Read Southern Kisi Pītɛ̍ Tāso̍o̍ 3 Bible Online

Pītɛ̍ Tāso̍o̍ 3 - Southern Kisi bible

Pītɛ̍ Tāso̍o̍ 3

¹Nya̍ wāŋ lāāndūa̍a̍ bɛ̍ɛ̍, lā nɔ̄ mī lā tūēī pīāāndūāā nyāa̍ dīōm. Tē lā tūēī nda̍ dīōm pɛ̍, ā yɔ᷄ŋ bɛ̍ɛ̍ mī ā pūm ā ve̍ wa̍nāā lāāla᷄ŋ te̍, kɛ̍ ō wa̍ bɛ̍ɛ̍ ka̍ā nyā kɛ̍ndɔ̄ɔ̍ ō tōsā mī pīāāndūāā nyāā ka̍ŋ ā sīmnu᷄ŋ wa̍nāā lāāla᷄ŋ, mī lā dīmu̍l nda̍ bɛ̍ɛ̍ nyɛ᷅ o̍ nyɛ̄ a̍ Ki̍li̍tī o̍kɔ̄ɔ̄ le̍.

²He̍ī chō yɔ̄nɔ᷄ŋ kāni̍ fu̍u̍le̍, ā chō chɔ̄ mɛ̄ɛ̍ kpɛ̍ nya̍ ke̍ nda̍ bɛ̄ɛ̄le̍ŋ yɛ̍, a̍ mɛ̄ɛ̍ ka̍ālā nyāla̍ŋ lā chō sa̍kpō yɛ̍.

³Lā du̍a̍ū kɔ̄llo̍ o̍ nāŋɔ̄ɔ̄ ŋ̄dīāllo̍ ho̍ō, mī lā tōl tōōsīa̍ŋ bɛ̍ndōo̍ a̍ nyɛ̄m kɛ̄ndɛ̄ŋ yɛ̍ yi̍ɔ̍ɔ̍ŋ te̍. Yīīŋnde̍ tōōsīāā bɛ̄ndōo̍ ni̍, kēla᷄ŋ, kɛ̄lɛ̄ŋgāā yɔ̄lɔ᷄ŋ ba̍ā kālāŋ bɛ̄ndo᷄ŋ, a̍ kōlāla̍ ba̍ā kālāla̍ŋ wōūnɔ᷄ŋndo̍, ō cho̍ na̍ŋɔ̄ɔ̄ wāā le̍nde̍ le̍ nya̍ lāndu̍ŋ kɔ̍l te̍.

⁴Yɔ̍ŋi̍ nya̍ lāndu̍ŋ kɔ̍l le̍ nāŋɔ̄ɔ̄ ŋ̄dīāl wāā le̍nde̍ yɛ̍, lā lāndu̍ŋ kɔ̍l o̍ nāŋɔ̄ɔ̍ o̍ ka̍ālā nyāla̍ŋ ni᷄ŋ. Nāŋɔ̄ɔ̄ wāā le̍nde̍, ndu̍ dɔ̍ɔ̍nāŋ te̍. Wānā la̍nɔ̍ cho̍ ho̍ō nyɛ̄ kɛ̄ndɛ̄ mɔ̍ɔ̄sɔ̄lɔ̄ɔ̄ wo̍, nāŋɔ̄ɔ̍ cho̍ o̍ ndu̍ ni̍ŋ ndo̍, ndu̍ cho̍ ko̍ŋ ni̍. Ndu̍yɛ̍ nāŋɔ̄ɔ̄ su̍u̍ wa̍ā nu̍a̍ā, ndu̍ Mɛ̄lɛ̄ka̍ chu̍a̍ ni̍ māā nāŋɔ̄ɔ̄ kpe̍e̍kpe̍i̍yo̍.

