Read Southern Kisi Pītɛ̍ Tāso̍o̍ 2 Bible Online

Pītɛ̍ Tāso̍o̍ 2 - Southern Kisi bible

Pītɛ̍ Tāso̍o̍ 2

¹Le̍la̍ŋ nyɛ̄ o̍ nyɛ̄ fe̍e̍ cho̍ yɔ̄ŋ wɔ̄ɔ̍ŋ, lā sōli̍ ni̍ko̍ ba᷅la̍ŋ lēni᷄ŋ po̍. Lā wa᷅ lɛ̄ wānāā dīmīāā lāchōōwā kpo̍so̍ŋ te̍. Lā wa᷅ wānāā sōndō yēēlɛ̍i̍ le̍. Lā wa᷅ lɛ̄ wānāa̍ pa̍ŋa̍la̍ wānā le̍ nyɛ̄ ndɔ̄ le̍. Lā wa᷅ lɛ̄ wānāa̍ tɛ̍ɛ̍mbu̍u̍ wānā la̍di̍o̍ le̍.

²Mɛ̄ɛ̍ chɛ̄lɛ̄kpi̍a̍a̍ le̍ndīa̍a̍ ā chō nu̍a̍ā, ā ye̍e̍mā nyɛ᷅ o̍ nyɛ̄ chēle̍ŋ te̍ mɛ̄ɛ̍ mɛ̄ɛ̄ya̍ŋ yɛ̍, le̍nde̍ nya̍ nɔ̄ mī lā dɔ̄ū kɔ̄lta̍ŋ o̍ mɛ̄ɛ̄mā kpe̍e̍kpe̍i̍ya̍ŋ ni̍, ma̍ŋ ma̍ yɔ̍nūŋ ni̍ māā dīo̍m Mɛ̄lɛ̄ka̍a̍. Tē ō lo̍ pɛ̍ o̍ ko̍ŋ mī lā wɛ̄i̍ mɛ̄ɛ̄mā kpe̍e̍kpe̍i̍ya̍ŋ ma᷅ŋ, lā lo̍ o̍ ko̍ŋ lā hīndū, lā chīnda̍, lā pēŋ.

³Kāni̍ fo̍ndōle̍, lā chē ni᷅ŋ kɛ̄ndɛ̄ī bɛ̍ndūī Māsānɔ̄ɔ̍ Mɛ̄lɛ̄ka̍ tōsa̍l nya̍ ve̍.

⁴Lā hu᷄ŋ nāa̍ wāna̍ cho̍ ho̍ō māā pōu̍ cho̍ yōōmū wo̍ chūā. Ndu̍ cho̍ pōū wāŋnda̍ kɛ̄ɛ̍ māā ō ni᷄ŋ te̍ wo̍ ni̍. Kɛ̍ ndu̍yɛ̍ ndu̍ Mɛ̄lɛ̄ka̍ ndu̍ ndu̍ hɛ̍li̍ ni̍, mbo̍ chūā ndu̍ māā pōū kɛ̄ndɛ̄ kpe̍e̍kpe̍i̍yo̍ ni̍.

⁵Lā hu᷄ŋ nāa̍ ndu̍ chu̍a̍ māā pōūta̍ cho̍ yōōmū, ndu̍yɛ̍ mī lā chɛ᷄l ndu̍ mbō sōli̍ŋ kpe̍ku̍ a̍ nya̍ le̍ chīɛ̍i̍ Mɛ̄lɛ̄ka̍a̍ ō Nyi̍na̍ Mɛ̄lɛ̄ka̍a̍ chō tāŋgūllo̍ wo̍. O̍ ko̍ŋ, mī lā sīmnu᷄ŋ wa̍nāa̍ cho̍ le̍ Mɛ̄lɛ̄ka̍, o̍ chīɛ̍i̍ Mɛ̄lɛ̄ka̍a̍ ni᷄ŋ, ndu̍yɛ̍ mī lā wa̍ wānāa̍ sōlīāā lāsa̍lāa̍. Ndu̍yɛ̍, lā sōlī ni̍ŋ sa̍lālā Nyi̍na̍ Mɛ̄lɛ̄ka̍a̍ ō hɛ̄nāŋ, ndu̍yɛ̍ mī Mɛ̄lɛ̄ka̍ chɛ᷄l le̍ sa̍bu̍ Chi̍i̍sū Ki̍li̍tīo̍o̍ la̍ŋ.

