Read Southern Kisi Pītɛ̍ Tāso̍o̍ 4 Bible Online

Pītɛ̍ Tāso̍o̍ 4 - Southern Kisi bible

Pītɛ̍ Tāso̍o̍ 4

¹Mɛ̄ɛ̍ Ki̍li̍tī sɔ̍la̍ nyɛ̄ nɛ̄īyāa̍ a̍ bōōndi̍i̍ o̍ wa̍ chi̍e̍ēŋ na̍nu᷄ŋ nde̍ yɛ̍, nya̍ bɛ̍ɛ̍ lā nɔ̄ mī lā wa̍ ā bɛ̄ɛ̄ndīa̍ŋ le̍ nyɛ̄ nɛ̄īyāa̍ sɔ̄lāa̍ le̍nde̍. Kāni̍ fu̍u̍le̍, wānā o̍ wāna̍ sɔ̍la̍ ni᷅ŋ nyɛ̄ nɛ̄īyāa̍ pɛ̍, ō wo̍ū lɛ̍ bā o̍ yɔ̄ŋ wɔ̄ɔ̍ŋ ni᷄ŋ te̍.

²Le̍la̍ŋ, wānā wa̍ā le̍nde̍ ndu̍ ndu̍, ō hi̍ū lɛ̍ lāchī a̍ sɔ̄ɔ̍ŋ yēēma̍ŋ wɔ̍ɔ̍ŋ ŋ̄wāna̍ chi̍e̍e̍ya̍ŋ ŋ̄ dīmūl ndu̍ wo̍ŋ tōsāa̍ le̍. Kɛ̍ sɔ̄ɔ̍ŋ Mɛ̄lɛ̄ka̍ hɛ̄nāŋ ndu̍ le̍ tōsāa̍ wo̍ŋ, mu̍ŋ o̍ hi̍a̍ū ni᷅ŋ lāchī a̍ tōsāa̍ ni̍, mbō kūɛ̄ ha̍a̍a̍ a̍ bōōndi̍i̍ o̍ cho̍ chi̍e̍ēŋ na̍nu᷄ŋ nde̍.

³Sɔ̄ɔ̍ŋ wānāa̍ tu̍i̍ī Mɛ̍lɛ̄ka̍ dīōm te̍ wa̍ ā hɛ̄na̍ŋ to̍sāa̍ wo̍ŋ, mu̍ŋ ko̍ni̍ nya̍ wa̍ tōsāa̍ ni̍. Ndu̍yɛ̍ lā tōsa̍ ni᷅ŋ mu̍ŋ te̍i̍. Mu̍ŋ cho̍ yɛ̄ mu᷅ŋ ni̍, nīīlūlā nɔ̄ɔ̄lɛ̍i̍la̍ŋ, a̍ kɔ̄l lānda᷄ŋ bɛ̍ndōo̍ o̍ sūɛ̍i̍ wānā la̍nɔ̍ɔ̍ kɛ̄lɛ̄ŋgāā sūɛ̍i̍ wānā pɔ̍nɔ̍ɔ̍, a̍ wāa̍ o̍ kūūlīāālā māmūɛ̄īla̍ŋ chōo̍, a̍ sɔ̍ɔ̍ŋ lāsi̍ɔ̍mbo̍ŋ tōsāa̍, a̍ nyɛ̄m chēle̍ŋndo̍ŋ sōōlūūwo̍, sūɛ̍i̍ wāna̍ chi̍e̍e̍ nɔ̍ mbō tōsa̍ le̍ ve̍.

⁴O̍ ko̍ŋ kɔ̍ɔ̍lī, tē wānāa̍ tu̍i̍ī Mɛ̍lɛ̄ka̍ dīōm te̍ wa̍ ā chē pɛ̍ māā, lā cho̍ nda̍ sɔ̄ɔ̄ŋgūū chōo̍ le̍ sɔ̄ɔ̍ŋ yēēma̍ŋ wɔ̍ɔ̍ŋ ŋ̄wāna̍ chi̍e̍e̍ya̍ mu᷅ŋ tōsāa̍ kpo̍so̍ŋ te̍, kɔ̄ndɔ̄fi̍llo̍ bīī nda̍, o̍ ko̍ŋ kɔ̍ɔ̍lī, ā sāa̍ dɔ̍ɔ̍ sɔ̄ɔ̍ŋ lāchōōwa᷄ŋ dīmīo̍o̍ a̍ nya̍ o̍kɔ̄ɔ̄, māā lā chō wānāā wɔ̄ɔ̍ŋ.