⁵Wāŋ lāāndūāā māsīndīa̍a̍ nda̍ a̍a̍ yɔ̍ŋgu̍ŋ o̍ Mɛ̄lɛ̄ka̍ lo̍, ndu̍yɛ̍ ma̍ dūāū tīīnda᷄ŋ ndāa̍ o̍ Mɛ̄lɛ̄ka̍ ni᷄ŋ nda̍, nāŋɔ̄ɔ̄ nda̍ wa̍ lēni᷄ŋ ndo̍ wa̍ ko̍ŋ ni̍. Ā wa̍ wānāa̍ tu̍e̍ī pīāāndūāā ndāa̍ dīōm.

⁶Le̍nde̍ Se̍lūā la̍nɔ̍ɔ̍ E̍bīlāha᷅m wa̍ ni̍. Ō wa̍ wāna̍ tu̍e̍ī pɔ̍nɔ̍ ndɔ̍ dīōm. Māsānɔ̍ nūu̍la̍ŋ ndu̍ o̍o̍ ve̍e̍lū ndu̍ ni̍. Nya̍ bɛ̍ɛ̍ tē lā tōsa̍ nyɛ̍ na̍ŋ le̍ tōsāa̍ wo̍ pɛ̍, ndu̍yɛ̍ mī lā yɔ᷄ŋ i̍si̍o̍o̍ŋ te̍ pɛ̍, mɛ̄ɛ̍ chūāūwāa̍ Se̍lūā wa̍ nya̍ chō ni̍.

⁷Nya̍ pīāāndūa̍a̍ bɛ̍ɛ̍, ka̍ālā nyāla̍ŋ lā wa̍ la̍ kɛ̍ndɛ̄ nāa̍ lāāndāā nyāa̍ chūā. Lā ke̍ nda̍ bɛ̄ɛ̄le̍ŋ, kāni̍ fo̍ndōle̍, ā nɔ̍ di̍a̍llūŋ kālā māā wāŋ pīāāndūa̍a̍ le̍. Ndu̍yɛ̍ vɛ̍lɛ̄, nda̍ ni̍ a̍ nya̍ la̍tu̍lu̍, Mɛ̄lɛ̄ka̍ chō nya̍ kɛ̄ndɛ̄i̍ ndūɛ̍i̍ tōsāl mbō ke̍ nya̍ yōōmū kpe̍e̍kpe̍i̍yo̍. Lā tōsa̍ he̍ī, yɔ̄ŋi̍ nyɛ̄ o̍ nyɛ̄ si᷄m pi̍ɛ̍īlē nyāle̍ŋ lāchī.

⁸Nyɛ̄ ya̍ I̍ nɔ̍ mī I̍ di̍mu̍l nya̍ o̍ mɛ̄ɛ̄lu̍la̍ŋ ndo̍, ndu̍ cho̍ ho̍ō ni̍. Nya̍ kpo̍u̍ lā nɔ̍ yi̍ya᷄ŋ pi᷅lɔ̍ɔ̍. Kɔ̄ltā nyāla̍ŋ lā wa̍ o̍ chāāŋāā nyāa̍ lo̍ ve᷅llāa̍ vēllē. Lā nɔ̍ ka̍a̍lāa̍ le̍ chāāŋāā nyāā wa̍nāā lāāla᷄ŋnda̍. Lā nɔ̍ bu̍u̍la᷄ŋ chāāŋāā nyāa̍. Ndu̍yɛ̍ lā wa᷅ wānāā yōŋgā le̍.

⁹Ā yɔ᷄ŋ bɛ̍ɛ̍ mī wāŋnda̍ tōsa̍l nya̍ dɛ̍nɛ̍ wɔ̍ɔ̍ŋndo̍, lā mi̍ŋgūl nda̍ a̍ ī wɔ̄ɔ̍ŋ te̍. Kɛ̄lɛ̄ŋgāā, ā yɔ᷄ŋ bɛ̍ɛ̍ mī wāŋnda̍ ye̍i̍ nya̍, lā ye̍ī nda̍ sɔ̍ŋgɔ̍ ko̍ŋ te̍. Yɔ̄ŋi̍ nya̍ mīŋgu̍l nda̍ a̍ ō wɔ̄ɔ̍ŋ yɛ̍, lā dɔ̄u̍ nda̍ sa̍lā. Kāni̍ fu̍u̍le̍, le̍ he̍ī Mɛ̄lɛ̄ka̍ vēēlu̍ nya̍ le̍ wāa̍ wānāā ndɔ̄ ni̍. Ndu̍yɛ̍ tē lā tōsa̍ he̍ī pɛ̍, ō dɔ̄ū nya̍ sa̍lā.