⁶Kāni̍ fu̍u̍le̍, ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ māā Mɛ̄lɛ̄ka̍ dīmi̍ āā, “Lā ya᷄ŋ ni᷅la̍ŋ, I̍ cho̍ pōūwo̍ ō pūm hāndɔ̄ɔ̍ Sa̍a̍yɔ̄ŋ chi̍e̍e̍. Ndu̍ cho̍ pōū kpe̍e̍kpe̍i̍ sa̍a̍ tāŋgūllo̍ wo̍ ni̍. Ndu̍ ya̍ I̍ hɛ̍li̍ ni̍, mi̍ chu̍ā ndu̍ māā pōū kɛ̄ndɛ̄ kpe̍e̍kpe̍i̍yo̍. Wānā o̍ wāna̍ dɔ̍ū tīīnda᷄ŋndo̍ o̍ ndu̍ ni̍ŋ pɛ̍, si̍ɔ̍mbu̍la̍ tu᷅l ndu̍ le̍.”

⁷Nya̍ wānāa̍ dɔ̍ū tīīnda᷄ŋndo̍ o̍ Mɛ̄lɛ̄ka̍ ni᷄ŋ nda̍, pōūwo̍ ho̍ō chō pōū kɛ̄ndɛ̄ kpe̍e̍kpe̍i̍ le̍ nya̍. Kɛ̍ wānāa̍ do̍u̍ ti̍i̍nda᷄ŋ o̍ Mɛ̄lɛ̄ka̍ ni᷄ŋ te̍ wa̍, Yāu̍ Mɛ̄lɛ̄ka̍a̍ dīmi̍ āā, “Pōū wānāā tāŋgūlāa̍ kɛ̄ɛ̍ māā ō ni᷄ŋ te̍ wo̍, ndu̍ si̍mnu᷄ŋ ni᷅ŋ pōū kpe̍e̍kpe̍i̍ sa̍a̍ tāŋgūllo̍ wo̍ ni̍.”

⁸Mbo̍ dīmī vɛ̄lɛ̄ āā, “Ndu̍ cho̍ pōu̍ to̍sā ni̍ŋ mī wāŋnda̍ kēi̍ ndu̍ kōōnda᷅ŋ ndo̍ ni̍, pōu̍ to̍sā ni̍ŋ mā de᷄l lo̍.” Sa̍bū nda̍ kēī ni̍ŋ ndu̍ kōōnda᷅ŋ ndo̍ cho̍ ni̍, māā ā kɛ̄ɛ̍ le̍ lāāla᷄ŋndo̍ a̍ nyɛ̄ dīo̍m Mɛ̄lɛ̄ka̍a̍ dīmi̍ wo̍. Nyɛ̄ Mɛ̄lɛ̄ka̍ kɛ̄ɛ̄si̍a̍a̍ māā ō nɔ̄ le̍ nda̍ yɔ̄nɔ᷄ŋndo̍ wo̍ cho̍ ko̍ŋ ni̍.

⁹Kɛ̍ ndu̍yɛ̍ nya̍ chō māchūāā wānāā Mɛ̄lɛ̄ka̍ ō hɛ̄li̍ le̍ wāa̍ wānāā ndɔ̄ wa̍. Nya̍ cho̍ wānāa̍ so̍lī sa̍lāa̍ nāa̍ Māsā Bɛ̍ndōo̍ chūā wa̍ ni̍. Nya̍ cho̍ ku̍nda̍ cho̍ ō yɔ̄ŋga᷄ŋ o̍ Mɛ̄lɛ̄ka̍ lo̍ wo̍ ni̍. Nya̍ cho̍ Mɛ̄lɛ̄ka̍ wānāā ndūa̍a̍ ni̍. Ndu̍ Mɛ̍lɛ̄ka̍ o̍ ve̍e̍lu̍ nya̍ mbo̍ sōlī nya̍ o̍ nyūmnda̍ŋ ni᷄ŋ, mbo̍ hūŋ a̍ nya̍ o̍ nyɛ̄ ndɔ̄ wa̍wo̍ŋ kɛ̍ndɛ̄ bɛ̄ndōo̍ ni᷄ŋ ndo̍, ō hɛ̄li̍ nya̍ le̍ mī lā dīmu̍l wāŋnda̍ a̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndūŋ o̍ to̍sa̍ wo̍ŋ o̍kɔ̄ɔ̄.