⁵Kɛ̍ ndu̍yɛ̍, ke̍ŋ cho̍ nda̍ lāchī o̍ Mɛ̄lɛ̄ka̍ lo̍, o̍ cho̍ hūnɔ̄ɔ̄ su̍ŋ kɔ̍ɔ̍sɔ̍ a̍ wānā o̍ wānā wo̍, wānāa̍ cho̍ yōōmū wa̍ ni̍, a̍ wānāa̍ vi᷅ ni᷅ŋ bɛ̍ɛ̍ wa̍.

⁶Wānāa̍ vi᷅ ha̍ā wa̍, mi̍ Mɛ̄lɛ̄ka̍ kɔ̄ɔ̄sā a̍ nda̍ bōōndi̍i̍ nda̍ wa̍ yōōmū o̍ chi̍e̍ēŋndo̍ ni᷄ŋ nde̍, mɛ̄ɛ̍ o̍ kɔ̍ɔ̍sā a̍ wāŋnda̍ kpo̍u̍ yɛ̍. Kɛ̍, mɛ̄ɛ̍ nda̍ vī, nda̍ bɛ̍ɛ̍ mi̍ Ki̍li̍tī di̍mūl nda̍ yōōŋgū kɛ̄ndɔ̄ɔ̍, le̍ mī nyi̍nāā ndāa̍ ā wa̍ yōōmū mɛ̄ɛ̍ Mɛ̄lɛ̄ka̍ hɛ̄na̍ŋ yɛ̍.

⁷Mɛ̄ɛ̄lu̍la̍ chi̍e̍ēŋndo̍ ho̍ō lā cho̍ lɛ̍ lēvīl te̍. Le̍la̍ŋ, lā mānda̍ nya̍ pi̍la̍ a̍ mɛ̄ɛ̍ ka̍ālā nyāla̍ŋ lā nɔ̄ mī lā wa̍ yɛ̍, ndu̍yɛ̍ mī lā wa̍ ā bɛ̄ɛ̄ndīa̍ŋ. Ko̍ŋ to̍sā mī lā nɔ̄la̍ le̍ Mɛ̄lɛ̄ka̍ pīɛ̄īyo̍ nyɛ̄ kɛ̄ndɛ̍ī.

⁸Kɛ̍ ndu̍yɛ̍ sūɛ̍i̍ cho̍ sūɛ̍i̍ le̍bo̍lle̍ kpo̍u̍ ve̍, ndi̍ cho̍ ni̍ māā lā kāāli̍āŋ ve᷅llāa̍ vēllē a̍ kɔ̄l kpo̍u̍. Kāni̍ fu̍u̍le̍, tē lā kāāli̍āŋ pɛ̍, lā nɔ̄lā le̍ te̍le̍ŋ o̍ te̍le̍ŋ mī lā ma᷄l chāāŋāā nyāa̍ le̍ sɔ̄ɔ̍ŋ wɔ̍ɔ̍ŋ nda̍ tōsa̍l nya̍ wo̍ŋ.

⁹O̍ ko̍ŋ kɔ̍ɔ̍lī, chīɛ̄īlā nyāla̍ŋ lā wa̍ la̍ ku̍mbīa̍ŋ lɔ̍ɔ̍ lɔ̍ɔ̍ le̍ chāāŋāā nyāā wa̍nāā lāāla᷄ŋnda̍. Ndu̍yɛ̍ lā to̍sā ndi̍ a̍ ŋɔ̄ɔ̄chīa̍ŋ te̍.

¹⁰Mɛ̄lɛ̄ka̍ tōsa̍l nya̍ pi̍lɛ̍ŋ pi̍lɛ̍ŋnda̍ kɛ̄ndɛ̄i̍ ndūɛ̍i̍ le̍ mī lā nɔ̄la̍ mī lā tōsa̍ wa̍lta̍ yɛ̍ yɛ̍la̍ŋ. Le̍la̍ŋ, lā wa̍ wa̍nāā wa̍li̍a̍a̍ kɛ̍ndɛ̄ ndu̍yɛ̍ mī wa̍lta̍ nya̍ tōsā la̍ŋ lā wa̍ le̍ wāŋnda̍ mālāa̍.