¹⁰Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, “Wānā o̍ wāna̍ ye̍e̍ma̍ mbō dē yōōmōo̍ tɔ̄nɔ̄ pɛ̍, ndu̍yɛ̍ mbō yēēma̍ le̍ wāa̍ o̍ dɛ̍nɛ̍ kɛ̍ndɔ̄ɔ̍ ni᷄ŋ pɛ̍, mɛ̄ɛ̍ wānā wa̍ā le̍nde̍ ō su̍a̍ā dīōmndā wɔ̄ɔ̍ŋ a̍ chāāŋāā ndūāā wa᷅ŋndā chīe̍e̍ya̍ o̍kɔ̄ɔ̄ le̍, ndu̍yɛ̍ ō di̍mī lāchōōwā le̍.

¹¹Wānā wa̍ā le̍nde̍ ō ma᷄l yɔ᷅ŋ wɔ̄ɔ̍ŋndo̍ tōsāa̍, mbō tōsa̍ nyɛ̍ bɛ̍nda̍ wo̍. Wānā ko̍ŋ, ō kīndi̍ŋ kpi̍ŋ le̍ mī kɔ̄l nyūlōo̍ ō wa̍ nda̍ tɛ̍ɛ̄ŋ nda̍ chāāŋāā ndūāā wa᷅ŋndā chīe̍e̍ya̍.

¹²Kāni̍ fu̍u̍le̍, wānāa̍ cho̍ ha̍ā ma̍ wā sa̍kpō o̍ kēlālā ndāla̍ŋ ni᷄ŋ nda̍, māndāa̍ Māsānɔ̄ɔ̍ Mɛ̄lɛ̄ka̍ māndā nda̍ ni̍. Ndu̍yɛ̍ tē ā pīɛ̍i̍ ndu̍ pɛ̍, tūēīyɔ̄ɔ̍ o̍ tu̍ɛ̍ī pi̍ɛ̍īlē ndāle̍ŋ ni̍. Kɛ̍ wānāa̍ to̍sā dɛ̍nɛ̍ wɔ̍ɔ̍ŋndo̍ wa̍ nda̍ nda̍, sīmūllo̍ Māsānɔ̄ɔ̍ Mɛ̄lɛ̄ka̍ sīmūl nda̍ ni̍.”

¹³Tē ō wa̍ pɛ̍ mā wa̍ a̍ dīāllūŋ fūlāā le̍ sūɛ̍i̍ bɛ̍nda̍ ve̍ tōsāa̍ pɛ̍, ō nɛ̄ɛ̍nɛ̍ yɔ᷅ŋ yɛ̍ nu̍m nyɛ̄?

¹⁴Kɛ̍ ndu̍yɛ̍ tē ō wa̍ pɛ̍ mī wāŋnda̍ tōsa̍ mā sɔ̍la̍ nyɛ̄ pālāa̍ le̍ sūɛ̍i̍ bɛ̍nda̍ ve̍ tōsāa̍, mɛ̄ɛ̍ ā pɛ̄l tɔ̄nɔ̄ɔ̍. Le̍la̍ŋ, lā wo᷅ wānāa̍ to̍sā mī lā sɔ̄la̍ nyɛ̄ pālāa̍ wa̍ le̍, ndu̍yɛ̍ būūla᷄ŋ o̍ būūla᷄ŋ wa᷅ nya̍ le̍.