¹⁰Lā ve̍ pa̍a̍ndū wānāā ndɔ̄ le̍. Kɛ̍, wānāā ndūa̍a̍ nya̍ chō ni᷅ŋ pɛ̄ŋgo̍o̍ ho̍ō ni̍. Ndu̍ o̍o̍ tūīīnu̍ŋ nya̍ īnyīɛ̍ɛ̍ pāāndū le̍, kɛ̍ ō tūīīnu̍ŋ nya̍ ni᷅ŋ īnyīɛ̍ɛ̍ pɛ̍ŋgo̍o̍ ho̍ō.

¹¹Chāāŋāā nīāā ka̍a̍lāa̍, lā sīna̍ pɛ̍ŋgu̍ māā mīālla̍ nya̍ cho̍ chi̍e̍ēŋ na̍nu᷄ŋ ni̍. Ndu̍yɛ̍ mɛ̄ɛ̍ chɔ̄ūwo̍ sōlī nu̍a̍ā wāŋnda̍ yɛ̍, le̍nde̍ nya̍ chō ni̍. Le̍la̍ŋ mī nyɔ̍ɔ̍lu̍ nya̍, lā wo̍ū lɛ̄ lābā o̍ nyɛ̄ yēēma̍ŋ wɔ̍ɔ̍ŋ ŋ̄wāna̍ chi̍e̍e̍ya̍ŋ tōsāa̍ ni᷄ŋ te̍. Tē ō wa̍ māā yɔ̄ŋɔ̄ɔ̄ pɛ̍, yēēma̍ŋ mu̍ŋ ŋ̄ chō chɔ̄ū lābāa̍ a̍ nyi̍nāā nyāa̍ pɛ̄ŋgu̍ o̍ pɛ̄ŋgu̍.

¹²Le̍la̍ŋ, kēlālā nyāla̍ŋ lā wa̍ nyɛ̍ kɛ̄ndɛ̄ wa̍la̍ŋ wa̍nāa̍ cho̍ wa̍nāā lāāla᷄ŋ te̍ wa̍ tɛ̄ɛ̄ŋ. Ko̍ŋ to̍sā ā yɔ᷄ŋ bɛ̍ɛ̍ mā dīmi̍ a̍ nya̍ o̍kɔ̄ɔ̄ māā lā chō wānāā wɔ̄ɔ̍ŋ, kɛ̍ ndu̍yɛ̍ ā nɔ̄lā mā chē sɔ̄ɔ̍ŋ kɛ̍ndɛ̄ŋ nya̍ tōsā wo̍ŋ. O̍ ko̍ŋ, tē pāa̍le̍ Māsānɔ̄ɔ̍ chō hūnɔ̄ɔ̄ le̍ŋ lē fūūlu̍u̍ pɛ̍, wāŋnda̍ ha̍ā ā yɔ̄ŋgū ni̍ŋ sa̍ŋgālāa̍ o̍ Mɛ̄lɛ̄ka̍ lo̍.

¹³Le̍ mī wāŋnda̍ ā ke̍ Māsānɔ̄ɔ̍ Mɛ̄lɛ̄ka̍ bɛ̄ɛ̄le̍ŋ, wānā o̍ wāna̍ nda̍ dīmi̍ āā ā hāndu̍ ndu̍ wāŋnda̍ bōlle̍ŋ, lā tūe̍i̍ ndu̍ dīōm. Lā tūe̍i̍ ma᷅sa̍ māLu̍o̍ma᷅ŋndo̍ o̍ cho̍ māsāa̍ kpe̍de̍ bo᷅lle̍ŋ ndo̍ dīōm.

¹⁴O̍ ko̍ŋ kɔ̍ɔ̍lī, māsāa̍ o̍ ha̍ndū lɛ᷅ŋnde̍ bōlle̍ wa̍ bɛ̍ɛ̍, lā tūe̍i̍ nda̍ dīōm. Ō yūlū nda̍ māyūlāā le̍ wānāa̍ to̍sā dɛ̍nɛ̍ wɔ̍ɔ̍ŋndo̍ wa̍ nyɛ̄ pālāa̍ tūsīo̍o̍ chōo̍, vɛ̄lɛ̄ le̍ wānāa̍ to̍sā sɔ̍ɔ̍ŋ bɛ̍nda̍ wo̍ŋ nda̍ chāndɔ̄ɔ̍.

¹⁵Kāni̍ fu̍u̍le̍, Mɛ̄lɛ̄ka̍ yēēma̍ nya̍ mī lā tōsa̍ sɔ̄ɔ̍ŋ bɛ̍nda̍ wo̍ŋ, le̍ mī dīɔ̄mnda̍ ha̍ā ā pɛ̄ŋgi̍ sɔ̄ɔ̍ŋ nda̍ŋ ŋ̄dīɔ̄mndo̍ŋ dīmīo̍o̍ a̍ nya̍ o̍kɔ̄ɔ̄.