¹¹Wāna̍ cho̍ ho̍ō mi̍ Mɛ̄lɛ̄ka̍ kē ndu̍ kpāāyāa̍ le̍ wāŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ dīmūllo̍ wo̍, wānā ko̍ŋ ō dīmu̍l nda̍ ndu̍ māā Mɛ̄lɛ̄ka̍ dīōm ndɔ̄ɔ̍ ni̍. Ndu̍yɛ̍ wāna̍ Mɛ̄lɛ̄ka̍ ke̍ ho̍ō kpāāyāa̍ le̍ wāŋnda̍ mālāa̍ wo̍, wānā ko̍ŋ ō māla̍ nda̍ a̍ kpāāya̍ Mɛ̄lɛ̄ka̍ ō kē ndu̍ wo̍. Nyɛ̄ o̍ nyɛ̄ nya̍ wa̍ to̍sā, lā tōsa̍ ndu̍ le̍ mī wāŋnda̍ ā yɔ̄ŋgu̍ sāŋgālāa̍ o̍ Mɛ̄lɛ̄ka̍ lo̍, sa̍na̍a̍ o̍ sa̍bu̍ Chi̍i̍sū Ki̍li̍tīo̍o̍ ni᷄ŋ. Ndu̍ nɔ̍ mbō sɔ̄la̍ līsāa̍ ni̍, ndu̍yɛ̍ ndu̍ nɔ̍ mbō wa̍ māsāa̍ le̍ fɛ̍ɛ̍ŋ a̍ fɛ̍ɛ̍ŋ ni̍. Āmi̍i̍nā.

¹²Chāāŋāā nīāā ka̍a̍lāa̍, kɔ̄ndɔ̄fi̍li̍ bi̍ī nya̍ le̍ nyɛ̄ pālāā bɛ̄ndu̍ cho̍ ho̍ō nya̍ chōo̍ wo̍ le̍. Lā ke̍e̍lā kɔ̄l mī lā dīmi̍ āā, “Vɛ᷅ mi̍ sɔ̄ɔ̍ŋ wa̍ā nu̍a̍ā ŋ̄ wā na̍a̍ yɔ̄nɔ᷄ŋndo̍,” le̍. Sɔ̄ɔ̍ŋ mu᷅ŋ ki̍nɛ̍i̍, ŋ̄ chō māchūāā le̍ sīnāa̍ tē lā nɔ̄ tīīnda᷄ŋndo̍ o̍ Mɛ̄lɛ̄ka̍ ni᷄ŋ le̍kɛ̍ndɛ̍ī pɛ̍.

¹³Lā nɔ̄ mānūāā mī lā wa̍ a̍ kɔ̄l kɛ̄ndɛ̄, le̍ mɛ̄ɛ̍ nya̍ chō nyɛ̄ pālāa̍ sɔ̄lāa̍ mɛ̄ɛ̍ Ki̍li̍tī sɔ̍la̍ nyɛ̄ pālāa̍ yɛ̍. O̍ he̍ī ni᷄ŋ, tē ō hu᷄ŋ mi̍i̍ŋgū na̍nu᷄ŋ mī wāŋnda̍ chē nāŋɔ̄ɔ̄ ndɔ̄ bɛ̍ndōo̍ pɛ̍, kɔ̄l kɛ̄ndɛ̄ nya̍ sɔ̄lā ni̍ŋ ndo̍ ō wā ni̍ŋ o̍ bɔ̍ɔ̍ bɔ̍ɔ̍.

¹⁴Le̍la̍ŋ, tē ō wa̍ pɛ̍ mī wāŋnda̍ yīo̍u̍ nya̍ le̍ mɛ̄ɛ̍ nya̍ chō wānāa̍ Ki̍li̍tīa̍a̍ yɛ̍ pɛ̍, mɛ̄ɛ̍ lā pɛ̄l tɔ̄nɔ̄ɔ̍. Kāni̍ fu̍u̍le̍, Mɛ̄lɛ̄ka̍ Nyi̍nā ndɔ̍ cho̍ o̍ nāŋɔ̄ɔ̄ bɛ̄ndōo̍ ni᷄ŋ ndo̍ chō nya̍ kɔ̄ɔ̄lī.