¹⁵Nyɛ̄ nya̍ nɔ̄ mī lā tōsa̍ wo̍, ndu̍ cho̍ ni̍ māā, lā chu̍a̍ Ki̍li̍ti̍ māā Māsānɔ̄ɔ̍ Mɛ̄lɛ̄ka̍ nyā, ndu̍yɛ̍ mī lā chu̍a̍ ndu̍ kpe̍e̍kpe̍i̍ māā wāna̍ tāse̍ o̍ kɔ̄ltā nyāla̍ŋ ni᷄ŋ. Ndu̍yɛ̍ tē wānā o̍ wānā nyu̍na̍ nya̍ a̍ tīīnda᷄ŋ nya̍ nɔ̄ o̍ Ki̍li̍tī ni̍ŋ ndo̍ o̍kɔ̄ɔ̄ pɛ̍, lā wa̍ a̍ bɛ̍ɛ̍ndīa̍ŋ te̍le̍ŋ o̍ te̍le̍ŋ le̍ nda̍ chɔ̄mndo̍.

¹⁶Kɛ̍ ndu̍yɛ̍ tē lā wa̍ wāŋnda̍ ndu̍ chɔ̄mndo̍ pɛ̍, lā dīmu̍l nda̍ nyɛ̄ kɛ̄ndɛ̍ī o̍ bɛ̄ɛ̄le̍ kɛ̍sīāā ni᷄ŋ. Kɔ̄ltā nyāla̍ŋ lā wa̍ nyɛ̍ kɛ̄ndɛ̄ wa̍la̍ŋ. Ko̍ŋ to̍sā tē wāŋnda̍ dīmi̍ sɔ̄ɔ̍ŋ wɔ̍ɔ̍ŋndo̍ŋ, a̍ nya̍ o̍kɔ̄ɔ̄ le̍ sɔ̄ɔ̍ŋ kɛ̍ndɛ̄ŋ nya̍ chō tōsāa̍ māā bu̍ɛ̍i̍yāa̍ Ki̍li̍tī yɛ̍ pɛ̍, si̍ɔ̍mbu̍la̍ŋ lā bīī nda̍ le̍ nyɛ̄ nda̍ dīmī ko̍ŋ ndo̍.

¹⁷Kāni̍ fo̍ndōle̍, tē ō wa̍ pɛ̍ māā hɛ̄na᷄ŋ Mɛ̄lɛ̄ka̍a̍ i̍ cho̍ ni̍, māā lā sɔ̄la̍ nyɛ̍ pālāa̍, mɛ̄ɛ̍ ō nāŋ mī lā sɔ̄la̍ nyɛ̄ pālāa̍ le̍ sūɛ̍i̍ bɛ̍nda̍ ve̍ tōsāa̍, mbo̍ hīāū a̍ nyɛ̄ pālāa̍ sɔ̄lāa̍ le̍ sūɛ̍i̍ wɔ̍ɔ̍ŋnde̍ tōsāa̍.

¹⁸Kāni̍ fu̍u̍le̍, le̍ yɔ̄ŋndā wɔ̄ɔ̍ŋndā wāŋnda̍ tōsa̍ la̍ŋ Ki̍li̍tī vi᷅ ni̍. Lē pīlɛ̍ o̍ vi᷅ ni̍. Ndu̍yɛ̍ pīɔ̍m le̍ pi᷅lɛ̍ kōŋ chō lētūu̍. Mi̍ wāna̍ to̍sa̍ yɔ᷅ŋ wɔ̄ɔ̍ŋ te̍ wo̍ wū, sɔ̍ŋgɔ̍ wānāā yɔ̄ŋ wɔ̄ɔ̍ŋnda̍. Ki̍li̍tī vi᷅ le̍ mbō bɛ̄ɛ̄ndi̍a̍a̍ na̍a̍ tɛ̄ɛ̄ŋ na̍a̍ Mɛ̄lɛ̄ka̍ wa̍ā. Bōōndi̍i̍ wāŋnda̍ dīī ndu̍ ve̍, ō wa̍ o̍ īwāna̍ chi̍e̍e̍ya̍. Kɛ̍ mīŋgī Mɛ̄lɛ̄ka̍ mīŋgi̍ ndu̍ yōōmū wo̍, o̍ īnyi̍nāya̍ o̍ cho̍ ni̍.