¹⁶Ka̍ālā nyāla̍ŋ lā wa̍ māā wānāa̍ cho̍ ā bāŋa᷄ŋ. Kɛ̍ ndu̍yɛ̍ lā pu̍u̍lu᷄ŋ le̍ mɛ̄ɛ̍ nya̍ cho̍ ni᷅ŋ ā bāŋa᷄ŋ yɛ̍, le̍ ke̍ŋ mī lā wōu̍ bā o̍ yɔ̄ŋ wɔ̄ɔ̍ŋndo̍ tōsāa̍ ni᷄ŋ te̍. Lā nɔ̄ ni᷅ŋ mānūāā mī lā nɔ̄ ka̍āla̍ŋ māā bu̍ɛ̍i̍yāa̍ Mɛ̄lɛ̄ka̍.

¹⁷Lā ke̍ wa᷅ŋnda̍ kpe̍de̍ bɛ̍ɛ̄le̍ŋ, ndu̍yɛ̍ mī lā kāāla̍ chāāŋāā nyāā wa̍nāā lāāla᷄ŋnda̍. Lā nɔ̍ si̍o̍o̍ŋīi̍ Mɛ̄lɛ̄kɛ̍i̍ o̍ kɔ̄ltā nyāla̍ŋ ni᷄ŋ. Ndu̍yɛ̍ lā nɔ̍ bɛ̍ɛ̄le̍ŋ le̍ māsa̍ bɛ̍ndōo̍ kpe̍de̍.

¹⁸Nya̍ cho̍ chīa̍a̍ wāŋnda̍ o̍ bā wa̍, lā tūe̍i̍ nda̍ dīōm, ndu̍yɛ̍ mī lā ke̍ nda̍ bɛ̄ɛ̄le̍ŋ ta̍u̍. Ō cho̍ ko̍ ma̍sāā nyāa̍ a̍ na̍ŋ ka̍ā, ndu̍yɛ̍ mā bīī nya̍ bīyɔ̄ɔ̄ kɛ̄ndɔ̄ɔ̍ wa̍ ko̍ni̍ le̍ nya̍ kē bɛ̍ɛ̄le̍ŋ te̍. A̍ bi̍ī nya̍ bīyɔ̄ɔ̄ wɔ̄ɔ̍ŋndo̍ wa̍ bɛ̍ɛ̍, lā ke̍ nda̍ bɛ̄ɛ̄le̍ŋ.

¹⁹Ndu̍yɛ̍ tē ō wa̍ pɛ̍, māā le̍ mɛ̄ɛ̍ nya̍ chɛ᷄l le̍ nyɛ̄ Mɛ̄lɛ̄ka̍ hɛ̄na̍ŋ ndo̍ tōsāa̍ yɛ̍, le̍ ke̍ŋ mā hāndu̍ nya̍ nyɛ̄ nɛ̄īyāa̍ chōo̍ o̍ fo̍ndō fu̍u̍ wo̍ chōo̍, ndu̍yɛ̍ mī lā bi̍u̍nu̍ŋ pɛ̍, lā sɔ̄la̍ chāndɔ̄ɔ̍ Mɛ̄lɛ̄ka̍ o̍ bā.

²⁰Kɛ̍, tē ō wa̍ pɛ̍ mī wāŋndo̍ tōsa̍ sūɛ̍i̍ wɔ̍ɔ̍ŋnde̍, ndu̍yɛ̍ mā lɔ̄ɔ̄ ndu̍ le̍ ndi̍, ō bīūnu̍ŋ bɛ̍ɛ̍ lɔ̍ɔ̄ wāā le̍nde̍ ō sɔ̍lā cha̍ndɔ̄ɔ̍ le̍ ko̍ŋ te̍. Kɛ̍ tē ā hāndu̍ nya̍ nyɛ̄ nɛ̄īyāa̍ chōo̍ le̍ mɛ̄ɛ̍ nya̍ tōsa̍ sɔ̄ɔ̍ŋ bɛ̍nda̍ wo̍ŋ yɛ̍ pɛ̍, ndu̍yɛ̍ mī lā bi̍u̍nu̍ŋ pɛ̍, lā sɔ̄la̍ chāndɔ̄ɔ̍ Mɛ̄lɛ̄ka̍ o̍ bā.

