mɛ̄ɛ̍ wānā ko̍ŋ ō sīnā pɛ̍ŋgu̍ māā, wānā o̍ wānā to̍sā ā sābū mī wānā yɔ̄ŋ wɔ̄ɔ̍ŋndo̍ ō ma᷄l nɛ̄ī wɔ̍ɔ̍ŋ o̍ cho̍ kɔ̄la̍ŋ chōo̍ wo̍ pɛ̍, mɛ̄ɛ̍ ō chīīndi̍a̍a̍ ndu̍. Wānā ko̍ŋ, ō sɔ̍lā lɛ̍ pīɔ̍m fɛ̍ɛ̍ŋ fɛ̍ɛ̍ŋ ndo̍ le̍. Ndu̍yɛ̍ Mɛ̄lɛ̄ka̍ nɔ̄lā mbō ma᷄l wānā yɔ̄ŋ wɔ̄ɔ̍ŋ kōŋ le̍ yɔ̄ŋndā wɔ̄ɔ̍ŋndā fāŋgālā o̍ to̍sā lāŋ.