¹⁵Tē wāŋnda̍ ā tūsi̍ nya̍ nyɛ̄ pālāa̍ chōo̍ pɛ̍, ō wa᷅ le̍ sūɛ̍i̍ di̍yāā wāna̍ chi̍e̍e̍, kɛ̄lɛ̄ŋgāā le̍ lēvīī yɔ̄ŋ, kɛ̄lɛ̄ŋgāā le̍ sōndōo̍ wōūwo̍ o̍ sūɛ̍i̍ pi̍la̍ ni᷄ŋ, kɛ̄lɛ̄ŋgāā le̍ sɔ̄ɔ̍ŋ dɛ̍nɛ̍ wɔ̍ɔ̍ŋ chēle̍ŋ te̍.

¹⁶Kɛ̍ ndu̍yɛ̍ tē wāŋnda̍ tūsi̍ nya̍ nyɛ̄ pālāa̍ chōo̍ le̍ mɛ̄ɛ̍ nya̍ nɔ̄ tīīnda᷄ŋndo̍ o̍ Ki̍li̍tī ni̍ŋ yɛ̍ pɛ̍, mɛ̄ɛ̍ si̍ɔ̍mbu̍la̍ bi̍ī nya̍ le̍ ke̍ŋ te̍. Lā nɔ̄ mī lā me᷄l Mɛ̄lɛ̄ka̍ ba̍li̍ka̍ le̍ wāŋnda̍ nya̍ vēēlōo̍ āā, Ki̍li̍sīɔ̄ŋnda̍.

¹⁷Te̍le̍ŋ Mɛ̄lɛ̄ka̍ chō kɔ̍ɔ̍sɔ̍ a̍ wāŋnda̍ wo̍ ō fūūlu̍u̍. A̍ wānāā ndūa̍a̍ fɛ̍lɛ̍ŋ o̍ cho̍ kāndɔ̄ɔ̄. Ndu̍yɛ̍ tē ō wa̍ pɛ̍ mī kɔ̍ɔ̍sɔ̍ɔ̍ kāndu̍ŋ o̍ wānāā ndūa̍a̍ lo̍, mɛ̄ɛ̍ vɛ̄ɛ̍nɛ̍ i̍ wa᷅ yɛ̍ ni̍ŋ a̍ wānāa̍ kɛ̍ɛ̍ le̍ nyɛ̄ Yōōŋgū Kɛ̄ndɛ̍ Mɛ̄lɛ̄ka̍a̍ ō dīmi̍ wo̍ tōsāa̍ wa̍?

¹⁸Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, “Nāa̍ i̍ cho̍ wɔ̄ ī kālā le̍ wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍ mā sɔ̄la̍ pīōŋɔ̄ɔ̍, vɛ̄ɛ̍nɛ̍ i̍ wa᷅ yɛ̍ ni̍ŋ a̍ wānāā yɔ̄ŋ wɔ̄ɔ̍ŋnda̍, a̍ wānāa̍ kɛ̍ɛ̍ le̍ nyɛ̄ Mɛ̄lɛ̄ka̍ dīmi̍ wo̍ tōsāa̍ wa̍?”

¹⁹Le̍la̍ŋ, nya̍ wāŋnda̍ hāndū nyɛ̍ pālāa̍ chōo̍, kāni̍ fo̍ndōle̍, māā hɛ̄na᷄ŋ Mɛ̄lɛ̄ka̍a̍ cho̍ ko̍ŋ ni̍ wa̍, lā nɔ̄ mī lā hīōū la̍chi̍ a̍ sɔ̄ɔ̍ŋ bɛ̍nda̍ wo̍ŋ tōsāa̍. Ndu̍yɛ̍ lā yɔ̄ŋgu̍ŋ Mɛ̍lɛ̄ka̍ o̍ bā bɛ̄ŋgu̍ o̍ to̍o̍si̍a̍a̍ nya̍ wo̍. Ō chō wāna̍ lo̍ o̍ lēdīōm.