²¹Le̍ mɔ̍nɛ̍i̍ wa̍ā nu̍a̍ā bīyɔ̄ɔ̍, Mɛ̄lɛ̄ka̍ vēēlu̍ nya̍ le̍ wāa̍ wānāā ndɔ̄ ni̍. Kāni̍ fo̍ndōle̍, Ki̍li̍tī pi̍la̍ bɛ̍ɛ̍, le̍nde̍ o̍ bi̍ī mɔ̍nɛ̍i̍ le̍ nya̍ ni̍. Ndu̍yɛ̍ ō chɔ᷄m nya̍ sūɛ̍i̍ he̍ī māā tāāmāsi̍, a̍ mɛ̄ɛ̍ nya̍ nɔ̄ mī lā bi̍u̍nu̍ŋ mɔ̍nɛ̍i̍ bīyɔ̄ɔ̍ mɛ̄ɛ̍ o̍ bi̍u̍nu̍ŋ mɔ̍nɛ̍i̍ bīyɔ̄ɔ̍ yɛ̍.

²²Ki̍li̍tī to̍sa̍ i̍sɔ̍ɔ̍ o̍ īsɔ̄ɔ̍ wɔ̍ɔ̍ŋ te̍. Lē pīlɛ̍ bɛ̍ɛ̍ ō dīmi̍ la̍cho̍o̍wā le̍.

²³Mi̍ wāŋnda̍ yīōū Ki̍li̍tī, kɛ̍, ō mīŋgi̍ le̍. Ma̍ tūsī ndu̍ nyɛ̄ pālāa̍ chōo̍, kɛ̍ ndu̍ kɔ̍ŋgɔ̍la̍ŋ bɛ̍ɛ̍ nda̍ le̍ nda̍ nyɛ̄ pālāā tūsī chōo̍ le̍. Kɛ̍, mbo̍ dūāū tīīnda᷄ŋ ndɔ̄ɔ̍ o̍ Mɛ̄lɛ̄ka̍ ni᷄ŋ o̍ cho̍ yāma̍nɔ̄ sa̍kpōo̍ wo̍.

²⁴Yɔ̄ŋ o̍ yɔ̄ŋ wɔ̄ɔ̍ŋ na̍a̍ ŋ̄ tōsa̍ kpo̍u̍, Ki̍li̍tī chu̍a̍ nyɛ̄ nɛ̄īyāā kōŋ sɔ̍ŋgɔ̍ nāa̍, mbo̍ sɔ̄lā pīɔ̍mndo̍ o̍ yɔ̄m sīŋgāfīlāa̍ chōo̍ le̍ ndu̍ ni̍. Ō tōsa̍ mātōsāā he̍ī le̍ hāli̍ kpe̍ŋ ŋ̄ hi̍ū lɛ̍ lāchī a̍ yɔ̄ŋ wɔ̄ɔ̍ŋndo̍ kpo̍so̍ŋ te̍, ndu̍yɛ̍ a̍ yɔ̄ŋ wɔ̄ɔ̍ŋndo̍ ndu̍ ndu̍ o̍kɔ̄ɔ̄, ŋ̄ wā ni᷅ŋ māwāā māā wānāa̍ vi᷅ ni᷅ŋ. Ndu̍yɛ̍ ka̍ālā nāāla̍ŋ lā wā ni᷅ŋ māwāā o̍ nɛ̄ī sa̍kpō. Bōōlɔ᷄ŋnda̍ o̍ sɔ̍la̍ la̍ŋ, lēni᷄ŋ nya̍ sɔ̄la̍ sīōŋgɔ̄ɔ̍ ni̍.

²⁵Mɛ̄ɛ̍ sāa̍ ō lāāsīāŋ nu̍a̍ā yōndōo̍ ni᷄ŋ yɛ̍, le̍nde̍ nya̍ wa̍ ā lāāsīa̍ŋnda̍ ni̍. Kɛ̍ pɛ̄ŋgo̍o̍ ho̍ō ni᷅ŋ Mɛ̄lɛ̄ka̍ mīīŋgu̍ a̍ nya̍ le̍ mī lā tōl wāna̍ ma̍ndā nya̍ wo̍ kɔ̄ɔ̄lī, mɛ̄ɛ̍ wāŋndo̍ ō māndā nu̍a̍ā sāa̍ ndūa̍a̍ yɛ̍. Ndu̍ cho̍ wāna̍ ma̍ndā nya̍ wo̍ ni̍.