¹⁹Ndu̍yɛ̍ mbo̍ kūā o̍ īnyi̍nāya̍ nāa̍ wānāa̍ vi᷅ wa̍ nyi̍nāā ndāa̍ chō o̍ bīyɔ̄ɔ̍ ni᷄ŋ nda̍, mbo̍ kɔ̍ di̍mūl nda̍ yōōŋgū kɛ̄ndɔ̄ɔ̍.

²⁰Wānāa̍ kɛ̍ɛ̍ lɔ̍ɔ̍ ko̍ŋ le̍ nyɛ̄ Mɛ̄lɛ̄ka̍ dīmi̍ wo̍ tōsāa̍ bōōndi̍i̍ Nu̍u̍wā wa̍ dɛ̄ndɛ̍ bɛ̍ndōo̍ tōōsīa̍a̍ ve̍ wa̍, nyi̍nāā ndāa̍ wa̍ ka̍ŋ ni̍. A̍ bōōndi̍i̍ Nu̍u̍wā wa̍ dɛ̄ndɛ̍ ndɔ̄ɔ̍ tōōsīa̍a̍ ve̍, mi̍ Mɛ̄lɛ̄ka̍ hīāū lāchī a̍ wāŋnda̍ ha̍ā bīūwɔ᷄ŋndo̍. A̍ bōōndi̍i̍ ke̍ŋ wāŋnda̍ nyɛ̄ pɔ̄mbɔ̄ ko̍ni̍ a̍ lu̍ɛ̍ī o̍ dɛ̄ndɔ̄ɔ̍ ni᷄ŋ ni̍, wānāā ŋɔ̄ma̍a̍ kpe̍, mi̍ Mɛ̄lɛ̄ka̍ pīŋī nda̍ a̍ mɛ̄ŋnda̍ŋ.

²¹Tē ō wa̍ māā yɔ̄ŋɔ̄ɔ̄ pɛ̍, mɛ̄ŋmā yu̍ŋgu̍ Nu̍u̍wāā wo̍ sɔ̄la̍ pīŋīo̍o̍ a̍ ma̍ŋ nda̍ŋ, vēla᷅ŋ ndɔ̄ɔ̍ cho̍ yīŋɔ̄ɔ̍ ni̍. Ndu̍yɛ̍ pɛ̄ŋgo̍o̍ ho̍ō, a̍ yīŋɔ̄ɔ̍ nya̍ sɔ̄lā pi̍o̍ŋɔ̄ɔ̍ ni̍. Yīŋɔ̄ɔ̍ ho̍ō ndu̍ ndu̍ cho̍ le̍ nɔ̍ɔ̍ fa̍ŋa᷄ŋ le̍kɔ̍ɔ̍ le̍. Ō chō māchūāā pīɛ̄īle̍ŋ le̍ mī Mɛ̄lɛ̄ka̍ pūlū kɔ̄ltā nyāla̍ŋ mī lā dēndū fo̍. Ndu̍yɛ̍ yīŋɔ̄ɔ̍ ho̍ō, ō pīŋī nya̍ māpīŋīāā sa̍na̍a̍ a̍ mīīŋgū Chi̍i̍sū Ki̍li̍tī mi̍i̍ŋgu̍ yōōmū wo̍.

²²Mɛ̄ɛ̍ Chi̍i̍sū mi̍i̍ŋgu̍ yōōmū mbo̍ hēl o̍ Ɛ̄chɛ̍nɛ̄ mbo̍ kɔ̍ wa᷅ o̍ fo̍ndāŋ lēbɛ̄ɛ̄ bɛ̄ndōo̍ o̍ bā kɛ̄ndɛ̍ Mɛ̄lɛ̄ka̍a̍ chōo̍. Lo̍ŋ o̍ cho̍ ni̍ mi̍ ki̍i̍la̍a̍ Mɛ̄lɛ̄ka̍a̍ kpo̍u̍, a̍ nyi̍nāā yɛ̍ yi̍a̍a̍ cho̍ o̍ ha̍la̍, ma̍ wā māā lāmāsā, ndu̍yɛ̍, ma̍ nɔ̄ kpāāyāla̍ŋ nda̍, ma̍ wā ndu̍ o̍ bā bɛ̄ŋgu̍.